Yesu ɖiɣni nʋmɔʋ ɖɔm nɛ ɛɖɛɣ Yerusalɛm, ɛlɛ ɛtɩlɩtɩ Pereya egeetiye taa. Abalʋ ñɩm tʋ nɔɔyʋ se ɛ-wayɩ nɛ ɛtalɩ ɛ-cɔlɔ lɛ, eluŋ ɛ-tɛɛ. Abalʋ ɛnʋ ɛkɛ “ɛyʋ sɔsɔ” nɛ pɩtɩla yɔ, ɛɛkɛ Sinaagɔɔgɩ taa sɔsɔ nɔɔyʋ yaa Sahedrɛɛ taa tʋ nɔɔyʋ. Etendiɣ Yesu se: “Tɔm wɩlɩyʋ kɩbanʋ, pɩwɛnɩ-m se mala we nɛ mehiɣ tam tam wezuu?”—Luka 8:41; 18:18; 24:20.

Yesu pɔzɩ-ɩ se: “Pɩlabɩ ɛzɩma nɛ ŋyaɣ-m se Kɩbanʋ? Nɔɔyʋ tɩkɛ kɩbanʋ, ɛlɛ Ɛsɔ yeke.” Pɩtʋʋ fɛyɩ se abalʋ ɛnʋ, ɛya Yesu se “kɩbanʋ” se ɛha-ɩ ñamtʋ ɛzɩ Yuda ñɩma tɔm wɩlɩyaa sɔɔlʋʋ se payaa-wɛ yɔ. Paa Yesu kaakɛ wɩlɩyʋ kɩbanʋ yɔ, eheyi abalʋ ɛnʋ se Ɛsɔ ɖeke pɩwɛɛ se payaa se “Kɩbanʋ.”

Yesu tasɩ-ɩ lɔŋ se: “Ye ŋsɔɔlɩ hiɣu wezuu kɔyɔ, ɖɔkɩ paɣtʋ.” Abalʋ ɛnʋ ɛpɔzɩ Yesu se: “Ndʋ?” Peeɖe lɛ, Yesu yɔɔdɩ Paɣtʋ hiu taa kagbanzɩ tɔm, ndʋ tɩyɔɔdɩ ɛyʋ kʋʋ, hayitu, cɛtɩm, lʋlɩyaa ñam tɔm yɔ nɛ pʋwayɩ lɛ, ɛtɛzɩnɩ paɣtʋ sɔsɔtʋ tʋnɛ se: “Ŋŋsɔɔlɩ ño-koobu ɛzɩ ña-maɣmaɣ yɔ.”—Maatiyee 19:17-19.

Abalʋ ɛnʋ ecosi-i se: “Malaba pɩtɩŋa mbʋ yɔ, ɛbɛ pɩkazɩ-m ɖɔɖɔ?” (Maatiyee 19:20) Pɩtɩla, ɛmaɣzaɣ se wɛtʋ kɩbandʋ natʋyʋ kazaa se ɛwɛɛna nɛ pʋcɔ ehiɣ wezuu maatɛŋ. Yesu nawa se ɛtɛm ɛtaa lɛ, ‘ɛcɔnɩ-ɩ pɩŋŋ nɛ ɛsɔɔlɩ-ɩ.’ (Maarkɩ 10:21) Ɛlɛ kaɖɛ naɖɩyɛ ɖaŋ abalʋ ɛnʋ.

Abalʋ ɛnʋ ɛɛsɔɔlɩ ɛ-ñɩm nɛ ɛñɔɔnɩ-pʋ siŋŋ, pʋyɔɔ Yesu heyi-i se: “Pɩkazɩ-ŋ kʋyʋmtʋ, wolo, pɛdɩ ña-ñɩm kpeekpe nɛ ŋcɛlɩ liidiye kʋñɔndɩnaa nɛ ŋwɛɛnɩ ñɩm ɛsɔdaa, nɛ ŋkɔɔ ŋtɩŋ ma-wayɩ.” Toovenim, pɩwɛɛ se abalʋ ɛnʋ ɛha ɛ-ñɩm kʋñɔndɩnaa mba paapɩzɩɣ nɛ pɛhɛyɩ-ɩ pʋ wiɖiyi yɔ nɛ pɩsa nɛ ɛtɩŋ Yesu wayɩ. Peeɖe lɛ, abalʋ ɛnʋ ɛñɩŋ ɛ-ɛzɩdaa nɛ ɛkʋyɩ ɛɖɛɛ nɛ pɩla Yesu pʋtɔdɩyɛ. Abalʋ ɛnɛ, ɛɛñɔnɩ “ñɩm sakɩyɛ” mbʋ ɛɛwɛna yɔ, mbʋ huuzini ɛ-ɛza yɔɔ nɛ ɛɛtasɩɣ  naʋ ñɩm mbʋ pɩ-tɔm cɛyɩ siŋŋ nɛ pɩkɩlɩ yɔ. (Maarkɩ 10:21, 22) Pʋyɔɔ Yesu yɔɔdaa se: “Pɩwɛ kaɖɛ mba pɛwɛnɩ ñɩm yɔ se pasʋʋ ɛsɔdaa Kewiyaɣ taa!”—Luka 18:24.

Tɔm tʋnɛ nɛ ndʋ Yesu caɣ yɔɔdʋʋ lɛɛlɛɛyɔ yɔ, titukuni ɛ-tɔmkpɛlɩkɩyaa laŋa pɩdɩɩfɛyɩ. Ɛtɔm se: “Ɛɛɛ, pɩwɛ aɖaaɖaa to se ɛsʋʋnɩ ɛjɔʋ pɔʋ, pɩkɩlɩ ñɩm tʋ se ɛsʋʋ Ɛsɔ Kewiyaɣ taa!” Ɛ-tɔmkpɛlɩkɩyaa pɔzɩ-ɩ se: “Ye pɩwɛ mbʋ yɔ, apɩzɩɣ ɛya ɛ-ñʋʋ?” Ɛlɛ ɛzɩ pɩwɛ kaɖɛ kpem se ɛyʋ ehiɣ ñʋʋ yabʋ na? Yesu cɔnɩ pɛ-ɛzɩdaa nɛ ɛtɔ se: “Mbʋ ɛyaa ɩɩpɩzɩɣ yɔ, Ɛsɔ pɩzɩɣ-pʋ.”—Luka 18:25-27.

Peeɖe Pɩyɛɛrɩ pɔzɩ tɔm natʋyʋ nɛ pɩwɩlɩɣ se ɛ nɛ Yesu tɔmkpɛlɩkɩyaa lalaa patɩla ɛzɩ abalʋ ñɩm tʋ ɛnʋ yɔ. Ɛpɔzɩ Yesu se: “Cɔnɩ nɛ ŋna, ɖiyebi pɩtɩŋa payɩ nɛ ɖɩtɩŋ ña-wayɩ: Pɩkaɣ-ɖʋ sɛʋ we?” Yesu cosi nɛ eheyi-wɛ mbʋ pakaɣ hiɣu yɔ, pɩ-tɔm se: “Mba mɩ ɩtɩŋ ma-wayɩ yɔ, ɛjaɖɛ ɖɩñɔɔzɩyɛ wiye lɛ, Ɛyʋ Pɩyalʋ cakɩ ɛ-paɣlɩka sɔsɔɔ kpelaɣ yɔɔ lɛ, mɩ ɖɔɖɔ, ɩkaɣ kpelisi yɔɔ caɣʋ nɛ ɩhʋʋ tɔm nɛ Izrayɛɛlɩ cejewiye hiu nɛ naalɛ.”—Maatiyee 19:27, 28.

Pɩtʋʋ fɛyɩ se alɩwaatʋ ndʋ pɩtɩŋa pɩkaɣ ɖaɣnʋʋ ñɔɔzʋʋ tɛtʋ yɔɔ nɛ pɩwɛɛ ɛzɩ Edɛɛnɩ kaɖaɣ taa yɔ, tɩ-tɔm Yesu yɔɔdaɣ. Pɩyɛɛrɩ nɛ tɔmkpɛlɩkɩyaa lalaa pakaɣ wɛnʋʋ waɖɛ se pa nɛ Yesu pɔtɔɔ kewiyitu tɛtʋ ndʋ tɩpɩsɩ Paradisuu yɔ, tɩ-yɔɔ. Waɖɛ nɖɩ ɖɩwɛ ñɩm siŋŋ nɛ pɩkpaɖɩ paa kɩlaʋ ŋgʋ.

Ɛlɛ pɩtɩkɛ cee wayɩ mbʋ pakaɣ hiɣu yɔ, pi-ɖeke. Mba patɩŋɩɣ Yesu wayɩ yɔ, pehikiɣ wazasɩ sɔnɔ sɔnɔ. Yesu tɔm se: “Nɔɔyʋ ɛɛkaɣ yebu ɖɩɣa, halʋ, koobiya, ñɩma, yaa piya, Ɛsɔ Kewiyaɣ yɔɔ, nɛ etihiɣ pi-ɖeɖe hadɛ cɩnɛ nɛ cee wayɩ tam tam wezuu.”—Luka 18:29, 30.

Pɩkɛ toovenim se paa le Yesu tɔmkpɛlɩkɩyaa ɩtalaa yɔ, po-koobiya mʋʋ-wɛ camɩyɛ halɩ pɩkpaɖɩ pɔ-hɔŋ taa ñɩma maɣmaɣ. Pɩlabɩ pʋtɔdɩyɛ se abalʋ ñɩm tʋ ɛnɛ, eyeba nɛ wazaɣ kanɛ kɛɖɛɛ ɛ-yɔɔ, nɛ halɩ pɩkpɛndɩnɩ waɖɛ nɖɩ ɛpɩzaɣ ɛwɛɛna se ɛtɔɔ kewiyitu ɛsɔdaa Kewiyaɣ taa yɔ.

Yesu tasɩ yɔɔdʋʋ se: “Kajalaɣ mba sakɩyɛ kaɣ pɩsʋʋ wayɩ wayɩ mba, nɛ wayɩ wayɩ mba kaɣ pɩsʋʋ kajalaɣ mba.” (Maatiyee 19:30) Tɔm tʋnɛ tɩ-tɔbʋʋ lɛ suwe?

Abalʋ ñɩm tʋ ɛnɛ ɛɛwɛ “kajalaɣ mba” hɛkʋ taa, mbʋ pʋyɔɔ yɔ, ɛɛkɛ Yuda Ɛsɔ sɛtʋ ñʋndɩnaa taa nɔɔyʋ. Ɛzɩma ɛɖɔŋaɣ Ɛsɔ paɣtʋ yɔɔ yɔ, ɛɛwɛnɩ ñʋʋ leleŋ siŋŋ nɛ ɛyaa taɣ-ɩ liu pɩdɩɩfɛyɩ. Ɛlɛ ɛkpaɣ ɛ-ñɩm nɛ ɛsɩɩ kajalaɣ lone taa, e-wezuu caɣʋ kpeekpe taa. Ɛlɛ mba pɔ-yɔɔ taawɛɛ ñamtʋ siŋŋ yɔ, mba tɩlɩna se Yesu wɩlɩɣnɩ toovenim nɛ wezuu nʋmɔʋ. Papɩzɩɣ nɛ pɔtɔ se pɛkɛ “wayɩ wayɩ mba”, ɛlɛ lɛɛlɛɛyɔ lɛ, mba kaɣnɩ hiɣu “kajalaɣ” lone. Pɛwɛnɩ lidaʋ se pa nɛ Yesu pakaɣ caɣʋ kewiyitu kpelisi yɔɔ ɛsɔdaa nɛ pɔtɔɔ kewiyitu tɛtʋ ndʋ tɩpɩsɩ Paradisuu yɔ, tɩ-yɔɔ.