ƐZƖMA Bibl wɩlʋʋ tʋmɩyɛ tɔm cɛyɩ Yehowa Aseɣɖe Tɩnaa ɛsɩndaa yɔ pʋyɔɔ lɛ, ɛyaa nabɛyɛ pɩzɩɣ nɛ pamaɣzɩ se sukuli labʋ tɩkɛdɩnɩ-wɛ. Ɛlɛ tɔm ndʋ tɩtɩkɛ toovenim. Pɩsa nɛ wɩlɩyʋ nɔɔyʋ wɩlɩ lalaa lɛ, kajalaɣ lɛ pɩwɛɛ se ɛ-maɣmaɣ ɛkpɛlɩkɩ nɛ pɩpɔzʋʋ se pafalɩsɩ-ɩ nɛ pawɩlɩ-ɩ tɔm ɛzɩ pɩpɔzʋʋ yɔ. Ye mbʋ, pɩtasɩna se Yehowa Aseɣɖe Tɩnaa lakɩnɩ tʋmɩyɛ camɩyɛ tɔm  ndʋ pɛkpɛlɩkɩɣ sukuli taa yɔ lɛ, pɩlakɩ pɩnzɩ sakɩyɛ yɔ, sukulinaa nɛ kpɛlɩkʋʋ ɖʋtʋ ndɩ ndɩ ndʋ Watch Tower ɛgbɛyɛ laba yɔ tɩwɛɛ nɛ tɩwazɩɣ-wɛ ɖɔɖɔ. Pɩsɩnɩ Aseɣɖe Tɩnaa nɛ ɛyaa lalaa nɛ pɛɖɛɛnɩ ɛsɩndaa maɣzɩm taa, wezuu kɩbaŋʋ caɣʋ nʋmɔʋ taa, nɛ fezuu taa.

Kɩɖaʋ nakʋyʋ yɔ: Ajɛɛ sakɩyɛ taa, pɩlabɩ Yehowa Aseɣɖe Tɩnaa kaɖɛ kpem se pawɩlɩ tɔm ɛyaa mba paasɩŋ kalʋʋ yaa paasɩŋ maʋ yɔ, mbʋ pʋyɔɔ yɔ patihiɣ waɖɛ nɛ pala sukuli ɛzɩ pɩpɔzʋʋ yɔ. Pɩsa nɛ pɔcɔnɩ kaɖɛ nɖɩ ɖi-ɖeɖe lɛ, Watch Tower ɛgbɛyɛ labɩ ɖʋtʋ nɛ pawɩlɩɣ ɛyaa tɔm kalʋʋ nɛ tɔm maʋ.

Naajeeriya ɛjaɖɛ taa lɛ, pɩnaɣ 1949 taa papaɣzɩ ɖʋtʋ ndʋ, nɛ pawɩlɩɣ ɛyaa tɔm kalʋʋ nɛ tɔm maʋ. Ðʋtʋ ndʋ tiyeba nɛ Naajeeriya ɛjaɖɛ taa ñɩma kudokiŋ hiŋ sakɩyɛ kpɛlɩkɩ tɔm kalʋʋ. Akɔnta nakʋyʋ wɩlaa se Naajeeriya ɛjaɖɛ taa lɛ, Yehowa Aseɣɖe Tɩnaa 100 yɔɔ lɛ 90 sɩm kalʋʋ nɛ maʋ; ŋgʋ ye pakpaɣ peeɖe ɛyaa kpeekpe yɔ 100 yɔɔ lɛ, mba pasɩm kalʋʋ nɛ maʋ yɔ patɩtalɩ 50. Mɛkɩsiiki ɛjaɖɛ taa lɛ, pɩnaɣ 1946 taa papaɣzɩ ɖʋtʋ ndʋ. Ɛyaa mba pawɩlɩ tɔm kalʋʋ nɛ tɔm maʋ pɩnaɣ kʋɖʋmaɣ taa yɔ paacɛzɩ 6500 yɔɔ. Pɩwɩlɩɣ se ɛyaa mba pasɩnaa nɛ patɩlɩ kalʋʋ nɛ maʋ yɔ pɛcɛzɩ 100000. Pɩlakɩ pɩnzɩ sakɩyɛ yɔ, palabɩ ɖʋtʋ nɛ pawɩlɩɣ ɛyaa tɔm kalʋʋ nɛ tɔm maʋ ajɛɛ sakɩyɛ taa ɖɔɖɔ ɛzɩ Boolivii, Kameruni, Nepal nɛ Sambii mbʋ yɔ. Yehowa Aseɣɖe Tɩnaa lɩzɩ Appliquez-vous à la lecture et à l’écriture takayɩsɩ nɛ pɩcɛzɩ miiliyɔɔwaa lʋbɛ kʋnʋmɩŋ weyi ɩcɛzɩ 100 yɔ ɩ-taa.

Ajɛɛ wena a-taa palabɩ ɖʋtʋ nɛ pawɩlɩɣ ɛyaa tɔm kalʋʋ nɛ tɔm maʋ mbʋ yɔ, ɖoŋ ɖoŋ lɛ a-ñʋndɩnaa mba pɔcɔŋnɩ sukuli labʋ yɔɔ yɔ paha waɖɛ faaa. Kɩɖaʋ nakʋyʋ yɔ: Mɛkɩsiiki ɛjaɖɛ taa komina tʋmlaɖʋ nɔɔyʋ mawa se: “Mɛwɛnɩ ɛsɩmɩyɛ nɔɔ kʋɖʋmaɣ lɩmaɣza wena ɩwɛna yɔ a-yɔɔ, nɛ komina hɩɖɛ taa lɛ mahaɣ-mɩ samtʋ siŋŋ tʋmɩyɛ kɩbanɖɛ nɖɩ ɩlakɩ se pɩwazɩ samaɣ nɛ pɩsɩnɩ mba paasɩŋ kalʋʋ nɛ paasɩŋ maʋ yɔ. . . . Mantɩmɩɣ se ɖʋtʋ ndʋ ɩlaba nɛ ɩsɩɣnɩ ɛyaa se patɩlɩ kalʋʋ nɛ maʋ yɔ tɩɖɔ camɩyɛ.”

Bibl wɩlʋʋ tʋmɩyɛ tɔm cɛyɩ Yehowa Aseɣɖe Tɩnaa ɛsɩndaa siŋŋ, nɛ pʋyɔɔ lɛ pañakɩ pana se pɛwɛɛ niye nɛ pɩkpaɖɩ nɛ palɩzɩ lalaa Bibl wɩlɩtʋ taa camɩyɛ. Kɩɖaʋ nakʋyʋ yɔ: Agbaa wena awɛ ɛjaɖɛ kpeekpe yɔɔ yɔ acɛzɩ 119000 yɔɔ, nɛ a-taa paa nɖɩ taa lɛ pafalɩsɩɣ sukulibiya se pɩsɩnɩ-sɩ nɛ sɩwɛɛ niye samaɣ ɛsɩndaa tɔm yɔɔdʋʋ nɛ tɔm kalʋʋ hɔɔlʋʋ taa. Halɩ piya cikpesi ɖɔɖɔ, alɩwaatʋ ndʋ sɩtɩlɩɣ kalʋʋ yɔ sɩpɩzɩɣ sɩma sɩ-hɩla nɛ sɩmʋ falɩsʋʋ mbʋ; nɛ falɩsʋʋ mbʋ pɩwazɩɣ-sɩ ɖɔɖɔ hɔɔlɩŋ lɛɛŋ taa pɩkpɛndɩnɩ sukuli taa. Wɩlɩyaa sakɩyɛ yɔɔdaa se Aseɣɖe Tɩnaa piya yɔɔdʋʋ lɩmaɣza  wena sɩwɛna a-tɔm kpayɩ kpayɩ nɛ pɩkpaɖɩɣ.

Pɩtasɩ lɛ, peseɣti paa Yehowa Aseɣɖe Tɩnaa ɛgbɛyɛ nɖɩ lɛ se ɖɩwɛɛnɩ ɖi-Kewiyaɣ Kpaaŋ taa, yaa ɖenɖe ɖikpeɣliɣ nɛ ɖɩlakɩ kediɣzisi yɔ takayɩsɩ ɖɩzɩyɛ nɖɩ ɖɩ-taa nɛ Bibl kpɛlɩkʋʋ wondu, tɔm kpoŋ nɛ tɔm ñɩnʋʋ takayɩsɩ lɛɛsɩ yɔ. Mba payɩ powoki kediɣzisi Kewiyaɣ Kpaaŋ taa yɔ, papɩzɩɣ nɛ palabɩnɩ tʋmɩyɛ takayɩsɩ ɖɩzɩyɛ nɖɩ. Aseɣɖe Tɩnaa seɣtiɣ pa-agbaa taa ñɩma se pañaɣ pana kalʋʋ hɔɔlʋʋ taa. Nɛ peseɣtiɣ ɖɔɖɔ paa hɔʋ ŋgʋ lɛ se kɩwɛɛnɩ takayɩsɩ ɖɩzɩyɛ nɛ ɖɩ-taa lɛ paɖʋ takayɩsɩ sakɩyɛ  nɛ pɩsɩnɩ piya nɛ sɔsaa se pɔcɔnɩ pa-kɩcɛyɩm ɖeɖe.

Watch Tower tʋlɩ ɖɔɖɔ ɛgbɛyɛ sukulinaa mba pa-taa pafalɩsɩɣ Ɛsɔtɔm tiyiyaa halaa nɛ abalaa, nɛ sukulinaa mba pa-taa pafalɩsɩɣ abalaa mba pɛwɛnɩ wala pa-agbaa taa yɔ. Sukulinaa mba pawɩlɩɣ ɖɔɖɔ kpem se sukuli labʋ tɔm cɛyɩ Yehowa Aseɣɖe Tɩnaa ɛsɩndaa siŋŋ.