TƆM KƖKPƐLƖKƖTƲ 47
Ŋmʋnaa se pamɩyɩsɩ-ŋ lɩm na?
Ñe-Bibl kpɛlɩkʋʋ sɩnɩ-ŋ nɛ ŋtɩlɩ tɔm sakɩyɛ Yehowa yɔɔ. Nɛ pɩtʋʋ fɛyɩ se ŋlabɩ lɛɣzɩtʋ hɔɔlɩŋ nɩɩyɩ taa se pɩsa nɛ ŋɖɔ tɔm ndʋ ŋkpɛlɩkaa yɔ tɩ-yɔɔ. Ɛlɛ pɩtɩla lɩmaɣza naayɛ yɔɔ lɛ, sɔɔndʋ kpaɣ-ŋ se ŋha ña-tɩ Yehowa nɛ pamɩyɩsɩ-ŋ lɩm. Tɔm kɩkpɛlɩkɩtʋ tʋnɛ tɩ-taa ɖɩkaɣ naʋ kala wena apɩzɩɣ nɛ aɖɩɣ ɛyʋ nʋmɔʋ se ɛtaaha ɛ-tɩ nɛ pamɩyɩsɩ-ɩ lɩm yɔ nɛ ɛzɩma ɛpɩzɩɣ nɛ ɛwabɩ-yɛ yɔ.
1. Pɩcɛyaa se ŋtɩlɩ Bibl taa tɔm tɩŋa pʋcɔ nɛ pamɩyɩsɩ-ŋ lɩm na?
Pʋcɔ nɛ pamɩyɩsɩ-ŋ lɩm lɛ, pɩpɔzʋʋ se ŋwɛɛnɩ «toovenim tɛ sɩmtʋ siŋŋ.» (1 Timootee 2:4) Ɛlɛ pɩtɩwɩlɩ se pʋcɔ nɛ pamɩyɩsɩ-ŋ lɩm lɛ, pɩpɔzʋʋ se ŋtɩlɩ ɛzɩma pɩwɛɛ se ŋcosi tɔm ndʋ payɩ papɩzɩɣ nɛ pɔpɔzɩ-ŋ pɩlɩɩnɩ Bibl yɔɔ yɔ tɩ-yɔɔ. Halɩ Krɩstʋ ñɩma mba pamɩyɩsɩ-wɛ lɩm pɩlakɩ pɩnzɩ sakɩyɛ yɔ, pɛwɛ kpɛlɩkʋʋ yɔɔ halɩ nɛ sɔnɔ. (Koloosi mba 1:9, 10) Ɛlɛ pɩcɛyaa se ŋnɩɩ Bibl wɩlɩtʋ kɩcɛyɩtʋ taa. Ɛgbɛyɛ taa ɛzʋtʋyaa kaɣ-ŋ sɩnʋʋ nɛ ŋna se ɛzɩ ŋsɩm tɔm ndʋ payɩ pɩpɔzʋʋ yɔ?
2. Nɩŋgbanzɩ nzɩ pɩpɔzʋʋ se ŋkpɛzɩ pʋcɔ nɛ pamɩyɩsɩ-ŋ lɩm yɔ, sɩ-taa nasɩyɩ lɛ nzɩ?
Pʋcɔ nɛ pamɩyɩsɩ-ŋ lɩm lɛ, pɩpɔzʋʋ se ‘ŋkpiɖi ña-kɩwɛɛkɩm yɔɔ, nɛ ŋpɩsɩ.’ (Kalɩ Tʋma Labʋ 3:19.) Pʋ-tɔbʋʋ lɛ se pɩwɛɛ se ŋnɩɩ siziŋ kɩwɛɛkɩm mbʋ payɩ ŋlaba nɛ pɩɖɛɛ yɔ pɩ-yɔɔ nɛ ŋtendi Yehowa se ɛkpaɣ nɛ ekpeɣ-ŋ. Pɩpɔzʋʋ ɖɔɖɔ se ŋse wezuu kɩdɛkɛdʋʋ caɣʋ nɛ ŋtɛ ña-taa se ŋcakɩ wezuu ŋgʋ kɩkɛdɩnɩ Ɛsɔ yɔ. Pɩtasɩ lɛ, pɩpɔzʋʋ se ŋwoki ɛgbɛyɛ taa kediɣzisi nɛ ŋpɩsɩ ɖɔɖɔ tɔm susuyu weyi patɩmɩyɩsɩtɩ-ɩ lɩm yɔ.
3. Ɛbɛ yɔɔ pɩfɛyɩ se sɔɔndʋ ɛkpa-ŋ nɛ ŋpɩsɩnɩ wayɩ?
Sɔɔndʋ kpaɣ nabɛyɛ se paakaɣ pɩzʋʋ nɛ pɔɖɔ ɖuutu ndʋ poɖuu Yehowa ɛsɩndaa yɔ tɩ-yɔɔ. Pɩkɛ toovenim se pɩpɩzɩɣ nɛ picoɖi-ŋ nabʋyʋ taa. Halɩ halaa nɛ abalaa siɣsiɣ tɩnaa mba pɔyɔɔdɩ pɔ-tɔm Bibl taa yɔ, nabʋyʋ taa picoɖaɣ-wɛ ɖɔɖɔ. Ɛlɛ Yehowa ɛɛpɔzʋʋ ɛ-sɛyaa se pɛkɛ mba patalɩ pilim yɔ. (Kalɩ Keɣa 103:13, 14.) Alɩwaatʋ ndʋ ɛnaɣ se ŋlakɩ ño-ɖoŋ ɖeɖe yɔ, pɩkɛdɩɣnɩ-ɩ. Ɛkaɣ-ŋ sɩnʋʋ. Toovenim taa lɛ, Yehowa heyiɣ-ɖʋ se nabʋyʋ ɛɛkaɣ pɩzʋʋ nɛ «pɩyasɩ-ɖʋ nɛ Ɛsɔ sɔɔlɩm.»—Kalɩ Roma mba 8:38, 39.
TAZƖ NƐ PILIMI
Tazɩ nɛ ŋna se ye ŋwɛɛ nɛ ŋkpɛlɩkɩɣ nɛ ŋtɩlɩɣ Yehowa camɩyɛ nɛ ŋyeki se ɛsɩnɩ-ŋ yɔ, pɩkaɣ yebu nɛ ŋpɩzɩ nɛ ŋwa kala wena aɖɩkɩ-ŋ nʋmɔʋ se pataamɩyɩsɩ-ŋ lɩm yɔ.
4. Kpɛlɩkɩ nɛ ŋtɩlɩ Yehowa camɩyɛ nɛ pɩkɩlɩ
Pɩwɛɛ se ŋtɩlɩ tɔm tɩŋa Yehowa yɔɔ pʋcɔ nɛ pamɩyɩsɩ-ŋ lɩm na? Pɩcɛyaa se ŋtɩlɩ ɛ-yɔɔ tɔm ndʋ tiyeki nɛ ŋsɔɔlɩ-ɩ nɛ ŋlakɩ mbʋ pɩkɛdɩɣnɩ-ɩ yɔ. Ɩcɔnɩ VIDEO nɛ ɩna ɛzɩma Bibl kpɛlɩkɩyaa mba pɛwɛ ɛjaɖɛ hɔɔlɩŋ ndɩ ndɩ taa yɔ pɔɖɔm lɔŋ tasʋʋ pʋnɛ pɩ-yɔɔ yɔ. Nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛbɛ sɩnɩ nabɛyɛ nɛ pala mbʋ pɩpɔzʋʋ yɔ nɛ pamɩyɩsɩ-wɛ lɩm?
Ɩkalɩ Roma mba 12:2, nɛ pʋwayɩ lɛ ɩtazɩ tɔm tʋnɛ tɩ-taa:
-
Ŋpɩtɩɣ Bibl wɩlɩtʋ natʋyʋ yɔɔ? Yaa ŋpɩtɩɣ se pɩtɩla tɔm ndʋ Yehowa Aseɣɖe Tɩnaa wɩlɩɣ yɔ tɩtɩkɛ toovenim?
-
Ye mbʋ, ɛbɛ ŋpɩzɩɣ nɛ ŋla?
5. Wa kala wena apɩzɩɣ nɛ aɖɩɣ-ŋ nʋmɔʋ se pataamɩyɩsɩ-ŋ lɩm yɔ
Ða-tɩŋa payɩ ɖɩkatɩɣ kala alɩwaatʋ ndʋ ɖɩkpakɩɣ lɩmaɣzɩyɛ se ɖɩhaɣ ɖa-tɩ Yehowa nɛ pamɩyɩsɩ-ɖʋ lɩm yɔ. Pɩsa nɛ ɩna kɩɖaʋ nakʋyʋ lɛ, ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Kala wena pɩɩpɔzaa se Narangerel ɛwa nɛ ɛpɩzɩ nɛ ɛsɛɛ Yehowa?
-
Ɛzɩma sɔɔlɩm mbʋ ɛwɛnɩ Yehowa yɔɔ yɔ pɩsɩnɩ-ɩ nɛ ɛwa kala ana?
Ɩkalɩ Aduwa 29:25 nɛ 2 Timootee 1:7, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ haɣ-ɖʋ abalɩtʋ se ɖɩwa kala?
6. Taa liu Yehowa se ɛkaɣ-ŋ sɩnʋʋ
Yehowa kaɣ-ŋ sɩnʋʋ nɛ ŋla mbʋ pɩkɛdɩɣnɩ-ɩ yɔ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛbɛ ɖɩkaɣ Bibl kpɛlɩkɩyʋ nʋmɔʋ se pataamɩyɩsɩ-ɩ lɩm?
-
Tɔm ndʋ ɛkpɛlɩkaa nɛ pɩsɩnɩ-ɩ nɛ ɛcɛyɩsɩ tisuu mbʋ ɛwɛnɩ Yehowa yɔɔ yɔ?
Ɩkalɩ Izaayii 41:10, 13; nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ ña-taa pɩzɩɣ nɛ pɩtɛ se ŋkaɣ pɩzʋʋ nɛ ŋɖɔ ɖuutu ndʋ ŋɖuwaa nɛ ŋha ña-tɩ Ɛsɔ yɔ tɩ-yɔɔ?
7. Yele nɛ ɛsɩmɩyɛ nɖɩ ŋwɛnɩ Yehowa sɔɔlɩm yɔɔ yɔ ɖɩpaɣlɩ
Ye ŋkpakɩɣ alɩwaatʋ nɛ ŋmaɣzɩɣ ɛzɩma Yehowa sɔɔlɩ-ŋ yɔ pɩ-yɔɔ yɔ, piyeki nɛ ŋwɛɛnɩ ɛsɩmɩyɛ ɛ-sɔɔlɩm mbʋ pɩ-yɔɔ nɛ pɩkɩlɩ nɛ ŋsɔɔlɩ se ŋsɛɛ-ɩ tam tam. Ɩkalɩ Keɣa 40:5, nɛ pʋwayɩ lɛ ɩtazɩ tɔm tʋnɛ tɩ-taa:
-
Wazasɩ nzɩ ŋhiɣ Yehowa cɔlɔ yɔ, sɩ-taa lɛ nzɩ ŋsɔɔlaa nɛ pɩkɩlɩ?
Nayʋ Yereemii kaasɔɔlɩ Yehowa nɛ ɛ-tɔm nɛ ɛɛwɛnɩ ɛsɩmɩyɛ siŋŋ se Yehowa hɩɖɛ wɛ ɛ-yɔɔ. Ɛyɔɔdaa se: «Ñɔ-tɔm pɩsɩ amɛya nɛ taa leleŋ pʋyʋ ma-laŋɩyɛ taa, mbʋ pʋyɔɔ yɔ paya-m nɛ ña-hɩɖɛ, hayɩ yoyaa tɛ Ɛsɔ Yehowa.» (Yereemii 15:16) Cosi tɔm pɔzʋʋ pʋnɛ pɩ-yɔɔ:
-
Ɛbɛ yɔɔ pɩkɛnɩ waɖɛ sɔsɔɖɛ kpem se ɛyʋ ɛkɛ Yehowa Aseɣɖe Tʋ?
-
Ŋsɔɔlaa se pamɩyɩsɩ-ŋ lɩm nɛ ŋpɩsɩ Yehowa Aseɣɖe Tʋ na?
-
Nabʋyʋ ɖɩkɩ-ŋ nʋmɔʋ se ŋpɩzɩ nɛ ŋkpɛzɩ nɩŋgbaŋaɣ ŋga?
-
Ŋmaɣzɩɣ se ɛbɛ pɩwɛɛ se ŋla nɛ ŋpɩzɩ nɛ ŋtalɩ lɩm mɩyɩsʋʋ kaɖʋwa?
NABƐYƐ YƆƆDƲƲ SE: «Mamaɣzɩɣ se maakaɣ pɩzʋʋ nɛ mɔnɖɔ ɖuutu ndʋ monɖuwaa nɛ pamɩyɩsɩ-m lɩm yɔ tɩ-yɔɔ.»
-
Mbʋ ɖɔɖɔ ŋmaɣzɩɣ yaa we?
TOBI LƐ
Yehowa pɩzɩɣ nɛ ɛsɩnɩ-ŋ nɛ ŋwa kala wena payɩ aɖɩkɩ-ŋ nʋmɔʋ se pataamɩyɩsɩ-ŋ lɩm yɔ.
Tɔm taa tazʋʋ
-
Pɩpɔzʋʋ se ŋtɩlɩ Bibl taa tɔm kpeekpe pʋcɔ nɛ pamɩyɩsɩ-ŋ lɩm na?
-
Pɩtɩla lɛɣzɩtʋ ndʋ pɩpɔzʋʋ se ŋla pʋcɔ nɛ pamɩyɩsɩ-ŋ lɩm?
-
Ɛbɛ yɔɔ pɩfɛyɩ se sɔɔndʋ ɛkpa-ŋ nɛ ŋpɩsɩnɩ wayɩ?
WONDU LƐƐTƲ
Kalɩ nɛ ŋna mbʋ pɩwɛɛ se piseɣti-ŋ nɛ ŋkpaɣ lɩmaɣzɩyɛ se pamɩyɩsɩ-ŋ lɩm yɔ.
Kalɩ nɛ ŋna ɛzɩma ŋpɩzɩɣ nɛ ŋwa kala wena apɩzɩɣ nɛ apɩsɩnɩ-ŋ nɛ wayɩ yɔ, a-taa naayɛ.
«Ɛbɛ ɖaŋɩɣ-m se pataamɩyɩsɩ-m lɩm?» (Feŋuu Tilimiye, mars 2019)
Cɔnɩ nɛ ŋna ɛzɩma abalʋ nɔɔyʋ pɩzaa nɛ ɛwa kala sɔsɔna wena aɖɩkaɣ-ɩ nʋmɔʋ se pataamɩyɩsɩ-ɩ lɩm yɔ.
Abalʋ weyi payaɣ se Ataa yɔ, sɔɔndʋ kpaɣaɣ-ɩ se ɛha ɛ-tɩ nɛ pamɩyɩsɩ-ɩ lɩm. Cɔna nɛ ŋna mbʋ pɩsɩnɩ-ɩ nɛ ɛpɩzɩ nɛ ɛkpɛzɩ nɩŋgbaŋaɣ sɔsɔɔ ŋga yɔ.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
