Ɛsɔ paɣtʋ tigiɖe lɛ paɣtʋ kila. Ɛsɔ paɣtʋ kila kɛnɩ toovenim tɔm kɩcɛyɩtʋ ndʋ tɩwɛ Bibl taa yɔ. Asɩɣnɩ-ɖʋ se ɖɩtɩlɩ lɩmaɣza wena Ɛsɔ wɛnɩ hɔɔlɩŋ ndɩ ndɩ taa yɔ. Asɩɣnɩ-ɖʋ ɖɔɖɔ se ɖɩkpaɣ lɩmaɣza kɩbana ɖe-wezuu caɣʋ taa nɛ ɖɩla mbʋ pɩtʋʋzaa yɔ. Asɩɣnɩ-ɖʋ kɔzɩ kɔzɩ hɔɔlɩŋ weyi ɩ-taa Ɛsɔ tɩɖʋ paɣtʋ natʋyʋ kpayɩ yɔ.

▸ Ñʋʋ 1, tayʋʋ 8

Ye pɔtɔma ɖɩña Yehowa yɔ, pʋ-tɔbʋʋ lɛ se ɖitisi faaa nɛ ɖɩla ɛ-sɔɔlɩm. Yehowa sɔɔlaa se sɔɔlɩm etuyini-ɖʋ nɛ ɖɩñamɩ-ɩ. (1 Yohanɛɛsɩ 5:3) Ye ɖɩsɔɔlɩ Ɛsɔ nɛ ɖɩtaɣ-ɩ liu yɔ, paa ɛbɛ taa ɖɩwɛɛ yɔ, ɖɩɖɔŋ ɛ-lɔŋ tasʋʋ yɔɔ. Ðɩñaŋɩ-ɩ pɩkpɛndɩnɩ alɩwaatʋ ndʋ tɩ-taa pɩwɛ-ɖʋ kaɖɛ yɔ. Ye ɖɩñaŋ Yehowa yɔ, ɖa-maɣmaɣ pɩwazɩɣ mbʋ pʋyɔɔ yɔ, ɛwɩlɩɣ-ɖʋ ɛzɩma ɖɩcaɣ wezuu nɛ piɖeni-ɖʋ yɔ. Pɩtasɩ lɛ, ɛlabɩ-ɖʋ tamaɣ se ɖɩkaɣ hiɣu wazasɩ sakɩyɛ cee wayɩ.​—Izaayii 48:17.

▸ Ñʋʋ 1, tayʋʋ 10

Yehowa ha paa ɛyʋ weyi lɛ, tɩ-yɔɔ wɛʋ lɩzʋʋ waɖɛ, pʋ-tɔbʋʋ lɛ se ɛha waɖɛ paa ɛyʋ weyi se ɛsɛtɩ ɛ-tɩ tɔm. Ɛtɩlɩzɩ-ɖʋ ɛzɩ menziiniwaa yɔ. (Wayɩ Wayɩ Paɣtʋ 30:19; Yozuwee 24:15) Ðɩpɩzɩɣ ɖɩlabɩnɩ waɖɛ nɖɩ tʋmɩyɛ nɛ ɖɩkpaɣ lɩmaɣza kɩbana. Ɛlɛ ye ɖɩtɩtɩlɩ labʋ yɔ, ɖɩpɩzɩɣ ɖɩkpaɣ lɩmaɣza wena atɩtʋʋzɩ yɔ. Ðɩwɛnɩ tɩ-yɔɔ wɛʋ lɩzʋʋ waɖɛ, pʋyɔɔ lɛ ɖa pɩwɛɛ se ɖɩlɩzɩ se ɖɩsɔɔlʋʋ Yehowa nɛ ɖɩla mbʋ pɩkɛdɩɣnɩ-ɩ yɔ.

▸ Ñʋʋ 1, tayʋʋ 12

Yehowa ha-ɖʋ paɣtʋ se tiɖiyi-ɖʋ ɖe-wezuu caɣʋ taa. Ðɩpɩzɩɣ ɖɩkpɛlɩkɩ paɣtʋ ndʋ Bibl taa, nɛ ɖɩna ɛzɩma tɩpɩzɩɣ tɩsɩnɩ-ɖʋ nɛ ɖɩcaɣ wezuu kɩbaŋʋ yɔ. (Aduwa 6:16-19; 1 Kɔrɛntɩ 6:9-11) Paɣtʋ ndʋ tɩsɩɣnɩ-ɖʋ se  ɖɩtɩlɩ mbʋ pɩwɛ ɖeu nɛ mbʋ pɩfɛyɩ ɖeu Ɛsɔ ɛsɩndaa yɔ. Tɩsɩɣnɩ-ɖʋ ɖɔɖɔ se ɖɩtɩlɩ ɛzɩma ɖɩlɩzɩ sɔɔlɩm ɖɩwɩlɩ, ɛzɩma ɖɩkpaɣ lɩmaɣza kɩbana nɛ ɛzɩma ɖɩla lalaa kɩbandʋ yɔ. Pɩkɛ toovenim se ɛjaɖɛ wɛɛ nɛ ɖɩwɛɛkɩɣ kpem, ɛlɛ Yehowa paɣtʋ tɩlɛɣzɩ. (Wayɩ Wayɩ Paɣtʋ 32:4-6; Malakiya 3:6) Yehowa paɣtʋ kandɩyɩɣ ɖɔ-yɔɔ se ɖɩtaanɩɩ wɩzasɩ tomnaɣ yɔɔ nɛ sɔɔlɩm wɩlʋʋ nʋmɔʋ taa.

▸ Ñʋʋ 1, tayʋʋ 17

Ðɛ-ɛhʋyɛ wɛ ɛzɩ tɔm hʋyʋ weyi ɛwɛ ɖa-taa nɛ ɛsɩɣnɩ-ɖʋ se ɖɩtɩlɩ kɩbam nɛ kɩdɛkɛdɩm yɔ. Yehowa ha ɖa-taa paa weyi lɛ ɛhʋyɛ. (Roma 2:14, 15) Pʋcɔ nɛ ɖɛ-ɛhʋyɛ la tʋmɩyɛ camɩyɛ lɛ, pɩpɔzʋʋ se ɖɩtɩŋnɩ Yehowa paɣtʋ yɔɔ nɛ ɖɩfalɩsɩ-ɖɩ. Ye ɖɩfalɩsɩ-ɖɩ camɩyɛ yɔ, ɖɩpɩzɩɣ ɖɩkpaɣ lɩmaɣza kɩbana wena akɛdɩɣnɩ Yehowa yɔ. (1 Pɩyɛɛrɩ 3:16) Ye ɖɩcaɣ kpaɣʋ lɩmaɣzɩyɛ kɩdɛkɛdɩyɛ naɖɩyɛ yɔ, ɖɛ-ɛhʋyɛ pɩzɩɣ ɖɩsɩnɩ-ɖʋ nɛ ɖɩna se lɩmaɣzɩyɛ nɖɩ ɖɩfɛyɩ ɖeu. Pɩtasɩ lɛ, ye ɖɩlabɩ mbʋ pɩfɛyɩ ɖeu yɔ, ɖɛ-ɛhʋyɛ yeki nɛ ɖɩnɩɩ siziŋ. Pɩpɩzɩɣ pɩcamɩ ɖɛ-ɛhʋyɛ, ɛlɛ Yehowa pɩzɩɣ nɛ ɛsɩnɩ-ɖʋ nɛ ɖɩcɛyɩsɩ-ɖɩ. Ɛhʋyɛ kɩbanɖɛ yeki se ɖɩwɛɛnɩ laŋhɛzɩyɛ nɛ ñamtʋ ɖa-maɣmaɣ ɖɔ-yɔɔ.

▸ Ñʋʋ 2, tayʋʋ 3

Ye pɔtɔma se ɖise Ɛsɔ sɔɔndʋ yɔ, pʋ-tɔbʋʋ lɛ se ɖɩsɔɔlɩ-ɩ, ɖɩñamɩ-ɩ nɛ ɖise mbʋ payɩ pɩɩkɛdɩɣnɩ-ɩ yɔ. Ɛsɔ sɔɔndʋ seu sɩɣnɩ-ɖʋ se ɖɩla kɩbam nɛ ɖise kɩdɛkɛdɩm. (Keɣa 110:10) Pɩsɩɣnɩ-ɖʋ ɖɔɖɔ se ɖiwelisi ndʋ payɩ Yehowa heyiɣ-ɖʋ yɔ camɩyɛ. Pɩtasɩ lɛ, ye ɖiseɣ Ɛsɔ sɔɔndʋ yɔ, ɖɩɖɔŋ ɖo-ɖuutu yɔɔ mbʋ pʋyɔɔ yɔ, ɖɩsɔɔlɩ-ɩ siŋŋ. Ye ɖiseɣ Ɛsɔ sɔɔndʋ yɔ, ɖɩwɛɣnɩ lɩmaɣza kɩbana, ɖɩlakɩ lalaa kɩbandʋ nɛ ɖɩkpakɩɣ ɖɔɖɔ lɩmaɣza camɩyɛ ɖe-wezuu caɣʋ taa.

▸ Ñʋʋ 2, tayʋʋ 9

Kpiɖuu tɔbʋʋ lɛ se ɛyʋ ɛnɩɩ wɩzasɩ siŋŋ kɩwɛɛkɩm mbʋ ɛlaba yɔ pɩ-yɔɔ. Mba pɔsɔɔlɩ Yehowa yɔ, ye panawa se pamanɩ ɛ-paɣtʋ natʋyʋ  yɔɔ yɔ, panɩɣ wɩzasɩ pɩdɩɩfɛyɩ. Ye ɖɩlabɩ kɩdɛkɛdɩm yɔ, pɩpɔzʋʋ se ɖitendi Yehowa se ɛtɩŋnɩ Yesu kɩlaʋ yɔɔ nɛ ekpeɣ-ɖʋ. (Maatiyee 26:28; 1 Yohanɛɛsɩ 2:1, 2) Ye ɖikpiɖi ɖa-kɩwɛɛkɩm yɔɔ toovenim nɛ ɖiyele pɩ-labʋ yɔ, ɖɩpɩzɩɣ ɖɩtaa liu se Yehowa kpeɣ-ɖʋ. Ye mbʋ, ye ɖikpiɖaa yɔ, pɩfɛyɩ se ɖɩtasɩ nɩɣzʋʋ mbʋ ɖɩlaba nɛ pɩɖɛɛ yɔ pɩ-yɔɔ. (Keɣa 102:10-14; 1 Yohanɛɛsɩ 1:9; 3:19-22) Pɩpɔzʋʋ se ɖɩñaɣ pana siŋŋ nɛ kɩwɛɛkɩm mbʋ ɖɩlaba nɛ pɩɖɛɛ yɔ pɩkpɛlɩkɩ-ɖʋ lɔŋ, ɖɩlɔ lɩmaɣza kɩdɛkɛda nɛ ɖe-wezuu caɣʋ la nɔɔ kʋɖʋmaɣ nɛ Yehowa paɣtʋ.

▸ Ñʋʋ 2, tayʋʋ 18

Ye nɔɔyʋ ɛlabɩ kɩwɛɛkɩm sɔsɔm nɛ ekizi se eekpiɖiɣ pɩ-yɔɔ yɔ, ɛɛtasɩɣ pɩzʋʋ nɛ ɛwɛɛ Krɩstʋ ɛgbɛyɛ taa. Pɩpɔzʋʋ se palɩzɩ-ɩ ɛgbɛyɛ taa. Ye palɩzɩ nɔɔyʋ ɛgbɛyɛ taa yɔ, pɩwɛɛ se ɖɩcɛ ɖa nɛ ɩ ɖa-taabalɩyɛ nɛ ɖiyebi-i yɔɔdɩnʋʋ. (1 Kɔrɛntɩ 5:11; 2 Yohanɛɛsɩ 9-11) Ðʋtʋ ndʋ palaba se palɩzɩ ɛyaa ɛgbɛyɛ taa yɔ, tɩñalɩɣ Yehowa hɩɖɛ yɔɔ, nɛ tɩkandɩyɩɣ ɖɔɖɔ ɛgbɛyɛ taa ñɩma lalaa yɔɔ. (1 Kɔrɛntɩ 5:6) Ðʋtʋ ndʋ tɩpɩzɩɣ tɩsɩnɩ ɖɔɖɔ weyi ɛlabɩ kɩwɛɛkɩm yɔ nɛ ɛna se pɩpɔzʋʋ se ɛlɛɣzɩ ɛ-wɛtʋ nɛ ɛpɩsɩ Yehowa cɔlɔ.​—Luka 15:17.

▸ Ñʋʋ 3, tayʋʋ 19

Yehowa sɔɔlɩ-ɖʋ nɛ ɛñɩnɩɣ se ɛsɩnɩ-ɖʋ. Pʋyɔɔ ɛtɩŋɩɣnɩ Bibl nɛ ɛ-samaɣ ŋga kɔsɔɔlɩ-ɩ yɔ kɔ-yɔɔ nɛ ɛhaɣ-ɖʋ paɣtʋ, ɛwɩlɩɣ-ɖʋ nʋmɔʋ kɩbaŋʋ nɛ ɛtasɩɣ-ɖʋ lɔŋ. Pɩpɔzɩ-ɖʋ sɩnʋʋ mbʋ, mbʋ pʋyɔɔ yɔ ɖɩtɩtalɩ pilim. (Yereemii 17:9; nwt) Ye ɖiwelisiɣni mba Yehowa lɩzaa se peɖiyi-ɖʋ camɩyɛ yɔ, ɖɩwɩlɩɣ-ɩ se ɖɩñaŋɩ-ɩ nɛ ɖɩsɔɔlaa se ɖɩla ɛ-sɔɔlɩm.​—Ebree 13:7.

▸ Ñʋʋ 4, tayʋʋ 2

Ðɩkɛ ɛyaa mantɩtalɩ pilimwaa nɛ pʋyɔɔ lɛ, pɩwɛ kɛlɛʋ se ɖɩtɔlɩ piɖeni men-ɖeke wɛtʋ nɛ tɩ kpazʋʋ kpaca taa. Ɛlɛ Yehowa sɔɔlaa se ɖiluzi ɖa-tɩ. Ye ɖɩkpaɣ ɖa-tɩ nɛ ɖɩmaɣzɩnɩ Yehowa nɛ ɖɩna se ɖɩtɩlɩɩ pʋyʋ yɔ, pɩsɩɣnɩ-ɖʋ nɛ ɖiluzi ɖa-tɩ. (Yɔɔb 38:1-4) Pɩtasɩ lɛ, ye ɖɩmaɣzɩɣ mbʋ piiɖeni lalaa yɔ pɩ-yɔɔ nɛ pɩkpaɖɩ ɖa-maɣmaɣ ɖɔ-yɔɔ yɔ, piyeki nɛ ɖiluzi ɖa-tɩ. Ðoŋ ɖoŋ lɛ, tɩ kpazɩyʋ maɣzɩɣ se ɛmʋ ñɩm nɛ pɩkpaɖɩ lalaa. Weyi eluzuu ɛ-tɩ yɔ, ɛnawa se paa ɛwɛ ɖoŋ hɔɔlɩŋ nɩɩyɩ taa yɔ, ɛwɛnɩ ɖɔɖɔ ɛjandʋ. Yɛ picoɖi-i yɔ, sɔɔndʋ ɛɛkpaɣ-ɩ se etisi se picoɖi-i, ɛlɛ ɛpɔzʋʋ kpaɣʋ nɛ kpeɣu nɛ lɔŋ tasʋʋ. Weyi eluzuu ɛ-tɩ yɔ, ɛñɔʋnɩ Yehowa nɛ ɛɖɔŋ ɛ-paɣtʋ yɔɔ.​—1 Pɩyɛɛrɩ 5:5.

▸ Ñʋʋ 4, tayʋʋ 4

Ñʋndɩnaa wɛnɩ ɖoŋ nɛ waɖɛ se paɖʋ paɣtʋ nɛ pakpaɣ ɖɔɖɔ lɩmaɣza. Yehowa wɛnɩ ɖoŋ kpeekpe ɛsɔdaa nɛ tataa. Ɛnʋ lɩzɩnɩ wondu kpeekpe nɛ pʋyɔɔ lɛ, ɛnʋ kɛnɩnɩ Kɩlɩm kedeŋa kpeekpe yɔɔ. Paa ɛzɩmtaa lɛ, eyeki se e-ɖoŋ ɛwazɩ lalaa. Yehowa ha nabɛyɛ ɖoŋ se peɖiyi lalaa. Lʋlɩyaa, ɛgbɛyɛ taa ɛzʋtʋyaa nɛ komina ñʋndɩnaa wɛnɩ ɖoŋ nɩɩyɩ nɛ Yehowa sɔɔlaa se ɖiluzi ɖa-tɩ pɛ-tɛɛ. (Roma 13:1-5; 1 Timootee 5:17) Ɛlɛ ye ɛyaa paɣtʋ ɛkaɖɩɣnɩ Ɛsɔ ñɩndʋ yɔ, Ɛsɔ ɖɩñaŋ. (Tʋma Labʋ 5:29) Ye ɖiluzuu ɖa-tɩ ɛyaa mba Yehowa lɩzaa se peɖiyi-ɖʋ yɔ pɛ-tɛɛ yɔ, ɖɩwɩlɩɣ-ɩ se ɖɩñaŋ ɛ-paɣtʋ.

▸ Ñʋʋ 4, tayʋʋ 7

Ɛzʋtʋyaa kɛ koobiya mba pabɩ fezuu taa yɔ, nɛ Yehowa ha-wɛ waɖɛ se pɔcɔnɩ koobiya lalaa yɔɔ. (Wayɩ Wayɩ Paɣtʋ 1:13; Tʋma Labʋ 20:28) Pasɩɣnɩ-ɖʋ se ɖɩcɛyɩsɩ ɖa nɛ Yehowa ɖa-taabalɩyɛ nɛ ɖɩsɛɛ-ɩ ɛzɩ  pɩpɔzʋʋ yɔɔ laŋhɛzɩyɛ taa. (1 Kɔrɛntɩ 14:33, 40) Fezuu kiɖeɖeu sɩnɩna nɛ palɩzɩ ɛgbɛyɛ taa ɛzʋtʋyaa nɛ pʋyɔɔ lɛ, pɛwɛnɩ wɛtʋ kɩbandʋ ndʋ Bibl yɔɔdʋʋ tɩ-tɔm yɔ. (1 Timootee 3:1-7; Tiiti 1:5-9; 1 Pɩyɛɛrɩ 5:2, 3) Ðiluzuu ɖa-tɩ ɛgbɛyɛ taa ɛzʋtʋyaa tɛɛ mbʋ pʋyɔɔ yɔ, ɖɩtaɣ liu Ɛsɔ ɛgbɛyɛ nɛ ɖɩɖʋʋ-ɖɩ nesi.​—Keɣa 137:6; Ebree 13:17.

▸ Ñʋʋ 4, tayʋʋ 8

Yehowa ha ɖoŋ lʋlɩyaa se pɔcɔnɩ pe-piya yɔɔ. Ɛlɛ Bibl yɔɔdaa se caja kɛnɩnɩ hɔʋ ñʋʋdʋ. Ye caja ɛfɛyɩ hɔʋ nakʋyʋ taa yɔ, ɖoyo lakɩnɩ ɛ-tʋmɩyɛ. Tʋma wena hɔʋ ñʋʋdʋ lakɩ yɔ, a-taa naayɛ lɛ se ɛha ɛ-hɔʋ taa ñɩma tɔɔnaɣ, wondu kususutu nɛ ɖɩzʋyɛ. Pɩcɛyɩ siŋŋ se hɔʋ ñʋʋdʋ ɛɖɛɛ nɔɔ nɛ ɛsɩnɩ ɛ-hɔʋ nɛ kɩsɛɛ Yehowa camɩyɛ. Ɛnʋ pɩwɛɛ se ɛla ɖʋtʋ nɛ hɔʋ woki kediɣzisi, kisusuu tɔm nɛ kɩkpɛlɩkɩɣ Bibl ɖoŋ ɖoŋ. Pɩtasɩ lɛ, ɛnʋ pɩwɛɛ se ɛkpaɣ lɩmaɣza. Paa ɛzɩmtaa lɛ, pɩwɛɛ se ɛmaɣzɩnɩ Yesu, ɛwɛɛnɩ hɛɛ wɛtʋ nɛ ɛnɩɣ ɖɔɖɔ tɔm taa. Pɩtɩpɔzɩ kpa se ɛla ɛ-hɔʋ kañatʋ. Piyeki nɛ taabalɩyɛ kɩbanɖɛ wɛɛ hɔʋ taa ñɩma hɛkʋ taa, paa weyi ehiɣ laŋɩyɛ hɛzʋʋ nɛ ɛcɛyɩsɩ ɛ nɛ Yehowa pa-taabalɩyɛ.

▸ Ñʋʋ 4, tayʋʋ 12

Koobiya mba pɛwɛ Nɔɔɖɛyaa Ɛgbɛyɛ taa yɔ, pɛwɛnɩ lidaʋ se pakaɣ caɣʋ wezuu ɛsɔdaa nɛ pɔ-yɔɔ Yehowa tɩŋɩɣna nɛ eɖiyiɣ ɛ-samaɣ sɔnɔ. Yehowa kaatɩŋnɩ kajalaɣ pɩnzɩ mɩnʋʋ taa nɔɔɖɛyaa ɛgbɛyɛ yɔɔ nɛ eɖiyiɣ kajalaɣ Krɩstʋ mba, pɛ-Ɛsɔ sɛtʋ nɛ pɔ-tɔm susuu taa. (Tʋma Labʋ 15:2) Sɔnɔ koobiya mba pɛwɛ Nɔɔɖɛyaa Ɛgbɛyɛ taa yɔ, peɖiyiɣ Ɛsɔ samaɣ nɛ pakandɩyɩɣ kɔ-yɔɔ. Pʋcɔ nɛ pakpaɣ lɩmaɣzɩyɛ naɖɩyɛ lɛ, pañɩnɩɣ ndʋ Yehowa maɣzɩɣ yɔ Bibl taa nɛ pɔpɔzɩ-ɩ ɖɔɖɔ e-fezuu kiɖeɖeu. Yesu ya koobiya patam numwaa mba se: “Yom Siɣsiɣ Tʋ nɛ Lɔŋsɩnɖʋ.”​—Maatiyee 24:45-47; nwt.

▸ Ñʋʋ 4, tayʋʋ 15

Nabʋyʋ taa, pɔpɔzʋʋ Krɩstʋ tʋ halɩñɩnʋ nɔɔyʋ se ɛla tʋmɩyɛ nɖɩ abalaa lakɩ ɛgbɛyɛ taa yɔ. Pɩwɛɛ se Krɩstʋ tʋ halɩñɩnʋ ɛnʋ ehuuzi ɛ-ñʋʋ yɔɔ pʋcɔ nɛ ɛla tʋmɩyɛ nɖɩ. Ye ɛlabɩ mbʋ yɔ, pɩwɩlɩɣ se ɛwɛnɩ ñamtʋ ɖʋtʋ ndʋ Yehowa laba yɔ tɩ-yɔɔ. Ɛlɛ pɩtɩkɛ paa ɛzɩmtaa pɩwɛɛ se ehuuzi nabʋyʋ ɛ-ñʋʋ yɔɔ. Ðɩkpaɣ kɩɖaʋ kʋnɛ: Ye Krɩstʋ tʋ halɩñɩnʋ nɔɔyʋ ɛkpɛlɩkɩɣnɩ nɔɔyʋ Bibl, nɛ ɛ-walʋ yaa Krɩstʋ tʋ abalɩñɩnʋ weyi pamɩyɩsɩ-ɩ lɩm yɔ ɛwɛ peeɖe yɔ, pɩwɛɛ se ehuuzi nabʋyʋ ɛ-ñʋʋ yɔɔ.​—1 Kɔrɛntɩ 11:11-15.

▸ Ñʋʋ 4, tayʋʋ 17

Ðɩɩtɩnɩɣ hɔɔlʋʋ nakʋyʋ yɔɔ, pʋyɔɔ lɛ ɖɩɩɖʋ ɖɔ-nɔsɩ politiki tɔm taa. (Yohanɛɛsɩ 17:16) Yehowa samaɣ ɖʋʋ nesi e-Kewiyaɣ. Ɛzɩ Yesu yɔ, ɖɩɩɖʋ ɖɔ-nɔsɩ ɛjaɖɛ tɔm taa.

Yehowa ɖʋ Krɩstʋ ñɩma paɣtʋ se ‘poluzi pa-tɩ nɛ paña sɔsaa nɛ ñʋndɩnaa.’ (Tiiti 3:1, 2; Roma 13:1-7) Ɛlɛ Ɛsɔ paɣtʋ yɔɔdaa se ɖɩtaakʋ ɛyʋ. Pʋyɔɔ Krɩstʋ ñɩma ɛhʋyɛ ɛɛhaɣ-wɛ nʋmɔʋ se pala you. Ye Krɩstʋ tʋ ekizaa se ɛɛlakɩ sɔɔjatʋ tʋmɩyɛ nɛ paha-ɩ waɖɛ se ɛla tʋma wena awazɩɣ samaɣ yɔ pi-lone taa yɔ, pɩpɔzʋʋ se ewili nɛ ɛna se ɛ-ɛhʋyɛ haɣ-ɩ nʋmɔʋ se ɛla tʋma ana yaa we.

Yehowa ɖeke ɖɩsɛɣ mbʋ pʋyɔɔ yɔ, ɛnʋ ɛkɛnɩ ɖa-Lɩzɩyʋ. Pʋyɔɔ paa ɖɩwɛnɩ ñamtʋ ɛjaɖɛ kɩɖaʋ wondu yɔɔ yɔ, ɖɩɩsɛɣ kɩɖaʋ kɛdɛɛka nɛ ɖiiteɣ ɖɔɖɔ ɛjaɖɛ kɩɖaʋ hendu. (Izaayii 43:11; Danɩyɛɛlɩ 3:1-23; 91(24)-97(30); 1 Kɔrɛntɩ 10:14) Pɩtasɩ lɛ, takayɩsɩ ɖʋzʋʋ alɩwaatʋ taa, paa Krɩstʋ tʋ weyi ɛsɛtɩɣ ɛ-tɩ tɔm se ɛɛɖʋzʋʋ takayaɣ se palɩzɩ politiki ñʋʋdʋ nɔɔyʋ. Ðɩlakɩ mbʋ, mbʋ pʋyɔɔ yɔ, Ɛsɔ komina ɖɩɖʋʋ nesi.​—Maatiyee 22:21; Yohanɛɛsɩ 15:19; 18:36.

▸ Ñʋʋ 5, tayʋʋ 2

Ɛjaɖɛ sandɩɣ Sataŋ lɩmaɣza. Mba patɩsɔɔlɩ Yehowa, paamaɣzɩɣnɩ-ɩ nɛ pa-paa fɛyɩnɩ ɛ-paɣtʋ yɔ, lɩmaɣza ana pɛwɛna. (1 Yohanɛɛsɩ 5:19)  Lɩmaɣza ana, nɛ lakasɩ nzɩ lɩmaɣza ana atuyuu ɛyaa nɛ palakɩ yɔ, payaɣ se ɛjaɖɛ fezuu. (Efɛɛzɩ 2:2) Yehowa samaɣ ñakɩ pana se fezuu ŋgʋ kɩtaawɛɛnɩ ɖoŋ pɔ-yɔɔ. (Efɛɛzɩ 6:10-18) Ðɩsɔɔlɩ Yehowa nʋmɔŋ nɛ ɖɩlakɩ mbʋ payɩ ɖɩpɩzɩɣ yɔ se pɩsa nɛ ɖɩñɔɔnɩ ɛ-lɩmaɣza.

▸ Ñʋʋ 5, tayʋʋ 7

Tisuu yebu kɛnɩ siɣye haʋ Bibl taa toovenim tɔm nɛ tɩ-kaɖɩnʋʋ. Tisuu yebiyaa kʋyʋʋ Yehowa Ɛsɔ nɛ Yesu weyi ɛlɩzaa se ɛkɛ e-Kewiyaɣ Wiyaʋ yɔ pɔ-yɔɔ, nɛ pañakɩ pana se pepeɣzi lalaa nɛ pala ɛzɩ mba yɔ. (Roma 1:25) Pañɩnɩɣ se mba pɛsɛɣ Yehowa yɔ papaɣzɩ pɩtʋʋ. Kajalaɣ Krɩstʋ ñɩma nabɛyɛ kaapɩsɩ tisuu yebiyaa, nɛ mbʋ ɖɔɖɔ pɩwɛ sɔnɔ. (2 Tesalooniiki 2:3) Mba pɔsɔɔlɩ Yehowa yɔ, paaɖʋʋ ɛgbɛyɛ nɛ tisuu yebiyaa. Pɩfɛyɩ se ɖiyele nɛ saawɩɖɛ tuyi-ɖʋ nɛ ɖɩkalɩ tisuu yebiyaa takayɩsɩ, ɖiwelisini-wɛ yaa ɖɩcɔnɩ mbʋ palakɩ yɔ teelee yɔɔ. Pɩfɛyɩ ɖɔɖɔ se ɖiyele nɛ lalaa ñɩɣ ɖɔ-yɔɔ nɛ ɖɩla mbʋ. Ðɩsɔɔlɩ Yehowa nɛ e-ɖeke ɖɩsɛɣ.

▸ Ñʋʋ 5, tayʋʋ 9

Moyizi Paɣtʋ alɩwaatʋ taa, Izrayɛɛlɩ piya pɔzaɣ Yehowa se ekpeɣ-sɩ sɩ-kɩwɛɛkɩm. Siwokaɣni tɔɔnasɩ, num nɛ kpɩna nɛ sɩlakɩ haɖɛ kpaaŋ taa. Pɩsɩɣaɣnɩ Izrayɛɛlɩ samaɣ kpeekpe, nɛ paa Izrayɛɛlɩ pɩɣa ŋga lɛ, se kɔtɔzɩ se Yehowa tisiɣ faaa nɛ ekpeɣ-kɛ ka-kɩwɛɛkɩm. Pʋwayɩ Yesu kɔma nɛ ɛlaa e-wezuu se pihuuzi ɖa-kɩwɛɛkɩm yɔɔ. Pʋyɔɔ pɩtɩtasɩ pɔzʋʋ se ɖɩlaa kpɩna kɩlaŋ. Yesu kpaɣ e-tomnaɣ ŋga kɛwɛ pilim yɔ nɛ ɛlaa “tam kʋyʋmʋm.”​—Ebree 10:1, 4, 10.

▸ Ñʋʋ 7, tayʋʋ 6

Moyizi paɣtʋ alɩwaatʋ taa, paaha ɛyaa nʋmɔʋ se pakʋ kpɩna nɛ pɔtɔɔ a-nandʋ. Paaɖʋ-wɛ ɖɔɖɔ paɣtʋ se pakpaɣ kpɩna nɛ palaa kɩlaŋ. (Levitiki 1:5, 6) Ɛlɛ Yehowa taaha nʋmɔʋ ɛ-sɛyaa kpa se panazɩ  kpɩna. (Aduwa 12:10) Toovenim taa lɛ, ɛɛɖʋ paɣtʋ ndʋ tiyeki se pakandɩyɩ kpɩna yɔɔ yɔ. Paaɖʋ Izrayɛɛlɩ piya paɣtʋ se sɩcɔnɩ sɩ-kpɩna ɖeɖe camɩyɛ.​—Wayɩ Wayɩ Paɣtʋ 22:6, 7.

▸ Ñʋʋ 7, tayʋʋ 6

Calɩm hɔɔlɩŋ sɔsɔŋ. Hɔɔlɩŋ sɔsɔŋ naanza wɛnɩ calɩm taa​—kuludasɩ kɩsɛɛmasɩ, kuludasɩ kʋhʋlʋmasɩ, kuludasɩ nzɩ sɩlakɩ nɛ calɩm kiɣ yɔ nɛ calɩm akeleta. Hɔɔlɩŋ sɔsɔŋ ɛnɩ ɩ-taa palɩzɩɣ calɩm hɔɔlɩŋ cikpeŋ. *

Krɩstʋ ñɩma iitisiɣ se paɖʋ-wɛ calɩm maɣmaɣ yaa calɩm hɔɔlɩŋ sɔsɔŋ naanza waa mba pa-taa nakʋyʋ. Ɛlɛ papɩzɩɣ petisi nɛ pakpaɣ kɔɔ wena palabɩnɩ calɩm hɔɔlɩŋ cikpeŋ yɔ nɛ pawaa pa-kʋdɔmɩŋ na? Bibl ticosi tɔm ndʋ tɩ-yɔɔ kpayɩ. Ye mbʋ, paa Krɩstʋ tʋ weyi lɛ, pɩwɛɛ se ɛlabɩnɩ tʋmɩyɛ ɛ-ɛhʋyɛ nɖɩ ɛtɩŋnɩ Bibl yɔɔ nɛ ɛfalɩsɩ yɔ nɛ ɛsɛtɩ ɛ-tɩ tɔm hɔɔlʋʋ kʋnɛ kɩ-taa.

Krɩstʋ ñɩma nabɛyɛ iitisiɣ se pakpaɣ kɔɔ wena palabɩnɩ calɩm hɔɔlɩŋ cikpeŋ yɔ nɛ pawaa pa-kʋdɔmɩŋ, mbʋ pʋyɔɔ yɔ Moyizi paɣtʋ pɔzaɣ Izrayɛɛlɩ piya se ‘sɩpɩyɩ kpɩna calɩm tataa.’​—Wayɩ Wayɩ Paɣtʋ 12:22-24.

Ɛlɛ Krɩstʋ ñɩma lalaa ñaamaɣzɩɣ mbʋ. Pɛ-ɛhʋyɛ haɣ-wɛ nʋmɔʋ se petisi nɛ pakpaɣ kɔɔ wena palabɩnɩ calɩm hɔɔlɩŋ cikpeŋ yɔ nɛ pawaa pa-kʋdɔmɩŋ. Pamaɣzɩɣ se calɩm hɔɔlɩŋ cikpeŋ tɩkɛ calɩm maɣmaɣ nɛ pʋyɔɔ lɛ, pɩtɩsɩŋnɩ weyi ɛ-taa palɩzɩ-ɩ yɔ e-wezuu.

Pʋcɔ nɛ ŋkpaɣ lɩmaɣzɩyɛ naɖɩyɛ pɩlɩɩnɩ calɩm hɔɔlɩŋ cikpeŋ yɔɔ lɛ, pɔzɩ ña-tɩ tɔm tʋnɛ:

• Manɩ pɩ-taa camɩyɛ se ye menkizaa se pataaɖʋ-m calɩm hɔɔlɩŋ cikpeŋ yɔ, pʋ-tɔbʋʋ lɛ se maakaɣ tisuu nɛ mankpaɣ kɔ wena ayeki se calɩm ekii yɔ yaa kɔ wena pawaɣnɩ kʋdɔmɩŋ yɔ a-taa naayɛ?

•   Ɛzɩma manpɩzɩɣ malɩzɩ mɛn-tɛ ɖɔkɔtɔ mbʋ pʋyɔɔ mantɩsɔɔlɩ se paɖʋ-m calɩm hɔɔlɩŋ cikpeŋ yɔ pɩ-taa?

Kʋdɔmɩŋ waʋ nʋmɔʋ. Ða mba ɖɩkɛ Krɩstʋ ñɩma yɔ, ɖɩɩhaɣ ɖa-calɩm nɛ ɖiiyeki se palɩzɩ ɖa-maɣmaɣ ɖa-calɩm nɛ pasɩɩ se kpɩtaŋ nɩɩyɩ wayɩ lɛ, paapɩsɩnɩ-pʋ nɛ paɖʋ-ɖʋ. Ɛlɛ nabʋyʋ taa, ɖɔkɔtɔnaa lakɩnɩ tʋmɩyɛ kʋdɔndʋ maɣmaɣ calɩm. Paa Krɩstʋ tʋ weyi pɩwɛɛ se ɛsɛtɩ ɛ-tɩ tɔm pɩlɩɩnɩ ɛzɩma palabɩnɩ ɛ-calɩm tʋmɩyɛ alɩwaatʋ ndʋ paalakɩ-ɩ tʋmɩyɛ yɔ. Kʋdɔmɩŋ waʋ nʋmɔŋ ɛnɩ ɩ-taa, palɩzɩɣ kʋdɔndʋ calɩm nɛ pasɩɩ alɩwaatʋ pazɩ.​—Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ 15 Octobre 2000 tɛ Feŋuu Tilimiye hɔɔlɩŋ 30-31.

Kɩɖaʋ nakʋyʋ yɔ: Payaɣ kʋdɔmɩŋ waʋ nʋmɔʋ nakʋyʋ se hémodilution. Palɩzɩɣ kʋdɔndʋ maɣmaɣ calɩm, alɩwaatʋ ndʋ paalakɩ-ɩ tʋmɩyɛ yɔ, nɛ paɖʋ menziini nakʋyʋ taa. Pɔsɔkɩ-ɩ kɔyɛ naɖɩyɛ se pɛlɛɣzɩnɩ calɩm mbʋ palɩzaa yɔ, nɛ pʋwayɩ lɛ paaɖaɣnɩ-ɩ pʋ ɖʋʋ.

Kʋdɔmɩŋ waʋ nʋmɔʋ lɛɛkʋ payaɣ se récupération du sang épanché.  Pʋ-tɔbʋʋ lɛ se alɩwaatʋ ndʋ palakɩ kʋdɔndʋ tʋmɩyɛ yɔ, pakpakɩɣ calɩm mbʋ pɩkpɛdɩɣ yɔ, pañalɩ-pʋ nɛ palɩzɩ pɩ-taa azuluma nɛ pʋwayɩ lɛ, patɩŋnɩ menziini nakʋyʋ yɔɔ nɛ paɖaɣnɩ-ɩ pʋ ɖʋʋ.

Paa ɖɔkɔtɔ weyi lɛ ɛ-tʋmɩyɛ labʋ wɛ ndɩ. Ye mbʋ, pɩwɛɛ se ŋpɔzɩ ñɔ-ɖɔkɔtɔ nɛ ɛlɩzɩ-ŋ nʋmɔʋ ŋgʋ kɩ-yɔɔ ɛcaɣ tɩŋnʋʋ se ɛlabɩ-ŋ tʋmɩyɛ yɔ kɩ-taa camɩyɛ. Pɩwɛɛ se Krɩstʋ tʋ ɛtɩlɩ ɛzɩma ɖeyi ɖeyi pacaɣ labɩnʋʋ ɛ-calɩm tʋmɩyɛ yɔ.

Pʋcɔ nɛ ŋkpaɣ lɩmaɣzɩyɛ naɖɩyɛ pɩlɩɩnɩ ɛzɩma ŋsɔɔlaa se palabɩnɩ ña-calɩm tʋmɩyɛ yɔ pɩ-yɔɔ lɛ, maɣzɩ tɔm tʋnɛ tɩ-yɔɔ:

• Ye pɩpɔzʋʋ se palɩzɩ man-calɩm nɛ pasɩɩ alɩwaatʋ pazɩ yɔ, mɛ-ɛhʋyɛ yeki se mamaɣzɩ se calɩm mbʋ pɩkpɛndɩ pɩkɛ mɔ-hɔɔlʋʋ nakʋyʋ nɛ pʋyɔɔ lɛ pɩtɩcɛyɩ se ‘papɩyɩ-pʋ tataa ɛzɩ lɩm yɔ’?​—Wayɩ Wayɩ Paɣtʋ 12:23, 24.

• Mɛ-ɛhʋyɛ nɖɩ mankpaɣ Bibl nɛ manfalɩsɩna yɔ, ɖɩɩcɛyɩɣ-m ye mentisaa nɛ palɩzɩ man-calɩm, palɩzɩ pɩ-taa azuluma nɛ pʋwayɩ lɛ, paaɖaɣnɩ-m pʋ ɖʋʋ na?

• Manɩ pɩ-taa camɩyɛ se ye menkizaa se pataalabɩnɩ man-calɩm tʋmɩyɛ yɔ, pɩwɩlɩɣ se maatisiɣ se pamaɣzɩ man-calɩm yaa palabɩ-m hémodialyse yaa mbʋ payaɣ se cœur poumon artificiel yɔ?

 Pʋcɔ nɛ ɖɩkpaɣ lɩmaɣzɩyɛ naɖɩyɛ pɩlɩɩnɩ calɩm hɔɔlɩŋ cikpeŋ nɛ kʋdɔmɩŋ waʋ nʋmɔŋ weyi ɩ-taa palakɩnɩ tʋmɩyɛ ɖa-maɣmaɣ ɖa-calɩm yɔ lɛ, ɖɩtaasɔɔ se ɖɩpɔzɩ Yehowa se ɛha-ɖʋ lɔŋsɩnɖɛ nɛ ɖɩñɩnɩ ɖɔɖɔ ɛ-lɩmaɣza Bibl nɛ ɛgbɛyɛ takayɩsɩ taa. (Yakubu 1:5, 6) Nɛ pʋwayɩ lɛ, ɖɩlabɩnɩ tʋmɩyɛ ɖɛ-ɛhʋyɛ nɖɩ ɖɩkpaɣ Bibl nɛ ɖɩfalɩsɩna yɔ nɛ ɖɩsɛtɩ ɖa-tɩ tɔm. Pɩtɩpɔzɩ se ɖɩpɔzɩ lalaa se peheyi-ɖʋ mbʋ ɖɩla yɔ, yaa ɖiyele nɛ pañɩɣ ɖɔ-yɔɔ nɛ ɖɩkpaɣ lɩmaɣzɩyɛ naɖɩyɛ.​—Roma 14:12; Galaatii 6:5.

▸ Ñʋʋ 7, tayʋʋ 11

Pʋpɔzʋʋ se ɖe-wezuu caɣʋ nɛ ɖɛ-wɛtʋ ɩwɛɛ kele kele Ɛsɔ ɛsɩndaa. Pitukuuni ɖa-lɩmaɣza, ɖɔ-yɔɔdaɣ nɛ ɖa-lakasɩ. Yehowa pɔzʋʋ-ɖʋ se ɖise kʋzʋʋ nʋmɔʋ taa azuluma lakasɩ tɩŋa. (Aduwa 1:10; 3:1) Pɩpɔzʋʋ se ɖɩkpaɣ lɩmaɣza se ɖɩɖɔŋ paɣtʋ ndʋ Yehowa ɖʋ-ɖʋ kele kele wɛtʋ nʋmɔʋ taa yɔ, tɩ-yɔɔ pʋcɔ nɛ ɖɩɩkɔɔ ɖɩkatɩ takɩm nabʋyʋ. Pɩwɛɛ se ɖɩtɩmɩɣnɩ Ɛsɔ ɖoŋ ɖoŋ se ɛsɩnɩ-ɖʋ nɛ ɖɩka ɖa-lɩmaɣza mbʋ pɩwɛ kele kele yɔ pɩ-yɔɔ, nɛ ɖɩñaɣ pana nɛ ɖise azuluma lakasɩ tɩŋa.​—1 Kɔrɛntɩ 6:9, 10, 18; Efɛɛzɩ 5:5.

▸ Ñʋʋ 8, tayʋʋ 11

Pɔtɔŋ se ɛyʋ cakɩ wezuu kɩdɛkɛdʋʋ, ye ɛ-yɔɔdaɣ yaa ɛ-lakasɩ ɩwɩlɩɣ se ɛ-paa fɛyɩnɩ Ɛsɔ paɣtʋ paa ññɩɩ nɛ fɛyɛ ɛɛkpaɣ-ɩ nɛ Ɛsɔ paɣtʋ yɔɔ maʋ yɔ. Pɩpɔzʋʋ se tɔm hʋʋ kɔɔmiite ɛcɔnɩ ɛyʋ ɛnʋ e-ɖeɖe nɛ kɩsɩnɩ-ɩ. Azuluma lakasɩ kɛnɩ kɩdɛkɛdɩm ndɩ ndɩ labʋ. Kɩdɛkɛdɩm mbʋ, pɩ-taa nabʋyʋ pɩzɩɣ piyele nɛ payaa nɔɔyʋ tɔm hʋʋ kɔɔmiite ɛsɩndaa ɛgbɛyɛ taa.​—Galaatii 5:19-21; Efɛɛzɩ 4:19; ye ŋsɔɔlaa se ŋtɩlɩ nɛ pɩkpaɖɩ yɔ, kalɩ “Questions de lecteurs” 15 Juillet 2006 tɛ La Tour de Garde taa.

▸ Ñʋʋ 9, tayʋʋ 7; Ñʋʋ 12, tayʋʋ 10

Mba pɔɖɔkɩ nesi yɔ, Yehowa ha nʋmɔʋ se pasʋʋnɩ ɖama. Ɛlɛ ye nɔɔyʋ ɛsaɣyɩɣ ɛ-kʋzʋʋ piliŋa yɔɔ se ɛnɩɩ leleŋ weyi abalʋ nɛ ɛ-halʋ panɩɣ alɩwaatʋ ndʋ pasʋʋnɩ ɖama yɔ, ɛ-lakasɩ nzɩ sɩkɛ kʋzɔɔtʋ lakasɩ. Sɩpɩzɩɣ sɩcamɩ ɛ nɛ Yehowa pa-taabalɩyɛ. Piyeki ɖɔɖɔ nɛ ɛwɛɛnɩ lɩmaɣza kɩdɛkɛdaa nɛ ɛmaɣzɩɣ se kʋzʋʋ kɛ kɔɖɛyɩ kʋʋ pʋyʋ yem. (Koloosi 3:5) Weyi kʋzʋʋ pilinzi yɔɔ saɣyʋʋ malɩnɩ-ɩ yɔ, pɩpɩzɩɣ pɩwɛɛ-ɩ kaɖɛ se eyele azuluma lakasɩ nzɩ. (Keɣa 85:5; 1 Yohanɛɛsɩ 3:20) Ye wɛtʋ ndʋ tɩ-taa ŋwɛɛ yɔ, tɩmnɩ Yehowa nɛ ña-laŋɩyɛ pilim nɛ ŋpɔzɩ-ɩ se ɛsɩnɩ-ŋ. Se kʋzʋʋ kɩlɛmɩŋ cɔnʋʋ mbʋ pʋyɔɔ yɔ, pɩpɩzɩɣ pituyi-ŋ nɛ ŋla azuluma lakasɩ. Yɔɔdɩnɩ ña-lʋlɩyaa mba pɛkɛ Krɩstʋ ñɩma yɔ, yaa ña-taabalʋ weyi ɛpɩ fezuu taa nɛ ɛñaŋ Yehowa paɣtʋ yɔ. (Aduwa 1:8, 9; 1 Tesalooniiki 5:14; Tiiti 2:3-5) Taasɔɔ kpa se Yehowa naɣ pana wena ŋñakɩ se ŋla mbʋ pɩwɛ kele kele yɔ nɛ pɩkɛdɩɣnɩ-ɩ.​—Keɣa 50:19; Izaayii 1:18.

▸ Ñʋʋ 9, tayʋʋ 9

Pɩtɩpɔzɩ se abalʋ ɛkpaɣ nɛ pɩcɛzɩ halʋ kʋɖʋm. Yehowa kaaɖʋwa se abalʋ kʋɖʋm nɛ halʋ kʋɖʋm ɩɖɔkɩnɩ nesi. Caanaʋ taa Izrayɛɛlɩ piya alɩwaatʋ taa, Yehowa kaaha nʋmɔʋ se abalʋ ɛkpaɣ nɛ pɩcɛzɩ halʋ kʋɖʋm, ɛlɛ kiɖe tɛɛ lɛ, ɛtaaɖʋ se pɩwɛɛ mbʋ. Sɔnɔ Yehowa ɛɛhaɣ ɛ-sɛyaa nʋmɔʋ se pakpaɣ halaa sakɩyɛ. Halʋ kʋɖʋm pɩwɛɛ se abalʋ ɛkpaɣ, nɛ walʋ kʋɖʋm ɖɔɖɔ pɩwɛɛ se halʋ ɛwalɩ.​—Maatiyee 19:9; 1 Timootee 3:2.

▸ Ñʋʋ 10, tayʋʋ 12

Yehowa ɖʋwa se abalʋ nɛ ɛ-halʋ pɛwɛɛ ɖama cɔlɔ mbʋ pe-wezuu caɣʋ kpeekpe. (Kiɖe Tɛɛ Tɔm 2:24; Malakiya 2:15, 16; Maatiyee 19:3-6; 1 Kɔrɛntɩ 7:39) Ɛha nʋmɔʋ se pɛcɛ nesi ɖɔkʋʋ, ye abalʋ yaa halʋ ɛlabɩ acɛyɛ yɔ. Weyi ɛ-halʋ yaa ɛ-walʋ labɩ acɛyɛ yɔ, ɛnʋ pɩzɩɣna nɛ ɛkpaɣ lɩmaɣza se ɛcɛkɩ e-nesi ɖɔkʋʋ.​—Maatiyee 19:9.

 Ɛlɛ nabʋyʋ taa, nesi ɖɔkɩyaa pɩzɩɣ pakpaɣ lɩmaɣza se pakʋyʋʋ ɖama yɔɔ, paa pa-taa nɔɔyʋ ɛtɩla acɛyɛ yɔ. (1 Kɔrɛntɩ 7:11) Papɩzɩɣ pala mbʋ lɩmaɣza anɛ a-yɔɔ:

• Ye abalʋ ekizaa se ɛɛcɔŋnɩ ɛ-hɔʋ yɔɔ yɔ: Ye abalʋ ekizaa se ɛɛcɔŋnɩ ɛ-hɔʋ yɔɔ nɛ kʋkʋ wɛɛ tanɩm taa siŋŋ yɔ, ɛ-halʋ pɩzɩɣ ɛkpaɣ lɩmaɣza se ɛkʋyʋʋ ɛ-yɔɔ.​—1 Timootee 5:8.

• Kɩmakʋ: Ye nabɛyɛ ɩɖɔkɩ nesi nɛ pa-taa nɔɔyʋ makɩ lɛlʋ siŋŋ nɛ ɛlɛ wezuu sʋʋ kaɖɛ taa yɔ, ɛpɩzɩɣ ɛkpaɣ lɩmaɣza se paya ɖama.​—Galaatii 5:19-21.

• Ye nɔɔyʋ ɛɖʋ ɛ-taa se ɛwɛɛkɩɣ lɛlʋ nɛ Yehowa pa-taabalɩyɛ taa yɔ: Abalʋ yaa halʋ pɩzɩɣ nɛ ɛñakɩ pana siŋŋ se ɛɖɩɣ nʋmɔʋ ɛ-tɛŋga se kaka ɛtaasɛɛ Yehowa.​—Tʋma Labʋ 5:29.

▸ Ñʋʋ 11, tayʋʋ 19

Pɩpɔzʋʋ ɖa-tɩŋa payɩ samtʋ nɛ ɖoŋ kpazʋʋ. (Aduwa 12:25; 16:24) Ðɩpɩzɩɣ ɖɩkpazɩ lalaa ɖoŋ nɛ ɖɩhɛzɩ pa-laŋa, ye ɖiheyiɣ-wɛ sɔɔlɩm tɔm nɛ nɔɔ kɩbaŋa yɔ. Piyeki nɛ ɖo-koobiya pɩzɩ pɔɖɔkɩ kpam nɛ powolo Yehowa sɛʋ yɔɔ paa pakatɩɣ kala yɔ. (Aduwa 12:18; Filiipi 2:1-4) Ye pitibi nɔɔyʋ yɔɔɔ yɔ, pɩwɛɣ ɖeu se ɖiwelisini-i camɩyɛ nɛ ɖɩnɩɩ mbʋ pɩlakɩ-ɩ yɔ pɩ-taa. Pɩsɩɣnɩ-ɖʋ nɛ ɖɩtɩlɩ ndʋ ɖɩyɔɔdɩ yaa mbʋ ɖɩla nɛ ɖɩsɩnɩ-ɩ yɔ. (Yakubu 1:19) Ðʋ ña-taa se ŋñakɩ pana nɛ ŋtɩlɩ ño-koobiya camɩyɛ nɛ pɩsa nɛ ŋtɩlɩ kɩcɛyɩm mbʋ pɩ-taa pɛwɛɛ yɔ. Nɛ pʋwayɩ lɛ, ŋsɩnɩ-wɛ nɛ pɔñɔtɩnɩ laŋɩyɛ Hɛzɩyʋ Sɔsɔ weyi ɛ-cɔlɔ papɩzɩɣ pehiɣ ɖoŋ kpazʋʋ siŋŋ yɔ.​—2 Kɔrɛntɩ 1:3, 4; 1 Tesalooniiki 5:11.

▸ Ñʋʋ 12, tayʋʋ 16

Bibl tɩɖʋ paɣtʋ natʋyʋ kpayɩ pɩlɩɩnɩ ɛzɩma ɖeyi ɖeyi pɩwɛɛ se pala nesi ɖɔkʋʋ sɔnzɩ yɔ pɩ-yɔɔ. Ɛzɩma palakɩ nesi ɖɔkʋʋ sɔnzɩ ajɛɛ naayɛ taa yɔ, pɩwɛ ndɩ nɛ ɛzɩma palakɩ-sɩ ajɛɛ lɛɛna taa yɔ.  (Kiɖe Tɛɛ Tɔm 24:67; Maatiyee 1:24; 25:10; Luka 14:8) Nesi ɖɔkʋʋ sɔnzɩ hɔɔlʋʋ ŋgʋ kɩ-tɔm kɩlɩ cɛyʋʋ yɔ lɛ, ɖuutu ndʋ nesi ɖɔkɩyaa lakɩ yɔ. Nesi ɖɔkɩyaa sakɩyɛ sɔɔlaa se pala ɖuutu ndʋ pɔ-hɔʋ taa ñɩma nɛ pa-taabalaa ɛsɩndaa. Pɔsɔɔlaa ɖɔɖɔ se ɛgbɛyɛ taa ɛzʋtʋyʋ nɔɔyʋ ɛtɩŋnɩ Bibl yɔɔ nɛ ɛyɔɔdɩ samaɣ taa tɔm nɛ ɛtasɩ-wɛ lɔŋ. Nesi ɖɔkɩyaa pɩwɛɛ se pɛsɛtɩ pa-tɩ tɔm se palakɩ yaa paalakɩ kazandʋ pe-nesi ɖɔkʋʋ wiye. (Luka 14:28; Yohanɛɛsɩ 2:1-11) Paa ɛzɩma tɩyɛ nesi ɖɔkɩyaa ɩsɔɔlaa se pala nesi ɖɔkʋʋ sɔnzɩ yɔ, pɩpɔzʋʋ se pañaɣ pana nɛ mbʋ payɩ palakɩ yɔ, pɩɖʋ Yehowa hɩɖɛ. (Kiɖe Tɛɛ Tɔm 2:18-24; Maatiyee 19:5, 6) Bibl paɣtʋ kila pɩzɩɣ asɩnɩ-wɛ nɛ pakpaɣ lɩmaɣza kɩbana. (1 Yohanɛɛsɩ 2:16, 17) Ye nesi ɖɔkɩyaa ɩkpaɣ lɩmaɣzɩyɛ se patayɩɣ ɛyaa sʋlʋm pe-nesi ɖɔkʋʋ kazandʋ taa yɔ, pɩpɔzʋʋ se pɔcɔnɩ pi-ɖeɖe camɩyɛ nɛ nɔɔyʋ ɛtaaɖɛlɛsɩ niye. (Aduwa 20:1; Efɛɛzɩ 5:18) Ye pɔsɔɔlaa se pala aleɣya nɛ paɖʋ ɖɔɖɔ minziiki yɔ, pɩwɛɛ se peyele nɛ pɩɖʋ Yehowa hɩɖɛ. Pɩmʋnaa se nesi ɖɔkɩyaa ɩka pa-lɩmaɣza pa nɛ Yehowa pa-taabalɩyɛ nɛ sɔɔlɩm mbʋ pɛwɛnɩ ɖama yɔɔ yɔ pɩ-yɔɔ, nɛ pɩkɩlɩ pe-nesi ɖɔkʋʋ kazandʋ yɔɔ.​—Aduwa 18:22; ye ŋsɔɔlaa se ŋtɩlɩ nɛ pɩkpaɖɩ yɔ, kalɩ 15 octobre 2006 tɛ La tour de garde hɔɔlɩŋ 18-31 (“Des mariages honorables aux yeux de Dieu et des hommes”; “Que votre vie soit le reflet de votre foi”; “Faites de vos noces un événement joyeux et digne”).

▸ Ñʋʋ 13, tayʋʋ 18

Ðɩsɔɔlaa se ɖɩtɩŋnɩ Bibl paɣtʋ kila yɔɔ nɛ ɖɩkpaɣ lɩmaɣza kɩbana. Krɩstʋ tʋ nɔɔyʋ weyi ɛ-walʋ yaa ɛ-halʋ tɩkɛ koobu yɔ, ɛpɩsɩɣ ɛyaa-ɩ se powolo pɔ-hɔʋ taa ñɩma tɛ nɛ pɔtɔɔ tɔɔnaɣ kazandʋ natʋyʋ wiye. Ye ñɛwɛnɩ wɛtʋ ndʋ tɩ-taa, ɛbɛ pɩwɛɛ se ŋla? Ye ñɛ-ɛhʋyɛ ɛhaɣ-ŋ nʋmɔʋ se ŋwolo yɔ, ŋpɩzɩɣ ŋlɩzɩ ñɛ-tɛŋga pɩ-taa se ye iwobi peeɖe nɛ papaɣzɩ labʋ sɩɩnaa layaa sɔnzɩ nasɩyɩ yɔ, ŋŋlakɩ-sɩ. Pɩtasɩ lɛ, pɩpɔzʋʋ se ŋpɔzɩ ña-tɩ se ye ŋwobi tɔɔnaɣ ŋga ka-ɖɩdɔɔyɛ yɔ, pɩɩkaɣ tuuluu nabɛyɛ yaa we?​—1 Kɔrɛntɩ 8:9; 10:23, 24.

Ye ña-tʋmɩyɛ ñʋʋdʋ ɛlabɩ-ŋ kʋjɔʋ nakʋyʋ kazandʋ natʋyʋ alɩwaatʋ taa, pɩpɔzʋʋ se ŋkizi yaa we? Aayɩ, nabʋyʋ taa ŋpɩzɩɣ ŋtisi. Pɩlɩɣnɩ lɩmaɣzɩyɛ nɖɩ ɖɩ-yɔɔ ña-tʋmɩyɛ ñʋʋdʋ labɩ-ŋ kʋjɔʋ ŋgʋ yɔ, pɩ-cɔlɔ. Pɔzɩ ña-tɩ se kazandʋ yɔɔ ɛlabɩ-m kʋjɔʋ ŋgʋ? Yaa ɛlabɩ-m  kʋ se ɛwɩlɩ-m ɛ-ɛsɩmɩyɛ na? Tɔm tʋnɛ tɩ-yɔɔ maɣzʋʋ sɩɣnɩ-ɖʋ nɛ ɖɩna se pɩwɛɛ se ɖitisi yaa ɖikizi kʋjɔʋ ŋgʋ.

Nabʋyʋ taa ɖɔɖɔ nɔɔyʋ pɩzɩɣ ɛlabɩ-ŋ kʋjɔʋ nakʋyʋ kazandʋ alɩwaatʋ natʋyʋ taa nɛ eheyi-ŋ se: “Manawa se ŋŋtɔkɩ kazandʋ tʋnɛ, ɛlɛ mɔnsɔɔlaa se malabɩ-ŋ kʋjɔʋ mbʋ.” Pɩtɩla ɛyʋ ɛnʋ ɛcaɣ ɛlabɩ-ŋ kɩbandʋ yem na. Ɛlɛ pɩwɛɣ ɖeu se ŋmaɣzɩ nɛ ŋna se ɛcaɣ se ɛtakɩ-ŋ kɩtakʋʋ nɛ etuyi-ŋ nɛ ŋtɔɔ kazandʋ ndʋ? Pɩwɛɛ se ŋmaɣzɩ tɔm tʋnɛ tɩ-yɔɔ pʋcɔ nɛ ŋsɛtɩ ña-tɩ tɔm se ŋtisiɣ yaa ŋŋtisiɣ nɛ ŋmʋ kʋjɔʋ ŋgʋ. Pɩpɔzʋʋ se lɩmaɣza wena payɩ ɖɩkpakɩɣ yɔ, ayele nɛ ɖɩwɛɛnɩ ɛhʋyɛ kɩbanɖɛ nɛ ɖɩwɛɛ siɣsiɣ Yehowa ɛsɩndaa.​—Tʋma Labʋ 23:1.

▸ Ñʋʋ 13, tayʋʋ 22

Ðoŋ ɖoŋ lɛ, ye pɔñɔɔzɩ tɔm lɔŋ laŋhɛzɩyɛ taa kɔyɔ, tɩɩpɩsɩɣ tɔm sɔsɔtʋ. (Maatiyee 5:23-26) Paa Krɩstʋ tʋ weyi lɛ, pɩwɛɛ se hɩɖɛ ɖʋʋ Yehowa nɛ nɔɔ kʋɖʋmaɣ ŋga kɛwɛ ɛgbɛyɛ taa yɔ pɩ-tɔm ɛkɩlɩnɩ cɛyʋʋ ɛ-ɛsɩndaa.​—Yohanɛɛsɩ 13:34, 35; 1 Kɔrɛntɩ 13:4, 5.

Ye Krɩstʋ ñɩma nabɛyɛ ɩlakɩ tadɩyɛ nɛ ɖama kɩɩnɩnʋʋ kɔɔ pɛ-hɛkʋ taa yɔ, pɩcɛyaa se pɔcɔnɩ pi-ɖeɖe nɛ pataawoni tɔm ndʋ tɔm hʋyaa tɛ. 1 Kɔrɛntɩ 6:1-8 taa, apostoloo Pɔɔlɩ tasɩ-ɖʋ lɔŋ pɩlɩɩnɩ ɛzɩma pɩwɛɛ se ɖɩcɔnɩ tɔm ndʋ tɩkɔŋ Krɩstʋ ñɩma hɛkʋ taa yɔ, ti-ɖeɖe yɔ. Ye ɖɩya ɖo-koobu tɔm ɛjaɖɛ yɔɔ tɔm hʋyaa cɔlɔ yɔ, pɩpɩzɩɣ pipisi ɛgbɛyɛ nɛ Yehowa hɩɖɛ. Maatiyee 18:15-17 wɩlɩɣ Krɩstʋ ñɩma nɩŋgbanzɩ naadozo nzɩ pɩwɛɛ se pɛkpɛzɩ nɛ pɔcɔnɩ tɔm sɔsɔtʋ ɛzɩ kɔlɔmɔtʋ yaa mulum ɖeɖe mbʋ yɔ: (1) Pɩpɔzʋʋ se pɔñɔɔzɩ tɔm pa-taa pe-ɖeke. (2) Ye palabɩ mbʋ nɛ tɔm ɛtɩñɔɔzɩ yɔ, papɩzɩɣ payaa koobu nɔɔyʋ yaa koobiya naalɛ mba papɩ fezuu taa yɔ se pasɩnɩ-wɛ. (3) Ye tɔm ɛtɩñɔɔzɩ ɖɔɖɔ yɔ, papɩzɩɣ nɛ pɔpɔzɩ ɛgbɛyɛ taa ɛzʋtʋyaa se pɔcɔnɩ tɔm ndʋ ti-ɖeɖe. Ye tɔm ɛtalɩ ɛgbɛyɛ taa ɛzʋtʋyaa cɔlɔ yɔ, patɩŋɩɣnɩ Bibl paɣtʋ kila yɔɔ se pɩsa nɛ pɔcɔnɩ ti-ɖeɖe nɛ pɩsa nɛ laŋhɛzɩyɛ kɔɔ koobiya hɛkʋ taa. Ye koobiya nabɛyɛ ekizaa se paaɖɔŋ Bibl lɔŋ tasʋʋ yɔɔ yɔ, ɛgbɛyɛ taa ɛzʋtʋyaa pɩzɩɣ pakpaɣ lɩmaɣzɩyɛ se palakɩ tɔm hʋʋ kɔɔmiite.

 Nabʋyʋ taa lɛ, pɩtɩkɛ tɔm natʋyʋ yɔɔ ɛyaa wokini ɖama tɔm ɖɩhʋyɛ, ɛlɛ powoki se pala mbʋ paɣtʋ pɔzʋʋ yɔɔ na. Ɛjaɖɛ yɔɔ tɔm hʋyaa ɖeke pɩzɩɣna nɛ paha ɛyʋ takayɩsɩ nasɩyɩ. Takayɩsɩ nzɩ sɩ-taa nasɩyɩ yɔ: Nesi cɛbʋ takayaɣ, takayaɣ ŋga kahaɣ lʋlɩyʋ waɖɛ se ɛcɔnɩ ɛ-pɩɣa yɔɔ yɔ, takayaɣ ŋga kawɩlɩɣ mbʋ pɩwɛɛ se abalʋ ɛha ɛ-halʋ nesi cɛbʋ wayɩ yɔ, takayaɣ ŋga kawɩlɩɣ mbʋ pɩwɛɛ se pɛhɛyɩ nɔɔyʋ ye pɛwɛɛkɩ ɛ-pʋyʋ yɔ (assurance), takayaɣ ŋga ka-taa nɔɔyʋ maɣ ɛ-hɩɖɛ nɛ pɩwɩlɩɣ paɣtʋ ɛsɩndaa se ɛsʋ kɩmɩyɛ yɔ, nɛ takayaɣ ŋga kawɩlɩɣ mbʋ ɛyʋ sɔɔlaa se pala ɛ-sɩm wayɩ yɔ (testament). Ye Krɩstʋ tʋ nɔɔyʋ ɛtɩŋnɩ nʋmɔʋ ŋgʋ kɩ-yɔɔ nɛ ɛñaɣ pana se ɛñɔɔzɩ tɔm laŋhɛzɩyɛ taa yɔ, ɛtɩmaanɩ Pɔɔlɩ lɔŋ tasʋʋ yɔɔ.

Ye Krɩstʋ tʋ nɔɔyʋ ɛkpaɣ Krɩstʋ tʋ lɛlʋ weyi ɛlabɩ kɩwɛɛkɩm sɔsɔm nabʋyʋ ɛzɩ halʋ caʋ nɛ ɖoŋ, piya sʋnʋʋ, mabʋtʋ siŋŋ, mɩlɩm sɔsɔm, yaa ɛyʋ kʋʋ mbʋ yɔ, nɛ ewoni ñʋndɩnaa cɔlɔ yɔ, pʋbʋ lɛ ɛtɩmaanɩ Pɔɔlɩ lɔŋ tasʋʋ yɔɔ.

▸ Ñʋʋ 14, tayʋʋ 14

Ðooo Edɛɛnɩ kaɖaɣ taa, Sataŋ wɛɛ nɛ ñakɩ pana se pitii ɛyaa yɔɔɔ. (Kiɖe Tɛɛ Tɔm 3:1-6; Natʋ 12:9) Ɛnawa se ye eyiɣdi ɖa-lɩmaɣza taa yɔ, ɛpɩzɩɣ etuyi-ɖʋ nɛ ɖɩla mbʋ pɩfɛyɩ ɖeu yɔ. (2 Kɔrɛntɩ 4:4; Yakubu 1:14, 15) Ɛtɩŋɩɣnɩ politiki, Ɛsɔ sɛtʋ, tadɩyɛ, aleɣya, sukuli nɛ wondu sakɩyɛ yɔɔ nɛ etuyuu ɛyaa se pɛwɛɛnɩ ɛ-lɩmaɣza nɛ pamaɣzɩ se pɩkɛ mbʋ pɩwɛ ɖeu yɔ.​—Yohanɛɛsɩ 14:30; 1 Yohanɛɛsɩ 5:19.

Sataŋ nawa se alɩwaatʋ ndʋ tɩkazɩ-ɩ se epeɣzini ɛyaa yɔ, tɩtɩɖɔɔ. Pʋyɔɔ ɛwɛɛ nɛ ɛñakɩ pana se epeɣzi ɛyaa sakɩyɛ. Mba pɛsɛɣ Yehowa yɔ, mba kpem ɛkɩlɩ sɔɔlʋʋ se epeɣzi. (Natʋ 12:12) Ye ɖɩtɩkpa ɖa-tɩ yɔ, Eleeu pɩzɩɣ nɛ ɛlɛɣzɩ ɖa-lɩmaɣza pazɩ pazɩ. (1 Kɔrɛntɩ 10:12) Yehowa sɔɔlaa se nesi ɖɔkɩyaa ɩwɛɛ ɖama cɔlɔ tam. (Maatiyee 19:5, 6, 9) Sɔnɔ ɛyaa sakɩyɛ ɩɩkpakɩɣ nesi ɖɔkʋʋ ɛzɩ ñɩm pʋyʋ yɔ, nɛ pamaɣzɩɣ se papɩzɩɣ nɛ pekizi ɖama kɛlɛʋ yem. Filimwaa nɛ teelee yɔɔ ɖʋtʋ sandɩɣ lɩmaɣza ana. Pɩwɛɛ se ɖɩcɛyɩ ɖa-tɩ nɛ lɩmaɣza wena ɛjaɖɛ yɔɔ ñɩma wɛnɩ nesi ɖɔkʋʋ yɔɔ yɔ, ataawɛɛnɩ ɖoŋ ɖɔ-yɔɔ.

 Nʋmɔʋ lɛɛkʋ ŋgʋ kɩ-yɔɔ Sataŋ tɩŋɩɣna se epeɣzi-ɖʋ ɖɔɖɔ yɔ lɛ tɩ-yɔɔ wɛʋ lɩmaɣza. (2 Timootee 3:4) Ye ɖɩtɩkpa ɖa-tɩ yɔ, ɖɩpɩzɩɣ ɖiyele ñam ñʋndɩnaa mba Yehowa lɩzaa yɔ. Pɩpɩzɩɣ pɩla se koobu abalɩñɩnʋ nɔɔyʋ kiziɣ se ɛɛɖɔŋ ɖʋtʋ ndʋ ɛgbɛyɛ taa ɛzʋtʋyaa laba yɔ, tɩ-yɔɔ. (Ebree 12:5) Yaa koobu halɩñɩnʋ nɔɔyʋ kaɖɩɣnɩ ɖʋtʋ ndʋ Yehowa laba se abalʋ ɛkɛnɩ hɔʋ ñʋʋdʋ yɔ.​—1 Kɔrɛntɩ 11:3.

Pɩwɛɛ se ɖɩñaɣ pana nɛ ɖitaayele nɛ Eleeu wɛɛnɩ ɖoŋ ɖa-lɩmaɣza yɔɔ. Ɛlɛ pɩwɛɛ se ɖɩwɛɛnɩ Yehowa lɩmaɣza nɛ ɖɩka ɖa-lɩmaɣza ‘ɛsɔdaa wondu yɔɔ.’​—Koloosi 3:2; 2 Kɔrɛntɩ 2:11.

▸ Ñʋʋ 16, tayʋʋ 9

Alɩwaatʋ ndʋ pɩwɩɣ-ɖʋ yɔ, ɖɩñakɩ pana se ɖɩcɔnɩ ɖa-kʋdɔŋ ɖeɖe camɩyɛ mbʋ pʋyɔɔ yɔ, ɖa-tɩŋa ɖɩsɔɔlaa se ɖɩwɛɛnɩ tɔnʋʋ taa alaafɩya. (Izaayii 38:21; Maarkɩ 5:25, 26; Luka 10:34) Sɔnɔ nʋmɔŋ weyi ɩ-yɔɔ ɖɔkɔtɔnaa nɛ kɔ cayaa tɩŋɩɣna nɛ pawaɣ kʋdɔmɩŋ yɔ, ɩtɔyɩ sakɩyɛ. Alɩwaatʋ ndʋ ɖɩñɩnɩɣ se ɖɩwaa ɖa-kʋdɔŋ nakʋyʋ yɔ, pɩcɛyaa se ɖɩlabɩnɩ tʋmɩyɛ Bibl paɣtʋ kila. Ðɩtaasɔɔ se Ɛsɔ Kewiyaɣ ɖeke pɩzɩɣna nɛ kawaa ɖa-kʋdɔmɩŋ kpaagbaa waʋ. Pɩtɩpɔzɩ se ɖɩka ɖa-lɩmaɣza kpeekpe ɖo-tomnaɣ taa alaafɩya yɔɔ nɛ ɖɩsɔɔ ɖa nɛ Yehowa ɖa-taabalɩyɛ yɔɔ.—Izaayii 33:24; 1 Timootee 4:16.

Pɩwɛɛ se ɖɩcɔnɩ camɩyɛ nɛ ɖikizi kʋdɔmɩŋ waʋ nʋmɔŋ weyi ɩ-taa ɖɩmaɣzɩɣ se pɩtɩla palakɩnɩ tʋmɩyɛ aleewaa ɖoŋ yɔ. (Wayɩ Wayɩ Paɣtʋ 18:10-12; Izaayii 1:13) Pʋcɔ nɛ ɖitisi kʋdɔmɩŋ waʋ nʋmɔʋ nakʋyʋ yaa kɔyɛ naɖɩyɛ lɛ, pɩwɛɛ se ɖɩtazɩ camɩyɛ nɛ ɖɩna se kʋdɔmɩŋ waʋ nʋmɔʋ ŋgʋ pɩkɛnaa nɛ ɛbɛ pɩɖʋʋ nesi. (Aduwa 14:15) Pɩtɩpɔzɩ se ɖɩsɔɔ se Sataŋ sɔɔlaa se ɖɩtɔlɩ feziŋ kɩdɛkɛdɩŋ yaʋ kpaca taa. Ye pɩlakɩ-ɖʋ se kʋdɔmɩŋ waʋ nʋmɔʋ nakʋyʋ labɩ nɔɔ kʋɖʋmaɣ nɛ feziŋ kɩdɛkɛdɩŋ yaʋ lakasɩ yɔ, pɩwɛɛ se ɖikizi nʋmɔʋ ŋgʋ.​—1 Pɩyɛɛrɩ 5:8.

▸ Ñʋʋ 16, tayʋʋ 18