PAA ŋkalɩɣ ɛjaɖɛ yɔɔ tɔm susuu takayaɣ, ŋcɔŋnɩ teelee yaa ŋwelisiɣ raadiyoo yɔ, pɩtʋʋ fɛyɩ se ŋnɩɣ ɛyaa kʋʋ, yoŋ nɛ kañatʋ lakasɩ lɛɛsɩ tɔm. Pɩtɩla kʋñɔŋ nakʋyʋ yaa ñɛ-ɛyʋ kʋsɔɔlʋ nɔɔyʋ sɩm yeba nɛ ña-maɣmaɣ ŋnɩɣ wɩzasɩ siŋŋ.

Pɔzɩ ña-tɩ se:

• Wɛtʋ tʋnɛ tɩ-taa Ɛsɔ sɔɔlaa se ma nɛ mɔ-hɔʋ ɖɩwɛɛ?

• Le manpɩzɩɣ mehiɣ sɩnʋʋ nɛ malʋbɩnɩ kala nɛ kʋñɔmɩŋ weyi mankatɩɣ yɔ?

• Wiɖiyi ɛyaa kaɣ pɩzʋʋ nɛ pɛwɛɛ laŋhɛzɩyɛ taa?

Bibl cosi tɔm tʋnɛ tɩ-yɔɔ kpayɩ kpayɩ.

• Ɛyaa ɩɩkaɣ tasʋʋ labʋ kʋñɔŋ, paatasɩɣ kpadɩyʋʋ nɛ paatasɩɣ sɩbʋ.​—Natʋ 21:4

• “Taɖɩyɛ tʋ kaɣ kʋyʋʋ nɛ ɛmaa ɛzɩ nɛnzɛm yɔ.”​—Izaayii 35:6

• “Yʋlʋmaa ɛza kuluu.”​—Izaayii 35:5

•  Pakaɣ fezuu sɩɖaa.​—Yohanɛɛsɩ 5:28, 29

• Nɔɔyʋ ɛɛkaɣ tasʋʋ hɩnʋʋ kʋdɔŋ.​—Izaayii 33:24

• Paa weyi ɛkaɣ wɛnʋʋ tɔɔnasi sakɩyɛ tɛtʋ yɔɔ.​—Keɣa 71:16

Pɩtɩla, ŋmaɣzɩ se piti lakasɩ nzɩ Bibl wɩlɩɣ se sɩkaɣ labʋ tɛtʋ yɔɔ yɔ, sɩkɛ ɖoziye tɔm yem. Ɛlɛ Bibl heyiɣ-ɖʋ se piileɖiɣ lɛ, Ɛsɔ maɣmaɣ kaɣnɩ lɛɣzɩtʋ ndʋ kɔnʋʋ tɛtʋ yɔɔ nɛ kiheyiɣ-ɖʋ ɖɔɖɔ ɛzɩma ɛkaɣ labʋ nɛ ɛkɔnɩ-tʋ yɔ.

Ɛlɛ pɩtɩkɛ tɔm ndʋ ti-ɖeke Bibl heyiɣ-ɖʋ. Kiheyiɣ-ɖʋ mbʋ pɩpɔzʋʋ se ɖɩtɩlɩ nɛ ɖɩwɛɛ koboyaɣ taa nɛ ɖɩnɩɩ leleŋ ɖe-wezuu caɣʋ taa sɔnɔ yɔ. Maɣzɩ pazɩ nɛ ŋna, ɖoŋ ɖoŋ lɛ, ɛbɛ haɣ-ɖʋ nɩɣzɛ? Pɩtɩla liidiye kʋñɔŋ, hɔʋ taa tɩlasɩ, kʋdɔmɩŋ yaa ɛyʋ kʋsɔɔlʋ nɔɔyʋ sɩm. Bibl pɩzɩɣ kɩsɩnɩ-ŋ kʋñɔmɩŋ ɛnɩ ɩ-taa nɛ kɩhɛzɩ ña-laŋɩyɛ. Kɩsɩɣnɩ-ŋ ɖɔɖɔ nɛ ŋcosi tɔm tʋnɛ tɩ-yɔɔ:

• Ɛbɛ yɔɔ ɖɩlakɩ kʋñɔŋ?

• Ɛbɛ pɩzɩɣ pɩsɩnɩ-ɖʋ nɛ ɖɩlɩɩ ɖa-kʋñɔmɩŋ taa?

• Ɛbɛ ɖɩpɩzɩɣ ɖɩla nɛ ɖɔ-hɔʋ wɛɛ koboyaɣ taa?

• Ðɩsɩkɩ lɛ, ɛbɛ pɩtɛŋnɩ-ɖʋ?

• Wiɖiyi ɖɩkaɣ tasʋʋ naʋ ɖɛ-ɛyaa kʋsɔɔlaa mba pasɩba yɔ?

• Ɛbɛ yɔɔ ɖɩpɩzɩɣ nɛ ɖɩtaa liu se Ɛsɔ kaɣ labʋ ndʋ payɩ ɛyɔɔdaa yɔ?

 Ŋwɛʋ nɛ ŋkalɩɣ takayaɣ kanɛ yɔ, pɩwɩlɩɣ se ŋsɔɔlaa se ŋtɩlɩ tɔm ndʋ Bibl wɩlɩɣ yɔ. Takayaɣ kanɛ kakaɣ-ŋ sɩnʋʋ. Paa tayʋʋ mbʋ lɛ, pɩ nɛ pɩ-tɔm pɔzʋʋ mbʋ pɩsɩɣnɩ-ŋ se ŋnɩɩ Bibl wɩlɩtʋ taa camɩyɛ yɔ. Ɛyaa miiliyɔɔwaa sakɩyɛ sɔɔlɩ ɛzɩma Yehowa Aseɣɖe Tɩnaa nɛ ɛyaa pɛkpɛlɩkɩɣ Bibl yɔ. Ðɩtaɣ liu se ña ɖɔɖɔ ŋkaɣ sɔɔlʋʋ se ña nɛ wɛ ɩkpɛlɩkɩ Bibl. Ðɩtɩmɩɣnɩ Ɛsɔ se ɛwazɩ-ŋ alɩwaatʋ ndʋ ŋɖiɣni ñaɣʋ pana se ŋtɩlɩ tɔm ndʋ Bibl wɩlɩɣ yɔ.