DAVIID kʋ Gooliyaatɩ nɛ pɩtɛ lɛ, Izrayɛɛlɩ sɔɔjanaa ñʋʋ tʋ Abnɛɛrɩ kpaɣ-ɩ nɛ ewoni-i Sɔɔlɩ cɔlɔ. Daviid tɔm la leleŋ Sɔɔlɩ siŋŋ nɛ ɛpɩsɩ-ɩ ɛ-sɔɔjanaa taa sɔsɔ nɔɔyʋ. Nɛ ɛsɩ-ɩ ɛ-ɖɩɣa taa.

Kɩyakʋ nakʋyʋ Izrayɛɛlɩ sɔɔjanaa wobi nɛ poyooni Filisti mba nɛ papɩsɩɣ lɛ, halaa teɣ hendu se: ‘Sɔɔlɩ kʋ ɛyaa kudokiŋ nɛ Daviid ñakʋ ɛyaa kudokiŋ kudokiŋ.’ Nɛ tɔm ndʋ tɩ-yɔɔ lɛ, Sɔɔlɩ paɣzɩ Daviid sʋsʋʋ mbʋ pʋyɔɔ yɔ paɖʋ-ɩ hɩɖɛ nɛ pɩkɩlɩ wiyaʋ. Ɛlɛ Yonataanɩ ñataalakɩ sʋsɩ. Ɛɛsɔɔlɩ Daviid pɩdɩɩfɛyɩ nɛ Daviid sɔɔlɩ-ɩ ɖɔɖɔ. Nɛ poɖuuni ɖama se pɛkɛɣ taabalaa mbʋ tam.

Daviid kaakɛ cɩmʋʋ maɖʋ kɩbanʋ. Nɛ Sɔɔlɩ kaasɔɔlɩ cɩmʋʋ ŋgʋ ɛmakɩ yɔ. Ɛlɛ, kɩyakʋ nakʋyʋ Sɔɔlɩ sʋsɩ kʋyɩnɩ-ɩ lɛ, ɛla kɩdɛkɛdɩm lakasɩ nasɩyɩ. Daviid wɛɛ ɛmakɩ cɩmʋʋ lɛ, Sɔɔlɩ kpaɣ kɩgbɛzʋʋ nɛ ɛtɔ-kʋ nɛ ɛtɔ se: ‘Mɔnsɔkɩ Daviid nɛ mankamɩ-ɩ nɛ koloŋa!’ Ɛlɛ, Daviid wɛlɩ ɛ-tɩ nɛ kɩgbɛzʋʋ tihiɣ-i. Pʋwayɩ Sɔɔlɩ tasɩ Daviid kɩgbɛzʋʋ tɔʋ nɛ efeti-i ɖɔɖɔ. Peeɖe Daviid ɖiɣzinaa se pʋpɔzʋʋ ɛkpa ɛ-tɩ.

Ŋtɔzʋʋ tɔm ndʋ Sɔɔlɩ kaayɔɔdaa yɔ, tɩ-yɔɔ? Ɛɛtɔm se weyi ɛkʋʋ Gooliyaatɩ yɔ,  ɛnʋ haɣ-ɩ ɛ-pɛlɛ. Ɛlɛ pɩkɔma lɛ, Sɔɔlɩ heyi Daviid se ye ɛpɩzaa ɛkʋ Filisti mba 100 yɔ, ɛhaɣ-ɩ ɛ-pɛlɛ Miikaalɩ. Sɔɔndʋ tɔm! Toovenim taa lɛ, Sɔɔlɩ ñɩnaɣ se Filisti mba ɩkʋ Daviid na. Ɛlɛ, patɩpɩzɩ. Daviid lɩɩ pɩ-taa nɛ Sɔɔlɩ cɛlɩ-ɩ ɛ-pɛlɛ nɛ ɛpɩsɩ Daviid halʋ.

Kɩyakʋ nakʋyʋ lɛ, Sɔɔlɩ heyi Yonataanɩ nɛ ɛ-lɩmɖʋyaa kpeekpe kpayɩ se ɛnʋ sɔɔlaa se ɛkʋ Daviid. Peeɖe Yonataanɩ heyi ɛ-caa se: ‘Taala Daviid kɩdɛkɛdɩm, mbʋ pʋyɔɔ yɔ wiɖiyi ɛtɩlabɩ-ŋ kɩwɛɛkɩm nabʋyʋ. Halɩ mbʋ mbʋ ɛlabɩ payɩ yɔ, ña pɩsɩnaa. Ɛlɛɣzɩ ɛ-tɩ sɩm nɛ ɛkʋ Gooliyaatɩ nɛ ŋna nɛ pɩlabɩ-ŋ leleŋ.’

Sɔɔlɩ nɩɩ ɛ-pɩyalʋ nɔɔ taa tɔm nɛ eɖuu se ɛnʋ ɛɛtasɩɣ Daviid kɩdɛkɛdɩm labʋ. Nɛ Daviid pɩsɩ ɛwɛɛ Sɔɔlɩ cɔlɔ ɛzɩ ɖooo yɔ nɛ ɛɖʋʋ-ɩ lɩm. Ɛlɛ kɩyakʋ nakʋyʋ Daviid wɛɛ ɛmakɩ cɩmʋʋ lɛ, Sɔɔlɩ ɖaɣnɩ-ɩ tɔʋ kɩgbɛzʋʋ. Daviid wɛlɩ ɛ-tɩ nɛ kɩgbɛzʋʋ ɖɛɛ kisiɣ koloŋa yɔɔ. Nabudozo ɖeɖe lɛ, Sɔɔlɩ tɔʋ Daviid kɩgbɛzʋʋ yɔ. Peeɖe Daviid nawa se ye ɛñɩnɩɣ ɛlɩɩ pɩ-taa yɔ, pʋpɔzʋʋ ese.

Ðoo ana ewolo ɛ-maɣmaɣ ɛ-ɖɩɣa taa. Ɛlɛ Sɔɔlɩ tiyi ɛ-ɛyaa nabɛyɛ se powolo pakʋ-ɩ. Miikaalɩ kaasɩm ɛ-caa lɩmaɣza. Pɩ-yɔɔ eheyi ɛ-walʋ se: ‘Ye ŋtise ɖoo anɛ yɔ, cee ŋkɛɣ sɩɖʋ.’ Miikaalɩ sɩnɩ Daviid nɛ ɛlɩɩnɩ mondoɖebɔʋ nɛ ese. Sɔɔlɩ wɛɣ nɛ ɛɖɔɔnʋʋ Daviid yɔ, pɩlakɩ pɩnzɩ lʋbɛ yɔ. Nɛ alɩwaatʋ ndʋ tɩ-taa Daviid seɣaɣ nɛ ɛmɛlɩɣ lona ndɩ ndɩ taa se Sɔɔlɩ ɛtaakʋ-ɩ.