Yesu nɩwa se Sahedrɛɛ taa mba labɩ nɔɔ se pakʋʋ-ɩ lɛ, ɛkpaɣ nʋmɔʋ nɛ ewolo Efrayim. Tɛtʋ ndʋ, tɩwɛnɩ Yerusalɛm nɛ hayo kiŋ. Ɛlabɩ mbʋ se e-koyindinaa etaahiɣ-i. Ɛ nɛ ɛ-tɔmkpɛlɩkɩyaa paawobini peeɖe. (Yohanɛɛsɩ 11:54) Ɛlɛ pɩnaɣ 33 tɛ Paska kazandʋ ɖiɣni ñɔtʋʋ nɛ pʋyɔɔ lɛ, pɩɩwɛɛ se Yesu ɛɖaɣnɩ pɩsʋʋ Yerusalɛm. Ɛpɩsaɣ lɛ, ɛtɩŋnɩ Samaarɩɩ nɛ Galilee ageeta taa, nɛ ɛtɩtasɩ pɩsʋʋ ageeta ana a-taa pʋcɔ nɛ ɛsɩ.

Yesu kɔm nɛ ɛtalɩ kɔfɩ nakʋyʋ taa lɛ, ɛna abalaa nabɛyɛ hiu pɛkɛ canasɩ. Kʋdɔŋ ŋgʋ kɩkpaɣ ɛyʋ nɛ pɩtalɩ ɖoli lɛ, kɩdɔkɩ e-tomnaɣ kɔzɩ kɔzɩ e-nimbe, e-nee nɛ ɛ-nɩŋgbaaŋ. (Kɩgalʋʋ 12:10-12) Moyizi Paɣtʋ taa lɛ, pɩɩwɛɛ se ye canaɣ ɛna ɛyaa yɔ, kama kubusi se “Azuluma tʋ! Azuluma tʋ!” Nɛ koposini-wɛ.—Levitiki 13:45, 46.

Pʋyɔɔ canasɩ hiu waa mba paaposi pa-tɩ nɛ Yesu. Ɛlɛ pɛwɛɛ nɛ pamakɩ kubusi se: “Yesu, Tɔm wɩlɩyʋ, na ɖa-pʋtɔdɩyɛ.” Yesu na-wɛ lɛ, eheyi-wɛ se: “Iwolo ɩwɩlɩ mɩ-tɩ layaa.” (Luka 17:13, 14) Pɩwɩlɩɣ se Yesu ñam Ɛsɔ paɣtʋ, mbʋ pʋyɔɔ yɔ, cɔjɔnaa ɖeke kaawɛnɩnɩ waɖɛ se pewili ɛyʋ nɛ peheyi-i se ɛ-canatʋ kʋdɔŋ tɛma. Nɛ ye toovenim ɛ-yɔɔ ɛcɛba yɔ, lɛɛlɛɛyɔ ɛ nɛ ɛyaa lalaa papɩzɩɣ nɛ pɛwɛɛ ɖama cɔlɔ.—Levitiki 13:9-17.

Canasɩ hiu waa mba paatisi Yesu yɔɔ se ɛwɛnɩ piti lakasɩ ɖoŋ. Pʋyɔɔ pɛɖɛ cɔjɔnaa cɔlɔ kpaagbaa, paa pɔ-yɔɔ ɛtɩcɛbɩta yɔ. Pakpaɣ nʋmɔʋ nɛ pɛɖɛɣ lɛ, panaɣ se po-tomnaɣ paɣzɩ lɛɣzʋʋ nɛ pɔ-yɔɔ kɔɔ pɩcɛ. Toovenim, tisuu mbʋ paawɛnɩ Yesu yɔɔ yɔ, pɩwazɩ-wɛ siŋŋ!

Canasɩ nzɩ sɩ-taa nakʋ kpaɣ sɩ-nʋmɔʋ nɛ sɩɖɛɛ. Ɛlɛ lɛlʋ ñapɩsɩ. Ɛɛkɛ Samaarɩɩ tʋ nɛ ɛpɩsaa lɛ, ɛñɩnɩɣ Yesu. Ɛbɛ yɔɔ? Ɛcaɣ se ɛsɛɛ Yesu kpem, ɛzɩma ɛwa ɛ-kʋdɔŋ yɔ, pʋyɔɔ. Lɛɛlɛɛyɔ, ɛzɩma ɛ-yɔɔ cɛba yɔ, ɛwɛɛ nɛ “ɛsɛɣ Ɛsɔ ɖoŋ” mbʋ pʋyɔɔ yɔ, ɛnawa se Ɛsɔ ɖoŋ taa ɛ-kʋdɔŋ cɛba. (Luka 17:15) Ɛkɔma nɛ ɛna Yesu lɛ, ɛtɔlɩ ɛ-nɩŋgbanzɩ tɛɛ nɛ ɛsɛɛ-ɩ siŋŋ.

Yesu pɔzɩ mba paawɛɛ ɛ-cɔlɔ yɔ se: “Ɛzɩ pe-hiu, pe-kpeekpe pɔ-yɔɔ tɩcɛ? Nakʋ lalaa wɛ le yɔ? Pa-taa nɔɔyʋ tɩpɩsɩ ɛkɔɔ Ɛsɔ sam, ɛlɛ ɛgɔm ɛnʋ yɔ e-yeke?” Peeɖe lɛ, Yesu heyi Samaarɩɩ tʋ ɛnʋ se: “Kʋyɩ ŋwolo: Ñe-tisuu yabɩ ña-ñʋʋ.”—Luka 17:17-19.

Ɛzɩma Yesu wa canasɩ hiu waa panɛ yɔ, pɩwɩlaa se Ɛsɔ ɖoŋ kaawɛ ɛ-yɔɔ. Canasɩ nzɩ sɩ-tɩŋa sɩ-yɔɔ cɛba. Ɛlɛ ŋga kawɩlɩ ɛsɩmɩyɛ Yesu yɔ, pɩtasɩnɩ se kɔ-yɔɔ cɛba lɛ, kɛwɛnɩ ɖɔɖɔ waɖɛ se kapɩzɩɣ nɛ kehiɣ wezuu maatɛŋ. Alɩwaatʋ ndʋ Ɛsɔ ɖʋwa se ɛkaɣ tɩŋnʋʋ Yesu yɔɔ nɛ ɛwaa ɛyaa kʋdɔmɩŋ yɔ, tɩtɩtalɩta. Ɛlɛ ye ɖɩwɛnɩ tisuu Yesu yɔɔ yɔ, ɖɩpɩzɩɣ nɛ ɖɩwɛɛnɩ ɖɔɖɔ waɖɛ se ɖihiɣ wezuu maatɛŋ. Ðɩwɛnɩ pɩ-yɔɔ ɛsɩmɩyɛ ɛzɩ canaɣ Samaarɩɩ tʋ ɛnʋ yɔ?