Apa Bafakazi ba Jehova ba na Baibili Yabo Kene?

ZANA

Bafakazi ba Jehova ba ka shingisa shandulilo njinji dze Baibili dza ka siyasiyana mu ku zwidiya Baibili kwabo. Mu ndimi dza chi be ne Baibili, to bokela kwazo New World Translation of the Holy Scriptures ku shingisa zina le Ndzimu, ku tambunuka kwayo, ne ku chenesa zwithu kwayo.

Ku shingisiwa kwe zina le Ndzimu. Bakwali bangwe be Baibili ba ka kongwa ku kudza pa ka fanila kudziwa. Ha ti lakidzila, Baibili ingwe ya ka kwala mazina a no pinda 70 e bathu ba ka be ne gobe mu ku kwagwa kwayo. Chi no chenamisa, Baibili iyeyo ya ka dusa zina le Nkwali we Baibili—Jehova Ndzimu—choselele!

Ku leyana na ichecho, New World Translation ya ka gwiliza zina gulu ka njinjinjinji pa la ka be li li po mu mikwalo ye kutanga, ngono mazina e ba mu komiti ye bakwali bayo haazo kwagwa.
Ku tambunuka kwayo. Ha te Baibili dzose dzi no chenesa zibiso ye Baibili ye mikwalo ye kutanga ne zila ya ka tambunuka. Ha ti lakidzila, Baibili ingwe, mu na Matewu 7:13 i noti: “Nginani ne nkoba wa ka manikana, ne kuti nkoba u no yesa ku dzihele wa ka zhuka ne zila i no yenda ko i ndelu.” Ne kwa ka jalo, mikwalo ye kutanga ya ka shingisa dama “chinyiwa,” i si “dzihele.” Pangwe bakwali bayo ba ka shingisa dama “dzihele” ne kuti ba ka be be duma kuti bathu ba ka bipa ba no no dziyidzigwa chose mu moto we dzihele. Ngono nkumbulo iwoyo ha u to dumana ne Baibili. Ndizo New World Translation iyo ne zila ya ka tambunuka i ti: “Ngina ne nkoba wa ka manikana, ne kuti nkoba nkulukulu wa ka zhuka i zila i no yesa ku chinyiwa.”
Ku chenesiwa kwayo. Shandulilo ye Baibili ya ka lulwama haizo fanila kuti i be ili ya ka tambunuka koga, ngono i be i hwika ne ku hwisisika zwibuyanana. Yela njele yechi. Mu na Baroma 12:11, mpostolo Paulo wa ka shingisa ndebo i no dwa kuti “meya dzi no bila.” Ne kuti ndebo iyeyi ha i to hwika mu Ikhuwa cha ngwenu, New World Translation i no shingisa ndimana iyeyo ne zila i no hwika. I no ti Bakirisiti ba ka fanila ku “penyesiwa ne meya.”

Pezhugwi kwe ku shingisa zina le Ndzimu kwayo, ku tambunuka kwayo, ne ku hwika kwayo, New World Translation i na chingwe chi no i shalula: I no piwa bathu mahala. Ndizo, dzimiliyoni dze bathu dzi khona bala Baibili ne ndimi dzabo—kose na ibabo ba singa khone ku zwitengela Baibili.