TƆM KƖKPƐLƖKƖTƲ 38
Yele nɛ wezuu mʋ ñɩm ñɛ-ɛsɩndaa
Mbʋ pɩpɩzɩɣ nɛ pɩha-ɖʋ taa leleŋ ɖe-wezuu caɣʋ taa yɔ pɩɖɔwa pɩdɩɩfɛyɩ. Paa ɖɩkatɩɣ kala yɔ, paa ɛzɩmtaa lɛ ɖe-wezuu caɣʋ pɩzɩɣ nɛ pɩha-ɖʋ taa leleŋ. Ɛzɩma ɖɩpɩzɩɣ nɛ ɖɩwɩlɩ se wezuu mʋ ñɩm ɖɛ-ɛsɩndaa? Nɛ lɩmaɣzɩyɛ sɔsɔɖɛ nɖɩ yɔɔ pɩwɛɛ se wezuu ɛmʋ ñɩm ɖɛ-ɛsɩndaa?
1. Ɛbɛ yɔɔ pɩwɛɛ se wezuu ɛmʋ ñɩm ɖɛ-ɛsɩndaa?
Pɩwɛɛ se wezuu ɛmʋ ñɩm ɖɛ-ɛsɩndaa mbʋ pʋyɔɔ yɔ, kɩkɛ kʋjɔʋ ŋgʋ ɖa-Caa sɔɔlɩm tʋ Yehowa labɩ-ɖʋ yɔ. «[Ɛ-cɔlɔ] wezuu hiɖe wɛɛ» nɛ ɛnʋ lɩzɩnɩ mbʋ payɩ pɩwɛ wezuu yɔ. (Keɣa 36:9) «Ɛ-maɣmaɣ ɛhaɣnɩ ɛyaa tɩŋa wezuu nɛ fezuu nɛ wondu kpeekpe.» (Tʋma Labʋ 17:25, 28) Yehowa haɣ-ɖʋ mbʋ pɩpɔzʋʋ-ɖʋ se pɩsa nɛ ɖɩcaɣ wezuu yɔ. Pɩtasɩ lɛ, ɛhaɣ-ɖʋ ɖɔɖɔ mbʋ payɩ piyeki se ɖɩnɩɩ wezuu leleŋ yɔ.—Kalɩ Tʋma Labʋ 14:17.
2. Ɛzɩma ɖɩpɩzɩɣ nɛ ɖɩwɩlɩ Yehowa se wezuu kʋjɔʋ ŋgʋ ɛlabɩ-ɖʋ yɔ kɩkɛdɩnɩ-ɖʋ?
Kpaɣnɩ alɩwaatʋ ndʋ ño-ɖoo haɣ ño-hoɣa yɔ, Yehowa maɣzɩɣ ñɔ-yɔɔ. Fezuu kiɖeɖeu sɩnɩ Ɛsɔ sɛyʋ weyi payaɣ se Daviid yɔ nɛ ɛyɔɔdɩ se: «Halɩ ñɛ-ɛsa na-m alɩwaatʋ ndʋ maakɛ calɩm tootoye yɔ.» (Keɣa 139:16) Ñe-wezuu mʋ ñɩm Yehowa ɛsɩndaa pɩdɩɩfɛyɩ. (Kalɩ Maatiyee 10:29-31.) Ye nɔɔyʋ ɛɖʋ ɛ-taa nɛ ɛkʋ ɛ-tɩ yaa ɛyʋ lɛlʋ yɔ, pɩɖʋʋ Yehowa ɖɩwɩzɩyɛ pɩdɩɩfɛyɩ. a (Ejipiti Lɩʋ 20:13) Mbʋ ɖɔɖɔ ye ɖɩlabɩ kaakendu nɛ ɖɩɖʋ ɖe-wezuu kaɖɛ taa yaa ɖɩtɩla mbʋ pɩpɔzʋʋ yɔ se ɖɩkandɩyɩ lalaa weziŋ yɔɔ yɔ, pɩɖʋʋ-ɩ ɖɩwɩzɩyɛ siŋŋ. Ye ɖɩcɔŋnɩ ɖa-maɣmaɣ ɖe-wezuu yɔɔ camɩyɛ nɛ ɖɩñaŋ ɖɔɖɔ lalaa weziŋ yɔ, pʋbʋ lɛ ɖɩwɩlɩɣ se wezuu kʋjɔʋ ŋgʋ Yehowa labɩ-ɖʋ yɔ, kɩmʋ ñɩm siŋŋ ɖɛ-ɛsɩndaa.
TAZƖ NƐ PILIMI
Yele nɛ ɖɩtazɩ nɛ ɖɩtɩlɩ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se wezuu mʋ ñɩm ɖɛ-ɛsɩndaa yɔ ɩ-taa nɩɩyɩ.
3. Cɔnɩ ño-tomnaɣ taa alaafɩya ɖeɖe camɩyɛ
Krɩstʋ ñɩma mba paha pa-tɩ Ɛsɔ yɔ, palakɩ Yehowa sɔɔlɩm pe-wezuu caɣʋ kpeekpe taa. Pɩwɛ ɛzɩ pakpaɣ po-tomnaɣ nɛ palaa-ɩ kɩlaʋ yɔ. Ɩkalɩ Roma mba 12:1, 2, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ pɩwɛɛ se piseɣti-ŋ nɛ ŋcɔnɩ ño-tomnaɣ taa alaafɩya ɖeɖe camɩyɛ?
-
Nʋmɔŋ weyi yɔɔ ŋpɩzɩɣ ŋtɩŋna nɛ ŋla mbʋ?
4. La mbʋ pɩpɔzʋʋ yɔ nɛ ŋkandɩyɩ ñe-wezuu nɛ lalaa wezuu yɔɔ
Bibl seɣtiɣ-ɖʋ se ɖise lakasɩ nzɩ sɩpɩzɩɣ nɛ sɩɖʋ ɛyʋ heŋ yaa sɩkɔnɩ ɛyʋ sɩm yɔ. Ɩcɔnɩ VIDEO nɛ ɩna mbʋ ɩpɩzɩɣ nɛ ɩla nɛ ɩkandɩyɩ mi-weziŋ nɛ lalaa weziŋ yɔɔ yɔ.
Ɩkalɩ Aduwa 22:3, nɛ pʋwayɩ lɛ ɩtazɩ mbʋ ɩpɩzɩɣ ɩla nɛ ɩkandɩyɩ mi-weziŋ nɛ lalaa weziŋ yɔɔ ye ɩwɛ . . .
-
mɩ-ɖɩɣa taa yɔ.
-
mɩ-tʋmɩyɛ taa yɔ.
-
hola aleɣya ɖɩlaɖɛ yɔ.
-
lɔɔɖɩyɛ taa, kpokpo yɔɔ yaa cɛɛcɛ yɔɔ yɔ.
5. Ña pɩɣa ŋga kɛwɛ ko-ɖoo lotu taa yɔ ke-wezuu
Daviid tɩŋnɩ keɣa nakɛyɛ yɔɔ nɛ ɛwɩlɩ se Yehowa maɣzɩɣ pɩɣa wezuu nɛ ɛzɩma kapaɣlɩɣ ko-ɖoo lotu taa yɔ pɩ-yɔɔ. Ɩkalɩ Keɣa 139:13-17, nɛ pʋwayɩ lɛ ɩtazɩ tɔm tʋnɛ tɩ-taa:
-
Yehowa ɛsɩndaa lɛ, ɛyʋ wezuu paɣzɩɣ alɩwaatʋ ndʋ e-ɖoo hakɩ e-hoɣa yɔ yaa alɩwaatʋ ndʋ palʋlʋʋ-ɩ yɔ?
Paɣtʋ ndʋ Yehowa kaaɖʋ Izrayɛɛlɩ mba yɔ, tɩkandɩyaɣ ɖoonaa nɛ piya nzɩ sɩwɛ po-lotu taa yɔ pɔ-yɔɔ. Ɩkalɩ Ejipiti Lɩʋ 21:22, 23; nɛ pʋwayɩ lɛ ɩtazɩ tɔm tʋnɛ tɩ-taa:
-
Suwe Yehowa maɣzɩɣ weyi ɛtɩɖʋna nɛ ɛkʋ pɩɣa ŋga kɛwɛ ko-ɖoo lotu taa yɔ ɛ-yɔɔ?
-
Ye nɔɔyʋ ɛɖʋ ɛ-taa faŋŋ nɛ ɛkʋ pɩɣa ŋga kɛwɛ ko-ɖoo lotu taa yɔ, ɛzɩma pɩlakɩ Yehowa? b
-
Ŋmaɣzɩɣ suwe Ɛsɔ lɩmaɣzɩyɛ yɔɔ?
Halɩ nabʋyʋ taa halʋ weyi wezuu mʋ ñɩm ɛ-ɛsɩndaa yɔ, ɛpɩzɩɣ nɛ ɛmaɣzɩ se mbʋ pi-ɖeke pɩpɩzɩɣ nɛ pɩsɩnɩ-ɩ yɔ lɛ se ɛlɩzɩ hoɣa. Ɩkalɩ Izaayii 41:10, nɛ pʋwayɩ lɛ ɩtazɩ tɔm tʋnɛ tɩ-taa:
-
Ye pɛwɛɛ nɛ pañɩkɩɣ halʋ nɔɔyʋ yɔɔ se ɛlɩzɩ hoɣa yɔ, apɩzɩɣ nɛ ɛsɩnɩ-ɩ? Ɛbɛ yɔɔ?
NABƐYƐ YƆƆDƲƲ SE: «Halʋ wɛnɩ waɖɛ se ɛlɩzɩ hoɣa mbʋ pʋyɔɔ yɔ ɛ-maɣmaɣ e-tomnaɣ pɩkɛnaa nɛ ɛpɩzɩɣ nɛ ɛlabɩ-kɛ mbʋ ɛsɔɔlaa yɔ.»
-
Ɛbɛ yeba nɛ ña-taa tɛ se ɖoyo nɛ pɩɣa ŋga kɛwɛ e-lotu taa yɔ, pa-naalɛ pe-weziŋ mʋ ñɩm Yehowa ɛsɩndaa?
TOBI LƐ
Bibl wɩlɩɣ-ɖʋ se ɖɩsɔɔlɩ, ɖɩwɛɛnɩ ñamtʋ nɛ ɖɩkandɩyɩ wezuu kʋjɔʋ ŋgʋ Yehowa labɩ-ɖʋ yɔ kɩ-yɔɔ. Pɩpɩzɩɣ nɛ pɩkɛ ɖa-maɣmaɣ ɖe-wezuu yaa lalaa wezuu.
Tɔm taa tazʋʋ
-
Ɛbɛ yɔɔ ɛyʋ wezuu mʋ ñɩm Yehowa ɛsɩndaa?
-
Ye nɔɔyʋ ɛɖʋ ɛ-taa faŋŋ nɛ ɛkʋ ɛyʋ yɔ, ɛzɩma pɩlakɩ Yehowa?
-
Ɛbɛ yɔɔ ña-taa wɛ leleŋ nɛ wezuu kʋjɔʋ ŋgʋ Yehowa labɩ-ŋ yɔ?
WONDU LƐƐTƲ
Ɛzɩma ɖɩpɩzɩɣ nɛ ɖɩwɩlɩ Yehowa ɖɛ-ɛsɩmɩyɛ wezuu kʋjɔʋ yɔɔ?
Kalɩ nɛ ŋna tɔm pɔzʋʋ pʋnɛ pɩ-yɔɔ cosuu: Ɛsɔ pɩzɩɣ nɛ ekpeɣ halʋ weyi ɛɛlɩzɩ hoɣa yɔ?
«L’avortement: qu’en dit la Bible?» (Intɛrnɛɛtɩ yɔɔ tɔm ñʋʋ)
Kalɩ nɛ ŋna ɛzɩma lɩmaɣza wena Ɛsɔ wɛnɩ wezuu yɔɔ yɔ apɩzɩɣ asɩnɩ-ŋ nɛ ŋtɩlɩ aleɣya wena ŋpɩzɩɣ nɛ ŋlɩzɩ se ŋlakɩ yɔ.
«‘Sports de l’extrême’: doit-on faire abstraction des risques?» (Réveillez-vous!, 8 octobre 2000)
Kalɩ nɛ ŋna ɛzɩma Bibl pɩzɩɣ nɛ kɩsɩnɩ weyi ɛwɛnɩ lɩmaɣza wena atuyuu-i se ɛkʋ ɛ-tɩ yɔ.
a Yehowa maɣzɩɣ mba pa-laŋa pʋʋtaa yɔ pɔ-yɔɔ pɩdɩɩfɛyɩ. (Keɣa 34:18) Siziŋ sɔsɔŋ weyi ɛyʋ nɔɔyʋ pɩzɩɣ nɛ ɛnɩɩ nɛ etuyuu-i se ɛkʋ ɛ-tɩ yɔ, ɛnɩɣ ɩ-taa nɛ ɛsɔɔlaa se ɛsɩnɩ ɛyʋ ɛnʋ. Pɩsa nɛ ŋtɩlɩ ɛzɩma ɛpɩzɩɣ nɛ ɛsɩnɩ nɔɔyʋ nɛ ɛlɔ lɩmaɣza wena atuyuu-i se ɛkʋ ɛ-tɩ yɔ lɛ, kalɩ tɔm ñʋʋ «Je veux mourir—Est-ce que la Bible peut m’aider si j’ai des idées suicidaires?» Tɔm ñʋʋ kʋnɛ, kɩwɛ tɔm kɩkpɛlɩkɩtʋ tʋnɛ tɩ-hɔɔlʋʋ Wondu lɛɛtʋ taa.
b Mba paalɩzɩ hosi nɛ pɩɖɛɛ yɔ, pɩfɛyɩ se peyele nɛ pɛ-ɛhʋyɛ cɛyɩɣ-wɛ. Yehowa pɩzɩɣ nɛ ekpeɣ-wɛ. Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ tɔm ñʋʋ «L’avortement: qu’en dit la Bible?» Kɩwɛ tɔm kɩkpɛlɩkɩtʋ tʋnɛ tɩ-hɔɔlʋʋ Wondu lɛɛtʋ taa.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
