TƆM KƖKPƐLƖKƖTƲ 59
Ŋpɩzɩɣ nɛ ŋɖɔkɩ ña-tɩ nazɩm taa
Pɩwɛɛ se paa Krɩstʋ tʋ weyi lɛ ɛtɩlɩ se nabɛyɛ kaɣ-ɩ kaɖɩnʋʋ nɛ halɩ papɩzɩɣ nɛ panazɩ-ɩ siŋŋ. Ɛlɛ pɩwɛɛ se pɩkpa-ɖʋ sɔɔndʋ na?
1. Ɛzɩma ɖɩlaba nɛ ɖɩna se pakaɣ-ɖʋ nazʋʋ?
Bibl yɔɔdɩ kpayɩ se: «Mba payɩ pɔsɔɔlaa se pɔñɔɔnɩ Ɛsɔ pe-wezuu caɣʋ taa pa nɛ Krɩstʋ Yesu pɔ-nɔɔ kʋɖʋmaɣ labʋ taa yɔ, pakaɣ-wɛ nazʋʋ ɖɔɖɔ.» (2 Timootee 3:12) Paanazɩ Yesu mbʋ pʋyɔɔ yɔ, ɛtaakɛ Sataŋ ɛjaɖɛ yɔɔ tʋ. Ða ɖɔɖɔ ɖɩtɩkɛ ɛjaɖɛ yɔɔ mba, pʋyɔɔ pɩɩɖɩɣzɩɣ-ɖʋ alɩwaatʋ ndʋ ɛjaɖɛ yɔɔ kominawaa nɛ Ɛsɔ sɛtʋ agbaa panazɩɣ-ɖʋ yɔ.—Yohanɛɛsɩ 15:18, 19.
2. Ɛzɩma ɖɩpɩzɩɣ nɛ ɖɩñɔɔzɩ ɖa-tɩ nɛ ɖɩɖaŋ nazɩm?
Pɩwɛɛ se ɖɩcɛyɩsɩ tisuu mbʋ ɖɩwɛnɩ Yehowa yɔɔ yɔ lɛɛlɛɛyɔ. Paa evemiye nɖɩ lɛ, ñɩnɩ alɩwaatʋ nɛ ŋtɩmnɩ-ɩ nɛ ŋkalɩ ɖɔɖɔ ɛ-Tɔm. Woki ɛgbɛyɛ taa kediɣzisi ɖoŋ ɖoŋ. Tʋma ana, a-labʋ yeki nɛ ŋwɛɛnɩ ɖoŋ nɛ abalɩtʋ ndʋ pɩpɔzʋʋ yɔ nɛ ŋɖɔkɩ ña-tɩ nazɩm taa; paa nazɩm mbʋ pɩlɩnɩ ñɔ-hɔʋ taa mba cɔlɔ yɔ. Paanazɩ apostoloo Pɔɔlɩ tam sakɩyɛ, ɛmawa se: «Yehowa kɛnɩ man-sɩnɩyʋ; sɔɔndʋ ɛɛkaɣ-m kpaʋ.»—Ebree mba 13:6.
Ye ɖisusuu tɔm ɖoŋ ɖoŋ yɔ, ɖɩpɩzɩɣ ɖɔɖɔ nɛ ɖɩwɛɛnɩ abalɩtʋ. Tɔm susuu tʋmɩyɛ sɩɣnɩ-ɖʋ se ɖɩtaa Yehowa liu nɛ ɖɩwa ɖɔɖɔ ɛyʋ sɔɔndʋ seu. (Aduwa 29:25) Nɛ ye wiɖiyi komina nakʋyʋ ɛɖɩɣ-ɖʋ nʋmɔʋ se ɖɩtaala ɖɛ-Ɛsɔ sɛtʋ tʋma yɔ, ɖɩkaɣ wobu pɩ-yɔɔ nɛ ɖisusuu tɔm nɛ abalɩtʋ.—1 Tesalooniiki mba 2:2.
3. Ye ɖɩɖɔkɩ ɖa-tɩ nazɩm taa yɔ, wazasɩ nzɩ ɖihikiɣ?
Toovenim taa lɛ, pɩtɩkɛnɩ-ɖʋ taa leleŋ se panazɩ-ɖʋ; ɛlɛ ye ɖɩpɩzaa nɛ ɖɩɖɔkɩ ɖa-tɩ nazɩm taa yɔ pɩcɛyɩsɩɣ ɖe-tisuu. Pɩsɩɣnɩ-ɖʋ ɖɔɖɔ se ɖɩñɔtɩnɩ Yehowa nɛ pɩkɩlɩ, mbʋ pʋyɔɔ yɔ ɖɩnaɣ e-ɖoŋ alɩwaatʋ ndʋ pɩlakɩ-ɖʋ ɛzɩ ɖɩtɩtasɩ wɛnʋʋ ɖoŋ yɔ. (Kalɩ Yakubu 1:2-4.) Panazɩɣ-ɖʋ lɛ, pɩhaɣ Yehowa laŋwɛɛkɩyɛ; ɛlɛ ɛnaɣ ɛzɩma ɖɩɖɔkʋʋ kpam yɔ lɛ, pɩhaɣ-ɩ taa leleŋ. Bibl yɔɔdaa se: «Ye ɩɖɔkʋʋ mɩ-laŋa kʋñɔŋ taa mbʋ pʋyɔɔ yɔ ɩlakɩ kɩbandʋ yɔ, mbʋ kɛdɩɣnɩnɩ Ɛsɔ.» (1 Pɩyɛɛrɩ 2:20) Ye ɖɩɖɔkɩ ɖa-tɩ nazɩm taa yɔ, kʋjɔʋ ŋgʋ Yehowa lakɩ-ɖʋ yɔ ŋgʋ lɛ wezuu maatɛŋ ɛjaɖɛ kɩfaɖɛ taa, nɛ nɔɔyʋ ɛɛkaɣ kaɖɩnʋʋ kele kele sɛtʋ ɛjaɖɛ nɖɩ ɖɩ-taa.—Maatiyee 24:13.
TAZƖ NƐ PILIMI
Tazɩ nɛ ŋna mbʋ pɩwɩlɩɣ se ɖɩpɩzɩɣ nɛ ɖɩɖɔkɩ ɖe-siɣsiɣ wɛtʋ kpam paa panazɩɣ-ɖʋ yɔ, nɛ ɛzɩma Yehowa wazɩɣ-ɖʋ yɔ.
4. Ŋpɩzɩɣ nɛ ŋɖɔkɩ ña-tɩ paa ñɔ-hɔʋ taa mba ɩnazɩɣ-ŋ yɔ
Yesu yɔɔdaa se lɩmaɣzɩyɛ nɖɩ ɖɩkpakɩɣ se ɖɩsɛɣ Yehowa yɔ, pɩtɩla ɖɩɩkɛdɩɣnɩ ɖɔ-hɔʋ taa mba. Ɩkalɩ Maatiyee 10:34-36, nɛ pʋwayɩ lɛ ɩtazɩ tɔm tʋnɛ tɩ-taa:
-
Ye nɔɔyʋ ɛkpaɣ lɩmaɣzɩyɛ se ɛsɛɣ Yehowa yɔ, ɛbɛ ɛ-hɔʋ taa mba pɩzɩɣ nɛ pala?
Pɩsa nɛ ɩna kɩɖaʋ nakʋyʋ lɛ, ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Ye ñɔ-hɔʋ taa tʋ nɔɔyʋ yaa ña-taabalʋ nɔɔyʋ ɛñɩnɩɣ se ɛɖɩɣ-ŋ nʋmɔʋ nɛ ŋtaasɛɛ Yehowa yɔ, ɛbɛ ŋkaɣ labʋ?
Ɩkalɩ Keɣa 27:10 nɛ Maarɩkɩ 10:29, 30. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm tʋnɛ tɩ-taa:
-
Ye ñɔ-hɔʋ taa tʋ nɔɔyʋ yaa ña-taabalʋ nɔɔyʋ ɛnazɩɣ-ŋ yɔ, ɛzɩma tɔm tʋnɛ tɩpɩzɩɣ tɩsɩnɩ-ŋ nɛ ŋɖɔkɩ ña-tɩ?
5. Ðɔkɩ Yehowa sɛtʋ kpam paa panazɩɣ-ŋ yɔ
Ye lalaa ɩñɩnɩɣ se paɖɩɣ-ɖʋ nʋmɔʋ se ɖɩtaasɛɛ Yehowa yɔ, pɩpɔzʋʋ-ɖʋ abalɩtʋ pʋcɔ nɛ ɖɩpɩzɩ nɛ ɖɩsɛɛ-ɩ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Kɩɖaŋ weyi pɔyɔɔdɩ ɩ-tɔm video taa yɔ, ɛbɛ kpazɩ-ŋ ɖoŋ ɩ-taa?
Ɩkalɩ Tʋma Labʋ 5:27-29 nɛ Ebree mba 10:24, 25. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm tʋnɛ tɩ-taa:
-
Ɛbɛ yɔɔ pɩcɛyɩ siŋŋ se ɖiwolo pɩ-yɔɔ nɛ ɖɩsɛɣ Yehowa paa paɖɩɣ-ɖʋ nʋmɔʋ se ɖitaasusi tɔm nɛ ɖɩla ɖɔɖɔ kediɣzisi yɔ?
6. Yehowa kaɣ-ŋ sɩnʋʋ nɛ ŋɖɔkɩ na-tɩ
Yehowa Aseɣɖe Tɩnaa wɛnɩ pɩnzɩ ndɩ ndɩ nɛ palɩnɩ lona ndɩ ndɩ taa nɛ pɔɖɔkʋʋ pe-siɣsiɣ wɛtʋ kpam paa panazɩɣ-wɛ yɔ. Pɩsa nɛ ɩna mbʋ pɩsɩnɩ-wɛ yɔ lɛ, ɩcɔnɩ VIDEO. Nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛbɛ sɩnɩ Yehowa Aseɣɖe Tɩnaa mba pɔ-tɔm pɔyɔɔdɩ video taa yɔ nɛ pɔɖɔkɩ pa-tɩ?
Ɩkalɩ Roma mba 8:35, 37-39 nɛ Filiipi mba 4:13. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm tʋnɛ tɩ-taa:
-
Ɛzɩma mayaɣ kanɛ kahaɣ-ŋ lidaʋ se ŋpɩzɩɣ nɛ ŋɖɔkɩ ña-tɩ paa takɩm mbʋ lɛ pɩ-taa?
Ɩkalɩ Maatiyee 5:10-12, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ ŋpɩzɩɣ nɛ ŋwɛɛ taa leleŋ taa paa panazɩɣ-ŋ yɔ?
Yehowa sɛyaa miiliyɔɔwaa sakɩyɛ pɩzaa nɛ pɔɖɔkɩ pa-tɩ nazɩm taa. Ña ɖɔɖɔ ŋpɩzɩɣ nɛ ŋɖɔkɩ ña-tɩ!
NABƐYƐ YƆƆDƲƲ SE: «Maapɩzɩɣ nɛ mɔnɖɔkɩ man-tɩ nazɩm taa.»
-
Masɩ nzɩ pɩzɩɣ nɛ sɩkpazɩ-wɛ ɖoŋ?
TOBI LƐ
Pana wena ɖɩñakɩ nɛ ɖɩsɛɣ Yehowa paa panazɩɣ-ɖʋ yɔ, amʋ ñɩm siŋŋ ɛ-ɛsɩndaa. Ɛpɩzɩɣ nɛ ɛsɩnɩ-ɖʋ nɛ ɖɩɖɔkɩ ɖa-tɩ nazɩm taa!
Tɔm taa tazʋʋ
-
Ɛbɛ sɩnɩ Krɩstʋ mba nɛ pana se pakaɣ-wɛ nazʋʋ?
-
Ɛbɛ ŋpɩzɩɣ nɛ ŋla lɛɛlɛɛyɔ nɛ ŋñɔɔzɩ ña-tɩ nɛ ŋɖaŋ nazɩm?
-
Ɛbɛ pɩzɩɣ pɩsɩnɩ-ŋ nɛ ña-taa tɛ se ŋpɩzɩɣ nɛ ŋsɛɛ Yehowa paa takɩm mbʋ lɛ pɩ-taa?
WONDU LƐƐTƲ
Paakpa koobu pɩɣa evelaɣ nakɛyɛ nɛ paɖɩɣ-kɛ salaka mbʋ pʋyɔɔ yɔ kekizaa se kaaɖʋ kɔ-nɔɔ ɛjaɖɛ tɔm taa. Cɔnɩ video nɛ ŋna ɛzɩma Yehowa kaasɩnɩ-kɛ nɛ kɔɖɔkɩ ka-tɩ wɛtʋ ndʋ tɩ-taa yɔ.
Cɔnɩ video nɛ ŋna mbʋ pɩsɩnɩ koobu nɔɔyʋ nɛ ɛ-halʋ nɛ pɔɖɔkɩ pe-siɣsiɣ wɛtʋ kpam pɩnzɩ sakɩyɛ, paa panazaɣ-wɛ yɔ.
Kalɩ nɛ ŋna ɛzɩma ŋpɩzɩɣ nɛ ŋla abalɩtʋ nɛ ŋɖɔkɩ kpam nazɩm taa yɔ.
«Ñɔɔzɩ ña-tɩ lɛɛlɛɛyɔ nɛ ŋɖaŋ nazɩm» (Feŋuu Tilimiye, juillet 2019)
Ye ɖɔ-hɔʋ taa mba ɩnazɩɣ-ɖʋ yɔ, lɩmaɣza wena pɩwɛɛ se ɖɩwɛɛna? Nɛ ɛzɩma ɖɩpɩzɩɣ nɛ ɖɩɖɔkɩ ɖa-tɩ nazɩm mbʋ pɩ-taa?
«Toovenim ‘ɛɛkɔŋnɩ laŋhɛzɩyɛ, ɛlɛ laɣɖɛ’» (Feŋuu Tilimiye, octobre 2017)
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
