TƆM KƖKPƐLƖKƖTƲ 29
Ɛbɛ pɩtɛŋnɩ ɛyʋ weyi ɛsɩba yɔ?
Ñɛ-ɛyʋ kʋsɔɔlʋ nɔɔyʋ sɩba? Siziŋ nɩʋ alɩwaatʋ ndʋ tɩ-taa ŋpɩzɩɣ nɛ ŋpɔzɩ se: «Ɛbɛ pɩtɛŋnɩ ɛyʋ weyi ɛsɩba yɔ? Ɛzɩ lidaʋ nakʋyʋ wɛɛ se ɖɩkaɣ tasʋʋ naʋ ɖɛ-ɛyaa kʋsɔɔlaa mba pasɩba yɔ?» Tɔm ñʋʋ kʋnɛ nɛ ŋgʋ kɩkɔŋ yɔ kɩ-taa, ɖɩkaɣ naʋ ɛzɩma Bibl cosi tɔm ndʋ tɩ-yɔɔ yɔ nɛ ɛzɩma pɩhɛzɩɣ ɖa-laŋa yɔ.
1. Ɛbɛ pɩtɛŋnɩ ɛyʋ weyi ɛsɩba yɔ?
Yesu kpaɣ sɩm nɛ ɛmaɣzɩnɩ ɖom cukaŋ ñɩmbʋ nabʋyʋ. Ɛyʋ weyi eɖou yɔ, ɛɛpɩzɩɣ nɛ ɛna mbʋ piɖiɣni labʋ ɛ-cɔlɔ yɔ. Ɛbɛ yɔɔ pɔtɔŋ se sɩm wɛ ɛzɩ ɖom yɔ? Ɛyʋ sɩkɩ lɛ, ɛɛtasɩɣ nɩʋ siziŋ. Paa ɛɛsɔɔlɩ ɛ-taabalaa nɛ ɛ-hɔʋ taa mba siŋŋ yɔ, pɩɩlakɩ-ɩ ɛzɩ ɛwɛ ɛ-ɖeke yɔ. Bibl yɔɔdaa se: «sɩɖaa ɩɩsɩŋ natʋyʋ paa ññɩɩ.»—Kalɩ Eklezɩyasɩtɩ 9:5.
2. Ye ɖɩtɩlɩ sɩm yɔɔ toovenim tɔm yɔ, ɛzɩma pɩpɩzɩɣ nɛ pɩwazɩ-ɖʋ?
Ɛyaa sakɩyɛ seɣ sɩm sɔɔndʋ nɛ halɩ peseɣ sɩɖaa sɔɔndʋ ɖɔɖɔ. Ɛlɛ tɔm ndʋ Bibl yɔɔdʋʋ sɩm yɔɔ yɔ, tɩhɛzɩɣ ɛyaa laŋa. Yesu yɔɔdaa se: «Toovenim kaɣ-mɩ holuu.» (Yohanɛɛsɩ 8:32) Ɛsɔ sɛtʋ agbaa sakɩyɛ wɩlɩɣ se ɛyʋ wɛnɩ kalɩzaɣ ŋga kaasɩkɩ nɛ kacakɩ wezuu ɛ-sɩm wayɩ yɔ. Ɛlɛ pɩtɩkɛ tɔm ndʋ Bibl wɩlɩɣ. Toovenim taa lɛ, ɛyʋ ɛɛlakɩ kʋñɔŋ ɛ-sɩm wayɩ. Pɩtasɩ lɛ, sɩɖaa ɩɩsɩŋ natʋyʋ; pʋyɔɔ lɛ, paapɩzɩɣ nɛ panazɩ nɔɔyʋ. Ye mbʋ pɩtɩcɛyɩ se pɛhɛzɩ pa-laŋa, ɖɩsɛɛ-wɛ yaa ɖɩsɛɛ Ɛsɔ pɔ-yɔɔ.
Ɛyaa nabɛyɛ yɔɔdʋʋ se papɩzɩɣ nɛ pɔyɔɔdɩnɩ sɩɖaa. Ɛlɛ pɩɩpɩzɩɣ nɛ pɩla mbʋ kpa. Ɛzɩ ɖɩnaʋ yɔ sɩɖaa «ɩɩsɩŋ natʋyʋ paa ññɩɩ.» Mba pamaɣzɩɣ se pɛ-ɛyaa kʋsɔɔlaa mba pasɩba yɔ pɔyɔɔdʋʋnɩ yɔ, toovenim taa lɛ, aleewaa pɔyɔɔdʋʋna. Aleewaa mba, palakɩ ɛzɩ mba kɛnɩ ɛyaa mba pasɩba yɔ. Pʋyɔɔ lɛ ye ɖɩtɩlɩ toovenim yɔ, pɩkandɩyɩɣ ɖɔ-yɔɔ se ɖɩtaatɔlɩ aleewaa kpaca taa. Yehowa paɣ-ɖʋ se ɖɩtaañaɣ pana se ɖɩyɔɔdɩnɩ sɩɖaa mbʋ pʋyɔɔ yɔ ɛnawa se ye ɖɩyɔɔdʋʋnɩ aleewaa yɔ, pɩkɔŋnɩ-ɖʋ kala.—Kalɩ Wayɩ Wayɩ Paɣtʋ 18:10-12.
TAZƖ NƐ PILIMI
Tazɩ nɛ ŋtɩlɩ tɔm lɛɛtʋ tɔm ndʋ Bibl yɔɔdʋʋ sɩm yɔɔ yɔ tɩ-yɔɔ, nɛ ña-taa tɛ se Ɛsɔ kʋsɔɔlʋ ɛɛhɔŋ ɛyaa nɩŋgbaaŋ pa-sɩm wayɩ.
3. Wɛtʋ ndʋ taa sɩɖaa wɛɛ?
Ɛjaɖɛ kpeekpe yɔɔ, ɛyaa wɛnɩ lɩmaɣza ndɩ ndɩ wɛtʋ ndʋ tɩ-taa sɩɖaa wɛɛ yɔ tɩ-yɔɔ. Toovenim taa lɛ, lɩmaɣza ana a-tɩŋa aapɩzɩɣ nɛ akɛ toovenim.
-
Lɩmaɣza wena ñe-egeetiye taa ɛyaa wɛnɩ sɩm yɔɔ?
Pɩsa nɛ ɩtɩlɩ tɔm ndʋ Bibl wɩlɩɣ yɔ lɛ, ɩcɔnɩ VIDEO.
Ɩkalɩ Eklezɩyasɩtɩ 3:20, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩ mayaɣ kanɛ kɔyɔɔdʋʋ yɔ, ɛbɛ pɩtɛŋnɩ ɛyʋ weyi ɛsɩba yɔ?
-
Ɛyʋ sɩkɩ lɛ, ɛ-hɔɔlʋʋ nakʋyʋ woki pɩ-yɔɔ nɛ kɩcakɩ wezuu na?
Bibl yɔɔdɩ Lazaarɩ weyi ɛɛkɛ Yesu taabalʋ yɔ ɛ-sɩm tɔm. Ŋŋkalɩɣ Yohanɛɛsɩ 11:11-14 lɛ, cɔna nɛ ŋna se Yesu yɔɔdaa se Lazaarɩ sɩba lɛ, wɛtʋ ndʋ taa ɛlɛ kaawɛɛ. Pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ Yesu kpaɣ sɩm nɛ ɛmaɣzɩna?
-
Ɛbɛ pɩwɩlɩɣ-ɖʋ wɛtʋ ndʋ tɩ-taa sɩɖaa wɛɛ yɔ tɩ-yɔɔ?
-
Tɔm ndʋ Bibl yɔɔdʋʋ sɩm yɔɔ yɔ, ŋmaɣzɩɣ suwe tɩ-yɔɔ?
4. Ye ɖɩsɩm sɩm yɔɔ toovenim tɔm yɔ, pɩwazɩɣ-ɖʋ
Ye ɖɩsɩm sɩm yɔɔ toovenim tɔm yɔ, piyeki nɛ sɔɔndʋ ɛtaasɩɣ-ɖʋ kpaʋ nɛ sɩɖaa. Ɩkalɩ Eklezɩyasɩtɩ 9:10, nɛ pʋwayɩ lɛ ɩtazɩ tɔm tʋnɛ tɩ-taa:
-
Sɩɖaa pɩzɩɣ nɛ palabɩ-ɖʋ kɩdɛkɛdɩm na?
Tɔm ndʋ Bibl wɩlɩɣ yɔ, tɩsɩɣnɩ-ɖʋ ɖɔɖɔ se ɖise lɩmaɣza wena aseɣtiɣ ɛyaa nɛ pañɩnɩɣ se pɛhɛzɩ sɩɖaa laŋa nɛ halɩ pɛsɛɣ-wɛ yɔ. Ɩkalɩ Izaayii 8:19 nɛ Natʋ 4:11, nɛ pʋwayɩ lɛ ɩtazɩ tɔm tʋnɛ tɩ-taa:
-
Ña-naʋ taa yɔ, ɛyʋ weyi ɛsɛɣ sɩɖaa yaa ɛyʋ weyi ɛñɩnɩɣ se sɩɖaa ɩsɩnɩ-ɩ yɔ, Yehowa maɣzɩɣ suwe ɛ-yɔɔ?
5. Ye ɖɩsɩm sɩm yɔɔ toovenim tɔm yɔ, pɩhɛzɩɣ ɖa-laŋa
Pawɩlɩ ɛyaa sakɩyɛ se pɔhɔŋ pa-nɩŋgbaaŋ pa-sɩm wayɩ kɩdɛkɛdɩm mbʋ paalaba nɛ pɩɖɛɛ yɔ pɩ-yɔɔ. Ɛlɛ ɛyaa, halɩ pɩkpɛndɩnɩ mba paalabɩ kɩdɛkɛdɩm siŋŋ yɔ, paalakɩ kʋñɔŋ pa-sɩm wayɩ. Alɩwaatʋ ndʋ ɖɩtɩlɩɣ tɔm ndʋ yɔ, pɩhɛzɩɣ ɖa-laŋa. Ɩkalɩ Roma mba 6:7, nɛ pʋwayɩ lɛ ɩtazɩ tɔm tʋnɛ tɩ-taa:
-
Ye ɛyʋ weyi ɛsɩba yɔ, ɛlɩ ɛ-kɩwɛɛkɩm taa ɛzɩ ɖɩkalʋʋ Bibl taa yɔ, ŋmaɣzɩɣ se sɩɖʋ nɔɔyʋ lakɩ kʋñɔŋ kɩwɛɛkɩm mbʋ ɛɛlaba nɛ pɩɖɛɛ yɔ pɩ-yɔɔ?
Ye ɖɩsɩm Yehowa camɩyɛ yɔ, ɖɩnaɣ se ɛɛpɩzɩɣ nɛ eyele kpa nɛ ɛyaa lakɩ kʋñɔŋ pa-sɩm wayɩ. Ɩkalɩ Wayɩ Wayɩ Paɣtʋ 32:4 nɛ 1 Yohanɛɛsɩ 4:8, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛsɔ weyi ɛwɛnɩ wɛtʋ kɩbandʋ ndʋ tɩ-tɔm pɔyɔɔdɩ masɩ sɩnɛ sɩ-taa yɔ, ɛpɩzɩɣ nɛ ɛha nʋmɔʋ nɛ panazɩɣ ɛyaa mba pasɩba yɔ?
-
Ŋmaɣzɩɣ se ɛyʋ ɛtɩlɩ sɩm yɔɔ toovenim tɔm yɔ, pɩhɛzɩɣ ɛ-laŋɩyɛ na? Ɛbɛ yɔɔ?
NABƐYƐ YƆƆDƲƲ SE: «Sɔɔndʋ kpaɣ-m nɛ mbʋ pɩkaɣ-m talʋʋ man-sɩm wayɩ yɔ.»
-
Ye ɛyʋ nɔɔyʋ eheyi-ŋ tɔm ndʋ yɔ, Bibl masɩ nzɩ ŋpɩzɩɣ nɛ ŋkalɩ-ɩ nɛ ŋhɛzɩ ɛ-laŋɩyɛ?
TOBI LƐ
Ɛyʋ sɩkɩ lɛ e-wezuu sɩ tɩnaɣ. Sɩɖaa ɩɩlakɩ kʋñɔŋ nɛ paapɩzɩɣ ɖɔɖɔ nɛ pala kañatʋ ɛyaa mba pɛwɛ wezuu yɔ.
Tɔm taa tazʋʋ
-
Ɛyʋ sɩkɩ lɛ ɛbɛ pɩtɛŋnɩ-ɩ?
-
Ye ɖɩtɩlɩ sɩm yɔɔ toovenim tɔm yɔ, ɛzɩma pɩwazɩɣ-ɖʋ?
-
Ye ɖɩtɩlɩ sɩm yɔɔ toovenim tɔm yɔ, ɛzɩma pɩhɛzɩɣ ɖa-laŋa?
WONDU LƐƐTƲ
Kalɩ nɛ ŋna ɛzɩma Bibl lɩzɩɣ tɔm piye «kalɩzaɣ» tɔbʋʋ yɔ.
Cɔna nɛ ŋna mbʋ pɩwɩlɩɣ se Ɛsɔ ɛɛnazɩɣ ɛyaa miŋ maatɛŋ taa yɔ.
Pɩwɛɛ se ŋse sɩɖaa sɔɔndʋ na?
Kalɩ nɛ ŋna ɛzɩma abalʋ nɔɔyʋ kɔma nɛ ɛtɩlɩ mbʋ pɩtɛŋnɩ ɛyʋ weyi ɛsɩba yɔ nɛ pɩhɛzɩ ɛ-laŋɩyɛ yɔ.