Koobiya kʋsɔɔlaa:

Ɛzɩ ɩnaʋ yɔ, pɔyɔɔdɩ ɛyaa sakɩyɛ tɔm Bibl taa. Pa-taa sakɩyɛ kɛ abalaa nɛ halaa mba paawɛ siɣsiɣ nɛ paakatɩ kala wena yɔ, ɖa ɖɔɖɔ ɖɩkatɩɣ-yɛ sɔnɔ. ‘Paakɛ ɛyaa ɛzɩ ɖa yɔ.’ (Yakubu 5:17) Pa-taa nabɛyɛ kaakatɩ kala ndɩ ndɩ nɛ pɩha-wɛ nɩɣzɛ. Lalaa lɛ, pɔ-hɔŋ taa mba yaa po-koobiya mba pa nɛ wɛ pɛkpɛndɩ Ɛsɔ sɛtʋ yɔ pa-lakasɩ kaayeba nɛ pɛwɛɛ laŋwɛɛkɩyɛ taa. Lalaa ɖɔɖɔ lɛ, pa-maɣmaɣ pɛ-ɛjandʋ kaayeba nɛ pɛwɛɛ laŋwɛɛkɩyɛ taa.

Ɛlɛ ɛzɩ paaha Yehowa siɣye na? Aayɩ. Pɩlakaɣ pa-taa sakɩyɛ ɛzɩ pɩɩlabʋ Keɣa maɖʋ yɔ. Ɛyɔɔdaa se: “Meleki, mɛnkɛ heɣa kilebaɣ, kɔɔ nɛ ŋñɩnɩ ña-lɩmɖʋyʋ, mbʋ yɔ maasɔʋ ña-paɣtʋ yɔɔ.” (Keɣa 118:176) Pɩlakɩ ña-ɖɔɖɔ mbʋ yaa we?

Yehowa ɛɛsɔʋ ɛ-sɛyaa mba poposi pa-tɩ nɛ ewiɖe yɔ pɔ-yɔɔ kpa. Ɛlɛ ɛñɩnɩɣ-wɛ nɛ ɖoŋ ɖoŋ lɛ, po-koobiya yɔɔ ɛtɩŋɩɣna nɛ ɛlakɩ mbʋ. Maɣzɩ ɛzɩma Yehowa kaasɩnɩ ɛ-sɛyʋ Yɔɔb yɔ pɩ-yɔɔ nɛ ŋna. Yɔɔb kaakatɩ kala sakɩyɛ: Eelesi e-wondu nɛ ɛla liidiye kʋñɔŋ, eelesi ɛ-ɛyaa kʋsɔɔlaa nabɛyɛ nɛ ɛhɩnɩ ɖɔɖɔ kʋdɔŋ sɔsɔʋ nakʋyʋ. Pɩtasɩ lɛ, ɛyaa mba paakɔm se pɛhɛzɩ ɛ-laŋɩyɛ yɔ, paayɔɔdɩ tɔm ndʋ tɩtɩmʋna yɔ nɛ pɩha-ɩ laŋwɛɛkɩyɛ siŋŋ. Ɛlɛ paa nabʋyʋ taa ɛ-lɩmaɣza ɛtaatʋʋzɩ ɖeyi ɖeyi yɔ, ɛtɩha siɣye Yehowa kpa. (Yɔɔb 1:22; 2:10) Ɛzɩma Yehowa kaasɩnɩ Yɔɔb nɛ ɛɖaɣnɩ wɛnʋʋ lɩmaɣza wena atʋʋzaa yɔ?

Yehowa tɩŋnɩ ɛ-sɛyʋ weyi payaɣ se Eliihu yɔ ɛ-yɔɔ nɛ ɛsɩnɩ Yɔɔb. Yɔɔb yɔɔdaɣ mbʋ pɩcɛyaɣ-ɩ yɔ pɩ-tɔm lɛ, Eliihu welisini-i nɛ pʋwayɩ lɛ ɛyɔɔdɩnɩ-ɩ. Ɛzɩ tɔm ndʋ Eliihu yɔɔdaa? Ɛzɩ ɛkʋ Yɔɔb tɔm yaa ɛñɩnaɣ se ɛɖʋ-ɩ fɛyɛ nɛ piseɣti-i nɛ ɛlɛɣzɩ? Ɛzɩ Eliihu maɣzaɣ se ɛkɩlɩ Yɔɔb? Aayɩ. Ɛsɔ fezuu ɖiyi Eliihu nɛ ɛyɔɔdɩ se: “Mɛwɛ ɛzɩ ñɛ yɔ Ɛsɔ ɛsɩndaa nɛ cʋʋ kʋyʋmʋʋ ŋgʋ pamanɩ-m.” Pʋwayɩ lɛ, ɛhɛzɩ Yɔɔb laŋɩyɛ nɛ tɔm tʋnɛ: “Pɩtɛ lɛ, mɔn-sɔɔndʋ ɛtaatɔyɩtɩ-ŋ nɛ me-nee yuŋ etaatii ñɔ-yɔɔ.” (Yɔɔb 33:6, 7) Eliihu taala nabʋyʋ nɛ pitii Yɔɔb yɔɔɔ, ɛlɛ ɛkpazɩ-ɩ ɖoŋ nɛ ɛtasɩ-ɩ lɔŋ weyi pɩpɔzɩ-ɩ yɔ nɛ sɔɔlɩm.

Ðitendi-ŋ tɩlɩ se lɩmaɣza kʋɖʋma ana ɖɩwɛna, pʋcɔ nɛ ɖɩñɔɔzɩ takayaɣ kanɛ. Kajalaɣ lɛ, ɖiwelisini mba poposini ɛgbɛyɛ yɔ camɩyɛ nɛ ɖɩmaɣzɩ ɖɔɖɔ wɛtʋ ndɩ ndɩ ndʋ tɩ-taa pɛwɛɛ yɔ, tɩ-yɔɔ. (Aduwa 18:13) Pʋwayɩ lɛ, ɖɩtɩmɩ nɛ ɖɩtazɩ Masɩ taa se ɖɩna ɛzɩma Yehowa kaasɩnɩ ɛ-sɛyaa mba paawɛ wɛtʋ kʋɖʋmtʋ tʋnɛ tɩ-taa yɔ. Pʋbʋ wayɩ lɛ, ɖikpeɣli Bibl taa kɛdɛsɩ nzɩ sɩlabɩ nɔɔ kʋɖʋmaɣ nɛ ɖa-alɩwaatʋ taa koobiya mba poposini ɛgbɛyɛ yɔ pɛ-wɛtʋ yɔ, nɛ ɖɩma takayaɣ kanɛ ka-taa. Ðiseɣtiɣ-ŋ se ŋkalɩ takayaɣ kanɛ. Ðitendi-ŋ tɩlɩ se ɖɩsɔɔlɩ-ŋ pɩdɩɩfɛyɩ.

Yehowa Aseɣɖe Tɩnaa tɛ Nɔɔɖɛyaa Egbɛyɛ