PEEYIBAA ɛjaɖɛ yɔɔ lɔŋsɩnɖʋ weyi payaɣ se Spinoza yɔ, ɛyɔɔdaa se: “Mañaɣ pana se manɩɩ lalaa tɔm taa; mantɩsɔɔlɩ se pa-lakasɩ iyele nɛ mohoŋ-wɛ, mewii pɔ-yɔɔ yaa manpaɖɩ-wɛ.” Ye ŋkɛ wɩlɩyʋ yɔ, pɩwɛɛ se ŋñaɣ pana nɛ ŋnɩɩ ño-sukulibiya, pɩkpɛndɩnɩ nzɩ sɩ-lʋlɩyaa kɛ Yehowa Aseɣɖe Tɩnaa yɔ, sɩ-lɩmaɣza, wɛtʋ ndʋ tɩ-taa sɩwɛɛ yɔ nɛ si-tisuu taa. Nɛ pɩfɛyɩ kɛlɛʋ. Nabʋyʋ taa, piya nzɩ sɩpɩzɩɣ nɛ sɩkpɛzɩ nɩŋgbanzɩ nasɩyɩ hɔɔlɩŋ nɩɩyɩ taa, nɛ ŋpɩzɩɣ nɛ ŋmaɣzɩ se nɩŋgbanzɩ nzɩ sɩtɩmʋna. Ɛlɛ ye sɩ-Ɛsɔ sɛtʋ yaa ɛzɩma sɩsɔɔlaa se sɩcaɣ wezuu kɩbaŋʋ yɔ, pʋyɔɔ sɩkpɛzɩ nɩŋgbanzɩ nzɩ yɔ, pɩpɔzʋʋ se ŋkpaɣ alɩwaatʋ nɛ ŋmaɣzɩɣ pɩ-yɔɔ. Watch Tower Bible and Tract Society (ɛgbɛyɛ nɖɩ ɖɩlɩzɩɣ Yehowa Aseɣɖe Tɩnaa takayɩsɩ yɔ), nɖɩ lɩzɩnɩ hatʋ cabɩ takayaɣ kanɛ. Pɔñɔɔzɩ-kɛ se kasɩnɩ-ŋ nɛ ŋnɩɩ piya nzɩ sɩkɛ Yehowa Aseɣɖe Tɩnaa yɔ, sɩ-lakasɩ taa camɩyɛ. Ðɩtaɣ liu se ŋkaɣ kpaɣʋ alɩwaatʋ nɛ ŋkalɩ-kɛ camɩyɛ.

Ye pɔtɔm se ŋnɩɩ nɔɔyʋ tisuu taa yɔ, pɩɩwɩlɩɣ se pɩwɛɛ se ŋtisi ɛ-Ɛsɔ sɛtʋ wɩlɩtʋ yɔɔ. Mbʋ ɖɔɖɔ ye nɔɔyʋ ɛyɔɔdʋʋ ɛ-Ɛsɔ sɛtʋ tɔm yɔ, pɩɩwɩlɩɣ se ɛñɩkɩɣ lalaa yɔɔ se pasʋʋ ɛ-Ɛsɔ sɛtʋ taa. Ðɩɩñɩnɩɣ se ɖɩtɩŋnɩ hatʋ cabɩ takayaɣ kanɛ kɔ-yɔɔ nɛ ɖɩñɩɣ ña yaa ño-sukulibiya yɔɔ se ɩwɛɛnɩ Yehowa Aseɣɖe Tɩnaa tisuu. Ɛlɛ ɖɩñɩnɩɣ se ɖɩsɩnɩ-ŋ nɛ ŋtɩlɩ paɣtʋ kila nɛ tisuu mbʋ ño-sukulibiya nasɩyɩ lʋlɩyaa sɩnɩ-sɩ nɛ sɩwɛɛna yɔ. Piyeki nɛ ŋnɩɩ sɩ-tɔm taa nɛ pɩkɩlɩ nɛ ŋpɩzɩ nɛ ŋfalɩsɩ-sɩ camɩyɛ. Toovenim, pɩtɩkɛ paa ɛzɩmtaa piya lakasɩ lakɩ nɔɔ kʋɖʋmaɣ nɛ mbʋ sɩ-lʋlɩyaa wɩlɩ-sɩ yɔ, mbʋ pʋyɔɔ yɔ, paa weyi ɛfalɩsɩɣ ɛ-maɣmaɣ ɛ-ɛhʋyɛ.

Ɛzɩ lʋlɩyaa lalaa yɔ, Yehowa Aseɣɖe Tɩnaa sɔɔlaa se pe-piya iyele nɛ sukuli ŋgʋ sɩlakɩ yɔ, kɩwazɩ-sɩ camɩyɛ. Pʋyɔɔ peseɣtiɣ-sɩ se siyele nɛ ɖama nɩnʋʋ wɛɛ sɩ nɛ sɩ-wɩlɩyaa pɛ-hɛkʋ taa. Pɩtasɩ lɛ, lʋlɩyaa mba pɛkɛ Aseɣɖe Tɩnaa yɔ pa nɛ pe-piya pawɩlɩɣ pɛ-ɛsɩmɩyɛ wɩlɩyaa ɛzɩma paba nɩɣ pɔ-tɔm taa nɛ pawɩlɩɣ-wɛ ñamtʋ yɔ pʋyɔɔ.

Yehowa Aseɣɖe Tɩnaa kɛ Krɩstʋ ñɩma mba pasɩm-wɛ camɩyɛ ɛjaɖɛ kpeekpe yɔɔ yɔ. Ɛlɛ nabʋyʋ taa, ɛyaa ɩɩnɩɣ pɔ-tɔm taa camɩyɛ. Ðɩtaɣ liu se hatʋ cabɩ takayaɣ kanɛ, kakaɣ-ŋ sɩnʋʋ nɛ ŋnɩɩ Yehowa Aseɣɖe Tɩnaa piya nzɩ sɩkɛ ño-sukulibiya yɔ sɩ-tɔm taa camɩyɛ nɛ pɩkɩlɩ. Nɛ kɔzɩ kɔzɩ lɛ, ɖɩsɔɔlaa se ŋtɩlɩ mbʋ pʋyɔɔ nabʋyʋ taa, sɩpɔzʋʋ-ŋ se ŋha-sɩ waɖɛ nɛ sɩtaala mbʋ sukulibiya lɛɛsɩ lakɩ yɔ.