TƆM KƖKPƐLƖKƖTƲ 25
Kaɖʋwa ŋga Ɛsɔ wɛnɩ ɖɔ-yɔɔ?
Bibl yɔɔdʋʋ se ɛyʋ «wezuu wɛ tobi nɛ kisuni kʋñɔmɩŋ.» (Yɔɔb 14:1) Mbʋ Ɛsɔ kaasɔɔlaa se ɖe-wezuu caɣʋ ɛwɛɛ? Ye pɩtɩkɛ mbʋ, kaɖʋwa ŋga ɛwɛnɩ ɖɔ-yɔɔ? Kakaɣ labʋ wiɖiyi? Bibl cosuu tɔm ndʋ yɔ, tɩhɛzɩɣ ɖa-laŋa siŋŋ. Yele nɛ ɖɩkpɛlɩkɩ nɛ ɖɩtɩlɩ-tʋ.
1. Ɛzɩma Yehowa sɔɔlaa se ɖe-wezuu caɣʋ ɛwɛɛ?
Yehowa sɔɔlaa se piɖeni-ɖʋ siŋŋ ɖe-wezuu caɣʋ taa. Kajalaɣ ɛyaa mba Ɛsɔ lɩzaa yɔ, payaɣ-wɛ se Aɖam nɛ Ɛva. Ɛsɔ lɩzɩ-wɛ lɛ, ɛsɩɩ-wɛ paradisuu nakʋyʋ taa, kɩɩwɛ kajʋka pɩdɩɩfɛyɩ, payaɣ-kʋ se Edɛɛnɩ kaɖaɣ. Pʋwayɩ lɛ, «Ɛsɔ wazɩ-wɛ, nɛ Ɛsɔ heyi-wɛ se: “Ɩlʋlɩ nɛ ɩɖɔɔ, isu tɛtʋ yɔɔ nɛ ɩwɛɛnɩ ɖoŋ tɩ-yɔɔ.”» (Kiɖe Tɛɛ Tɔm 1:28) Yehowa kaasɔɔlaa se palʋlɩ piya, pawalɩsɩ paradisuu nɛ kɩtalɩ tɛtʋ kpeekpe yɔɔ nɛ pɔcɔnɩ kpɩna yɔɔ. Ɛ-kaɖʋwa lɛ se ɛyaa kpeekpe ɩwɛɛnɩ alaafɩya ŋgʋ kɩtalɩ pilim yɔ nɛ pacaɣ wezuu tam tam.
Paa pɩtɩɖɔ ɛzɩ Ɛsɔ kaasɔɔlʋʋ kiɖe tɛɛ yɔ, a ɛtɩlɛɣzɩ ɛ-kaɖʋwa. (Izaayii 46:10, 11) Halɩ nɛ sɔnɔ ɛsɔɔlaa se ɛyaa ɩcaɣ wezuu tam tam wɛtʋ ndʋ tɩtalɩ pilim yɔ tɩ-taa.—Kalɩ Natʋ 21:3, 4.
2. Ɛbɛ pɩwɛɛ se ɖɩla nɛ ɖɩpɩzɩ nɛ ɖɩcaɣ wezuu kɩbaŋʋ sɔnɔ?
Yehowa lɩzɩ ɛyʋ lɛ, ɛɖʋ ɛ-taa fezuu taa kɩcɛyɩm, pʋ-tɔbʋʋ se ɛzɩma pɩwɛɛ se ɛsɛɛ Ɛsɔ yɔ, pɩ-kɔɖɛyɩ. (Kalɩ Maatiyee 5:3-6.) Ɛsɔ sɔɔlaa se taabalɩyɛ kɩbanɖɛ ɛwɛɛ ɖa nɛ ɩ ɖɛ-hɛkʋ taa, «[ɖɩɖɔ] ɛ-nʋmɔŋ kpeekpe taa» nɛ ɖɩsɛɛ-ɩ nɛ «[ɖa]-laŋɩyɛ kpeekpe.» (Wayɩ Wayɩ Paɣtʋ 10:12; Keɣa 25:14) Ye ɖɩlakɩ mbʋ yɔ, ɖɩwɛɣ koboyaɣ taa, paa ɖɩkatɩɣ kala yɔ. Alɩwaatʋ ndʋ ɖɩsɛɣ Yehowa yɔ, ɖe-wezuu caɣʋ wɛɣnɩ tɔbʋʋ nɩʋ mbʋ pʋyɔɔ yɔ ɖɩwɛɛ nɛ ɖɩcakɩ wezuu ɛzɩ ɛsɔɔlʋʋ yɔ.
TAZƖ NƐ PILIMI
Tazɩ nɛ ŋna sɔɔlɩm sɔsɔm mbʋ Yehowa lɩzaa nɛ ɛwɩlɩ alɩwaatʋ ndʋ ɛñɔɔzaɣ tɛtʋ se ɛyaa ɩcaɣ tɩ-yɔɔ yɔ nɛ tɔm ndʋ Bibl yɔɔdʋʋ pɩlɩɩnɩ wezuu kaɖʋwa yɔɔ yɔ.
3. Yehowa kaɖʋwa lɛ se ɛyaa ɩcaɣ wezuu kɩbaŋʋ ŋgʋ kɩ-wayɩ fɛyɩ yɔ
Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛbɛ yɔɔ Ɛsɔ lɩzɩ tɛtʋ nɛ tɩwɛɛ kajʋka pɩdɩɩfɛyɩ?
Ɩkalɩ Eklezɩyasɩtɩ 3:11, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ mayaɣ kanɛ kɛkpɛlɩkɩɣ-ŋ Yehowa yɔɔ?
4. Kaɖʋwa ŋga Yehowa kaawɛna yɔ katɩlɛɣzɩ
Ɩkalɩ Keɣa 37:11, 29 nɛ Izaayii 55:11, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma ɖɩlaba nɛ ɖɩna se kaɖʋwa ŋga Yehowa kaawɛnɩ ɖɔ-yɔɔ yɔ katɩlɛɣzɩ?
Papɩzɩɣ nɛ pɔñɔɔzɩ ɖɩɣa ŋga kɛwɛɛkaa yɔ. Mbʋ ɖɔɖɔ paa ɛyaa sakɩyɛ ɩɩcɔŋnɩ tɛtʋ yɔɔ camɩyɛ yɔ, Ɛsɔ kaɣ-tʋ ñɔɔzʋʋ nɛ ɛha-tʋ mba pɔsɔɔlɩ-ɩ yɔ.
5. Alɩwaatʋ ndʋ ɖɩsɛɣ Yehowa yɔ, ɖe-wezuu caɣʋ wɛɣnɩ tɔbʋʋ nɩʋ
Ye ɖɩsɩm wezuu caɣʋ kaɖʋwa yɔ, ɖihikiɣ taa leleŋ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Alɩwaatʋ ndʋ Terumi tɩlɩ wezuu caɣʋ kaɖʋwa yɔ, ɛzɩma pɩwazɩ-ɩ?
Ɩkalɩ Eklezɩyasɩtɩ 12:13, nɛ pʋwayɩ lɛ ɩtazɩ tɔm tʋnɛ tɩ-taa:
-
Mbʋ Yehowa labɩ-ɖʋ yɔ pɩfɛyɩ yɔɔdʋʋ, ye mbʋ pɩpɔzaa se pituyi-ɖʋ nɛ ɖɩlabɩ-ɩ we?
NƆƆYƲ PƖZƖƔ NƐ ƐPƆZƖ SE: «Wezuu caɣʋ kaɖʋwa lɛ ŋga?»
-
Ɛzɩma ŋpɩzɩɣ nɛ ŋcosi?
TOBI LƐ
Yehowa sɔɔlaa se ɖɩcaɣ wezuu tɛtʋ yɔɔ tam tam, wɛtʋ ndʋ tɩtalɩ pilim yɔ tɩ-taa. Ye ɖɩsɛɣ Ɛsɔ nɛ ɖa-laŋɩyɛ pilim yɔ, ɖe-wezuu caɣʋ wɛɣnɩ tɔbʋʋ nɩʋ, kpaɣnɩ sɔnɔ nɛ pɩɖɛɛ tam tam.
Tɔm taa tazʋʋ
-
Kiɖe tɛɛ lɛ, kaɖʋwa ŋga Yehowa kaawɛnɩ Aɖam nɛ Ɛva pɔ-yɔɔ?
-
Ɛzɩma ɖɩlaba nɛ ɖɩna se kaɖʋwa ŋga Ɛsɔ kaawɛnɩ kiɖe tɛɛ yɔ katɩlɛɣzɩ?
-
Ɛbɛ pɩwɛɛ se ŋla nɛ ñe-wezuu caɣʋ wɛɛnɩ tɔbʋʋ nɩʋ?
WONDU LƐƐTƲ
Kalɩ nɛ ŋna mbʋ pɩwɩlɩɣ se Edɛɛnɩ kaɖaɣ kaawɛ lone naɖɩyɛ taa keekee yɔ.
«Le jardin d’Éden—Un mythe ?» (La Tour de Garde, 1er janvier 2011)
Kalɩ nɛ ŋna mbʋ pʋyɔɔ ɖa-taa pɩzɩɣ nɛ pɩtɛ se tɛtʋ kaɣ wɛʋ tam tam yɔ.
Kalɩ nɛ ŋna tɔm ndʋ Bibl wɩlɩɣ pɩlɩɩnɩ mbʋ pɩwɛɛ se ŋla nɛ ñe-wezuu wɛɛnɩ tɔbʋʋ nɩʋ yɔ, pɩ-yɔɔ yɔ.
Cɔna nɛ ŋna ɛzɩma abalʋ weyi ɛmaɣzaɣ se ɛwɛnɩ pɩtɩŋa payɩ yɔ, ɛkɔma nɛ eɖiɣzina se nabʋyʋ tɛɖɩɣ-ɩ yɔ.
a Ñʋʋ ŋgʋ kɩkɔŋ yɔ kɩ-taa, ɖɩkaɣ naʋ mbʋ pɩ-cɔlɔ pɩlɩnaa nɛ pɩtɩɖɔ ɛzɩ Ɛsɔ kaaɖʋʋ kiɖe tɛɛ yɔ.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
