Yesu susaɣ tɔm Galilee egeetiye taa lɛ, ɛlabɩ tʋma sɔsɔna sakɩyɛ. Ɛlɛ Yesu nawa se pɩtɩkɛ Galilee taa ɖeke pɩwɛɛ se ɛla tʋmɩyɛ, pʋyɔɔ ɛyɔɔdaa se: “Pɩwɛɛ se mowolo tɛtʋ lɛɛtʋ taa nɛ monsusi Ɛsɔtɔm kɩbandʋ.” Mbʋ labɩna “nɛ ɛyɛlɩɣ Yudee Ɛsɔ kuduyiŋ tɛɛ [yaa Sinaagɔɔgɩwaa taa] nɛ ɛwɩlɩɣ tɔm. (Luka 4:43, 44) Pɩɩpɔzaa se ɛla mbʋ, mbʋ pʋyɔɔ yɔ, pɩnaɣ taa kazandʋ ndʋ palakɩ Yerusalɛm yɔ, tɩñɔtaa.

Evaŋgilimwaa yɔɔdɩ tʋmɩyɛ nɖɩ Yesu labɩ Galilee egeetiye taa yɔ, ɖɩ-tɔm nɛ pɩkpaɖɩ nɖɩ ɛlabɩ Yudee egeetiye taa yɔ. Paa Yudee egeetiye taa ɛyaa sakɩyɛ ɛtaamʋʋ Yesu camɩyɛ yɔ, etiyele tɔm susuu nɛ tʋma kɩbana labʋ hɔɔlɩŋ weyi ɩ-taa payɩ ewokaɣ yɔ.

Lɛɛlɛɛyɔ, Yesu woki Yudee egeetiye taa tɛtʋ sɔsɔtʋ ndʋ payaɣ-tʋ se Yerusalɛm yɔ, tɩ-taa, se ɛtɔɔ pɩnaɣ 31 tɛ Paska kazandʋ. Hiɖe naɖɩyɛ kaañɔtɩnɩ Yerusalɛm tɛtʋ nɔnɔɔ ŋga payaɣ se Heŋ Nɔnɔɔ yɔ nɛ payaɣ-ɖɩ se Betɛsda. Ɛyaa sakɩyɛ cakaɣ hiɖe nɖɩ ɖɩ-cɔlɔ. Kʋdɔndɩnaa sakɩyɛ, yʋlʋmaa nɛ kaakalasɩ powokaɣ nɛ pacakɩ peeɖe. Ɛbɛ yɔɔ? Mbʋ pʋyɔɔ yɔ, ɛyaa sakɩyɛ maɣzaɣ se ye lɩm eciɣdaa nɛ kʋdɔndʋ nɔɔyʋ tii pɩ-taa kɔyɔ, ɛ-yɔɔ cɛkɩ.

Yesu na abalʋ nɔɔyʋ hiɖe nɖɩ ɖɩ-cɔlɔ Sabaatɩ wiye. Pɩlakɩ pɩnzɩ 38 yɔ, abalʋ ɛnʋ ɛkɛʋ kʋdɔndʋ yɔ. Yesu pɔzɩ-ɩ se: “Ŋsɔɔlaa se ñɔ-yɔɔ ɛcɛ na?” Nɛ abalʋ ɛnʋ ecosi-i se: “Caa Kɩbaɣlʋ, mɛnfɛyɩ nɔɔyʋ se eetisi-m, lɩm ciɣdiɣ lɛ, mankʋyʋʋ se mentiki lɛ, nɔɔyʋ tɛm tibu.”—Yohanɛɛsɩ 5:6, 7.

Peeɖe Yesu yɔɔdɩ tɔm natʋyʋ nɛ tɩɖɩɣzɩ abalʋ ɛnʋ nɛ mba payɩ pewelisi-tʋ yɔ. Ɛyɔɔdaa se: “Kʋyɩ nɛ ŋkpaɣ ñɛ-tɛya nɛ ŋkpe.” (Yohanɛɛsɩ 5:8) Nɛ abalʋ ɛnʋ ɛ-yɔɔ cɛ kpaagbaa, ɛkʋyɩ ɛkpaɣ ɛ-tɛya nɛ ɛpaɣzɩ ɖɔm.

Yuda mba taa tɩla leleŋ nɛ piti lakasɩ nzɩ. Pʋyɔɔ pana abalʋ ɛnʋ lɛ, papaɣzɩ-ɩ hʋnʋʋ tɔm nɛ peheyi-i se: “Sɔnɔ Sabaatɩ, pɩtɩha-ŋ nʋmɔʋ se ŋsɩɣlɩ ñɛ-tɛya.” Peeɖe abalʋ ɛnʋ ecosi-wɛ se: “Weyi ɛlaba nɛ mɔ-yɔɔ cɛ yɔ, ɛ-maɣmaɣ ɛtɔmɩ-m se: ‘Kpaɣ ña-tɛya nɛ ŋɖɔ.’” (Yohanɛɛsɩ 5:10, 11) Yuda ñɩma mba, pɛwɛɛ pɔhɔŋ tɔm nɛ abalʋ ɛnʋ mbʋ pʋyɔɔ yɔ, pawa ɛ-kʋdɔŋ Sabaatɩ wiye.

Peeɖe pɔpɔzɩ abalʋ ɛnʋ se: “Atɔmɩ-ŋ se: ‘Kpaɣ ña-tɛya nɛ ŋɖɔ?’” Pañɩnaɣ se patɩlɩ weyi ɛwa abalʋ ɛnʋ yɔ, ŋgʋ ɛlɛ ñaasɩŋ Yesu hɩɖɛ, nɛ pɩtasɩ lɛ, Yesu wa ɛ-kʋdɔŋ nɛ pɩtɛ lɛ, “ɛlɩɩ ɛyaa hɛkʋ taa nɛ ɛmɛlɩ.” (Yohanɛɛsɩ 5:12, 13) Ɛlɛ abalʋ ɛnʋ ɛkaɣ tasʋʋ katʋʋ Yesu. Ɛ nɛ Yesu pɔkɔm patasɩ ɖama katʋʋ kpaaŋ taa nɛ peeɖe ɛtɩlɩ weyi ɛɛwa ɛ-kʋdɔŋ hiɖe cɔlɔ yɔ, ɛ-hɩɖɛ.

Pʋwayɩ lɛ, abalʋ ɛnʋ ɛkatɩ Yuda ñɩma mba pañɩnaɣ se patɩlɩ weyi ɛwa ɛ-kʋdɔŋ yɔ. Peeɖe eheyi-wɛ se Yesu kaawanɩ ɛ-kʋdɔŋ. Panɩ mbʋ lɛ, pɛɖɛɛ Yesu wayɩ. Ɛzɩ powoki se pɔpɔzɩ Yesu nɛ pana ɖenɖe ɛlɩ ɖoŋ ɛnʋ ɛ-yɔɔ nɛ ɛlakɩ piti lakasɩ nzɩ yɔ? Aayɩ. Ɛlɛ powoki se panazɩ-ɩ nɛ pɔpɔzɩ-ɩ nɛ pana se aha-ɩ nʋmɔʋ se ɛla lakasɩ kɩbanzɩ nzɩ Sabaatɩ wiye.