TƆM KƖKPƐLƖKƖTƲ 21
Ɛzɩma pɛwɛɛ nɛ posusuu laŋhɛzɩyɛ tɔm?
Pɩkazɩ pazɩ Yehowa tɩŋɩɣnɩ e-Kewiyaɣ yɔɔ nɛ eyele nɛ ɖa-kʋñɔmɩŋ tɩŋa sɩɩ tɩnaɣ. Pɩkɛ tɔm kɩbandʋ kpem nɛ pɩpɔzʋʋ se paa weyi ɛnɩɩ-tʋ. Yesu sɔɔlaa se ɛ-wayɩ tɩŋɩyaa iheyi paa anɩ tɔm ndʋ. (Maatiyee 28:19, 20) Ɛzɩma Yehowa Aseɣɖe Tɩnaa wɛɛ nɛ pɔɖɔŋ Yesu tɔm ndʋ tɩ-yɔɔ?
1. Ɛzɩma Maatiyee 24:14 taa tɔm wɛɛ nɛ tɩlakɩ sɔnɔ?
Yesu kaayɔɔdaa se: «Kewiyaɣ tɔm kɩbandʋ tʋnɛ, pakaɣ-tʋ susuu tɛtʋ kpeekpe yɔɔ.» (Maatiyee 24:14) Yehowa Aseɣɖe Tɩnaa wɛɛ nɛ palakɩ tʋmɩyɛ sɔsɔɖɛ ɖɩnɛ nɛ taa leleŋ. Ðɩwɛɛ nɛ ɖisusuu tɔm kɩbandʋ kedeŋa kpeekpe yɔɔ kʋnʋmɩŋ weyi ɩ-taa yɔ, ɩcɛzɩ 1000. Pɩpɔzʋʋ ɖʋtʋ kɩbandʋ nɛ pana ñaɣʋ siŋŋ pʋcɔ nɛ papɩzɩ nɛ pala tʋmɩyɛ sɔsɔɖɛ ɖɩnɛ. Yehowa ɖeke pɩzɩɣna nɛ ɛsɩnɩ-ɖʋ nɛ ɖɩla tʋmɩyɛ nɖɩ.
2. Pana wena ɖɩñakɩ se ɖɩpɩzɩ nɛ ɖisusi ɛyaa tɔm?
Ðisusuu tɔm paa le, ɖenɖe payɩ ɛyaa wɛɛ yɔ. Ɛzɩ kajalaɣ Krɩstʋ mba yɔ, ɖisusuu tɔm «kpaɣ ɖɩɣa nɛ ŋwolo ɖɩɣa.» (Tʋma Labʋ 5:42) Nʋmɔʋ ŋgʋ kɩsɩɣnɩ-ɖʋ se ɖɩpɩzɩ nɛ ɖɩyɔɔdɩnɩ ɛyaa miiliyɔɔwaa sakɩyɛ paa pɩnaɣ ŋga. Ɛyaa ɩɩwɛɣ pa-ɖɩsɩ taa paa ɛzɩmtaa; pʋyɔɔ lɛ, ɖisusuu tɔm samaɣ taa ɖɔɖɔ. Paa ɛzɩmtaa ɖɩñɩnɩɣ nʋmɔŋ ndɩ ndɩ weyi ɩ-yɔɔ ɖɩpɩzɩɣ ɖɩtɩŋna nɛ ɖiheyi ɛyaa lalaa Yehowa nɛ ɛ-tamasɩ pɔ-tɔm yɔ.
3. Anɩ pɩwɛɛ se esusi tɔm kɩbandʋ?
Pɩwɛɛ se toovenim Krɩstʋ mba tɩŋa isusi ɛyaa lalaa tɔm kɩbandʋ. Ða-tʋmɩyɛ nɖɩ ɖɩ-tɔm cɛyɩ ɖɛ-ɛsɩndaa siŋŋ. Ðɩñakɩ pana nɛ ɖisusuu tɔm ɛzɩ ɖɛ-wɛtʋ haɣʋ-ɖʋ nʋmɔʋ yɔ, mbʋ pʋyɔɔ yɔ ɖɩnawa se pɩyakɩ ɛyaa ñʋʋ. (Kalɩ 1 Timootee 4:16.) Paahɛyɩɣ-ɖʋ tʋmɩyɛ nɖɩ ɖɩ-yɔɔ mbʋ pʋyɔɔ yɔ Bibl yɔɔdaa se: «Ɩmʋ falaa, ɩha falaa.» (Maatiyee 10:7, 8) Pɩtɩkɛ ɛyaa tɩŋa welisiɣni-ɖʋ. Paa mbʋ yɔ, ɖiwoki pɩ-yɔɔ nɛ ɖisusuu tɔm mbʋ pʋyɔɔ yɔ pɩkɛ ɖɛ-Ɛsɔ sɛtʋ hɔɔlʋʋ nakʋyʋ nɛ pɩhaɣ Yehowa taa leleŋ.
TAZƖ NƐ PILIMI
Tazɩ nɛ ŋna pana wena Yehowa Aseɣɖe Tɩnaa ñakɩ nɛ posusuu tɔm ɛjaɖɛ kpeekpe yɔɔ nɛ ɛzɩma Yehowa sɩɣnɩ-wɛ yɔ.
Ɛjaɖɛ kpeekpe yɔɔ tɔm susuu: (A) Kosta Rika, (B) Etaazuunii, (C) Peenɛɛ, (D) Tayɩlandɩ, (E) Yap, (F) Suyɛɛdɩ
4. Ðɩñakɩ pana se ɖisusi tɔm ɛyaa kpeekpe
Yehowa Aseɣɖe Tɩnaa ñakɩ pana siŋŋ se posusi tɔm ɛyaa lona kpeekpe taa. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛbɛ tukuuni-ŋ alɩwaatʋ ndʋ ŋnaɣ pana wena Yehowa Aseɣɖe Tɩnaa ñakɩ nɛ posusuu tɔm yɔ?
Ɩkalɩ Maatiyee 22:39 nɛ Roma mba 10:13-15, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma ɖɔ-tɔm susuu wɩlɩɣ se ɖɩsɔɔlɩ ɛyaa lalaa?
-
Yehowa maɣzɩɣ suwe mba posusuu tɔm kɩbandʋ yɔ pɔ-yɔɔ? —Cɔnɩ kalɩtʋ 15.
5. Ða nɛ Ɛsɔ ɖɩkpɛndɩɣ nɛ ɖɩlakɩ tʋmɩyɛ
Kɩɖaŋ sakɩyɛ wɩlɩɣ se ɖa nɛ Ɛsɔ ɖɩlakɩnɩ tʋmɩyɛ. Kɩɖaŋ ɛnɩ ɩ-taa nakʋyʋ yɔ: Payaɣ koobu abalɩñɩnʋ nɔɔyʋ se Paul, ɛwɛ Nuvɛɛlɩ Zelandɩ ɛjaɖɛ taa. Esusaɣ tɔm ɖanaɣ nakɛyɛ yɔɔ kpaɣ ɖɩɣa nɛ ŋwolo ɖɩɣa lɛ, ɛkatɩ halʋ nɔɔyʋ. Evemiye nɖɩ ɖi-wiye, halʋ ɛnʋ ɛɛtɩm tanaŋ tɛɛ. Adɩma ana a-taa ɛɛlabɩnɩ tʋmɩyɛ Yehowa hɩɖɛ nɛ ɛpɔzɩ-ɩ se eyele nɛ nɔɔyʋ kɔɔ nɛ ɛna-ɩ. Paul yɔɔdaa se: «Ñɩɣtʋ naadozo wayɩ lɛ, mantalɩ halʋ ɛnʋ ɛ-nɔnɔɔ taa.»
Ɩkalɩ 1 Kɔrɛntɩ mba 3:9, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma tɩyɛ Nuvɛɛlɩ Zelandɩ ɛjaɖɛ taa kɩɖaʋ kʋnɛ nɛ kɩɖaŋ lɛɛŋ weyi ɩnɩɣzɩnɩ-kʋ yɔ, ɩwɩlɩɣ se Yehowa ɖiyiɣni tɔm susuu tʋmɩyɛ?
Ɩkalɩ Tʋma Labʋ 1:8, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ pɩpɔzʋʋ se Yehowa ɛsɩnɩ-ɖʋ tɔm susuu tʋmɩyɛ taa?
Ŋŋsɩm-tʋ?
Paa kpɩtaʋ ŋgʋ lɛ, pafalɩsɩɣ-ɖʋ kpɩtaʋ hɛkʋ taa kediɣzaɣ taa se pɩsɩnɩ-ɖʋ nɛ ɖɩla tɔm susuu tʋmɩyɛ camɩyɛ. Ye ŋtɛm wobu kediɣzaɣ ŋga ka-taa yɔ, ŋmaɣzɩɣ suwe falɩsʋʋ mbʋ pɩ-yɔɔ?
6. Ðɩñaŋ paɣtʋ ndʋ Ɛsɔ ɖʋwa se ɖisusi tɔm yɔ
Kajalaɣ pɩnzɩ mɩnʋʋ taa, koyindinaa kaañaɣ pana se paɖɩɣ nʋmɔʋ Yesu wayɩ tɩŋɩyaa nɛ pataapɩzɩ nɛ posusi tɔm. Kajalaɣ pɩnzɩ mɩnʋʋ taa Krɩstʋ mba kaalʋbɩ waɖɛ nɖɩ paawɛnɩ «paɣtʋ ɛsɩndaa» se posusi «tɔm kɩbandʋ» yɔ ɖɩ-yɔɔ. (Filiipi mba 1:7) Mbʋ ɖɔɖɔ Yehowa Aseɣɖe Tɩnaa lakɩ sɔnɔ. a
Ɩkalɩ Tʋma Labʋ 5:27-42, nɛ pʋwayɩ lɛ ɩtazɩ tɔm tʋnɛ tɩ-taa:
NƆƆYƲ PƖZƖƔ NƐ ƐPƆZƖ SE: «Ɛbɛ yɔɔ Yehowa Aseɣɖe Tɩnaa susuu tɔm kpaɣ ɖɩɣa nɛ ŋwolo ɖɩɣa?»
-
Ɛzɩma ŋpɩzɩɣ nɛ ŋcosi?
TOBI LƐ
Yesu ɖʋ paɣtʋ ɛ-wayɩ tɩŋɩyaa se posusi tɔm kɩbandʋ ajɛɛ kpeekpe. Yehowa wɛɛ nɛ ɛsɩɣnɩ ɛ-samaɣ tʋmɩyɛ nɖɩ ɖɩ-labʋ taa.
Tɔm taa tazʋʋ
-
Ɛzɩma posusuu tɔm kɩbandʋ ɛjaɖɛ kpeekpe yɔɔ?
-
Ɛzɩma ɖɔ-tɔm susuu wɩlɩɣ se ɖɩsɔɔlɩ ɛyaa lalaa?
-
Ŋmaɣzɩɣ se tɔm susuu tʋmɩyɛ pɩzɩɣ nɛ pɩha-ɖʋ taa leleŋ na? Ɛbɛ yɔɔ?
WONDU LƐƐTƲ
Cɔna nɛ ŋna ɛzɩma Yehowa Aseɣɖe Tɩnaa susuu tɔm tɛtʋ sɔsɔtʋ taa yɔ.
Ɛbɛ Yehowa Aseɣɖe Tɩnaa laba se papɩzɩ nɛ pakatɩ kʋyʋʋ ɖʋyaa?
Cɔna nɛ ŋna ɛzɩma halʋ nɔɔyʋ hiɣ taa leleŋ alɩwaatʋ ndʋ ɛkpaɣ ɛ-alɩwaatʋ nɛ esusi lalaa tɔm yɔ.
Kalɩ nɛ ŋna ɛzɩma Yehowa Aseɣɖe Tɩnaa lʋbɩ tɔm hʋyaa ɛsɩndaa nɛ pawa nɛ piyele nɛ tɔm kɩbandʋ susuu tʋmɩyɛ ɖɛɛnɩ ɛsɩndaa yɔ.
a Ɛsɔ hanɩ-ɖʋ nʋmɔʋ se ɖisusi tɔm. Pʋyɔɔ lɛ, pɩtɩcɛyɩ se ñʋndɩnaa nabɛyɛ ɩha nʋmɔʋ Yehowa Aseɣɖe Tɩnaa pʋcɔ nɛ pala tɔm susuu tʋmɩyɛ.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
