YE ŊKATƖ ɛyʋ nɔɔyʋ ɛɖaɣlɩ pɩdɩɩfɛyɩ, ɛpɩzɩɣ eɖuuni koliɣa, ŋmaɣzɩɣ se pʋdʋ kɛ anɩ? Ɛkɛɣ ɖogo! Alɩwaatʋ natʋyʋ taa ɖogowaa kaawɛ tɛtʋ yɔɔ. Bibl heyiɣ-ɖʋ se pa-caanaa kaakɛ Ɛsɔ tiyiyaa. Ɛzɩma mbʋ?

Tɔzɩ se Ɛsɔ tiyiyu kɩdɛkɛdʋ weyi payaɣ se Sataŋ yɔ, ɛwɛɛ ɛhɔyʋʋ ñaɖʋʋ. Halɩ ɛwɛɛ ɛñakɩ pana se Ɛsɔ tiyiyaa lɛlaa ɩpɩsɩ kɩdɛkɛdaa. Pɩkɛdaa lɛ, Ɛsɔ tiyiyaa nabɛyɛ paɣzɩ Sataŋ welisinuu. Peyele tʋmɩyɛ nɖɩ Ɛsɔ ɖʋ-wɛ ɛsɔdaa yɔ nɛ petii tataa nɛ pakpaɣ ɛyaa tomnasɩ. Ŋsɩm mbʋ pʋyɔɔ palabɩ mbʋ yɔ?

Bibl se Ɛsɔ pɩyalaa mba panawa se pɛlaa mba pɛwɛ tɛtʋ yɔɔ patʋʋzaa lɛ, pɩlabɩ-wɛ liu se pakpaɣ-wɛ halaa. Nɛ petii tɛtʋ yɔɔ nɛ pakpaɣ pɛlaa mba halaa. Bibl wɩlɩɣ se mbʋ palaba yɔ pɩfɛyɩ ɖeu, mbʋ pʋyɔɔ yɔ, Ɛsɔ kaalɩzɩ e-tiyiyaa se pacaɣ ɛsɔdaa na.

Ɛsɔ tiyiyaa mba nɛ pa-halaa palʋlɩ piya lɛ, sɩwɛ ndɩ. Pacalɩ-sɩ lʋlʋʋ lɛ, sɩɩwɛ ɛzɩ piya lɛɛsɩ yɔ. Pɩkɛdaa lɛ, sɩpaɣlɩɣ nɛ sɩpaɣlɩɣ, nɛ sɩlɩɣ toma kamaɣ fɛyɩ. Nɛ sɩkɔɔ sɩpɩsɩ ɖogowaa.

Ðogowaa mba paakɛ kɩdɛkɛdɩŋ. Pataɣaɣ pa-paɣlɩka nɛ po-ɖoŋ yɔɔ nɛ panazɩɣ ɛyaa. Pañɩkaɣ ɛyaa yɔɔ se paba ɩpɩsɩ kɩdɛkɛdaa ɛzɩ mba yɔ.

Enɔɔkɩ kaasɩba, ɛlɛ ɛyʋ kɩbanʋ nɔɔyʋ kaawɛ ɛjaɖɛ yɔɔ alɩwaatʋ ndʋ tɩ-taa. Ɛyʋ ɛnʋ ɛ-hɩɖɛ lɛ Noa. Ɛɖɔŋaɣ Ɛsɔ paɣtʋ yɔɔ paa ɖooye.

Kɩyakʋ nakʋyʋ lɛ, Ɛsɔ heyi Noa se pɩtalaa se Ɛnʋ eɖezi ɛyaa kɩdɛkɛdaa kpeekpe tɛtʋ yɔɔ. Ɛlɛ, Ɛsɔ kaɣ yabʋ Noa nɛ ɛ-hɔʋ nɛ kpɩna sakɩyɛ ñʋʋ. Ðɩna ɛzɩma Ɛsɔ laba yɔ.