HALƲ maɣzaɣ weyi eɖiɣni kɔm se ɛkatɩ Daviid yɔ, ŋsɩmɩ-ɩ? Payaɣ-ɩ se Abigayɛɛlɩ. Ɛwɛ lɛɣtʋ siŋŋ. Nɛ ɛkaɣ sɩnʋʋ Daviid se ɛtaala kɩdɛkɛdɩm nabʋyʋ. Ɛlɛ pʋcɔ nɛ ɖɩkpɛlɩkɩ tɔm ndʋ lɛ, yele ɖɩna mbʋ pɩtalɩ Daviid yɔ.

Daviid se Sɔɔlɩ cɔlɔ lɛ, ewobi ɛmɛlɩ camʋʋ nakʋyʋ tɛɛ. Ɛ-ɖalaa nɛ ɛ-hɔʋ taa mba lalaa wolo ɛ-cɔlɔ peeɖe. Ɛyaa ɛzɩ 400 mbʋ yɔ  wolo ɖɔɖɔ ɛ-cɔlɔ nɛ Daviid pɩsɩ pa-ñʋʋdʋ. Pʋwayɩ Daviid wolo nɛ ɛna Mowaabʋ wiyaʋ nɛ eheyi-i se: ‘Mentendi-ŋ, man-caa nɛ mon-ɖoo pacaɣ ñɔ-cɔlɔ nɛ pɩkɔɔ pɩtalɩ alɩwaatʋ ndʋ menɖiɣzini mbʋ pɩkaɣ-m talʋʋ yɔ.’ Daviid nɛ ɛ-ɛyaa powolo pɛmɛlɩ piyisi yɔɔ.

Pʋwayɩ lɛ, Daviid katɩ Abigayɛɛlɩ. Ɛ-walʋ Naabaalɩ kɛ ñɩm tʋ weyi ɛwɛnɩ tɛtʋ sakɩyɛ yɔ. Ɛwɛnɩ heŋ 3 000 nɛ pʋŋ 1 000. Naabaalɩ kɛ ɛyʋ kɩdɛkɛdʋ. Ɛlɛ ɛ-halʋ tʋzaa pɩdɩɩfɛyɩ nɛ ɛlakɩ mbʋ pʋtʋʋzaa yɔ. Kɩyakʋ nakʋyʋ ɛyabɩ ɛ-hɔʋ taa mba ñʋʋ. Yele ɖɩna ɛzɩma pɩlaba yɔ.

Daviid nɛ ɛ-ɛyaa palabɩ Naabaalɩ camɩyɛ siŋŋ. Paɖaŋ e-heŋ yɔɔ. Ɛlɛ kɩyakʋ nakʋyʋ Daviid tiyi ɛ-ɛyaa se powolo pɔpɔzɩ Naabaalɩ se ɛsɩnɩ-wɛ. Daviid tiyiyaa talɩ Naabaalɩ tɛ lɛ, ɛ nɛ ɛ-yaa peɖiɣni kɔʋ kpɛm heŋ yɔɔ. Pɩɩkɛ kazandʋ kɩyakʋ. Nɛ Naabaalɩ ɛɛwɛnɩ tɔɔnasɩ sakɩyɛ. Peeɖe Daviid tiyiyaa heyi-i se: ‘Ðɩɩlabɩ-ŋ camɩyɛ. Ðɩtɩmɩlɩ ñe-heu nɔɔyʋ. Ɛlɛ ɖɩɖaŋ ñe-heŋ yɔɔ camɩyɛ. Lɛɛlɛɛyɔ, ɖitendi-ŋ ha-ɖʋ tɔɔnaɣ.’

Naabaalɩ cosi-wɛ se: ‘Maahaɣ tɔɔnaɣ ɛyaa ɛzɩ mɩ yɔ.’ Nɛ ɛsʋʋ Daviid tʋʋ yɔɔ. Pʋwayɩ Daviid tiyiyaa heyi-i mbʋ pɩlaba yɔ lɛ, pɩwɩzɩ-ɩ pɩdɩɩfɛyɩ. Peeɖe eheyi ɛ-ɛyaa se: ‘Paa weyi lɛ ɛkpaɣ ɛ-laɣɖɛ!’ Nɛ pɛɖɛɛ se pakʋ Naabaalɩ nɛ ɛ-ɛyaa.

Naabaalɩ ɛyaa taa nɔɔyʋ kaanɩ tɔm kɩdɛkɛdɩtʋ ndʋ Naabaalɩ yɔɔdaa yɔ. Nɛ ewolo eheyi Abigayɛɛlɩ mbʋ pɩlaba yɔ. Abigayɛɛlɩ kʋyɩ kpaka nɛ ɛkpaɣ tɔɔnasɩ ndɩ ndɩ nɛ ɛsʋʋ kpaŋasɩ nɛ ɛɖɛɛ se ɛkatɩ Daviid. Ɛkatɩ-ɩ lɛ, etii kpaŋaɣ yɔɔ, eluŋ Daviid tɛɛ nɛ ɛtɔ se: ‘Mentendi-ŋ, taakpaɣ ma-walʋ Naabaalɩ tɔm nɛ ŋlabɩnɩ tʋmɩyɛ. Ɛkɛ kɩmɛlɛŋ nɛ kɩmɛlɛndʋ ɖeke ɛlakɩ. Mentendi-ŋ mʋ kʋjɔʋ kʋnɛ nɛ ŋkpeɣ-ɖʋ mbʋ pɩlaba yɔ.’

Daviid cosi-i se: ‘Ŋkɛ halʋ lɔŋsɩnɖʋ. Ŋɖaŋɩ-m se mantaakʋ Naabaalɩ nɛ mɛhɛyɩ-ɩ ɛ-kɩwɛɛkɩm yɔɔ. Wolo ña-ɖɩɣa taa nɛ laŋhɛzɩyɛ.’ Pʋwayɩ Naabaalɩ sɩba lɛ, Abigayɛɛlɩ pɩsɩ Daviid halaa taa lɛlʋ.