Laŋwɛɛkɩyɛ pɩzɩɣ nɛ pɩkɛnɩ-ɖʋ sʋʋtʋ sɔsɔtʋ kpem. Wiyaʋ Daviid mawa se: “Man-kɩwɛɛkɩm hu mɔ-yɔɔ nɛ pi-yuŋ tɔyɩtʋʋ-m.” (Keɣa 37:5) Krɩstʋ ñɩma nabɛyɛ taa kaatɛma se Yehowa ɛɛpɩzɩɣ nɛ ekpeɣ-wɛ kpa, nɛ laŋwɛɛkɩyɛ nɖɩ ɖɩ-taa pɛwɛɛ yɔ, ɖɩwɛɛ nɛ ɖɩtɔyɩtʋʋ-wɛ. (2 Kɔrɛntɩ mba 2:7) Ɛlɛ pɛwɛnɩ toovenim se pɛwɛɛnɩ lɩmaɣza ana? Paa ña-kɩwɛɛkɩm ɛtɩpaɣlɩ ɛzɩma yɔ, pɩwɩlɩɣ se ŋposini Yehowa siŋŋ nɛ ɛɛkaɣ pɩzʋʋ nɛ ekpeɣ-ŋ kpa yaa we? Aayɩ.

Yehowa ɛɛhaɣ siɣye kɩwɛɛkɩm laɖaa mba pekpiɖiɣ yɔ. Toovenim taa lɛ, ɛñɩnɩɣ-wɛ. Pɩɣa kilebaɣ eduuye taa, Yesu kpaɣ Yehowa nɛ ɛmaɣzɩnɩ caja sɔɔlɩm tʋ weyi ɛ-pɩyalʋ lɩ ɖɩɣa nɛ ewolo nɛ ɛcaɣ wezuu kɩdɛkɛdʋʋ yɔ. Ɛ-pɩyalʋ ɛnʋ ɛkɔma nɛ ɛkpaɣ lɩmaɣzɩyɛ se ɛpɩsɩɣ ɖɩɣa. “Ɛwɛ poliŋ taa lɛ, ɛ-caa losi-i nɛ pɩlabɩ-ɩ pʋtɔdɩyɛ, nɛ ese nɛ ewolo ekpibi-i nɛ ɛkpɛlɩ ɛ-yɔɔ nɛ sɔɔlɩm.” (Luka 15:11-20) Ŋsɔɔlaa se ŋpɩsɩ Yehowa cɔlɔ ɛlɛ pɩlakɩ-ŋ ɛzɩ ŋwɛ ɖooo “poliŋ taa”, pʋ-tɔbʋʋ se ŋposini-i pɩdɩɩfɛyɩ? Ɛzɩ Yesu eduuye taa caja yɔ, Yehowa naɣ ña-pʋtɔdɩyɛ. Ɛsɔɔlaa se ŋpɩsɩ nɛ ɛmʋ-ŋ atuu.

Ɛlɛ ye pɩlakɩ-ŋ ɛzɩ kɩwɛɛkɩm mbʋ ŋlaba yɔ, pɩkɩlɩ paɣlʋʋ yaa pɩkɩlɩ ɖɔʋ nɛ Yehowa ɛɛpɩzɩɣ nɛ ekpeɣ-ŋ yɔ, tɔzɩ Izaayii 1:18 yɔɔ. Yehowa yɔɔdɩ peeɖe se: “Ɩkɔɔ ɖɩhʋʋ tɔm [yaa ɩkɔɔ ɖɩñɔɔzɩ ɖɛ-hɛkʋ taa tɔm.] Ye mɩ-kɩwɛɛkɩm ɛsɛ cɩɩɩ ɛzɩ calɩm yɔ yɔ, pɩkɔŋ hʋlʋmʋʋ payɩ payɩ ɛzɩ ɖɔmbɛɛ yɔ, ye pɩsɛ ɖʋʋ ɖʋʋ kɔyɔ, pɩkaɣ hʋlʋmʋʋ ɛzɩ kpɛm yɔ.” Toovenim, paa pɩlakɩ-ɖʋ ɛzɩ ɖa-kɩwɛɛkɩm paɣlɩ siŋŋ nɛ paapɩzɩɣ nɛ pahɩzɩ-pʋ yɔ, Yehowa pɩzɩɣ nɛ ekpeɣ-ɖʋ pʋ.

Yehowa tɩsɔɔlɩ se ñɛ-ɛhʋyɛ ɛwɛɛ nɛ ɖɩkʋʋ ñɔ-tɔm nɛ pɩhaɣ-ŋ laŋwɛɛkɩyɛ. Ye mbʋ ɛbɛ pɩwɛɛ se ŋla nɛ Ɛsɔ kpeɣ-ŋ ña-kɩwɛɛkɩm, pɩha-ŋ ɛhʋyɛ kɩbanɖɛ nɛ pɩhɛzɩ ña-laŋɩyɛ? Na nɩŋgbanzɩ naalɛ nzɩ Wiyaʋ Daviid kaakpɛzaa yɔ. Kajalaɣ lɛ, ɛyɔɔdaa se: “Meheyiɣ Kɩbaɣlʋ man-kɩwɛɛkɩm.” (Keɣa 31:5) Tɔzɩ se Yehowa tɛmɩ-ŋ yaʋ se ŋñɔtɩnɩ-ɩ adɩma taa nɛ ‘ɩhʋʋ tɔm’ yaa ɩñɔɔzɩ mɩ-hɛkʋ taa tɔm. Kuli ña-kɩwɛɛkɩm yɔɔ nɛ ŋwɩlɩ Yehowa nɛ ŋheyi-i ɛzɩma pɩlakɩ-ŋ yɔ. Mbʋ pɩɩtalɩ Daviid yɔ, piyeba nɛ ɛtɩmɩ se: “Kpezi man-kɩdɛkɛdɩtʋ. . . . Laŋɩyɛ nɖɩ ɖɩ-taa nɛ wɩzasɩ yɔ, laŋɩyɛ nɖɩ Kɩbaɣlʋ mʋʋ nesi nasɩlɛ.”—Keɣa 50:4, 19.

Nabʋlɛ lɛ, Daviid kaayeba nɛ Yehowa lone taa caɣyʋ Naataanɩ sɩnɩ-ɩ. Naataanɩ kaakɛ nayʋ.  (2 Samɩyɛɛlɩ 12:13) Sɔnɔ Yehowa lɩzɩ ɛgbɛyɛ taa ɛzʋtʋyaa nɛ pafalɩsɩɣ-wɛ se papɩzɩ nɛ pasɩnɩ kɩwɛɛkɩm laɖaa mba pekpiɖiɣ yɔ, nɛ pɔñɔɔzɩ pa nɛ Yehowa pɛ-hɛkʋ taa. Ye ŋñɔtɩnɩ ɛgbɛyɛ taa ɛzʋtʋyaa yɔ, patɩŋɩɣnɩ Masɩ nɛ adɩma yɔɔ nɛ pɛhɛzɩ ña-laŋɩyɛ, pasɩnɩ-ŋ nɛ ŋlʋbɩnɩ lɩmaɣza kɩdɛkɛda nɛ ŋɖaɣnɩ hiɣu alaafɩya fezuu taa.—Yakubu 5:14-16.

Toovenim taa lɛ, pɩpɩzɩɣ pɩlabɩ-ŋ kaɖɛ se ŋkuli ña-kɩwɛɛkɩm yɔɔ nɛ ŋheyi Ɛsɔ Yehowa nɛ ŋñɔtɩnɩ ɛgbɛyɛ taa ɛzʋtʋyaa se pasɩnɩ-ŋ. Pɩɩlabɩ Daviid kaɖɛ ɖɔɖɔ. Ɛlabɩ kɩwɛɛkɩm lɛ, ɛyɔɔdaa se: “Monsuŋaɣ nɛ mɛntɛŋgɛlɩɣ yem.” (Keɣa 31:3) Paa mbʋ yɔ, pʋwayɩ ɛ-taa labɩ leleŋ se ekuli ɛ-kɩwɛɛkɩm yɔɔ nɛ ɛñɔɔzɩ ɛ-wɛtʋ nɛ pɩkɔnɩ-ɩ wazasɩ.

Wazaɣ sɔsɔɔ ŋga Daviid hiɣaa yɔ, ŋga yɔ: Ɛɖaɣnɩ hiɣu taa leleŋ weyi ɛɛwɛna yɔ. Ɛmawa se: “Koboyaɣ tʋ lɛ weyi pekpeɣ-i ɛ-kɩwɛɛkɩm nɛ pɔsɔʋ ɛ-kɩdɛkɛdɩm yɔɔ yɔ!” (Keɣa 31:1) Ɛtɩmaa ɖɔɖɔ se: “Kɩbaɣlʋ, haa mo-ndomee nɛ mɔ-nɔɔ susi ña-samtʋ.” (Keɣa 50:17) Ɛsɔ kpeɣ Daviid nɛ ɛ-laŋɩyɛ hɛɛ lɛ, piseɣti-i se ɛkɛdɩ Yehowa tɔm ɛyaa lalaa.

Yehowa sɔɔlaa se ŋnɩɩ leleŋ weyi ɛhʋyɛ kɩbanɖɛ kɔŋna yɔ. Nɛ ɛsɔɔlaa se ŋkɛdɩ ɛyaa lalaa ɛ-tɔm nɛ ɛ-kaɖʋsɩ, ɛsɔɔlaa se ŋla mbʋ nɛ taa leleŋ nɛ ɛhʋyɛ kɩbanɖɛ. (Keɣa 64:2-5) Tɔzɩ yatʋ tʋnɛ tɩ-yɔɔ: “Ɩpɩsɩ nɛ pɩsa nɛ pahɩzɩ mɩ-kɩwɛɛkɩm, nɛ Yehowa maɣmaɣ kɔnɩ-mɩ laŋɩyɛ hɛzʋʋ alɩwaatʋ.”—Tʋma Labʋ 3:19.

Mbʋ pɩlabɩ Martha hɔɔlʋʋ taa. Ɛyɔɔdaa se: “Man-pɩyalʋ wobi pɩ-yɔɔ nɛ etiyiɣni-m Feŋuu Tilimiye nɛ Réveillez-vous! takayɩsɩ. Pazɩ pazɩ lɛ, manpɩsɩ Yehowa cɔlɔ. Mbʋ pɩ-labʋ kaakɩlɩ-m kaɖɛ yɔ mbʋ lɛ se mɔnpɔzɩ nɛ pekpeɣ-m kɩwɛɛkɩm mbʋ payɩ malaba yɔ. Ɛlɛ mañaɣ pana nɛ mɔñɔtɩnɩ Ɛsɔ adɩma taa nɛ mɔnpɔzɩ-ɩ se ekpeɣ-m. Pɩɖɩɣzɩɣ-m se manpɩzaa nɛ manpɩsɩ Yehowa cɔlɔ pɩnzɩ 40 wayɩ. Mbʋ pɩtalɩ-m yɔ, pɩwɩlɩɣ kpayɩ kpayɩ se paa ɛyʋ eposini Yehowa pɩnzɩ sakɩyɛ yɔ, ɛpɩzɩɣ ɛtasɩ pɩsʋʋ nɛ ɛsɛɛ Yehowa nɛ ɛwɛɛ ɛ-sɔɔlɩm taa.”