Ba no dwilila be rera ndebo mbuya ye Bushe gwe Ndzimu ngwedzi ne ngwedzi ndibo ba no bagwa koga se Bafakazi ba Jehova. (Matewu 24:14) Palo iyeyi nde ye Bafakazi ba ka dubikiwa kose ne ba no fanilika ku thama nshingo we ku rera nenguba ba sathu ba ka dubikiwa.

 Aa. Ku doneita mari a te iko ku no thama kuti nthu a bagwe se Mfakazi kene a piwe nshingo nngwe kene gobe mu gubungano ledu. (Mishingo 8:18-20) Dumbu, mari a no doneitiwa kanjinji a no thamiwa ku si na u no ziba. Mfakazi nngwe ne nngwe u no shingisa nako iye, masimba awe, ne zwithu zwizwe mu nshingo wedu we shango yose ku yendidzana ne ku da kukwe, kose ne mamo awe.​—2 Bakorinta 9:7.

 Ngwedzi nngwe ne nngwe, Bafakazi ba no bika nshingo wabo we ku rera mu dziphuthego dzabo. Mbiko iyeyi i no thamiwa ne ku da.

 Mbiko dzose dze phuthego dzo shanganyiwa, dzi be dzi tumiligwa ku ofisi ye litabi ye ndawo yadzo. Ofisi ye litabi i no tumila mbiko dzose dze shango ingwe ne ingwe kene dzi mu ndawo yayo, ku ofisi yedu hwulu ye shango yose.

 Ku bupelo gwe gole le bushingili lingwe ne lingwe, a palo i pezhugwi kwazo ye shango ingwe ne ingwe mu gole ilelo i no bongwa. Palo idzedzi dzo shanganyiwa dzose kuti ku bongwe palo ye Bafakazi mu shango yose. Mbiko dza ka pelela dze shango ingwe ne ingwe dzo longwa mu section ye website yedu i noyi “Mu Shango Yose”. Mbiko idzedzi dzo ti kgothatsa, koga se kwa dza ka dzi kgothatsa Bakirisiti be kutanga.​—Mishingo 2:41; 4:4; 15:3.

 Nenguba ti si nga longe palo ye ba si nga rere mu palo ye Bafakazi ba Jehova, to ba amuchila mu dziphuthego dzedu. Bunji gwabo ba no be yapo mu Chikumbuludzo che lufu gwa Jesu che gole ne gole, ndizo palo yabo i nga bongwa ne ku dusa palo ye Bafakazi mu palo ye bathu ba yapo ku Chikumbuludzo. Ne 2022, palo ye bathu ba ka bali yapo ku Chikumbuludzo ya ka be ili 19,721,672.

 Banjinji ba si nga zhe ku zwidiyo zwedu zwe phuthego ba no shathila ndongoloso yedu ye ku zwidiya ne bathu Baibili mahala. Ne 2022, ko kumbuligwa kuti ta ka bo ne dzithuto dze Baibili ne bathu ngwedzi ne ngwedzi dzili 5,666,996, bangwe bali ba no zwidiya bali banjinji mu chibaka chi ngompela.

 Kanjinji hurumente u no bona palo idzedzi ne ku buzwa bathu kuti ba no shanganila ne ithopa che budumili gupi. Ha ti lakidzila, U.S. Census Bureau i ka ti palo dzabo dzo ‘bongwa koga ne ku buzwa nthu kuti a u no zwitola ali we budumili gungwe mu ichaba,’ ngono ba no dwilila be ti ko pelela ne palo dza ka teiwa ‘mu ku kumbulila koga’. Ku leyana na ichecho, iswi to bala nthu se nngwe we Bafakazi ba Jehova koga ha e dwilila e rerela bangwe kakale e dwilila e bika nshingo uwe, ngono a ti to bala bathu ba no zwileba koga kuti Bafakazi ba Jehova.