Pʋcɔ nɛ pɩɣa nakɛyɛ ɖɛɛ sukuli lɛ, ko-ɖoo ñɔɔzʋʋ-kɛ nɛ ɛcɔnɩ ke-ɖeɖe nɛ ɛna se kɔsɔ lɩm nɛ kosu wondu ndʋ yɔ, tɩwɛ camɩyɛ nɛ tɩwɛɛ cɩɖɩ cɩɖɩ. Ðoyo nawa se ye ɛlakɩ mbʋ paa ɛzɩmtaa yɔ, ɛ-pɩɣa wɛɣ alaafɩya nɛ pɩwɩlɩɣ ɛyaa lalaa se ka-lʋlɩyaa cɔŋnɩ kɔ-yɔɔ camɩyɛ. Mbʋ ɖɔɖɔ Yehowa, ɖa-Caa weyi ɛwɛ ɛsɔdaa yɔ, ɛsɔɔlaa se ɖɩwɛɛ cɩɖɩ cɩɖɩ tomnaɣ yɔɔ nɛ ɖe-wezuu caɣʋ taa. Ye ɖɩwɛ kele kele yɔ, pɩwazɩɣ ɖa-maɣmaɣ nɛ pɩɖʋʋ-ɩ ɖɔɖɔ hɩɖɛ.

1. Ɛzɩma ɖɩpɩzɩɣ nɛ ɖɩwɛɛ kele kele tomnaɣ yɔɔ?

Yehowa heyiɣ-ɖʋ se: «Pɩwɛɛ se ɩkɛ kiɖeɖema.» (1 Pɩyɛɛrɩ 1:16) Pɩsa nɛ ɖɩkɛ kiɖeɖema lɛ, pɩcɛyaa se ɖɩwɛɛ kele kele tomnaɣ yɔɔ nɛ ɖe-wezuu caɣʋ taa. Ye ɖɩsɔʋ lɩm ɖoŋ ɖoŋ nɛ ɖiyeki ɖɔɖɔ se ɖo-tokonaa, ɖa-ɖɩɣa, ɖɔ-lɔɔɖɩyɛ nɛ ɖo-wondu lɛɛtʋ pɛwɛɛ cɩɖɩ cɩɖɩ paa ɛzɩmtaa yɔ, pʋbʋ lɛ ɖɩwɛɣ kele kele tomnaɣ yɔɔ. Ðɩpɩzɩɣ ɖɔɖɔ nɛ ɖɩɖʋʋ nesi tʋma wena palakɩ se Kewiyaɣ kpaaŋ ɛwɛɛ cɩɖɩ cɩɖɩ yɔ. Ye paa ɛzɩmtaa ɖɩwɛ kele kele tomnaɣ yɔɔ yɔ, pɩɖʋʋ hɩɖɛ Yehowa.—2 Kɔrɛntɩ mba 6:3, 4.

2. Pɩsa nɛ ɖɩwɛɛ kele kele lɛ, wɛtʋ ndʋ pɩtɩpɔzɩ se ɖɩwɛɛna?

Bibl seɣtiɣ-ɖʋ se «ɖɩñalɩ ɖo-tomnaɣ yɔɔ nɛ ɖa-maɣzɩm taa azuluma tɩŋa.» (2 Kɔrɛntɩ mba 7:1) Pʋyɔɔ lɛ, ɖɩñakɩ pana se ɖikizi mbʋ payɩ pɩpɩzɩɣ nɛ pɩcamɩ ɖo-tomnaɣ yaa ɖa-maɣzɩm yɔ. Pɩwɛɛ se ɖa-maɣzɩm ɛkɛdɩnɩ Yehowa, pʋyɔɔ lɛ ɖɩñakɩ pana se ɖɩlɔ lɩmaɣza kɩdɛkɛda. (Keɣa 104:34) Ðɩñakɩ pana ɖɔɖɔ se ɖɔ-yɔɔdaɣ ɛwɛɛ kele kele.—Kalɩ Koloosi mba 3:8.

Ɛbɛ ɖɔɖɔ pɩzɩɣ piyele nɛ ɖɩɩwɛɣ kele kele tomnaɣ yɔɔ nɛ ɖe-wezuu caɣʋ taa? Lakasɩ nasɩyɩ pɩzɩɣ nɛ sɩcamɩ ɖo-tomnaɣ. Ye mbʋ pɩwɛɛ se ɖise lakasɩ ɛzɩ taba yaa tabakʋʋyaɣ ñɔʋ mbʋ yɔ. Ye ɖiseɣ lakasɩ nzɩ yɔ, ɖɩwɛɣnɩ tomnaɣ taa alaafɩya camɩyɛ nɛ ɖɩwɩlɩɣ se ɖɩñaŋ wezuu kʋjɔʋ. Pɩsa nɛ ɖɩwɛɛ kele kele ɖe-wezuu caɣʋ taa lɛ, pɩwɛɛ se ɖise lakasɩ ɛzɩ kʋzʋʋ pilinzi yɔɔ saɣyʋʋ nɛ kʋzʋʋ kɩlɛmɩŋ cɔnʋʋ mbʋ yɔ. (Keɣa 119:37; Efɛɛzɩ mba 5:5) Pɩpɩzɩɣ nɛ pɩwɛɛ kaɖɛ se ɖɩlɩɩ lakasɩ nzɩ si-yomiye taa, ɛlɛ Yehowa pɩzɩɣ nɛ ɛsɩnɩ-ɖʋ.—Kalɩ Izaayii 41:13.

 TAZƖ NƐ PILIMI

3. Tomnaɣ yɔɔ cɩɖɩ cɩɖɩ wɛtʋ ɖʋʋ Yehowa hɩɖɛ

Ye ɖɩtazɩ paɣtʋ ndʋ Yehowa kaaha caanaʋ taa Izrayɛɛlɩ mba yɔ tɩ-taa yɔ, pɩsɩɣnɩ-ɖʋ nɛ ɖɩtɩlɩ lɩmaɣza wena ɛwɛnɩ tomnaɣ yɔɔ cɩɖɩ cɩɖɩ wɛtʋ yɔɔ yɔ. Ɩkalɩ Ejipiti Lɩʋ 19:10 nɛ 30:17-19, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ masɩ sɩnɛ sɩkpɛlɩkɩɣ-ɖʋ pɩlɩɩnɩ lɩmaɣza wena Yehowa wɛnɩ cɩɖɩ cɩɖɩ wɛtʋ yɔɔ yɔ?

• Ɛbɛ pɩwɛɛ se ɖɩlakɩ ɖoŋ ɖoŋ nɛ pɩsɩnɩ-ɖʋ nɛ ɖɩwɛɛ kele kele tomnaɣ yɔɔ?

Pɩpɔzʋʋ pana ñaɣʋ nɛ alɩwaatʋ pʋcɔ nɛ ɛyʋ pɩzɩ nɛ ɛwɛɛ kele kele tomnaɣ yɔɔ. Ɛlɛ ɖɩpɩzɩɣ nɛ ɖɩla mbʋ paa lone nɖɩ taa ɖɩwɛɛ nɛ paa ɖɩkɛ ñɩm tʋ yaa kʋñɔndʋ yɔ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.

• Ye ɖɩwɛ kele kele tomnaɣ yɔɔ nɛ ɖɩñɔɔzʋʋ ɖo-wondu camɩyɛ yɔ, ɛzɩma pɩsɩɣnɩ mba ɖisusuu-wɛ tɔm yɔ se paña Yehowa nɛ pɩkɩlɩ?

4. Lɩɩ lakasɩ nzɩ sipisiɣ ɛyʋ yɔ si-yomiye taa

Ye ŋñɔʋ sɩgaa yaa tabakʋʋyaɣ yɔ, pɩtʋʋ fɛyɩ se ŋnawa se pɩwɛ kaɖɛ se ɛyʋ ɛpɩzɩ nɛ ɛlɩɩ lakasɩ nzɩ si-yomiye taa. Ɛbɛ pɩzɩɣ nɛ pɩsɩnɩ-ŋ? Maɣzɩ kala wena lakasɩ nzɩ sɩkɔŋnɩ-ŋ yɔ a-yɔɔ nɛ ŋna. Ɩkalɩ Maatiyee 22:37-39, nɛ pʋwayɩ lɛ ɩtazɩ nɛ ɩna se ye ɛyʋ ɛñɔʋ sɩgaa yaa tabakʋʋyaɣ yɔ, ɖoŋ weyi pɩpɩzɩɣ nɛ pɩwɛɛnɩ . . .

• ɛ nɛ Yehowa pa-taabalɩyɛ yɔɔ?

• ɛ-hɔʋ taa mba nɛ ɛ-cɔlɔ ñɩma yɔɔ?

La ɖʋtʋ nɛ tɩsɩnɩ-ŋ nɛ ŋlɩɩ lakasɩ nzɩ sipisiɣ ɛyʋ yɔ si-yomiye taa. a Ɩcɔnɩ VIDEO.

Ɩkalɩ Filiipi mba 4:13, nɛ pʋwayɩ lɛ ɩtazɩ tɔm tʋnɛ tɩ-taa:

• Ye ŋlʋkɩ se ŋlɩɩ lakasɩ nzɩ sipisiɣ ɛyʋ yɔ si-yomiye taa yɔ, ɛzɩma adɩma, Bibl kpɛlɩkʋʋ nɛ kediɣzisi wobu, pɩzɩɣ nɛ pɩsɩnɩ-ŋ?

 5. Lʋbɩnɩ lɩmaɣza nɛ lakasɩ nzɩ sɩfɛyɩ kele kele yɔ

Ɩkalɩ Koloosi mba 3:5, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩma ɖɩlaba nɛ ɖɩna se Yehowa ɛsɩndaa lɛ, ye ɛyʋ ɛcɔŋnɩ kʋzʋʋ kɩlɛmɩŋ, etiyiɣni kʋzʋʋ fotonaa yaa kʋzʋʋ videowaa pɔrtaabɩlɩwaa yɔɔ nɛ ɛsaɣyɩɣ ɛ-kʋzʋʋ pilinzi yɔɔ yɔ, pɩkɛ azuluma lakasɩ?

• Ŋmaɣzɩɣ se pɩmʋnaa se Yehowa ɛpɔzɩ-ɖʋ se ɖɩwɛɛ kele kele yaa we? Ɛbɛ yɔɔ?

Cɔna nɛ ŋna mbʋ pɩpɩzɩɣ pɩsɩnɩ-ŋ nɛ ŋlʋbɩnɩ lɩmaɣza wena afɛyɩ kele kele yɔ. Ɩcɔnɩ VIDEO.

Yesu tɩŋnɩ kɩɖaʋ nakʋyʋ yɔɔ nɛ ɛwɩlɩ se pɩpɔzʋʋ pana ñaɣʋ pʋcɔ nɛ ɛyʋ wɛɛ kele keke e-wezuu caɣʋ taa. Ɩkalɩ Maatiyee 5:29, 30, nɛ pʋwayɩ lɛ ɩtazɩ tɔm tʋnɛ tɩ-taa:

• Yesu tɔm tʋnɛ tɩɩwɩlɩɣ se pɩpɔzʋʋ se ɖɩɖʋ ɖa-tɩ wɩzasɩ, ɛlɛ tɩwɩlɩɣ se pɩwɛɛ se ɖɩñaɣ pana siŋŋ pʋcɔ nɛ ɖɩpɩzɩ nɛ ɖɩkpɛzɩ nɩŋgbanzɩ nzɩ pɩmʋnaa yɔ. Nɩŋgbanzɩ nzɩ ɛyʋ pɩzɩɣ nɛ ɛkpɛzɩ nɛ pɩsa nɛ ɛlʋbɩnɩ lɩmaɣza wena afɛyɩ kele kele yɔ? b

Ye ŋwɛɛ nɛ ŋlʋkɩnɩ lɩmaɣza wena afɛyɩ kele kele yɔ, tɩlɩ se ɛzɩma ŋwɛɛ nɛ ŋñakɩ pana yɔ, pɩkɛdɩɣnɩ Yehowa. Ɩkalɩ Keɣa 103:13, 14; nɛ pʋwayɩ lɛ ɩtazɩ tɔm tʋnɛ tɩ-taa:

• Ye ŋwɛɛ nɛ ŋlʋkɩnɩ lɩmaɣza wena afɛyɩ kele kele yɔ, ɛzɩma masɩ sɩnɛ sɩpɩzɩɣ nɛ sɩsɩnɩ-ŋ?

 TOBI LƐ

Ye ɖɩñaɣ pana nɛ ɖo-tomnaɣ, ɖa-lɩmaɣza nɛ ɖa-lakasɩ wɛɛ kele kele yɔ, ɖɔ-tɔm kɛdɩɣnɩ Yehowa.

Tɔm taa tazʋʋ

• Ɛbɛ yɔɔ pɩcɛyɩ siŋŋ se ɖɩwɛɛ kele kele?

• Ɛbɛ pɩzɩɣ pɩsɩnɩ-ŋ nɛ ŋwɛɛ kele kele tomnaɣ yɔɔ?

• Ɛbɛ pɩwɛɛ se ŋla nɛ ña-lɩmaɣza nɛ ña-lakasɩ pɛwɛɛ kele kele?