TƆM KƖKPƐLƖKƖTƲ 07
Ɛzɩma Yehowa wɛɛ?
Ŋmaɣzɩɣ se ɛzɩma Ɛsɔ Yehowa wɛɛ? Ɛkɛ weyi ŋñaŋɩ-ɩ siŋŋ yɔ? Yaa ŋmaɣzɩɣ se eposini-ŋ pɩdɩɩfɛyɩ ɛzɩ tɩɩnzɩ posinuu-ɖʋ yɔ? Yaa ŋmaɣzɩɣ se ɛwɛ ɖoŋ siŋŋ ɛzɩ kancʋʋlaɣ sɔsɔɔ yɔ, ɛlɛ ɛfɛyɩnɩ ɛyaa wɛtʋ? Ɛzɩma ɖeyi ɖeyi Yehowa wɛɛ? Bibl sɩɣnɩ-ɖʋ se ɖɩtɩlɩ ɛ-wɛtʋ. Kɩwɩlɩɣ-ɖʋ ɖɔɖɔ se ɛmaɣzɩɣ ɖɔ-yɔɔ.
1. Ɛbɛ yɔɔ ɖɩɩpɩzɩɣ nɛ ɖɩna Ɛsɔ?
«Ɛsɔ kɛ fezuu.» (Yohanɛɛsɩ 4:24) Ɛsɔ fɛyɩnɩ ɛyʋ tomnaɣ. Ɛkɛ fezuu nɛ ɛwɛ ɛsɔdaa, ŋgʋ ɖɩɩpɩzɩɣ nɛ ɖɩna peeɖe.
2. Wɛtʋ ndɩ ndɩ ndʋ Ɛsɔ wɛna yɔ, tɩ-taa natʋyʋ lɛ ndʋ?
Paa ɖɩɩpɩzɩɣ se ɖɩna Ɛsɔ yɔ, ye ɖɩkpɛlɩkaa nɛ ɖɩtɩlɩ-ɩ yɔ, ɖɩsɔɔlʋʋ-ɩ; mbʋ pʋyɔɔ yɔ ɖɩkaɣ naʋ se ɛkɛ weyi ɛwɛ keekee yɔ; nɛ ɛwɛnɩ wɛtʋ ndʋ yɔ, tɩ-wayɩ fɛyɩ. Bibl yɔɔdaa se: «Yehowa sɔɔlɩ siɣsiɣ wɛtʋ, nɛ ɛɛkaɣ lɔʋ mba pɛwɛ siɣsiɣ ɛ-ɛsɩndaa yɔ.» (Keɣa 37:28) Ɛwɛnɩ ɖɔɖɔ «sɔɔlɩm sɔsɔm nɛ ɛkɛ pʋtɔdɩyɛ nayʋ» nɛ ɛwɩlɩɣ wɛtʋ ndʋ kɔzɩ kɔzɩ mba pɛwɛ kʋñɔŋ nakʋyʋ taa yɔ. (Yakubu 5:11) «Yehowa ñɔtɩnɩ mba pa-laŋa pʋʋtaa yɔ; ɛyakɩ mba pitibi-wɛ yɔɔɔ yɔ pa-ñʋʋ.» (Keɣa 34:18, pɩ-tɛɛ tɔm) Nɛ ŋnawa se ɖa-lakasɩ pɩzɩɣ nɛ siyele nɛ Yehowa wɛɛ taa leleŋ taa yaa ɛnɩɩ siziŋ na? Ye nɔɔyʋ ɛlɩzaa se ɛlakɩ kɩdɛkɛdɩm yɔ, ɛɖʋʋ Yehowa ɖɩwɩzɩyɛ. (Keɣa 78:40, 41) Ɛlɛ ye ɛlɩzaa se ɛlakɩ kɩbam yɔ, ɛ-lakasɩ haɣ Yehowa taa leleŋ.—Kalɩ Aduwa 27:11.
3. Ɛzɩma Yehowa wɩlɩɣ-ɖʋ ɛ-sɔɔlɩm?
Yehowa wɛtʋ kpeekpe taa lɛ, sɔɔlɩm kpaɖɩna. Toovenim taa lɛ «Ɛsɔ kɛ sɔɔlɩm.» (1 Yohanɛɛsɩ 4:8) Yehowa tɩŋɩɣnɩ Bibl nɛ e-wondu kɩlɩzɩtʋ yɔɔ nɛ ɛwɩlɩɣ-ɖʋ sɔɔlɩm. (Kalɩ Tʋma Labʋ 14:17.) Maɣzɩ ɛzɩma ɛlɩzɩ-ɖʋ yɔ pɩ-yɔɔ nɛ ŋna. Ðɩpɩzɩɣ nɛ ɖɩna tɔlɩm kɩbam ndɩ ndɩ, ɖiwelisi minziikiwaa kɩbama nɛ ɖɩtɔɔ tɔɔnasɩ ndɩ ndɩ nɛ ɖɩnɩɩ si-leleŋ. Ɛsɔɔlaa se ɖɩnɩɩ wezuu leleŋ.
TAZƖ NƐ PILIMI
Tazɩ nɛ ŋna mbʋ pʋyɔɔ Yehowa tɩŋɩɣna nɛ ɛlakɩ tʋma wena awɛ piti siŋŋ yɔ. Nɛ pʋwayɩ lɛ, tazɩ ɖɔɖɔ nɛ ŋna ɛzɩma ɛlɩzɩɣ ɛ-wɛtʋ nɛ ɛwɩlɩɣ yɔ.
4. Fezuu kiɖeɖeu kɛnɩ ɖoŋ weyi Ɛsɔ lakɩnɩ tʋmɩyɛ yɔ
Ɛzɩ ɖɩlakʋʋ tʋma nɛ ɖe-nesi yɔ, mbʋ ɖɔɖɔ Ɛsɔ lakɩnɩ e-fezuu kiɖeɖeu tʋmɩyɛ. Bibl wɩlɩɣ se fezuu kiɖeɖeu tɩkɛ ɛyʋ, ɛlɛ kɩkɛ ɖoŋ weyi Ɛsɔ lakɩnɩ tʋmɩyɛ yɔ. Ɩkalɩ Luka 11:13 nɛ Tʋma Labʋ 2:17, nɛ pʋwayɩ lɛ ɩtazɩ tɔm tʋnɛ tɩ-taa:
-
Yehowa ‘pɩyɩɣ’ e-fezuu mba pɔpɔzʋʋ-ɩ kʋ yɔ pɔ-yɔɔ. Ye mbʋ, ŋmaɣzɩɣ se fezuu kiɖeɖeu kɛ ɛyʋ na? Yaa kɩkɛ ɖoŋ weyi Ɛsɔ lakɩnɩ tʋmɩyɛ yɔ? Ɛbɛ yɔɔ ŋcosi mbʋ?
Yehowa tɩŋɩɣnɩ e-fezuu kiɖeɖeu yɔɔ nɛ ɛlakɩ piti lakasɩ. Ɩkalɩ Keɣa 33:6 nɛ 2 Pɩyɛɛrɩ 1:20, 21; nɛ pʋwayɩ lɛ ɩtazɩ tɔm tʋnɛ tɩ-taa:
-
Mbʋ mbʋ Yehowa tɩŋnɩ e-fezuu kiɖeɖeu yɔɔ nɛ ɛlɩzɩ yɔ, pɩ-taa nabʋyʋ lɛ ɛbɛ?
5. Yehowa wɛnɩ wɛtʋ kɩbandʋ siŋŋ ndʋ tiseɣtiɣ-ɖʋ se ɖɩñɔtɩnɩ-ɩ yɔ
Paa Moyizi kaawɛɛ nɛ ɛsɛɣ Ɛsɔ camɩyɛ yɔ, ɛɛñɩnaɣ se ɛtɩlɩ ɛ-Lɩzɩyʋ camɩyɛ nɛ pɩkɩlɩ. Pʋyɔɔ eheyi Ɛsɔ se: «Yele nɛ mantɩlɩ ña-nʋmɔŋ, nɛ pɩsa nɛ mantɩlɩ-ŋ.» (Ejipiti Lɩʋ 33:13) Ɩkalɩ Ejipiti Lɩʋ 34:4-6, nɛ pʋwayɩ lɛ ɩtazɩ tɔm tʋnɛ tɩ-taa:
-
Yehowa wɛtʋ taa lɛ, ndʋ ɛlɩzaa nɛ ɛwɩlɩ Moyizi?
-
Yehowa wɛtʋ taa lɛ, ndʋ ŋkɩlɩ sɔɔlʋʋ?
6. Yehowa maɣzɩɣ ɛyaa yɔɔ
Ebree mba kaakɛ Yehowa samaɣ nɛ paakɛ ɖɔɖɔ yomaa Ejipiti ɛjaɖɛ taa. Alɩwaatʋ ndʋ palakaɣ kʋñɔŋ yɔ, ɛzɩma pɩlakaɣ Yehowa? Iwelisi Bibl taa tɔm ndʋ pakpaɣ TATAƔ yɔɔ yɔ yaa ɩkalɩ Ejipiti lɩʋ 3:1-10. Nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛbɛ kɛdaɣ kanɛ kɛkpɛlɩkɩɣ-ŋ se alɩwaatʋ ndʋ ɛyaa lakɩ kʋñɔŋ yɔ, ɛzɩma pɩlakɩ Yehowa?—Cɔnɩ kalɩtʋ 7 nɛ 8
-
Ŋmaɣzɩɣ se Yehowa sɔɔlaa se ɛsɩnɩ ɛyaa toovenim na? Nɛ ŋmaɣzɩɣ se ɛpɩzɩɣ nɛ ɛla mbʋ? Ɛbɛ yɔɔ?
7. Wondu kɩlɩzɩtʋ sɩɣnɩ-ɖʋ se ɖɩtɩlɩ Yehowa wɛtʋ
Yehowa tɩŋɩɣnɩ e-wondu kɩlɩzɩtʋ yɔɔ nɛ ɛwɩlɩɣ-ɖʋ ɛ-wɛtʋ. Ɩcɔnɩ VIDEO. Nɛ pʋwayɩ lɛ ɩkalɩ Roma mba 1:20; nɛ pʋbʋ wayɩ lɛ, ɩtazɩ tɔm tʋnɛ tɩ-taa.
-
Yehowa wɛtʋ ndʋ ŋnaɣ wondu ndʋ ɛlɩzaa yɔ tɩ-taa?
NABƐYƐ YƆƆDƲƲ SE: «Ɛsɔ tɩkɛ ɛyʋ keekee, ɛlɛ ɛkɛ ɖoŋ weyi ɩwɛ paa le yɔ.»
-
Suwe ñamaɣzɩɣ?
-
Ɛbɛ yɔɔ ŋmaɣzɩɣ mbʋ?
TOBI LƐ
Yehowa kɛ fezuu nɛ ɛwɛnɩ wɛtʋ ndʋ tiseɣtiɣ-ɖʋ se ɖɩñɔtɩnɩ-ɩ yɔ, nɛ tɩ-taa lɛ sɔɔlɩm kpaɖɩna.
Tɔm taa tazʋʋ
-
Ɛbɛ yɔɔ ɖɩɩpɩzɩɣ nɛ ɖɩna Yehowa?
-
Ɛbɛ fezuu kiɖeɖeu kɛnaa?
-
Yehowa wɛnɩ wɛtʋ sakɩyɛ, tɩ-taa natʋyʋ lɛ ndʋ?
WONDU LƐƐTƲ
Kpɛlɩkɩ Yehowa wɛtʋ ndʋ tɩkpaɖaa yɔ tɩ-taa naanza tɔm nɛ pɩkpaɖɩ nɛ pɩsɩnɩ-ŋ nɛ ŋtɩlɩ-ɩ nɛ pɩkpaɖɩ.
Kalɩ nɛ ŋna mbʋ pɩwɩlɩɣ kpayɩ kpayɩ se Ɛsɔ fɛyɩ paa wonuu ŋgʋ lɛ kɩ-taa yɔ.
«Dieu est-il partout?, Est-il omniprésent?» (Intɛrnɛɛtɩ yɔɔ tɔm ñʋʋ)
Kalɩ nɛ ŋna mbʋ pʋyɔɔ Bibl yaɣ fezuu kiɖeɖeu se Ɛsɔ nesi yɔ.
Pɩɩwɛ kaɖɛ abalʋ yʋlʋm nɔɔyʋ se etisi se Ɛsɔ maɣzɩɣ ɛ-yɔɔ. Kalɩ nɛ ŋna mbʋ piyeba nɛ ɛlɛɣzɩ ɛ-lɩmaɣza yɔ.
«J’ai maintenant le sentiment de pouvoir aider les autres» (Tour de Garde, 1er octobre, 2015)
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
