ƐZƖMA ÐƖPƖZƖƔ NƐ ÐƖPAƔZƖ KƐDAƔ YƆ
TƆM KƖKPƐLƖKƖTƲ 6
Yɔɔdɩnɩ abalɩtʋ
Paɣtʋ kiɖe: «Ðɛ-Ɛsɔ ha-ɖʋ abalɩtʋ nɛ ɖiheyi-mɩ . . . tɔm kɩbandʋ.»—1 Tes. 2:2.
Mbʋ Yesu laba yɔ
1. Cɔnɩ VIDEO, yaa kalɩ Luka 19:1-7. Pʋwayɩ lɛ ŋmaɣzɩ tɔm tʋnɛ tɩ-yɔɔ:
Ɛbɛ ɖɩkpɛlɩkɩɣ Yesu kɩɖaʋ taa?
2. Pɩpɔzʋʋ-ɖʋ abalɩtʋ se pɩsa nɛ ɖisusi Kewiyaɣ tɔm paa anɩ.
Maɣzɩnɩ Yesu
3. Taa Yehowa liu. Ɛsɔ fezuu kaasɩnɩ Yesu nɛ esusi tɔm, nɛ kɩpɩzɩɣ nɛ kɩsɩnɩ-ŋ ɖɔɖɔ. (Mat. 10:19, 20; Luka 4:18) Pɩtɩla sɔɔndʋ kpaɣ-ŋ nɛ ɛyaa nabɛyɛ, pɔzɩ Yehowa se ɛha-ŋ abalɩtʋ nɛ ŋsusi-wɛ tɔm.—Tʋma 4:29.
4. Taawɛɛnɩ lɩmaɣza kɩdɛkɛda ɛyaa yɔɔ. Pɩtɩla, ɛyaa nabɛyɛ ɛsɩndaa wɛtʋ, pa-ñɩm, pa-tʋmɩyɛ, pe-wezuu caɣʋ yaa pɛ-Ɛsɔ sɛtʋ ɛgbɛyɛ yɔɔ lɛ, ɖɩkpaɣ ɖa-tɩ nɛ ɖiisusuu-wɛ tɔm. Ɛlɛ tɔzɩ se:
-
Yehowa nɛ Yesu papɩzɩɣ nɛ pana mbʋ pɩwɛ ɛyʋ laŋɩyɛ taa yɔ; ɛlɛ ɖa lɛ ɖɩɩpɩzɩɣ nɛ ɖɩna mbʋ pɩwɛ ɛyʋ laŋɩyɛ taa yɔ.
5. Wɛɛ abalɩtʋ, ɛlɛ yɔɔdɩnɩ ñamtʋ ɖɔɖɔ. (Mat. 10:16) Taasɔɔlɩ tɔm hɔm. Ye nɔɔyʋ ɛtɩsɔɔlɩ se ewelisi tɔm kɩbandʋ ndʋ ŋsusuu yɔ, yaa ye kaɖɛ naɖɩyɛ ɛcaɣ kɔm yɔ, pɩwɛɛ se ŋsɩnzɩ kɛdaɣ. Ɛlɛ la mbʋ nɛ ñamtʋ.—Adu. 17:14.