Komina ñʋndɩnaa mulum lakasɩ kɛ kaɖɛ nɖɩ ɖɩwɛ ɛjaɖɛ kpeekpe yɔɔ yɔ nɛ ɖɩkɔŋnɩ ɛyaa kala sɔsɔna siŋŋ. a Kɩɖaʋ nakʋyʋ yɔ: COVID-19 kʋdɔŋ alɩwaatʋ taa, pakʋ kominawaa sakɩyɛ kaɖɩsɩ tɔm se liidiye nɖɩ pɩɩwɛɛ se pakpaɣ nɛ pasɩnɩnɩ ɛyaa nɛ palʋbɩnɩ COVID-19 kʋdɔŋ yɔ, pakpaɣ-ɖɩ nɛ pasɩɩ pa-tɩ nɛ papɩsɩ ñɩm tɩnaa. Mulum lakasɩ nzɩ, siyeba nɛ patɩpɩzɩ nɛ pawaa ɛyaa ɛzɩ pɩpɔzʋʋ yɔ nɛ piyeba nɛ ɛyaa la kʋñɔŋ siŋŋ nɛ sakɩyɛ sɩ ɖɔɖɔ.

 Kominawaa mulum lakasɩ kɔŋnɩ kala wena yɔ aɖɔ siŋŋ. Rʋwayom-unii komina ñʋʋdʋ kɩbɩnʋ weyi payaɣ se David Cameron yɔ ɛyɔɔdaa se «mulum lakasɩ kɛ wɛtʋ ndʋ tɩwɛ ajɛɛ tɩŋa taa yɔ.»

 Paa mbʋ yɔ, ɖa-taa pɩzɩɣ nɛ pɩtɛ se pɩkazɩ pazɩ lɛ, kominawaa mulum lakasɩ kpeekpe kaɣ sɩʋ tɩnaɣ. Ɛbɛ yɔɔ? Na mbʋ Bibl yɔɔdʋʋ se Ɛsɔ kaɣ labʋ yɔ.

 Tɔm tʋnɛ Ɛsɔ yɔɔdɩ Bibl taa: «Ma Yehowa, mɔnsɔɔlɩ siɣsiɣ wɛtʋ; manpaɖɩɣ mɩlɩm nɛ mbʋ pɩfɛyɩ siɣsiɣ yɔ.» b (Izaayii 61:8) Alɩwaatʋ ndʋ ɛyaa lalaa mulum lakasɩ yeki nɛ ɛyaa tɔkɩ kʋñɔŋ yɔ, Ɛsɔ naɣ. (Aduwa 14:31) Ɛlabɩ tamaɣ se: «Panazɩɣ mba pɛwɛ kʋñɔŋ taa yɔ, . . . pʋyɔɔ lɛ, mankaɣ kʋyʋʋ nɛ mala nabʋyʋ.»—Keɣa 12:5.

 Ɛsɔ kaɣ labʋ? Ɛɛkaɣ labʋ lɛɣzʋʋ kominawaa mba pɛtɛm wɛʋ yɔ pa-taa nabɛyɛ nɛ lalaa, ɛlɛ ɛkaɣ lɛɣzʋʋ po-lone taa ɛ-maɣmaɣ ɛ-tɛ komina ŋgʋ kɩwɛ ɛsɔdaa yɔ, ŋgʋ payaɣ se «Ɛsɔ Kewiyaɣ.» (Maarɩkɩ 1:14, 15; Maatiyee 6:10) Bibl yɔɔdʋʋ se: «Ɛsɔdaa Ɛsɔ kaɣ sɩʋ kewiyaɣ nakɛyɛ. . . . Kakaɣ yɔkʋʋ kewiyisi lɛɛsɩ tɩŋa nɛ kaɖɩzɩ-sɩ, nɛ ke-ɖeke kakaɣnɩ wɛʋ tam.» (Danɩyɛɛlɩ 2:44) Nʋmɔʋ ŋgʋ kɩ-yɔɔ Ɛsɔ kaɣ tɩŋnʋʋ nɛ ɛsɩnzɩ mulum lakasɩ nzɩ payɩ ɖɩnaɣ sɔnɔ yɔ.

 Ɛzɩma ɖɩlaba nɛ ɖɩna se mulum lakasɩ ɩɩkaɣ wɛʋ Ɛsɔ Kewiyaɣ komina taa kpa? Iyele nɛ ɖɩna lɩmaɣza anɛ:

1.  1. Ðoŋ. Ɛsɔ Ðoŋ Tɩŋa Tʋ cɔlɔ Kewiyaɣ ŋga ko-ɖoŋ lɩɣna.—Natʋ 11:15.

    Tʋkaɣ ŋga kɛwɛɛ yɔ: Pɩsa nɛ ɛyaa kominawaa la pa-tʋma lɛ, pa-ajɛɛ taa mba liidiye pataɣ liu. Piyeki nɛ ɖoŋ ɖoŋ lɛ pehikiɣ wala nɛ pamʋʋ mulum kʋjɔŋ ɛyaa cɔlɔ, pamɩlɩɣ nɛ pepeɣziɣ ɛyaa. Ɛlɛ Ɛsɔ Kewiyaɣ hɔɔlʋʋ taa lɛ, Ɛsɔ Ðoŋ Tɩŋa Tʋ ɖʋʋnɩ-kɛ nesi, ye mbʋ paa ɛzɩmtaa lɛ, ɛkaɣ pɩzʋʋ nɛ ɛcɔnɩ mba pɔ-yɔɔ kɔtɔkɩ kewiyitu yɔ pa-kɩcɛyɩm ɖeɖe.—Keɣa 145:16.

2.  2. Wiyaʋ. Ɛsɔ lɩzɩ Yesu Krɩstʋ se ɛkɛ Kewiyaɣ ŋga ke-Wiyaʋ.—Danɩyɛɛlɩ 7:13, 14.

    Tʋkaɣ ŋga kɛwɛɛ yɔ: Halɩ ñʋndɩnaa mba pakpaɖɩ ɖeu yɔ, nɔɔyʋ pɩzɩɣ nɛ ɛwɛɛnɩ ɖoŋ kɩdɛkɛdɩŋ pɔ-yɔɔ. (Eklezɩyasɩtɩ 7:20) Ɛlɛ Yesu ñɛwɛ ndɩ, ɛwɩlaa se paapɩzɩɣ nɛ pepeɣzi-i nɛ mulum kʋjɔʋ. (Maatiyee 4:8-11) Pɩtasɩ lɛ, paa ɛzɩmtaa ɛwɩlɩɣ se mbʋ payɩ ɛlakɩ mba eɖiyiɣ yɔ, sɔɔlɩm siɣsiɣ ñɩmbʋ seɣtiɣni-i nɛ ɛlakɩ-wɛ pʋ nɛ ɛsɔɔlɩ siŋŋ se piɖeni-wɛ.—Keɣa 72:12-14.

3.  3. Paɣtʋ. Ɛsɔ Kewiyaɣ paɣtʋ talɩ pilim nɛ halɩ tɩhɛzɩɣ ɛyʋ laŋɩyɛ.—Keɣa 19:7, 8.

    Tʋkaɣ ŋga kɛwɛɛ yɔ: Ðoŋ ɖoŋ lɛ, paɣtʋ ndʋ ɛyaa ɖʋʋ yɔ tɩwɛ kaɖɛ, tɩkɛ sʋʋtʋ nɛ paalakɩnɩ-tʋ tʋmɩyɛ camɩyɛ, piyeki nɛ mulum lakasɩ wɛɣ. Ɛlɛ Ɛsɔ paɣtʋ ñɛwɛ kɛlɛʋ nɛ tɩwazɩɣ. (Izaayii 48:17, 18) Pɩtasɩ lɛ, paɣtʋ ndʋ, pɩtɩkɛ lakasɩ ɖeke titukuuna ɛlɛ titukuuni ɖɔɖɔ mbʋ piseɣtiɣ ɛyʋ nɛ ɛlakɩ nabʋyʋ yɔ. (Maatiyee 22:37, 39) Toovenim taa lɛ, Ɛsɔ pɩzɩɣ nɛ ɛna mbʋ pɩwɛ ɛyaa laŋa taa yɔ nɛ pʋyɔɔ lɛ ɛnɩɣ pe-siziŋ alɩwaatʋ ndʋ ɛsɩɣnɩ-wɛ se pɔɖɔ paɣtʋ ndʋ tɩ-yɔɔ yɔ.—Yereemii 17:10.

 Ðiseɣtiɣ-ŋ se ŋkpɛlɩkɩ nɛ ŋtɩlɩ Bibl taa tamaɣ ŋga kɔyɔɔdʋʋ cee wayɩ komina ŋgʋ kɩ-taa mulum lakasɩ ɩɩkaɣ wɛʋ yɔ kɔ-tɔm nɛ pɩkɩlɩ.

•   Kalɩ tɔm ñʋʋ «Le Royaume de Dieu: un gouvernement sans corruption» nɛ ŋna lɩmaɣza 3 lɛɛna wena a-yɔɔ mulum lakasɩ ɩɩkaɣ wɛʋ Ɛsɔ Kewiyaɣ taa kpa yɔ.

•   Cɔnɩ video Ɛbɛ Ɛsɔ Kewiyaɣ kɛnaa? nɛ ŋtɩlɩ Ɛsɔ Kewiyaɣ yɔɔ tɔm nɛ mbʋ kakaɣ labʋ tɛtʋ yɔɔ yɔ pɩ-yɔɔ tɔm nɛ pɩkpaɖɩ.

•   Tisi nɛ ɖɩkpɛlɩkɩnɩ-ŋ Bibl falaa nɛ ŋna mbʋ ŋpɩzɩɣ ŋla nɛ tamasɩ nzɩ sɩwɛ Bibl taa yɔ sɩwazɩ-ŋ yɔ.