Toovenim Krɩstʋ mba lakɩ mbʋ payɩ papɩzɩɣ yɔ se nabʋyʋ yaa nɔɔyʋ ɛtaawɛɛkɩ taabalɩyɛ nɖɩ ɖɩwɛ pa nɛ Yehowa pɛ-hɛkʋ taa yɔ. Pɩtʋʋ fɛyɩ se mbʋ ña ɖɔɖɔ ŋsɔɔlaa. Ñe-siɣsiɣ wɛtʋ mʋ ñɩm siŋŋ Yehowa ɛsɩndaa. (Kalɩ 1 Kroniiki 28:9.) Wɛtʋ ndʋ pɩzɩɣ tiyele nɛ pɩwɛ-ŋ kaɖɛ se ŋɖɔkɩ ñe-siɣsiɣ wɛtʋ ɛ-ɛsɩndaa? Nɛ ɛzɩma ŋpɩzɩɣ nɛ ŋlʋbɩnɩ wɛtʋ ndʋ?

1. Ɛzɩma lalaa pɩzɩɣ peyele nɛ pɩwɛɛ-ɖʋ kaɖɛ se ɖɩɖɔkɩ ɖe-siɣsiɣ wɛtʋ Yehowa ɛsɩndaa?

Ɛyaa nabɛyɛ ñɩnɩɣ se potuyi-ɖʋ nɛ ɖiyele Yehowa sɛʋ. Ɛyaa mba ñɩnɩɣ se pala mbʋ? Pa-taa nabɛyɛ lɛ mba poposini toovenim nɛ pɔyɔɔdʋʋ cɛtɩm tɔm Ɛsɔ ɛgbɛyɛ yɔɔ se pacamɩ ɖe-tisuu yɔ. Payaɣ-wɛ se tisuu yebiyaa. Pɩtasɩ lɛ, Ɛsɔ sɛtʋ agbaa ñʋndɩnaa nabɛyɛ susuu cɛtɩm tɔm ɖɔ-yɔɔ se pɩsa nɛ potuyi Krɩstʋ mba nabɛyɛ nɛ paha siɣye toovenim. Ye ɖɩkpakɩɣ alɩwaatʋ nɛ ɖa nɛ koyindinaa mba ɖɩyɔɔdʋʋ, ɖɩkalɩɣ pa-takayɩsɩ, ɖiwelisiɣ tɔm ndʋ pɔyɔɔdʋʋ réseaux sociaux waa, intɛrnɛɛtɩ yaa videowaa taa yɔ, pɩpɩzɩɣ nɛ pɩkɔnɩ-ɖʋ kaɖɛ. Yesu yɔɔdaɣ ɛyaa mba pañɩnɩɣ se pitibi-ɖʋ yɔɔɔ nɛ ɖiyele ɖɔkʋʋ ɖe-siɣsiɣ wɛtʋ Yehowa ɛsɩndaa yɔ pɔ-tɔm lɛ, ɛtɔm se: «Iyele-wɛ. Nʋmɔʋ wɩlɩyaa yʋlʋmaa pɛkɛnaa. Ye yʋlʋm ɛwɩlɩɣ yʋlʋm nʋmɔʋ yɔ, pa-naalɛ pakaɣ tɔlʋʋ pɔʋ taa.»—Maatiyee 15:14.

Nɛ ye ɖɔ-hɔʋ taa tʋ nɔɔyʋ yaa ɖa-taabalʋ nɔɔyʋ ɛkpaɣ lɩmaɣzɩyɛ se ɛɛtasɩɣ kɛʋ Yehowa Aseɣɖe Tʋ? Pɩkɛ wɛtʋ ndʋ tɩpɩzɩɣ nɛ tɩha-ɖʋ laŋwɛɛkɩyɛ siŋŋ yɔ. Ɛyʋ ɛnʋ ɛpɩzɩɣ nɛ ɛñɩɣ ɖɔ-yɔɔ se ɖɩlɩzɩ ɛ nɛ Yehowa pɛ-hɛkʋ taa. Pɩwɛɛ se ɖɩɖʋ ɖa-taa se ɖɩwɛɣ siɣsiɣ Yehowa ɛsɩndaa nɛ ɖɩsɩɩ ɛ-sɛtʋ kajalaɣ lone taa. (Maatiyee 10:37) Yehowa ɖʋ-ɖʋ paɣtʋ se ɖa nɛ ɛyaa mba ɖɩtaaɖʋ taabalɩyɛ; pɩwɛɛ se ɖɩña paɣtʋ ndʋ.—Kalɩ 1 Kɔrɛntɩ mba 5:11.

2. Lɩmaɣza wena ɖɩpɩzɩɣ ɖɩkpaɣ nɛ pɩkɔnɩ kaɖɛ ɖa nɛ Yehowa ɖa-taabalɩyɛ?

Ðɩsɔɔlɩ Yehowa nɛ pʋyɔɔ lɛ ɖɩtɩsɔɔlɩ se nɔɔ kʋɖʋmaɣ nakɛyɛ ɛwɛɛ ɖa nɛ cɛtɩm Ɛsɔ sɛtʋ agbaa ɖɛ-hɛkʋ taa. Ðɩtɩsɔɔlɩ se ɖɩwɛɛ ɛgbɛyɛ naɖɩyɛ taa yaa ɖɩla tʋmɩyɛ nɖɩ ɖɩ-taa pasandɩɣ cɛtɩm Ɛsɔ sɛtʋ wɩlɩtʋ yaa tɩ-sɔnzɩ yɔ. Yehowa yɔɔdɩ «Babilɔɔnɩ Sɔsɔʋ» tɔm nɛ ɛpaɣ-ɖʋ se: «Ɩlɩɩ kɩ-taa, man-samaɣ.»—Natʋ 18:2, 4.

 TAZƖ NƐ PILIMI

3. Kpa ña-tɩ nɛ cɛtɩm wɩlɩtʋ

Ye nabɛyɛ ɛyɔɔdʋʋ tɔm kɩdɛkɛdɩtʋ Yehowa ɛgbɛyɛ yɔɔ yɔ, ɛbɛ pɩwɛɛ se ɖɩla? Ɩkalɩ Aduwa 14:15, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ pɩwɛɛ se ɖɩkpa ɖa-tɩ nɛ ɖitaatisiɣ tɔm ndʋ payɩ ɖɩnɩɣ yɔ tɩ-yɔɔ?

Ɩkalɩ 2 Yohanɛɛsɩ 10, nɛ pʋwayɩ lɛ ɩtazɩ tɔm tʋnɛ tɩ-taa:

• Wɛtʋ ndʋ pɩwɛɛ se ɖɩwɛɛnɩ tisuu yebiyaa yɔɔ?

• Paa ɖa-maɣmaɣ ɖɩɩñɔtʋʋnɩ tisuu yebiyaa yɔ, nʋmɔŋ weyi ɩ-yɔɔ papɩzɩɣ patɩŋna nɛ pa-wɩlɩtʋ talɩ-ɖʋ nɛ tɩwɛɛnɩ ɖoŋ ɖɔ-yɔɔ?

• Ña-naʋ taa yɔ, ye ɖiwelisiɣ tɔm kɩdɛkɛdɩtʋ ndʋ ɛyaa yɔɔdʋʋ Yehowa yaa ɛ-ɛgbɛyɛ yɔɔ yɔ, ɛzɩma pɩlakɩ-ɩ?

4. Ðɔkɩ ñe-siɣsiɣ wɛtʋ kpam Yehowa ɛsɩndaa alɩwaatʋ ndʋ koobu nɔɔyʋ lakɩ kɩdɛkɛdɩm yɔ

Ye ɖɩnɩwa se ɛgbɛyɛ taa koobu nɔɔyʋ labɩ kɩwɛɛkɩm yɔ, ɛbɛ pɩcɛyaa se ɖɩla? Yehowa kaaɖʋ paɣtʋ natʋyʋ caanaʋ taa Izrayɛɛlɩ mba. Tɩ-taa paɣtʋ kiɖe naɖɩyɛ wɩlɩɣ-ɖʋ mbʋ pɩwɛɛ se ɖɩla yɔ. Ɩkalɩ Levitiki 5:1.

Ɛzɩ pɔyɔɔdʋʋ mayaɣ kanɛ ka-taa yɔ, ye ɖɩnɩwa se koobu nɔɔyʋ labɩ kɩwɛɛkɩm yɔ, pɩpɔzʋʋ se ɖiheyi ɛgbɛyɛ taa ɛzʋtʋyaa. Ɛlɛ pʋcɔ nɛ ɖɩla mbʋ lɛ, pɩwɛɣ ɖeu se ɖiseɣti kɩwɛɛkɩm laɖʋ nɛ ɛ-maɣmaɣ ewolo nɛ eheyi ɛzʋtʋyaa ɛ-kɩwɛɛkɩm. Ye ekizaa yɔ, pɩwɛɛ se ɖɩwɩlɩ se ɖɩwɛ siɣsiɣ Yehowa ɛsɩndaa nɛ ɖiyele nɛ ɛzʋtʋyaa tɩlɩ ndʋ ɖɩsɩma yɔ. Ye ɖɩlabɩ mbʋ yɔ ɛzɩma pɩwɩlɩɣ se ɖɩwɛnɩ sɔɔlɩm mbʋ pɩwɛ siɣsiɣ yɔ . . .

• Yehowa yɔɔ?

• weyi ɛlabɩ kɩwɛɛkɩm yɔ ɛ-yɔɔ?

• ɛgbɛyɛ taa koobiya lalaa yɔɔ?

 5. Posi ña-tɩ nɛ Babilɔɔnɩ Sɔsɔʋ

 TOBI LƐ

Pɩsa nɛ ɖɩwɛɛ siɣsiɣ Yehowa ɛsɩndaa lɛ, pɩpɔzʋʋ se ɖise mba pɛfɛyɩ siɣsiɣ ɛ-ɛsɩndaa yɔ. Pɩpɔzʋʋ ɖɔɖɔ se ɖɩlɩɩ cɛtɩm Ɛsɔ sɛtʋ ɛgbɛyɛ taa caɣ caɣ.

Tɔm taa tazʋʋ

• Ɛbɛ yɔɔ pɩfɛyɩ se ɖɩcɔna, ɖɩkalɩ yaa ɖiwelisi tisuu yebiyaa tɔm?

• Wɛtʋ ndʋ pɩwɛɛ se ɖɩwɛɛnɩ mba patɩtasɩ sɔɔlʋʋ se pɛkɛ Yehowa Aseɣɖe Tɩnaa yɔ pɔ-yɔɔ?

• Ɛzɩma ɖɩpɩzɩɣ nɛ ɖɩwɩlɩ se ɖɩlɩ cɛtɩm Ɛsɔ sɛtʋ taa toovenim?