Yesu sɔɔlɩ apostoloowaa siŋŋ, pʋyɔɔ pɩkazɩ pazɩ se ɛɖɛɛ lɛ, ɛwɛɛ nɛ ɛñɔɔzʋʋ-wɛ se papɩzɩ nɛ pɔɖɔkɩ kpam ɛ-ɖɛʋ wayɩ. Lɛɛlɛɛyɔ ɛkpazɩ ɛ-ɛza nɛ Ɛsɔ nɛ ɛtɩmɩɣ se: “Sa ña-pɩyalʋ hɩɖɛ nɛ ña-pɩyalʋ samɩ-ŋ. Mbʋ lɛ, ɖɔɖɔ ɛzɩ ŋhaʋ-ɩ ɖoŋ wondu ɛza ndʋ kpeekpe yɔɔ yɔ, mbʋ ɖɔɖɔ ɛkaɣ haʋ tam tam wezuu mba ŋcɛlɩ-ɩ yɔ pe-kpeekpe.”—Yohanɛɛsɩ 17:1, 2.

Pɩwɩlɩɣ kpayɩ kpayɩ se Yesu nawa se Ɛsɔ samtʋ tɔm kɩlɩnɩ cɛyʋʋ. Ɛlɛ ɛzɩma wezuu maatɛŋ lidaʋ ŋgʋ kɩ-tɔm Yesu yɔɔdaa yɔ, kɩhɛzɩɣ ɛyaa laŋa? Ɛzɩma paha Yesu ɖoŋ “wondu ɛza ndʋ kpeekpe yɔɔ yɔ,” ɛkaɣ yebu nɛ kɩhɛyʋʋ pʋ-ñʋʋ taa kɩlaʋ wazɩ kedeŋa kpeekpe yɔɔ ɛyaa. Ɛlɛ pɩtɩkɛ ɛyaa tɩŋa kaɣnɩ hiɣu wazasɩ nzɩ. Ɛbɛ yɔɔ? Mbʋ pʋyɔɔ yɔ Yesu kaɣ kɔnʋʋ kɩhɛyʋʋ pʋ-ñʋʋ taa wazasɩ mba pe-wezuu caɣʋ labɩ nɔɔ kʋɖʋmaɣ nɛ tɔm ndʋ ɛyɔɔdɩ adɩma ana a-taa yɔ. Ɛyɔɔdaa se: “Nɛ tam tam wezuu kɛlɛ ña-tɩlʋʋ se ñe-yeke koŋ Ɛsɔ siŋŋ nɛ weyi ŋtiyi-i yɔ ɛ-tɩlʋʋ, Yesu Krɩstʋ.”—Yohanɛɛsɩ 17:3.

Pɩwɛɛ se ɛyʋ ɛtɩlɩ Caa nɛ Pɩyalʋ camɩyɛ nɛ taabalɩyɛ kɩbanɖɛ wɛɛ ɛ nɛ wɛ pɛ-hɛkʋ taa. Pɩwɛɛ se paa hɔɔlʋʋ ŋgʋ kɩ-taa lɛ, ɛwɛɛnɩ lɩmaɣza wena Caa nɛ Pɩyalʋ pɛwɛna yɔ. Pɩtasɩ lɛ, pɩwɛɛ se ɛñaɣ pana nɛ ɛnɩɣzɩnɩ pɛ-wɛtʋ kɩbandʋ nɛ ɛwɩlɩ-tʋ lalaa. Pɩwɛɛ se ɛnɩɩ pɩ-taa se Ɛsɔ samtʋ tɔm cɛyaa nɛ pɩkɩlɩ wezuu maatɛŋ kʋjɔʋ. Yesu ɖaɣnɩ pɩsʋʋ Ɛsɔ samtʋ tɔm yɔɔ nɛ ɛyɔɔdɩ se:

“Ma yɔ, mansamɩ-ŋ tataa nɛ tʋmɩyɛ nɖɩ ŋɖʋ-m yɔ ɖɩ-labʋ. Ñɛ Caa, samɩ-m lɛɛlɛɛyɔ ñɔ-cɔlɔ nɛ samtʋ ndʋ maawɛnɩ ñɔ-cɔlɔ nɛ pʋcɔ nɛ ɛjaɖɛ wɛɣ yɔ.” (Yohanɛɛsɩ 17:4, 5) Toovenim, Yesu caɣaɣ se ɛ-Caa efezi-i nɛ sɩɖaa taa nɛ ɛɖaɣnɩ-ɩ haʋ waɖɛ sɔsɔyɛ nɖɩ ɛɛwɛnɩ ɛsɔdaa yɔ.

Ɛlɛ Yesu tɩsɔɔ tɔm susuu tʋmɩyɛ nɖɩ ɛlaba yɔ, ɖɩ-yɔɔ. Pʋyɔɔ ɛtɩmaa se: “Malaba nɛ ɛyaa mba ŋkpaɣ-wɛ ɛjaɖɛ yɔɔ nɛ ŋcɛlɩ-m yɔ, patɩlɩ ña-hɩɖɛ. Ñatɩnɩ-wɛ nɛ ŋcɛlɩ-m wɛ nɛ pɔɖɔkɩ ñɔ-tɔm kpam.” (Yohanɛɛsɩ 17:6) Yesu lakaɣnɩ tʋmɩyɛ Ɛsɔ hɩɖɛ nɛ ɛwɩlɩɣ-ɖɩ ɖɔɖɔ lalaa. Ɛsɩnɩ apostoloowaa nɛ panɩɩ hɩɖɛ nɖɩ ɖɩ-tɔbʋʋ. Ɛsɩnɩ-wɛ ɖɔɖɔ nɛ patɩlɩ Ɛsɔ wɛtʋ kɩbandʋ nɛ ɛzɩma ɛsɔɔlaa se ɛ nɛ ɛyaa pɛ-hɛkʋ taa ɛwɛɛ yɔ.

Apostoloowaa kɔma nɛ patɩlɩ Yehowa camɩyɛ, patɩlɩ ɖɔɖɔ lone nɖɩ ɛ-Pɩyalʋ wɛna yɔ nɛ tɔm ndʋ Yesu wɩlɩ-wɛ yɔ. Yesu luzi ɛ-tɩ nɛ ɛyɔɔdɩ se: “Mɛncɛlɩ-wɛ tɔm ndʋ ŋcɛlɩ-m yɔ. Pamʋ-tʋ nɛ peɖiɣzini tɩtɩm taa se malɩnɩ ñɔ-cɔlɔ na nɛ petisi se ñetiyini-m.”—Yohanɛɛsɩ 17:8.

Pʋwayɩ lɛ, Yesu ɖʋ tʋkaɣ ɛ-wayɩ tɩŋɩyaa nɛ ɛjaɖɛ yɔɔ ñɩma pɛ-hɛkʋ taa nɛ ɛyɔɔdɩ se: “Pɔ-yɔɔ mantɩmɩɣ, pɩtɩkɛ ɛjaɖɛ yɔɔ mantɩmɩɣ, ɛlɛ mba ŋcɛlɩ-m yɔ pɔ-yɔɔ: Mbʋ pʋyɔɔ yɔ ñatɩnɩ-wɛ . . . [Ɛsɔ Caabiyuu! Ño-ɖoŋ taa lɛ, ɖɔkɩ-wɛ nɛ pala nɔɔ kʋɖʋmaɣ ɛzɩ ma nɛ ŋ ɖɩlabʋ yɔ; ABT] . . . Manɖaŋ pɔ-yɔɔ nɛ pa-taa nɔɔyʋ tile. Ɛlɛ pɩyalʋ kilebu yeke lebina.” Pɩyalʋ kilebu ɛnʋ lɛ Yudaasɩ Iskarɩyɔɔtɩ weyi ɛɖɛwa se ɛpɛdɩ Yesu yɔ.—Yohanɛɛsɩ 17:9-12.

Yesu wobi adɩma yɔɔ se: “Ɛjaɖɛ paɖɩɣ-wɛ. . . . Maatɩmɩɣnɩ-ŋ se ŋkʋsɩ-wɛ ɛjaɖɛ yɔɔ, ɛlɛ se ŋɖaŋ pɔ-yɔɔ kɩdɛkɛdɩm taa. Patɩkɛ ɛjaɖɛ yɔɔ mba, ɖɔɖɔ ɛzɩ ma, mantɩkɛ ɛjaɖɛ yɔɔ tʋ yɔ.” (Yohanɛɛsɩ 17:14-16) Apostoloowaa nɛ tɔmkpɛlɩkɩyaa lalaa pɛwɛ ɛjaɖɛ yɔɔ, pʋ-tɔbʋʋ se ɛyaa mba Sataŋ tɔkɩ pɔ-yɔɔ kewiyitu yɔ, pɛ-hɛkʋ taa, ɛlɛ pɩwɛɛ se palɩɩ ɖɩ-taa nɛ pataaɖʋ nesi ɖɩ-lakasɩ kɩdɛkɛdɩsɩ. Ɛzɩma tɩyɛ?

Pɩwɛɛ se pɛwɛɛ kele kele nɛ pɛkɛnɩ mba palɩzɩ pa-tɩ nɛ ŋgee se palakɩ Ɛsɔ sɔɔlɩm nɛ pɔɖɔ toovenim tɔm ndʋ tɩwɛ Ebree Masɩ taa nɛ tɔm ndʋ Yesu maɣmaɣ wɩlɩ-wɛ yɔ, tɩ-yɔɔ. Yesu tɩmaa se: “Ðɔkɩ-wɛ tʋtʋyɛ tɔm taa [yaa yele  nɛ pɩtɩŋnɩ toovenim yɔɔ nɛ pɛwɛɛ kele kele]: Ñɔ-tɔm kɛnɩ tʋtʋyɛ.” (Yohanɛɛsɩ 17:17) Pʋwayɩ lɛ, apostoloowaa nabɛyɛ kɔma nɛ pama Bibl takayɩsɩ lɛɛsɩ nɛ sɩwɩlɩɣ ɖɔɖɔ “tʋtʋyɛ tɔm” yaa toovenim mbʋ pɩsɩɣnɩ ɛyʋ se ɛwɛɛ kele kele yɔ.

Nabɛyɛ kaɣ ɖɔɖɔ tisuu “tʋtʋyɛ tɔm” ndʋ tɩ-yɔɔ. Pʋyɔɔ Yesu yɔɔdɩ adɩma taa se pɩtɩkɛ apostoloowaa mba paawɛ ɛ-cɔlɔ peeɖe yɔ, pe-ɖeke pɔ-yɔɔ ɛtɩmɩɣ, ɛlɛ ɛtɩmɩɣ ɖɔɖɔ mba, pɩtɩŋnɩ tɔm susuu yɔɔ lɛ, pakaɣ wɛnʋʋ tisuu yɔ, pɔ-yɔɔ. Suwe ɛtɩmaa nɛ ɛpɔzɩ pa-tɩŋa pɔ-yɔɔ? Ɛtɩmaa se: “Pe-kpeekpe pɛkpɛndɩ kʋyʋm ɖɔɖɔ ɛzɩ ñɛ Caa, [ma nɛ ŋ ɖɩkɛʋ kʋɖʋm] yɔ, mba ɖɔɖɔ pɛkpɛndɩ kʋyʋm.” (Yohanɛɛsɩ 17:20, 21) Toovenim taa lɛ, Yesu wɛ ndɩ nɛ ɛ-Caa. Ɛlɛ pɛkɛ kʋɖʋm, mbʋ pʋyɔɔ yɔ, nɔɔ kʋɖʋmaɣ wɛɛ pɛ-hɛkʋ taa nɛ panɩɣnɩ ɖama pɩ-tɩŋa payɩ pɩ-taa. Yesu tɩmaɣ se nɔɔ kʋɖʋmaɣ ŋga ɖɔɖɔ kɛwɛɛ ɛ-wayɩ tɩŋɩyaa hɛkʋ taa nɛ pa nɛ wɛ pɛ-hɛkʋ taa.

Pʋcɔ nɛ pɩtalɩ alɩwaatʋ ndʋ lɛ, Yesu kaaheyi Pɩyɛɛrɩ nɛ apostoloowaa lalaa se ewoki se ɛñɔɔzɩ-wɛ lona ɛsɔdaa. (Yohanɛɛsɩ 14:2, 3) Tɔm ndʋ tɩ-yɔɔ Yesu ɖaɣnɩ pɩsʋʋ nɛ ɛtɩmɩɣnɩ Ɛsɔ se: “Caa, mba ŋcɛlɩ-m yɔ, mɔnsɔɔlaa se pɛwɛɛ ɖɔɖɔ ɖenɖe mɛwɛɛ yɔ, nɛ pana ɖoŋ weyi ŋha-m yɔ, mbʋ pʋyɔɔ yɔ ŋsɔɔlɩ-m nɛ pʋcɔ ŋlɩzɩ ɛjaɖɛ.” (Yohanɛɛsɩ 17:24) Ɛ-tɔm tʋnɛ tɩwɩlɩɣ se ɖooo kiɖe tɛɛ pʋcɔ nɛ Aɖam nɛ Ɛva papaɣzɩ piya lʋlʋʋ lɛ, Ɛsɔ sɔɔlɩ ɛ-Pɩyalʋ ɛgbamɩyɛ weyi pɔkɔm payaa-ɩ pʋwayɩ se Yesu Krɩstʋ yɔ.

Yesu tɛzaɣ adɩma lɛ, ɛɖaɣnɩ ñɩɣʋ niye ɛ-Caa hɩɖɛ nɛ ɛzɩma Ɛsɔ sɔɔlɩ apostoloowaa nɛ mba payɩ pakaɣ tisuu toovenim tɔm yɔɔ yɔ, pɩ-yɔɔ nɛ ɛyɔɔdɩ se: “Monkuli ña-hɩɖɛ yɔɔ nɛ mawɩlɩ-wɛ, nɛ mankaɣ-wɛ ɖɩ wɩlʋʋ ɖɔɖɔ, se sɔɔlɩm mbʋ ŋsɔɔlɩnɩ-m yɔ, pɩwɛɛ pa-taa nɛ ma pa-taa.”—Yohanɛɛsɩ 17:26.