PAA weyi ɛpɩzɩɣ nɛ ɛwɛɛ nɩɣzɛ taa; halɩ Ɛsɔ sɛyaa ɖɔɖɔ pɩzɩɣ nɛ pɛwɛɛ nɩɣzɛ taa. Keɣa maɖʋ yɔɔdaa se: “Man-kʋñɔmɩŋ kɩlɩ-m nɛ pihuuzuu mɔ-yɔɔ.” (Keɣa 93:19) Nɛ Yesu yɔɔdaa se kɛdɛzaɣ kɩyakɩŋ taa lɛ, “wezuu caɣʋ taa nɩɣzɛ” kaɣ yebu nɛ pɩwɛɛ Yehowa sɛyaa kaɖɛ se pala ɛ-sɔɔlɩm. (Luka 21:34) Mbʋ pɩwɛ ñɔ-hɔɔlʋʋ taa? Pɩlakɩ-ŋ ɛzɩ liidiye kʋñɔŋ, hɔʋ taa tɩlasɩ nɛ kʋdɔmɩŋ yeba nɛ ñe-wezuu caɣʋ wɛɛ kaɖɛ siŋŋ na? Ɛzɩma Yehowa sɩɣnɩ-ŋ se ŋɖɔkɩ kpam?

Ðɩɩpɩzɩɣ nɛ ɖɩkpaɣ ɖa-maɣmaɣ ɖe-ɖeke ɖo-ɖoŋ nɛ ɖɩlʋbɩnɩ nɩɣzɛ. Apostoloo Pɔɔlɩ mawa se: “Pañɩɣ-ɖʋ hɔɔlɩŋ tɩŋa taa,” “pisidi ɖa-ñʋŋ taa,” “panazɩ-ɖʋ” nɛ “payaɣ-ɖʋ nɛ tɛtʋ.” Paa mbʋ yɔ, esuyaa se “pɩtɩtalɩ ɖenɖe pɩɩsaŋ se ɖiciɣdi yɔ,” “pɩtɩtalɩ ɖenɖe ɖɩɩsɩŋ mbʋ ɖɩla yɔ” nɛ “patɩɖɩzɩ-ɖʋ.” Ɛbɛ pɩzɩɣ nɛ pɩsɩnɩ-ɖʋ nɛ ɖɩɖɔkɩ kpam? “Ðoŋ weyi ɩcɛzɩ ɛyʋ ɖoŋ yɔ.” Pʋ-tɔbʋʋ lɛ se ɖoŋ weyi Ɛsɔ Ðoŋ Tɩŋa Tʋ Yehowa haɣ-ɖʋ yɔ.—2 Kɔrɛntɩ mba 4:7-9.

Tɔzɩ alɩwaatʋ ndʋ Ɛsɔ kaaha-ŋ “ɖoŋ weyi ɩcɛzɩ ɛyʋ ɖoŋ yɔ” tɩ-yɔɔ. Pɩtɩla tɔm yɔɔdʋʋ nabʋyʋ kaakpazɩ-ŋ ɖoŋ nɛ piyele nɛ ŋwɛɛnɩ ɛsɩmɩyɛ sɔɔlɩm mbʋ Yehowa wɛnɩ ñɔ-yɔɔ yɔ pɩ-yɔɔ. Ŋtɔzʋʋ pɩ-taa nabʋyʋ yɔɔ? Wiɖiyi ŋtɩwɩlɩ nɔɔyʋ Paradisuu yɔɔ tɔm natʋyʋ nɛ piyele nɛ tisuu mbʋ ŋwɛnɩ Yehowa tamaɣ yɔɔ yɔ pɩcɛyɩsɩ nɛ pɩkɩlɩ? Alɩwaatʋ ndʋ ɖiwoki kediɣzisi nɛ ɖɩyɔɔdʋʋ ɖe-tisuu tɔm yɔ, pɩkpazɩɣ-ɖʋ ɖoŋ se ɖɩlʋbɩnɩ wezuu caɣʋ taa nɩɣzɛ nɛ pɩhaɣ-ɖʋ ɖɔɖɔ laŋɩyɛ hɛzʋʋ se ɖiwolo pɩ-yɔɔ nɛ ɖɩsɛɣ Yehowa nɛ taa leleŋ.

Pɩpɩzɩɣ pɩlabɩ-ŋ ɛzɩ ŋkatɩɣ kala ndɩ ndɩ alɩwaatʋ kʋɖʋmtʋ taa yɔ. Yehowa pɔzʋʋ-ɖʋ se ɖɩsɩɩ e-Kewiyaɣ kajalaɣ ɖeɖe ɖe-wezuu caɣʋ taa nɛ ɖɩka ɖa-lɩmaɣza fezuu taa tʋma yɔɔ. (Maatiyee 6:33; Luka 13:24) Ɛlɛ nazɩm, kʋdɔmɩŋ yaa hɔʋ taa tɩlasɩ pɩzɩɣ piyele nɛ pɩwɛ-ŋ kaɖɛ se ŋla mbʋ. Yaa pɩtɩla, tomnaɣ yɔɔ tʋmɩyɛ nɖɩ ŋlakɩ yɔ, ɖɩmʋʋ-ŋ alɩwaatʋ siŋŋ nɛ ŋŋpɩzɩɣ se ŋla tʋma sakɩyɛ ɛgbɛyɛ taa. Pɩpɩzɩɣ nɛ pitibi-ŋ yɔɔɔ mbʋ pʋyɔɔ yɔ ŋŋhikiɣ alɩwaatʋ yaa ŋfɛyɩnɩ ɖoŋ se ŋla mbʋ payɩ pɩpɔzʋʋ se ŋla yɔ. Halɩ pɩtɩla ŋwɛɛ nɛ ŋpɔzʋʋ ña-tɩ se ɛzɩ mbʋ Yehowa pɔzʋʋ-ŋ yɔ, pɩtɩcɛzɩ ño-ɖoŋ kamaɣ yɔɔ?

Yehowa kɛ Ɛsɔ weyi ɛnɩɣ tɔm taa yɔ. Ɛɛpɔzʋʋ-ɖʋ se ɖɩla mbʋ ɛnawa se pɩcɛzɩ ɖo-ɖoŋ kamaɣ yɔɔ yɔ kpa. Nɛ ɛnawa se ye ɖɩhɩnɩ kʋdɔŋ nakʋyʋ yɔ, pɩkpakɩɣ-ɖʋ alɩwaatʋ pʋcɔ nɛ ɖɩɖaɣnɩ hiɣu ɖoŋ weyi ɖɩɩwɛna yɔ.—Keɣa 102:13, 14.

Maɣzɩ ɛzɩma Yehowa kaacɔnɩ nayʋ Eliya yɔɔ yɔ pɩ-yɔɔ nɛ ŋna. Alɩwaatʋ ndʋ piitibi Eliya yɔɔɔ nɛ sɔɔndʋ kpa-ɩ nɛ ese nɛ ɛɖɛɛ kañɩmbusuu taa yɔ, ɛzɩ Yehowa heyi-i se ɛtɩla camɩyɛ nɛ ɛpɔzɩ-ɩ se ɛpɩsɩ ɛ-tʋmɩyɛ taa? Aayɩ. Yehowa tiyi e-tiyiyu  nɔɔyʋ tam nabʋlɛ nɛ ɛlɛ wolo efezi Eliya nɛ ɛha-ɩ tɔɔnaɣ nɛ sɔɔlɩm. Paa mbʋ yɔ kɩyakɩŋ 40 wayɩ, Eliya kaawɛ nɩɣzɛ nɛ sɔɔndʋ taa mbʋ. Ɛbɛ Yehowa tasɩ labʋ se ɛsɩnɩ-ɩ? Kajalaɣ lɛ, Yehowa wɩlaa se ɛwɛnɩ ɖoŋ se ɛkandɩyɩ ɛ-yɔɔ. Nabʋlɛ lɛ, Yehowa yɔɔdɩnɩ-ɩ nɛ nɔɔ kɩbaŋa nɛ ɛhɛzɩ ɛ-laŋɩyɛ. Kɛdɛzaɣ ɖeɖe lɛ, Yehowa heyi-i se ɛyaa kudokiŋ sakɩyɛ wobi pɩ-yɔɔ nɛ pɛsɛɣ Ɛsɔ. Pitileɖi lɛ, Eliya ɖaɣnɩ hiɣu ɖoŋ nɛ ɛɖaɣnɩ paɣzʋʋ labʋ nayʋ tʋmɩyɛ nɛ kpekpeka. (1 Awiya 19:1-19) Lɔŋ weyi pɩkpɛlɩkɩɣ-ɖʋ? Alɩwaatʋ ndʋ Eliya kaawɛɛ nɛ ɛlʋkɩnɩ nɩɣzɛ yɔ, Yehowa lɩzɩ suuɖu nɛ pʋtɔdɩyɛ naʋ nɛ ɛwɩlɩ-ɩ. Yehowa tɩlɛɣzɩ. Ɛcɔŋnɩ ɖɔ-yɔɔ mbʋ ɖɔɖɔ sɔnɔ.

Wɛɛnɩ lɩmaɣza wena amʋnaa yɔ, alɩwaatʋ ndʋ ŋmaɣzɩɣ mbʋ ŋpɩzɩɣ nɛ ŋla Yehowa yɔ pɩ-yɔɔ yɔ. Taakpaɣ mbʋ ŋpɩzɩɣ labʋ sɔnɔ yɔ nɛ ŋmaɣzɩnɩ mbʋ ŋlakaɣ ɖooo lɛ yɔ. Ðɩkpaɣ kɩɖaʋ kʋnɛ: Seyu weyi eyebi seu pɩlakɩ fenasɩ yaa pɩnzɩ sakɩyɛ yɔ, ɛɛpɩzɩɣ nɛ ɛɖaɣnɩ paɣzʋʋ seu camɩyɛ kpaagbaa ɛzɩ ɖooo lɛ yɔ. Ɛlɛ pɩwɛɛ se ɛɖʋ ɛ-tɩ kaɖʋsɩ cikpesi nzɩ sɩkaɣ-ɩ sɩnʋʋ nɛ ɛɖaɣnɩ paɣzʋʋ seu pazɩ pazɩ yɔ. Krɩstʋ mba wɛ ɛzɩ seyaa yɔ. Pɛwɛnɩ kaɖʋwa nakɛyɛ nɛ kɔ-yɔɔ pafalɩsɩɣ pa-tɩ. (1 Kɔrɛntɩ mba 9:24-27) Pɩwɛɣ ɖeu se ŋɖʋ ña-tɩ kaɖʋwa ŋga ŋnawa se ŋpɩzɩɣ nɛ ŋtalɩ-kɛ kɛlɛʋ yɔ. Ŋpɩzɩɣ ŋɖʋ ña-tɩ kaɖʋwa se ŋwoki ɛgbɛyɛ taa kediɣzisi ɖoŋ ɖoŋ. Nɛ ŋpɔzɩ Yehowa se ɛsɩnɩ-ŋ nɛ ŋtalɩ-kɛ. Ŋwɛɣ nɛ ŋkpaɣ ɖoŋ fezuu taa lɛ, ŋkaɣ ‘ɖɩŋʋʋ nɛ ŋna, [Yehowa] wɛ ɖeu ɛzɩma yɔ.’ (Keɣa 33:9) Taasɔɔ se mbʋ payɩ ŋlakɩ se ŋwɩlɩ ñɔ-sɔɔlɩm Yehowa yɔ, paa pɩwɛ ññɩɩ yɔ, pɩmʋ ñɩm ɛ-ɛsɩndaa.—Luka 21:1-4.

Ɛzɩma Yehowa kpazɩ ɖoŋ June nɛ ɛpɩsɩ ɛ-cɔlɔ? June yɔɔdaa se: “Mowobi pɩ-yɔɔ nɛ mantɩmɩɣnɩ Yehowa, nɛ mɔnpɔzʋʋ-ɩ se ɛsɩnɩ-m. Pʋwayɩ lɛ, mo-wolu heyi-m se pakaɣ labʋ kigbeɣluu nakʋyʋ tɛtʋ ndʋ tɩ-taa mɛwɛɛ yɔ. Nɛ mankpaɣ lɩmaɣzɩyɛ se mowoki kigbeɣluu ŋgʋ kɩyakʋ kʋɖʋmʋʋ yeke. Pɩɩlabɩ-m leleŋ siŋŋ se manpɩsɩ Yehowa samaɣ taa. Kigbeɣluu ŋgʋ kiyeba nɛ mehiɣ ɖoŋ kpazʋʋ mbʋ pɩɩpɔzɩ-m yɔ. Lɛɛlɛɛyɔ, manɖaɣnɩ paɣzʋʋ sɛʋ Yehowa nɛ taa leleŋ. Me-wezuu caɣʋ wɛnɩ tɔbʋʋ nɩʋ nɛ pɩkɩlɩ. Kɔzɩ kɔzɩ lɛ, manawa se pɩcɛyaa se mɔñɔtɩnɩ mon-koobiya nɛ pasɩnɩ-m. Man-taa wɛ leleŋ siŋŋ se mehiɣ alɩwaatʋ nɛ manpɩsɩ Yehowa cɔlɔ.”