Ñʋʋ 1
«Iwolo nɛ ɩla . . . ɛyaa nɛ papɩsɩ tɔmkpɛlɩkɩyaa»
Apostoloowaa Tʋma Labʋ takayaɣ taa lɩmaɣza sɔsɔna nɛ ɛzɩma ka-taa tɔm tukuuni-ɖʋ sɔnɔ yɔ
1-6. Kɛdɩ ɛzɩma Aseɣɖe Tɩnaa susuu tɔm wɛtʋ ndɩ ndɩ taa yɔ pɩ-tɔm.
REBECCA kɛ Yehowa Aseɣɖe Tʋ, nɛ ɛwɛ Gana ɛjaɖɛ taa. Pɛlɛ ɛnʋ ɛkpaɣ e-sukuli ɛzɩ ɛ-tɔm susuu kooka yɔ. Ɛɖʋʋ ɛgbɛyɛ takayɩsɩ e-sukuli huyuu taa paa ɛzɩmtaa. Palɩɣ hɛzʋʋ lɛ, ɛñɩnɩɣ nʋmɔŋ se ɛtɩŋnɩ ɩ-yɔɔ nɛ esusi tɔm e-sukuli taa taabalaa. Rebecca paɣzɩ kpɛlɩkɩnʋʋ Bibl e-sukuli ɖaŋ taa taabalaa sakɩyɛ.
2 Madaagasɩkaarɩ kɛ lɩm hɛkʋ taa tɛtʋ ndʋ tɩñɔtɩnɩ Afrika wɩsɩ ɖɩlɩyɛ yɔ. Nʋmɔʋ lɩzɩyaa 2 nabɛyɛ ɖɔŋaɣ kilomɛtanaa 25 ɖoŋ ɖoŋ soŋaɣ taa nɛ powoki Madaagasɩkaarɩ ɛjaɖɛ taa tɛtʋ cikpetu natʋyʋ taa; tɛtʋ ndʋ tiposaa. Bibl tɔm kaakɛdɩnɩ ɛyaa sakɩyɛ tɛtʋ ndʋ tɩ-taa nɛ nʋmɔʋ lɩzɩyaa mba powokaɣ peeɖe nɛ pɛkpɛlɩkɩɣnɩ-wɛ Bibl.
3 Pɩsa nɛ Aseɣɖe Tɩnaa mba pɛwɛ Paraguwee yɔ papɩzɩ nɛ posusi tɔm ɛyaa mba pɛwɛ Paraguwee nɛ Paranaa pɔsɩ nɔsɩ yɔ lɛ, ajɛɛ 15 taa koobiya mba paha pa-tɩ faaa yɔ, pɔsɔzɩ pɔ-yɔɔ nɛ polu kpɩyʋʋ nakʋyʋ. Kpɩyʋʋ ŋgʋ kɩwalaa, nɛ ɛyaa 12 pɩzɩɣ nɛ pacaɣ kɩ-taa. Ðo-koobiya halaa nɛ abalaa cakɩ kpɩyʋʋ ŋgʋ nɛ powoki nɛ posusuu tɔm kɩbandʋ lona wena pɩwɛ kaɖɛ se ɛyʋ ewolo a-taa yɔ.
4 Aseɣɖe Tɩnaa mba pɛwɛ Amerika hayo kiŋ Alasɩkaa ɛjaɖɛ taa yɔ, patɩŋnɩ ŋgee waɖɛ naɖɩyɛ yɔɔ nɛ posusi tɔm alɩwaatʋ ndʋ ɛyaa kɔŋaɣ peeɖe soŋaɣ alɩwaatʋ taa se pɛyɛlɩ yɔ. Soŋaɣ fenasɩ taa lɛ, ajɛɛ ndɩ ndɩ taa ɛyaa sakɩyɛ sʋʋ mɛlɛnaa sɔsaa nɛ pɔkɔŋ nɛ pɛyɛlɩɣ Alasɩkaa ɛjaɖɛ taa. Aseɣɖe Tɩnaa ñɔɔzʋʋ pa-tɩ nɛ palakɩ samaɣ taa tɔm susuu mɛlɛnaa mba pɔ-cɔlɔ nɛ palakɩnɩ kʋnʋmɩŋ sakɩyɛ taa takayɩsɩ tʋmɩyɛ. Alasɩkaa ɛjaɖɛ nɖɩ ɖɩ-taa ɖɔɖɔ, koobiya lakaɣnɩ tʋmɩyɛ ɛsɔdaa lɔɔɖɩyɛ naɖɩyɛ nɛ posusuu tɔm lona wena aposaa yɔ a-taa, piyeba nɛ tɔm kɩbandʋ talɩ Alewutɩ, Atabaskaanɩ, Cimisiyaŋ nɛ Kilinkɛɛtɩ mba.
5 Koobu Larry wɛ Tekɩsaasɩ, Etaazuunii ɛjaɖɛ taa; ɛwɛnɩ ŋgee tɔm susuu kooka nakɛyɛ, ŋga lɛ kʋdɔndɩnaa ɖɩɣa ŋga ka-taa ɛwɛɛ yɔ. Ɛcakɩ kaakalasɩ cɛɛcɛ taa mbʋ pʋyɔɔ yɔ kɛgbɛdɩsaɣ nakɛyɛ kaatalɩ-ɩ; paa mbʋ yɔ ɛñɩnaɣ nʋmɔŋ nɛ ɛtɩŋɩɣnɩ ɩ-yɔɔ nɛ esusuu tɔm. Esusaɣ lalaa Kewiyaɣ tɔm, nɛ eheyaɣ-wɛ ɖɔɖɔ se ɛwɛnɩ lidaʋ se ɛjaɖɛ kɩfaɖɛ taa lɛ, ɛkaɣ tasʋʋ ɖɔm.—Iza. 35:5, 6.
6 Pɩsa nɛ Aseɣɖe Tɩnaa nabɛyɛ kʋyɩnɩ Mandalee nɛ powolo kigbeɣluu nakʋyʋ Birɩmanii hayo kiŋ lɛ, pasʋ mɛlɛ nɛ pala kɩ-taa kɩyakɩŋ 3. Paasɔɔlaa kpem se posusi tɔm kɩbandʋ, pʋyɔɔ lɛ pɔɖɔkaɣ ɛgbɛyɛ takayɩsɩ nɛ pahaɣ pa nɛ mba pɛwɛ mɛlɛ taa yɔ. Alɩwaatʋ ndʋ payɩ mɛlɛ sɩŋɩɣ tɛtʋ sɔsɔtʋ yaa tɛtʋ cikpetu natʋyʋ taa yɔ, ɖo-koobiya kpekpeka tɩnaa panɛ petiki lɛɛ lɛɛ nɛ powolo ɛyaa cɔlɔ nɛ paha-wɛ takayɩsɩ. Pɛwɛɣ nɛ posusuu tɔm lɛ, ɛyaa kɩfama sʋʋ mɛlɛ ŋgʋ, nɛ ɖo-koobiya panɛ papɩsɩɣ mɛlɛ taa lɛ, posusuu ɛyaa kɩfama mba tɔm.
7. (a) Nʋmɔŋ weyi yɔɔ Yehowa sɛyaa tɩŋɩɣna nɛ palɩzɩɣ aseɣɖe Ɛsɔ Kewiyaɣ yɔɔ? (b) Nɛ pa-kaɖʋwa lɛ ŋga?
7 Ɛzɩ koobiya halaa nɛ abalaa mba pɔ-tɔm ɖɩyɔɔdɩ pazɩ yɔ, Yehowa sɛyaa kpekpeka tɩnaa mba pɛwɛ ɛjaɖɛ kpeekpe yɔɔ yɔ ‘palɩzɩɣ aseɣɖe Ɛsɔ Kewiyaɣ yɔɔ tete.’ (Tʋma 28:23) Powoki ɛyaa cɔlɔ kpaɣ ɖɩɣa nɛ ŋwolo ɖɩɣa, habɛɛ yɔɔ, yaa pamaɣ-wɛ takayɩsɩ nɛ payaɣ-wɛ kaŋgalaafu yɔɔ. Alɩwaatʋ ndʋ pasʋʋ lɔɔɖɩyɛ, pɔɖɔŋ kaɖaɣ nakɛyɛ taa, yaa palɩɣ hɛzʋʋ tʋmɩyɛ taa yɔ, pɔsɔɔlɩ siŋŋ se pehiɣ waɖɛ naɖɩyɛ nɛ palɩzɩ aseɣɖe Ɛsɔ Kewiyaɣ yɔɔ. Paa patɩŋɩɣnɩ nʋmɔŋ ndɩ ndɩ yɔɔ yɔ, kaɖʋwa kʋɖʋmaɣ pɛwɛna: ŋga lɛ se posusi tɔm kɩbandʋ ɖenɖe payɩ panaɣ ɛyaa yɔ.—Mat. 10:11.
8, 9. (a) Ɛbɛ yɔɔ ɖɩpɩzɩɣ nɛ ɖɩyɔɔdɩ se ɛzɩma tɔm susuu tʋmɩyɛ wɛɛ nɛ ɖɩɖɛɣnɩ ɛsɩndaa sɔnɔ yɔ pɩwɛ piti kpem? (b) Pɩpɩzɩɣ piyele nɛ ɖɩpɔzɩ ɖa-tɩ tɔm ndʋ? (c) Ɛbɛ pɩpɔzʋʋ se ɖɩla nɛ ɖɩpɩzɩ nɛ ɖicosi tɔm ndʋ tɩ-yɔɔ?
8 Ña weyi ŋɖiɣni kalʋʋ takayaɣ kanɛ yɔ, ŋkɛ Kewiyaɣ tɔm susuyaa taa nɔɔyʋ? Tɔm susuyaa mba pɔɖɔ sakɩyɛ nɛ peɖiɣni tɔm susuu ajɛɛ wena a-taa yɔ, acɛzɩ 235. Ye ŋkɛ Kewiyaɣ tɔm susuyu yɔ, ña-taa pɩzɩɣ nɛ pɩla leleŋ mbʋ pʋyɔɔ yɔ ŋwɛɛ nɛ ŋɖʋʋ nesi se tɔm kɩbandʋ ɛtalɩ ɛyaa sakɩyɛ tɛtʋ kpeekpe yɔɔ. Mbʋ Yehowa samaɣ wɛɛ nɛ kalakɩ ɛjaɖɛ kpeekpe yɔɔ yɔ, pɩwɛ piti kpem. Paa Yehowa Aseɣɖe Tɩnaa ɩkatɩɣ kala sɔsɔna nɛ halɩ kominawaa ɖɩkɩ pɛ-Ɛsɔ sɛtʋ tʋma nʋmɔʋ nɛ panazɩɣ-wɛ yɔ, pɛwɛɛ nɛ palɩzɩɣ ajɛɛ tɩŋa taa ɛyaa aseɣɖe tete Ɛsɔ Kewiyaɣ yɔɔ.
9 Maɣzɩ tɔm tʋnɛ tɩ-yɔɔ: Paa ɖɩkatɩɣ kala sakɩyɛ nɛ Sataŋ ɛñakɩ pana se ɛɖɩɣ-ɖʋ nʋmɔʋ yɔ, tɔm susuu tʋmɩyɛ wɛɛ nɛ ɖɩɖɛɣnɩ ɛsɩndaa. Ɛzɩma pɩpɩzɩɣ nɛ pɩlakɩ mbʋ? Pɩsa nɛ ɖicosi tɔm ndʋ tɩ-yɔɔ lɛ, pɩpɔzʋʋ se ɖɩyɔɔdɩ mbʋ pɩɩlabɩ kajalaɣ pɩnzɩ mɩnʋʋ taa yɔ pɩ-tɔm. Toovenim taa lɛ, Yehowa Aseɣɖe Tɩnaa mba pɛwɛ sɔnɔ yɔ, pɛwɛɛ nɛ powoki pɩ-yɔɔ nɛ palakɩ tɔm susuu tʋmɩyɛ nɖɩ ɖɩɩpaɣzɩ ɖooo kajalaɣ pɩnzɩ mɩnʋʋ taa yɔ.
Tʋmɩyɛ nɖɩ ɖɩ-tɔm cɛyɩ siŋŋ yɔ
10. (a) Tʋmɩyɛ nɖɩ Yesu kaaha ɛ-tɩ faaa nɛ ɛla? (b) Nɛ tɔm ndʋ ɛɛsɩm ɖɩ-yɔɔ?
10 Yesu Krɩstʋ weyi ɛsɩ Krɩstʋ ɛgbɛyɛ tigiɖe yɔ, ɛha ɛ-tɩ faaa nɛ esusi Ɛsɔ Kewiyaɣ tɔm kɩbandʋ; tʋmɩyɛ nɖɩ ɖɩ-tɔm kaakɩlɩnɩ cɛyʋʋ e-wezuu caɣʋ taa. Ɛyɔɔdɩ kɩyakʋ nakʋyʋ se: «Pɩwɛɛ ɖɔɖɔ se monsusi Ɛsɔ Kewiyaɣ tɔm kɩbandʋ tɛtʋ lɛɛtʋ taa, mbʋ pʋyɔɔ yɔ pʋyɔɔ petiyi-m.» (Luka 4:43) Yesu kaanawa se ɛpaɣzɩ tʋmɩyɛ nɖɩ yɔ, e-ɖeke ɛɛkaɣ pɩzʋʋ nɛ ɛtɛm-ɖɩ. Alɩwaatʋ pazɩ pʋcɔ nɛ ɛsɩkɩ lɛ, ɛɛyɔɔdaa se pakaɣ susuu Kewiyaɣ tɔm «ajɛɛ kpeekpe taa.» (Mark. 13:10) Ɛlɛ ɛzɩma pɩkaɣ labʋ mbʋ, nɛ akaɣ tʋmɩyɛ nɖɩ labʋ?
«Iwolo nɛ ɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa.»—Maatiyee 28:19
11. (a) Tʋmɩyɛ kɩcɛyɩyɛ nɖɩ Yesu ɖʋ ɛ-tɔmkpɛlɩkɩyaa? (b) Nɛ ɛbɛ kaɣ-wɛ sɩnʋʋ nɛ palabɩ-ɖɩ?
11 Yesu sɩba nɛ pefezi-i nɛ pɩtɛ lɛ, ɛwɩlɩ ɛ-tɩ ɛ-tɔmkpɛlɩkɩyaa nɛ ɛɖʋ-wɛ tʋmɩyɛ kɩcɛyɩyɛ naɖɩyɛ. Eheyi-wɛ se: «Pʋyɔɔ lɛ, iwolo nɛ ɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa, ɩmɩyɩsɩ-wɛ lɩm Caa nɛ Pɩyalʋ nɛ fezuu kiɖeɖeu pa-hɩɖɛ taa, ɩwɩlɩ-wɛ nɛ pɔɖɔ tɔm ndʋ payɩ mawɩlɩ-mɩ yɔ tɩ-yɔɔ. Nɛ ɩna! Mɛwɛ mɩ-cɔlɔ kɩyakɩŋ tɩŋa nɛ pɩkɔɔ pɩtalɩ ɛjaɖɛ tɛm alɩwaatʋ taa.» (Mat. 28:19, 20) Tɔm ndʋ ɛyɔɔdaa se «mɛwɛ mɩ-cɔlɔ» yɔ, tɩwɩlɩɣ se ɛkaɣ sɩnʋʋ ɛ-tɔmkpɛlɩkɩyaa tɔm susuu nɛ kpɛlɩkɩyaa labʋ tʋmɩyɛ taa. Pɩpɔzʋʋ pasɩnɩ-wɛ mbʋ, mbʋ pʋyɔɔ yɔ Yesu kaayɔɔdaa se ‘ajɛɛ kpeekpe kaɣ-wɛ paɖʋʋ.’ (Mat. 24:9) Tɔmkpɛlɩkɩyaa pɩzɩɣ nɛ pataa liu sɩnʋʋ nabʋyʋ ɖɔɖɔ. Pɩɩkazɩ pazɩ se Yesu ɛkpa ɛsɔdaa lɛ, eeheyi ɛ-tɔmkpɛlɩkɩyaa se fezuu kiɖeɖeu kaɣ-wɛ ɖoŋ haʋ nɛ pɛkɛ ɛ-aseɣɖe tɩnaa «nɛ piwolo pɩtalɩ tɛtʋ hɔɔlʋʋ ŋgʋ kɩkɩlɩ posuu yɔ kɩ-taa.»—Tʋma 1:8.
12. (a) Tɔm kɩcɛyɩtʋ ndʋ ɖɩpɩzɩɣ nɛ ɖɩpɔzɩ ɖa-tɩ? (b) Nɛ ɛbɛ yɔɔ pɩcɛyaa se ɖɩtɩlɩ tɔm ndʋ tɩ-yɔɔ cosuu?
12 Ðɩpɩzɩɣ nɛ ɖɩpɔzɩ ɖa-tɩ tɔm kɩcɛyɩtʋ tʋnɛ: Ɛzɩ Yesu apostoloowaa nɛ kajalaɣ pɩnzɩ mɩnʋʋ taa tɔmkpɛlɩkɩyaa lalaa labɩ po-ɖoŋ ɖeɖe nɛ pala tɔm susuu tʋmɩyɛ nɖɩ Yesu ɖʋ-wɛ yɔ? Kajalaɣ Krɩstʋ mba taaɖɔɔ, ɛzɩ papɩzaa nɛ powolo pɩ-yɔɔ nɛ palɩzɩ aseɣɖe Ɛsɔ Kewiyaɣ yɔɔ tete halɩ pɩkpɛndɩnɩ nazɩm sɔsɔm taa? Ɛzɩ toovenim se Yehowa sɩnɩ-wɛ nɛ ɛha-wɛ ɖɔɖɔ e-fezuu kiɖeɖeu tɔmkpɛlɩkɩyaa labʋ tʋmɩyɛ nɖɩ ɖɩ-taa? Bibl taa takayaɣ ŋga payaɣ se Tʋma Labʋ yɔ, kocosi tɔm ndʋ nɛ tɔm lɛɛtʋ yɔɔ ɖɔɖɔ. Pɩcɛyaa se ɖɩtɩlɩ tɔm cosuu mbʋ. Ɛbɛ yɔɔ? Yesu kaayɔɔdaa se tʋmɩyɛ nɖɩ ɛɖʋ-wɛ yɔ, pɛwɛɣ ɖɩ-labʋ yɔɔ «pɩkɔɔ pɩtalɩ ɛjaɖɛ tɛm alɩwaatʋ taa.» Ye mbʋ, toovenim Krɩstʋ mba tɩŋa paɖʋ tʋmɩyɛ nɖɩ, pɩkpɛndɩnɩ ɖa mba ɖɩwɛ kɛdɛzaɣ kɩyakɩŋ ɛnɛ ɩ-taa yɔ. Pʋyɔɔ lɛ, ɖɩsɔɔlaa se ɖɩtazɩ kɛdɛsɩ nzɩ sɩwɛ Tʋma Labʋ takayaɣ taa yɔ sɩ-taa.
Tʋma Labʋ takayaɣ taa lɩmaɣza sɔsɔna
13, 14. (a) Ama Tʋma Labʋ takayaɣ, nɛ le ka-mayʋ lɩ tɔm ndʋ ɛmawa tɩ-yɔɔ? (b) Ɛbɛ tɔm pɔyɔɔdɩ Tʋma Labʋ takayaɣ taa?
13 Ama Tʋma Labʋ takayaɣ? Patɩyaa weyi ɛma takayaɣ ŋga yɔ ɛ-hɩɖɛ ka-taa, ɛlɛ tɔm ndʋ kapaɣzɩnaa yɔ tɩwɩlɩɣ kpayɩ kpayɩ se weyi ɛma Luka tɛ Evaŋgilim yɔ, ɛnʋ manɩ-kɛ ɖɔɖɔ. (Luka 1:1-4; Tʋma 1:1, 2) Pʋyɔɔ lɛ ɛyaa ɖiɣzinuu se Luka manɩ takayaɣ ŋga yɔ, pileɖaa. Paasɩmɩ-ɩ se ɛkɛ «fɛɖʋ kʋsɔɔlʋ» nɛ caanaʋ taa tɔm taa tazɩyʋ kɩbanʋ. (Kol. 4:14) Takayaɣ ŋga kɔyɔɔdʋʋ mbʋ pɩlabɩ pɩnzɩ 28 taa mbʋ yɔ, pʋ-tɔbʋʋ lɛ se kpaɣnɩ pɩnaɣ 33 alɩwaatʋ ndʋ Yesu kpa ɛsɔdaa yɔ nɛ piwolo pɩnaɣ 61 taa mbʋ yɔ, alɩwaatʋ ndʋ paɖɩɣ Pɔɔlɩ salaka taa Roma yɔ. Mbʋ pɩlaba nɛ Luka ma pɩ-tɔm yɔ, pɩwɩlɩɣ se alɩwaatʋ ndʋ pɩ-taa sakɩyɛ lakaɣ yɔ, Luka kaawɛɛ. Ðɩsɩm tɔm ndʋ mbʋ pʋyɔɔ yɔ, ɛyɔɔdɩ mbʋ pɩ-tɔm Tʋma Labʋ takayaɣ taa yɔ ɛɖʋ ɛ-tɩ pɩ-taa sakɩyɛ taa. (Tʋma 16:8-10; 20:5; 27:1) Luka kaasɔɔlaa se ɛma mbʋ pɩɖɔma yɔ keekee, pʋyɔɔ lɛ pɩtʋʋ fɛyɩ se ɛpɔzɩ tɔm Pɔɔlɩ, Barnaabaasɩ, Filiipu nɛ ɛyaa lalaa pʋcɔ nɛ ɛma Tʋma Labʋ takayaɣ.
14 Ɛbɛ tɔm pɔyɔɔdɩ Tʋma Labʋ takayaɣ taa? Evaŋgilim ŋgʋ Luka mawa yɔ kɩ-taa, ɛma tɔm ndʋ Yesu yɔɔdaa nɛ mbʋ ɛlaba yɔ pɩ-tɔm. Ɛlɛ Tʋma Labʋ takayaɣ taa lɛ, Luka kɛdɩ tɔm ndʋ Yesu wayɩ tɩŋɩyaa yɔɔdaa nɛ mbʋ palaba yɔ pɩ-tɔm. Ye mbʋ, Tʋma Labʋ takayaɣ yɔɔdʋʋ ɛyaa mba palabɩ tʋma sɔsɔna yɔ pɔ-tɔm, paa ɛyaa lalaa ɩkpakaɣ-wɛ se «patɩla sukuli nɛ pɛkɛ ɛyaa yemwaa» yɔ. (Tʋma 4:13) Tobi lɛ, takayaɣ kanɛ keheyiɣ-ɖʋ ɛzɩma pasɩ Krɩstʋ ɛgbɛyɛ tigiɖe nɛ ɛzɩma ɛgbɛyɛ nɖɩ ɖɩɖɛnɩ ɛsɩndaa yɔ. Nɛ Ɛsɔ fezuu kiɖeɖeu sɩnɩnɩ Luka nɛ ɛma takayaɣ ŋga. Tʋma Labʋ takayaɣ wɩlɩɣ ɛzɩma kajalaɣ pɩnzɩ mɩnʋʋ taa Krɩstʋ mba susaɣ tɔm yɔ: Nʋmɔŋ weyi ɩ-yɔɔ paatɩŋnaa nɛ posusi tɔm yɔ nɛ lɩmaɣza wena paawɛnɩ tɔm susuu yɔɔ yɔ. (Tʋma 4:31; 5:42) Kañɩkɩɣ niye ɛzɩma fezuu kiɖeɖeu sɩnaa nɛ tɔm kɩbandʋ yɛlɩ yɔ pɩ-yɔɔ. (Tʋma 8:29, 39, 40; 13:1-3; 16:6; 18:24, 25) Ɛzɩ Bibl taa takayɩsɩ lɛɛsɩ yɔ, Tʋma Labʋ takayaɣ ñɩkɩɣ niye Bibl tɔm ñʋʋ sɔsɔʋ yɔɔ; ŋgʋ yɔ: Yesu kɛnɩ Ɛsɔ Kewiyaɣ wiyaʋ nɛ pakaɣ tɩŋnʋʋ kɔ-yɔɔ nɛ pañalɩ Ɛsɔ hɩɖɛ yɔɔ. Takayaɣ ŋga kawɩlɩɣ ɖɔɖɔ ɛzɩma tɔmkpɛlɩkɩyaa pɩzaa nɛ posusi Kewiyaɣ tɔm kɩbandʋ paa ɛyaa sakɩyɛ kaanazaɣ-wɛ yɔ.—Tʋma 8:12; 19:8; 28:30, 31.
15. Ye ɖɩtazɩ Tʋma Labʋ takayaɣ taa yɔ, ɛzɩma pɩkaɣ-ɖʋ wazʋʋ?
15 Toovenim taa lɛ, ye ɖɩtazɩ Bibl taa takayaɣ ŋga payaɣ se Tʋma Labʋ yɔ ka-taa yɔ, pɩhaɣ-ɖʋ taa leleŋ nɛ pɩkpazɩ ɖe-tisuu ɖoŋ! Ye ɖɩkpaɣ alɩwaatʋ nɛ ɖɩmaɣzɩ kajalaɣ Krɩstʋ ñɩma mba pa-abalɩtʋ nɛ pe-kpekpeka yɔɔ yɔ, pɩkaɣ tukunuu ɖa-laŋa. Pɩkaɣ-ɖʋ seɣtuu ɖɔɖɔ nɛ ɖɩmaɣzɩnɩ kajalaɣ pɩnzɩ mɩnʋʋ taa ɖo-koobiya tisuu. Pɩtasɩ lɛ, pɩkaɣ-ɖʋ sɩnʋʋ nɛ ɖɩña paɣtʋ ndʋ Yesu ɖʋ-ɖʋ yɔ; ɛyɔɔdaa se: «Iwolo nɛ ɩla . . . tɔmkpɛlɩkɩyaa.» Takayaɣ kanɛ, palabɩ-kɛ se kasɩnɩ-ŋ nɛ ŋtazɩ Tʋma Labʋ takayaɣ taa camɩyɛ.
Takayaɣ ŋga kasɩɣnɩ-ɖʋ se ɖɩkpɛlɩkɩ Bibl yɔ
16. Kaɖʋsɩ 3 nzɩ takayaɣ kanɛ kɛwɛna?
16 Kaɖʋsɩ 3 sɩnɛ takayaɣ kanɛ kɛwɛna: (1) se kakpazɩ ɖoŋ tisuu mbʋ ɖɩwɛna se Yehowa wɛɛ nɛ ɛtɩŋɩɣnɩ e-fezuu kiɖeɖeu yɔɔ nɛ ɛɖʋʋ nesi Kewiyaɣ tɔm susuu tʋmɩyɛ nɛ kpɛlɩkɩyaa labʋ tʋmɩyɛ yɔ, (2) se ɖɩtazɩ kajalaɣ pɩnzɩ mɩnʋʋ taa Krɩstʋ mba kɩɖaŋ taa nɛ pieseɣti kpekpeka ŋga ɖɩwɛnɩ tɔm susuu yɔɔ yɔ, nɛ (3) se ñamtʋ ndʋ ɖɩwɛnɩ Yehowa ɛgbɛyɛ yɔɔ nɛ ñamtʋ ndʋ ɖɩwɛnɩ mba pɛɖɛɣ nɔɔ tɔm susuu tʋmɩyɛ taa nɛ pɔcɔŋnɩ agbaa yɔɔ yɔ tɩkpa ɖoŋ.
17, 18. (a) Ɛzɩma pɔcɔlɩ takayaɣ kanɛ ka-taa tɔm? (b) Nɛ wondu ndʋ wɛ ka-taa nɛ tɩkaɣ-ŋ sɩnʋʋ nɛ ŋkpɛlɩkɩ Bibl ña-tɩ yɔɔ?
17 Ɛzɩma pɔcɔlɩ takayaɣ kanɛ ka-taa tɔm? Patayɩ-kɛ hɔɔlɩŋ 8 taa, nɛ paa hɔɔlʋʋ ŋgʋ lɛ kɩyɔɔdʋʋ Tʋma Labʋ takayaɣ hɔɔlʋʋ nakʋyʋ tɔm. Ñʋŋ weyi ɩkɔŋ yɔ, ɩ-kaɖʋwa tɩkɛnɩ se ɩtazɩ Tʋma Labʋ takayaɣ taa mayaɣ mayaɣ, ɛlɛ ɩ-kaɖʋwa lɛ se ɩyɔɔdɩ lɔŋ weyi Tʋma Labʋ takayaɣ taa kɛdɛsɩ kpɛlɩkɩɣ-ɖʋ yɔ ɩ-tɔm nɛ ɩsɩnɩ-ɖʋ nɛ ɖɩna ɛzɩma ɖɩpɩzɩɣ nɛ ɖɩlabɩnɩ lɔŋ ɛnɩ tʋmɩyɛ yɔ. Paa ñʋʋ ŋgʋ kɩ-ɖɩbazɩyɛ lɛ, pama lɩmaɣzɩyɛ sɔsɔɖɛ nɖɩ ɖɩwɩlɩɣ mbʋ pɩ-tɔm tɔm ñʋʋ ŋgʋ kɩkaɣ yɔɔdʋʋ yɔ, nɛ pama ɖɔɖɔ Bibl masɩ nzɩ sɩwɩlɩɣ Tʋma Labʋ hɔɔlʋʋ ŋgʋ kɩ-tɔm pakaɣ yɔɔdʋʋ yɔ.
18 Wondu lɛɛtʋ wɛ takayaɣ kanɛ ka-taa ɖɔɖɔ nɛ tɩkaɣ-ŋ sɩnʋʋ nɛ ŋkpɛlɩkɩ Bibl ña-tɩ yɔɔ. Kɩlɛmɩŋ sɩɣnɩ-ŋ se ŋmaɣzɩ nɛ ŋna mbʋ pɩɩlaba nɛ pama pɩ-tɔm Tʋma Labʋ takayaɣ hɔɔlʋʋ ŋgʋ ŋɖiɣni kalʋʋ yɔ kɩ-taa yɔ. Ñʋŋ sakɩyɛ wɛnɩ aɖakasɩ nzɩ sɩsɩɣnɩ-ŋ se ŋtɩlɩ tɔm lɛɛtʋ yɔ. Aɖakasɩ nasɩyɩ yɔɔdʋʋ Bibl taa ɛyaa nabɛyɛ wezuu caɣʋ tɔm, mba pɩwɛɛ se ɖɩmaɣzɩnɩ pe-tisuu yɔ. Lɛɛsɩ ñɛkɛdɩɣ-ɖʋ tɔm lɛɛtʋ lona yɔɔ, kɛdɛsɩ yɔɔ, sɔnzɩ yɔɔ yaa ɛyaa lalaa mba pɔyɔɔdɩ pɔ-tɔm Tʋma Labʋ takayaɣ taa yɔ pɔ-yɔɔ.
Susi tɔm kpɛdɛyɛ ñɔ-tɔm susuu kooka taa
19. Tɔm ndʋ pɩwɛɛ se ɖɩpɔzɩ ɖa-tɩ nabʋyʋ taa?
19 Takayaɣ kanɛ kapɩzɩɣ kasɩnɩ-ŋ nɛ ŋheyi ña-tɩ toovenim alɩwaatʋ ndʋ ŋmaɣzɩɣ tʋmɩyɛ nɖɩ ŋlakɩ Yehowa sɛtʋ taa yɔ ɖɩ-yɔɔ yɔ. Ŋkɛʋ Kewiyaɣ tɔm susuyu yɔ, paa pileɖaa yaa pitileɖi yɔ, pɩwɛɣ ɖeu se ŋkpakɩɣ alɩwaatʋ nabʋyʋ taa nɛ ŋmaɣzɩɣ mbʋ pɩ-tɔm kɩlɩ cɛyʋʋ ñe-wezuu caɣʋ taa yɔ pɩ-yɔɔ; nɛ ŋmaɣzɩɣ ɖɔɖɔ lɩmaɣza wena ŋwɛnɩ tɔm susuu yɔɔ yɔ a-yɔɔ. (2 Kɔr. 13:5) Pɔzɩ ña-tɩ se: ‘Tɔm susuu mʋ ñɩm mɛ-ɛsɩndaa lɛɛlɛɛyɔ ɛzɩ pɩɩwɛʋ alɩwaatʋ ndʋ pamɩyɩsɩ-m lɩm yɔ? (1 Kɔr. 7:29-31) Man-taa tɛmnɩ tɔm kɩbandʋ ndʋ monsusuu yɔ, nɛ monsusuu-tʋ nɛ kpekpeka na? (1 Tes. 1:5, 6) Mɛwɛɛ nɛ malakɩ mon-ɖoŋ ɖeɖe tɔm susuu nɛ kpɛlɩkɩyaa labʋ tʋmɩyɛ taa?’—Kol. 3:23.
20, 21. (a) Ɛbɛ yɔɔ tʋmɩyɛ nɖɩ paɖʋ-ɖʋ yɔ ɖɩ-tɔm cɛyɩ kpem? (b) Nɛ pɩwɛɛ se ɖa-taa ɛtɛ se ɖɩlakɩ we?
20 Pɩwɛɛ se ɖɩtaasɔɔ kpa se tʋmɩyɛ kɩcɛyɩyɛ nɖɩ ɖɩlakɩ yɔ, nɖɩ lɛ tɔm susuu nɛ kpɛlɩkɩyaa labʋ. Alɩwaatʋ wɛɣ nɛ tɩɖɛɣ lɛ, tʋmɩyɛ nɖɩ ɖɩ-tɔm kaɣ cɛyʋʋ nɛ pɩkɩlɩ. Ɛjaɖɛ ɖɩnɛ ɖɩ-tɛm wɛɛ nɛ pɩñɔtʋʋ lɛɛ lɛɛ. Pɩcɛyɩ lɛɛlɛɛyɔ nɛ pɩkɩlɩ se ɛyaa ɩtɩlɩ mbʋ pɩwɛɛ se pala nɛ papɩzɩ nɛ pehiɣ ñʋʋ yabʋ Armaagedɔɔ wiye yɔ. Laŋa kɩbana tɩnaa mba pɩkazaa se papɩzɩɣ nɛ pewelisi tɔm ndʋ ɖisusuu yɔ, ɖɩɩsɩŋ pa-ñʋʋ. (Tʋma 13:48) Ɛlɛ ɖa-sʋʋtʋ pɩkɛnaa se ɖɩsɩnɩ-wɛ pʋcɔ nɛ alɩwaatʋ tɛ.—1 Tim. 4:16.
21 Ye mbʋ, pɩcɛyaa se ɖɩmaɣzɩnɩ kpekpeka ŋga kajalaɣ pɩnzɩ mɩnʋʋ taa Kewiyaɣ tɔm susuyaa kaawɛna yɔ. Tɛtɛ nɛ takayaɣ kanɛ kɛ-kpɛlɩkʋʋ seɣti-ŋ nɛ ŋsusi tɔm nɛ kpekpeka nɛ abalɩtʋ nɛ pɩkɩlɩ. Yele nɛ Tʋma Labʋ takayaɣ kpɛlɩkʋʋ sɩnɩ-ŋ nɛ ŋtɛ ña-taa se ŋwoki pɩ-yɔɔ nɛ ‘ŋlɩzɩɣ aseɣɖe Ɛsɔ Kewiyaɣ yɔɔ tete’ nɛ pɩkɩlɩ.—Tʋma 28:23.
