Yohanɛɛsɩ Lɩm Mɩyɩsɩyʋ wɛʋ salaka taa yɔ, pɩlakɩ ɛzɩ pɩnaɣ mbʋ yɔ. Paa ɛwɛ salaka taa yɔ, eɖiɣni nɩʋ tʋma kɩbana wena Yesu lakaɣ yɔ, a-taŋ. Maɣzɩ nɛ ŋna ɛzɩma pɩlabɩ-ɩ leleŋ siŋŋ, alɩwaatʋ ndʋ ɛ-tɔmkpɛlɩkɩyaa kɔm peheyi-i se Yesu fezi halʋ lelu nɔɔyʋ pɩyalʋ Nayɩnɩ tɛtʋ taa yɔ. Ɛlɛ Yohanɛɛsɩ sɔɔlɩ siŋŋ se Yesu maɣmaɣ eheyi-i weyi ɛkɛnaa nɛ ɛlakɩ tʋma sɔsɔna ana mbʋ yɔ. Pʋyɔɔ etiyi ɛ-tɔmkpɛlɩkɩyaa naalɛ Yesu cɔlɔ se pɔpɔzɩ-ɩ se: “Ñɛkɛnɩ weyi ɛkaɣ kɔm yɔ, yaa ɖɩɖaŋ nɔɔyʋ?”​—Luka 7:19.

Tɔm tʋnɛ, pɩɩɖɩɣzɩɣ-ɖʋ se Yohanɛɛsɩ pɔzʋʋnɩ-tʋ? Yohanɛɛsɩ sɛɣ Ɛsɔ camɩyɛ. Pɩlakɩ ɛzɩ pɩnzɩ naalɛ yɔ; ɛmɩyɩsaɣ Yesu lɩm lɛ, ɛ-maɣmaɣ ɛna Ɛsɔ fezuu tibi Yesu yɔɔ nɛ ɛnɩɩ ɖɔɖɔ tɔm ndʋ Ɛsɔ yɔɔdaa se Yesu kɛnɩ weyi ɛsɔɔlɩ-ɩ siŋŋ yɔ. Pɩtasɩ lɛ, nabʋyʋ ɛɛwɩlɩɣ lɛɛlɛɛyɔ se Yohanɛɛsɩ tisuu hɛwa. Ye e-tisuu kaahɛwa yɔ, Yesu taasamɩ-ɩ alɩwaatʋ tʋnɛ tɩ-taa mbʋ. Ɛlɛ ye Yohanɛɛsɩ ɛtaapɩtɩɣ, ɛbɛ yɔɔ ɛpɔzʋʋ tɔm tʋnɛ Yesu mbʋ?

Tobi lɛ, Yohanɛɛsɩ kaasɔɔlaa se Yesu maɣmaɣ ecosi-i se ɛkɛ Mesiya. Ye ecosi-i mbʋ yɔ, pɩkpazɩɣ-ɩ ɖoŋ salaka taa peeɖe. Pɩtasɩ lɛ, lɩmaɣzɩyɛ naɖɩyɛ yɔɔ ɖɔɖɔ Yohanɛɛsɩ pɔzɩ tɔm ndʋ mbʋ. Ɛsɩm Bibl taa natʋ tɔm ndʋ tɩyɔɔdʋʋ se Mesiya kaɣ kɛʋ wiyaʋ nɛ ñʋʋ yaɖʋ yɔ. Ɛlɛ pɩlabɩ fenasɩ sakɩyɛ lɛ, pamɩyɩsʋʋ lɩm Yesu yɔ, ɛlɛ Yohanɛɛsɩ wɛ salaka taa mbʋ. Pʋyɔɔ Yohanɛɛsɩ pɔzʋʋ se ɛna se nɔɔyʋ kaɣnɩ kɔm se ɛlɛɣzɩ Yesu lone taa nɛ Mesiya yɔɔ tɔm ndʋ tɩla yaa we.

Yesu kaapɩzaa se ecosi Yohanɛɛsɩ tɔmkpɛlɩkɩyaa kɛlɛʋ se ‘ma mɛkɛnɩnɩ Weyi Masɩ tɔm se ɛkaɣ kɔm yɔ.’ Ɛlɛ ɛtɩla mbʋ, ɛtɩŋnɩ kʋdɔmɩŋ ndɩ ndɩ waʋ yɔɔ nɛ ɛwɩlɩ Yohanɛɛsɩ tɔmkpɛlɩkɩyaa kaɣlaa se Ɛsɔ ɖoŋ wɛ ɛ-yɔɔ. Pʋwayɩ lɛ, eheyi-wɛ se: “Iwolo iheyi Yohanɛɛsɩ ndʋ ɩnɩwa yɔ: Yʋlʋmaa naɣ, kaakalasɩ ɖɔŋ, canasɩ yɔɔ cɛkɩ, tandamaa nɩɣ, sɩɖaa feŋ, kʋñɔndɩnaa hikiɣ tɔm kɩbandʋ.”​—Maatiyee 11:4, 5.

Pɩtɩla yɔ, Yohanɛɛsɩ kaamaɣzaɣ se pɩwɛɛ se Yesu ɛla piti lakasɩ siŋŋ nɛ pɩkpaɖɩ nzɩ eɖiɣni labʋ yɔ nɛ halɩ ɛlɩzɩ-ɩ salaka taa. Tɔm ndʋ Yesu cosaa yɔ, tɩwɩlɩɣ se ɛcaɣ se eheyi Yohanɛɛsɩ se ɛtaaɖaŋ piti lakasɩ nasɩyɩ nɛ pɩkpaɖɩ nzɩ ɛnʋ ɖiɣni labʋ yɔ.

Yohanɛɛsɩ tɔmkpɛlɩkɩyaa ɖɛɣaɣ lɛ, Yesu yɔɔdɩnɩ samaɣ nɛ eheyi-kɛ se Yohanɛɛsɩ tɩkɛ nayʋ yem. Ɛlɛ ɛkɛ “tiyiyu” weyi ɛ-tɔm Yehowa kaayɔɔdɩ Malakiya 3:1 taa yɔ. Ɛnʋ ɖɔɖɔ ɛkɛnɩnɩ nayʋ Eliya weyi ɛ-tɔm pɔyɔɔdɩ Malakiya 3:23, 24 taa yɔ. Yesu lɩzɩ pɩ-taa se: “Tʋtʋyɛ taa meheyiɣ-mɩ se halaa piya taa lɛ, nakɛyɛ tɩlɩɩ nɛ kakɩlɩ Yohanɛɛsɩ Lɩm [Mɩyɩsɩyʋ], ɛlɛ ɛsɔdaa Kewiyaɣ taa ɛjam kɩlɩ-ɩ.”​—Maatiyee 11:11.

Ɛzɩma Yesu yɔɔdaa se ɛsɔdaa Kewiyaɣ taa ɛjam kɩlɩ Yohanɛɛsɩ yɔ, pɩwɩlɩɣ se Yohanɛɛsɩ fɛyɩ mba pa nɛ Yesu pakaɣ tɔɔʋ kewiyitu ɛsɔdaa yɔ, pa-taa. Yohanɛɛsɩ tʋlɩ Yesu nʋmɔʋ, ɛlɛ ɛsɩba pʋcɔ nɛ Yesu paɣzɩ haʋ ɛsɔdaa Kewiyaɣ taa sʋʋ waɖɛ ɛyaa. (Ebree 10:19, 20) Ye mbʋ, Yohanɛɛsɩ kɛnɩ nayʋ siɣsiɣ tʋ nɛ ɛkaɣ hiɣu ɛ-kʋjɔʋ tɛtʋ yɔɔ, alɩwaatʋ ndʋ Ɛsɔ Kewiyaɣ kɔŋnɩ Paradisuu yɔ.