TƆM KƖKPƐLƖKƖTƲ 28
Wɩlɩ nɛ-ɛsɩmɩyɛ Yehowa nɛ Yesu mbʋ palabɩ-ŋ yɔ pɩ-yɔɔ
Ye ña-taabalʋ nɔɔyʋ ɛlabɩ-ŋ kʋjɔʋ kɩbaŋʋ nakʋyʋ yɔ ɛzɩma pɩlakɩ-ŋ? Pɩtʋʋ fɛyɩ se pɩlakɩ-ŋ leleŋ nɛ ŋsɔɔlaa se ŋwɩlɩ-ɩ ñɛ-ɛsɩmɩyɛ kʋjɔʋ ŋgʋ kɩ-yɔɔ. Yehowa nɛ Yesu palabɩ-ɖʋ kʋjɔʋ sɔsɔʋ ŋgʋ yɔ, kɩ-wayɩ fɛyɩ. Kʋjɔʋ ŋgʋ palabɩ-ɖʋ? Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ kɩ-yɔɔ?
1. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ ɖɛ-ɛsɩmɩyɛ Ɛsɔ nɛ Krɩstʋ yɔ ɩ-taa nakʋyʋ lɛ ŋgʋ?
Bibl heyiɣ-ɖʋ se «weyi ɛwɛɣnɩ tisuu [Yesu] yɔɔ yɔ,» ɛpɩzɩɣ nɛ ɛcaɣ wezuu tam. (Yohanɛɛsɩ 3:16) Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ tisuu? Pɩwɛɛ se ɖɩtɩŋnɩ lɩmaɣza wena ɖɩkpakɩɣ nɛ mbʋ ɖɩlakɩ yɔ pɩ-yɔɔ nɛ ɖɩlɩzɩ ɖe-tisuu mbʋ nɛ ɖɩwɩlɩ. (Yakubu 2:17) Alɩwaatʋ ndʋ ɖɩtɩŋɩɣnɩ mbʋ ɖɩlakɩ nɛ tɔm ndʋ ɖɩyɔɔdʋʋ yɔ tɩ-yɔɔ nɛ ɖɩwɩlɩɣ ɖe-tisuu yɔ, ɖɩcɛyɩsɩɣ taabalɩyɛ nɖɩ ɖɩwɛ ɖa nɛ Yesu nɛ ɛ-Caa Yehowa ɖɛ-hɛkʋ taa yɔ.—Kalɩ Yohanɛɛsɩ 14:21.
2. Ŋgee ɖʋtʋ ndʋ sɩɣnɩ-ɖʋ se ɖɩwɩlɩ ɖɛ-ɛsɩmɩyɛ mbʋ Yehowa nɛ Yesu palabɩ-ɖʋ yɔ pɩ-yɔɔ?
Ðanaɣ kɛdɛzaɣ ñɩŋga ŋga Yesu caɣ wezuu tɛtʋ yɔɔ pʋcɔ nɛ ɛsɩkɩ yɔ kɔ-yɔɔ, eheyi ɛ-wayɩ tɩŋɩyaa nʋmɔʋ lɛɛkʋ ŋgʋ kɩ-yɔɔ pɩwɛɛ se patɩŋna nɛ pawɩlɩ pɛ-ɛsɩmɩyɛ ɛ-kɩlaʋ yɔɔ yɔ. Ɛlabɩ ŋgee sɔnzɩ nasɩyɩ, nzɩ Bibl yaɣ se «Kɩbaɣlʋ ɖanaɣ tɔɔnaɣ;» nɛ nzɩ payaɣ ɖɔɖɔ se «Yesu sɩm yɔɔ tɔzʋʋ sɔnzɩ.» (1 Kɔrɛntɩ mba 11:20) Yesu ɖʋ paɣtʋ sɔnzɩ nzɩ sɩ-yɔɔ. Ɛyɔɔdaa se: «Ɩwɛɛ nɛ ɩlakɩ mbʋ nɛ ɩtɔzʋʋnɩ mɔ-yɔɔ.» (Luka 22:19) Alɩwaatʋ ndʋ ɖiwoki Yesu sɩm yɔɔ tɔzʋʋ sɔnzɩ taa yɔ, ɖɩwɩlɩɣ se ɖɩwɛnɩ ɛsɩmɩyɛ sɔɔlɩm sɔsɔm mbʋ Yehowa nɛ Yesu pɛwɛnɩ ɖɔ-yɔɔ yɔ pɩ-yɔɔ.
TAZƖ NƐ PILIMI
Tazɩ nɛ ŋna nʋmɔŋ lɛɛŋ weyi ɩ-yɔɔ ŋpɩzɩɣ ŋtɩŋna nɛ ŋwɩlɩ ñɛ-ɛsɩmɩyɛ sɔɔlɩm mbʋ Yehowa nɛ Yesu pɛwɛnɩ ɖɔ-yɔɔ yɔ pɩ-yɔɔ yɔ. Tazɩ ɖɔɖɔ nɛ ŋna ɛzɩma Krɩstʋ sɩm yɔɔ tɔzʋʋ sɔnzɩ tɔm cɛyɩ pɩdɩɩfɛyɩ yɔ.
3. Ðɛ-ɛsɩmɩyɛ seɣtiɣ-ɖʋ se ɖɩla mbʋ pɩpɔzʋʋ yɔ
Kpaɣ se lɩm kpakaɣ-ŋ nɛ nɔɔyʋ kɔɔ nɛ ɛya ña-ñʋʋ. Ŋkaɣ sum yem, mbʋ ɛyʋ ɛnʋ ɛlabɩ-ŋ yɔ pɩ-yɔɔ? Yaa ŋkaɣ tɩŋnʋʋ nʋmɔŋ nɩɩyɩ yɔɔ nɛ ŋwɩlɩ-ɩ ñɛ-ɛsɩmɩyɛ?
Yehowa kpaɣʋ ɛ-Pɩyalʋ nɛ ɛlaa ɖɔ-yɔɔ yɔ, ɛyabɩ ɖe-weziŋ ñʋʋ. Ɩkalɩ 1 Yohanɛɛsɩ 4:8-10, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ Yesu kɩlaʋ kɛ kʋjɔʋ ŋgʋ kɩwɛ ŋgee kpem yɔ?
-
Alɩwaatʋ ndʋ ŋmaɣzɩɣ mbʋ Yehowa nɛ Yesu palabɩ-ŋ yɔ pɩ-yɔɔ yɔ, ɛzɩma pɩlakɩ-ŋ?
Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ mbʋ Yehowa nɛ Yesu palabɩ-ɖʋ yɔ pɩ-yɔɔ? Ɩkalɩ 2 Kɔrɛntɩ mba 5:15 nɛ 1 Yohanɛɛsɩ 4:11; 5:3. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm tʋnɛ tɩ-taa:
-
Ɛzɩ mayaɣ kanɛ kɔyɔɔdʋʋ yɔ, ɛbɛ ɖɩpɩzɩɣ ɖɩla nɛ ɖɩwɩlɩ ɖɛ-ɛsɩmɩyɛ?
4. Maɣzɩnɩ Yesu
Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ ɖɛ-ɛsɩmɩyɛ yɔ ŋgʋ yɔ: Ðɩmaɣzɩnɩ Yesu. Ɩkalɩ 1 Pɩyɛɛrɩ 2:21, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma ŋpɩzɩɣ nɛ ŋɖɔ Yesu nɩŋgbanzɩ taa ɖeyi ɖeyi?
Yesu kaasɔɔlɩ Ɛsɔtɔm, eesusi tɔm kɩbandʋ nɛ ɛɛsɩnɩ ɛyaa lalaa.
5. Wolo Yesu sɩm yɔɔ tɔzʋʋ sɔnzɩ ɖɩlaɖɛ
Pɩsa nɛ ɩtɩlɩ ɛzɩma paalabɩ kajalaɣ Kɩbaɣlʋ ɖanaɣ tɔɔnaɣ sɔnzɩ lɛ, ɩkalɩ Luka 22:14, 19, 20; nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma paalabɩ Kɩbaɣlʋ ɖanaɣ tɔɔnaɣ sɔnzɩ?
-
Ɛbɛ kpɔnɔ nɛ vɛɛ pasɩŋnaa?—Cɔnɩ kalɩtʋ 19 nɛ 20.
Yesu kaasɔɔlaa se ɛ-tɔmkpɛlɩkɩyaa ɩlakɩ Kɩbaɣlʋ ɖanaɣ tɔɔnaɣ sɔnzɩ tam kʋɖʋm pɩnaɣ taa. Pʋyɔɔ Yehowa Aseɣɖe Tɩnaa kpeɣliɣ tam kʋɖʋm pɩnaɣ taa nɛ pɔtɔzʋʋ Yesu sɩm yɔɔ ɖeyi ɖeyi ɛzɩ ɛɛyɔɔdʋʋ se pala yɔ. Pɩsa nɛ ɩna mbʋ pʋyɔɔ kediɣzaɣ ŋga kɔ-tɔm cɛyaa yɔ lɛ, ɩcɔnɩ VIDEO. Pʋwayɩ lɛ ɩtazɩ tɔm tʋnɛ tɩ-taa.
-
Ɛzɩma palakɩ Yesu sɩm yɔɔ tɔzʋʋ sɔnzɩ?
Nabʋyʋ kpɔnɔ nɛ vɛɛ pasɩŋnaa. Kpɔnɔ sɩŋnɩ Yesu tomnaɣ ŋga katalɩ pilim yɔ, nɛ ɛkpaɣ-kɛ nɛ ɛlaa ɖɔ-yɔɔ. Vɛɛ sɩŋnɩ ɛ-calɩm.
NABƐYƐ YƆƆDƲƲ SE: «Ñɩtɩ nɛ ŋtisi Yesu yɔɔ, ŋhikiɣ ñʋʋ yabʋ.»
-
Ɛzɩma ŋpɩzɩɣ nɛ ŋtɩŋnɩ Yohanɛɛsɩ 3:16 nɛ Yakubu 2:17 yɔɔ nɛ ŋwɩlɩ se Yesu yɔɔ tisuu ɖeke tɩmaɣ?
TOBI LƐ
Ye ɖɩwɛnɩ tisuu Yesu yɔɔ nɛ ɖiwoki ɛ-sɩm yɔɔ tɔzʋʋ sɔnzɩ ɖɩlaɖɛ yɔ, pʋbʋ lɛ ɖɩwɩlɩɣ ɖɛ-ɛsɩmɩyɛ mbʋ ɛlabɩ-ɖʋ yɔ pɩ-yɔɔ.
Tɔm taa tazʋʋ
-
Ye pɔtɔm se ɖɩwɛɛnɩ tisuu Yesu yɔɔ yɔ, pʋ-tɔbʋʋ lɛ suwe?
-
Ɛbɛ ŋsɔɔlaa se ŋla nɛ ŋwɩlɩnɩ ñɛ-ɛsɩmɩyɛ Yehowa nɛ Yesu mbʋ palabɩ-ŋ yɔ pɩ-yɔɔ?
-
Ɛbɛ yɔɔ pɩcɛyɩ siŋŋ se ŋwolo Yesu sɩm yɔɔ tɔzʋʋ sɔnzɩ ɖɩlaɖɛ?
WONDU LƐƐTƲ
Ɛbɛ Krɩstʋ sɩm seɣtiɣ-ɖʋ se ɖɩla?
Kpɛlɩkɩ tɔm lɛɛtʋ pɩlɩɩnɩ mbʋ tisuu kɛnaa nɛ ɛzɩma ŋpɩzɩɣ nɛ ŋlɩzɩ-pʋ nɛ ŋwɩlɩ yɔ pɩ-yɔɔ.
«Ðɩwɛɛnɩ tisuu Yehowa lidaʋ tɔm yɔɔ» (Feŋuu Tilimiye, octobre 2016)
Kalɩ tɔm ñʋʋ «Je me sens pure et j’aime la vie», nɛ ŋna ɛzɩma halʋ nɔɔyʋ kpɛlɩkɩ tɔm pɩlɩɩnɩ Yesu kɩlaʋ yɔɔ nɛ ɖoŋ weyi pɩwɛnɩ e-wezuu caɣʋ yɔɔ yɔ.
«La Bible transforme des vies» (La Tour de Garde, 1er août 2011)
Kalɩ nɛ ŋna mbʋ pʋyɔɔ ɛyaa cabɩ yem tɔkɩnɩ kpɔnɔ nɛ pɔñɔʋ vɛɛ Yesu sɩm yɔɔ tɔzʋʋ sɔnzɩ taa yɔ.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
