Kewiyaɣ tɔm susuyu kʋsɔɔlʋ:

Maɣzɩ se ŋkɛ apostoloo nɛ ŋsɩŋ Oliivi Pʋʋ yɔɔ. Yesu lɩ ñɔ-yɔɔ. Ɛcaɣaɣ kpaʋ ɛsɔdaa lɛ, ɛyɔɔdɩ se: «Ɩkaɣ mʋʋ ɖoŋ alɩwaatʋ ndʋ fezuu kiɖeɖeu tiki mɩ-yɔɔ yɔ, nɛ ɩkaɣ kɛʋ ma-aseɣɖe tɩnaa Yeruzalɛm taa, Yuudee tɩŋa taa nɛ Samaarii taa, nɛ piwolo pɩtalɩ tɛtʋ hɔɔlʋʋ ŋgʋ kɩkɩlɩ posuu yɔ kɩ-taa.» (Tʋma 1:8) Ɛzɩma pɩɩlabɩ-ŋ?

Pɩtɩla pɩpɩzɩɣ nɛ pɩlabɩ-ŋ ɛzɩ tʋmɩyɛ nɖɩ Yesu wɛɛ nɛ ɛɖʋʋ-ŋ yɔ ŋŋpɩzɩɣ nɛ ŋlabɩ-ɖɩ yɔ. Ŋpɩzɩɣ nɛ ŋpɔzɩ ña-tɩ se: «Ɛzɩma ɖa tɔmkpɛlɩkɩyaa ññɩɩwaa panɛ, ɖɩpɩzɩɣ nɛ ɖɩlɩzɩ aseɣɖe “nɛ piwolo pɩtalɩ tɛtʋ hɔɔlʋʋ ŋgʋ kɩkɩlɩ posuu yɔ kɩ-taa”?» Pʋtɔma ŋtɔzʋʋ tɔm ndʋ Yesu yɔɔdaa nɛ ɛpaɣnɩ-mɩ kɛdɛzaɣ ɖoo wena ɛcaɣ wezuu tɛtʋ yɔɔ yɔ tɩ-yɔɔ: «Yom tɩkɩlɩ ɛ-caa. Ye panazɩ-m yɔ, pakaɣ-mɩ nazʋʋ ɖɔɖɔ; ye pɔɖɔm mɔn-tɔm yɔɔ yɔ, pakaɣ mɩ-ñɩndʋ yɔɔ ɖɔm ɖɔɖɔ. Ɛlɛ pakaɣ-mɩ labʋ pɩtɩŋa payɩ mbʋ yɔ ma-hɩɖɛ yɔɔ, mbʋ pʋyɔɔ yɔ patɩtɩlɩ Weyi etiyi-m yɔ.» (Yoh. 15:20, 21) Ŋmaɣzɩɣ tɔm ndʋ tɩ-yɔɔ lɛ, pɩtɩla ŋpɔzʋʋ ña-tɩ se: «Ɛzɩma manpɩzɩɣ nɛ malɩzɩ aseɣɖe tete ŋgʋ ɛyaa kaɣ-m kaɖɩnʋʋ nɛ panazɩ-m?»

Wɛtʋ ndʋ tɩ-ɖɔndɩ taa ɖɩwɛ sɔnɔ ɖɔɖɔ. Ða mba ɖɩkɛ Yehowa Aseɣɖe Tɩnaa yɔ, ɖa-tʋmɩyɛ pɔzʋʋ ɖɔɖɔ se ɖɩlɩzɩ «ajɛɛ tɩŋa taa ɛyaa» aseɣɖe tete nɛ «piwolo pɩtalɩ tɛtʋ hɔɔlʋʋ ŋgʋ kɩkɩlɩ posuu yɔ kɩ-taa.» (Mat. 28:19, 20) Ɛzɩma ɖɩpɩzɩɣ nɛ ɖɩla tʋmɩyɛ nɖɩ, kɔzɩ kɔzɩ alɩwaatʋ ndʋ ɛyaa kaɖɩɣnɩ-ɖʋ yɔ?

Apostoloowaa Tʋma Labʋ takayaɣ kɛdɩɣ-ɖʋ camɩyɛ ɛzɩma Yehowa sɩnɩ apostoloowaa nɛ kajalaɣ pɩnzɩ mɩnʋʋ taa Krɩstʋ mba lalaa nɛ pala tʋmɩyɛ nɖɩ paɖʋ-wɛ yɔ. Takayaɣ kanɛ, kakaɣ-ŋ sɩnʋʋ nɛ ŋna mbʋ mbʋ pɩɩtalɩ Krɩstʋ ñɩma mba yɔ nɛ ŋna ɖɔɖɔ ɛzɩma pɩɩkɛdɩnɩ-wɛ se pana se tɔm susuu tʋmɩyɛ wɛɛ nɛ ɖɩɖɛɣnɩ ɛsɩndaa lɛɛ lɛɛ yɔ. Pɩkaɣ-ŋ ɖɩɣzʋʋ se ŋtɩlɩ se wɛtʋ ndɩ ndɩ ndʋ kajalaɣ pɩnzɩ mɩnʋʋ taa Ɛsɔ sɛyaa kaakataa yɔ, tɩnɩɣzɩnɩ wɛtʋ ndʋ Ɛsɔ sɛyaa katɩɣ sɔnɔ yɔ. Ŋkaɣ naʋ se wɛtʋ ndʋ tiitukuuni tʋmɩyɛ nɖɩ paɖʋ-ɖʋ se ɖɩla yɔ ɖi-ɖeke, ɛlɛ titukuuni ɖɔɖɔ ɛzɩma pɔñɔɔzɩ-ɖʋ se ɖɩla tʋmɩyɛ nɖɩ yɔ. Ŋmaɣzɩɣ ɛzɩma wɛtʋ ndʋ tɩnɩɣzɩnɩ ɖama yɔ pɩ-yɔɔ lɛ, pɩtʋʋ fɛyɩ se pɩkaɣ kpazʋʋ ñe-tisuu ɖoŋ se Yehowa Ɛsɔ wɛɛ nɛ ewoki pɩ-yɔɔ nɛ eɖiyiɣ ɛ-ɛgbɛyɛ hɔɔlʋʋ ŋgʋ kɩwɛ tɛtʋ yɔɔ yɔ.

Ðɩtɩmɩɣnɩ Ɛsɔ se takayaɣ kanɛ kɛ-kpɛlɩkʋʋ ɛkpazɩ ñe-lidaʋ ɖoŋ se Yehowa kaɣ-ŋ sɩnʋʋ, nɛ ɛkaɣ tɩŋnʋʋ e-fezuu kiɖeɖeu yɔɔ nɛ ɛha-ŋ ɖoŋ weyi pɩpɔzʋʋ-ŋ yɔ nɛ ŋɖɔkɩ ña-laŋɩyɛ. Nɛ ɖɩɩpɩtɩɣ se ɛkaɣ labʋ mbʋ. Ye ŋɖɔŋ lɔŋ tasʋʋ mbʋ pɩwɛ takayaɣ kanɛ ka-taa yɔ pɩ-yɔɔ yɔ, pɩkaɣ-ŋ kpazʋʋ ɖoŋ nɛ ŋwolo pɩ-yɔɔ nɛ ‘ŋlɩzɩ aseɣɖe Ɛsɔ Kewiyaɣ yɔɔ tete’ nɛ ŋsɩnɩ lalaa nɛ pɛkpɛlɩkɩ nɛ patɩlɩ Yehowa nɛ pɛwɛɛnɩ wezuu maatɛŋ lidaʋ.—Tʋma 28:23; 1 Tim. 4:16.