Nda ka zwaligwa mu turopo ye Calgary mu Alberta, Canada. Bazwadzi bangu ba ka thubukana ndi chi ntikinini, ngono imi na mme ti ka no gala ku bazwadzi ba mme. Bazwadzi ba mme ba ka be be ti da, ngono nda ka be ndi gala nda ka shatha kwazo. Ndi cha kumbula makole iyawo a no shathisa kwazo.

 Ha ndina makole a li 7, buchilo gwangu gwa ka shanduka ne zila ya ka bipa ha mme na tate be lobolana kakale ngono ti be ti fulukila ku St. Louis, Missouri, mu United States. Shule kwa ikoko nda ka lemoga kuti tate i nthu wa ka bipa. Ha ndi lakidzila, ha ndi dwa ku ikwele mu zhuba le kutanga, tate ba ka lemuga kuti nda ka be ndi singa chile zwibuyanana ku ikwele ngono ndi singa zwigwile. Ba ka zhala bushongola ngono ba ka ndi loba ku pinda bana ba ka be be ndi loba ku ikwele! Nda ka hwisiwa zogwadza na ichecho ngono ndi ka tangisa ku zwigwila ndi na makole a li 7.

 Mazwibato a tate a ka bipa a ka hwisa mme zogwadza, ngono ba ka be be gala be gwa. Nda ka tangisa ku shingisa dzidrugs ne busukwa ndi na makole a li 11. Nda ka be nthu u na bushongola kwazo ngono nda ka be ndi da nghwa. Ha ndi pedza ku ikwele, mazwibato angu a ka shanduka choselele.

 Ha ndi na makole a li 18, nda ka hiriwa mu U.S. Marine Corps. Nda ka diyiwa ku thama kuti mazwiwo angu e bushongola a bipile mbeli. Shule kwe makole a li 5, nda ka lecha nshingo we chisole ngono ha tangisa ku zwidiyila nkumbulo we nthu kuti ndi shake nshingo ku Federal Bureau of Investigation. Nda ka tangisa zwidiyo zwangu zwe university ku United States ngono ha no zwipeleledza ku Canada kwa nda ka be ndo gala ko.

 Ku university nda ka nyadziwa moyo ne zila ya ka be bathu be zwibata nayo. Bathu ba ka be be lingika be zwikumbulila ba li boga, chingwe ne chingwe mu shango cha ka be chi lingika chi si cha chingwe, ngono mathatha e bathu a ka be e lingika a singa ke a ka pela. Nda ka pelegwa ne thembo ye kuti bathu ba nga thama kuti shango i be butuka.

 Ku bona ku sina nthu cha a nga chilila, kwa ka thama kuti ndi chilile busukwa ne dzidrugs, kose ne ku lawugwa ne ku da mari ne ndalo. Nda ka be ndi gala ndi li mu dziparty ne ku da bakadzi. Training ya nda ka amuchila mu chisole ya ka ndi pa chibindi che ku gwisa bangwe. Nda ka be ndi tola ndulamo ne zila i poga ngono nda ka be ndi gwisa nngwe ne nngwe wa nda ka be ndi kumbula kuti ha a to bata bangwe zwibuyanana. Malebeswa wose, ne kwa ka jalo, nda ka be nda chibe nlanda we nghwa.

 Zhuba lingwe nda ka dakiwa ne dzidrug ndi na nkhwinya wangu ku nzi ti zwibaakanyila ku no tengesa mbanje, nkhwinya wangu a ka ndi buzwa kuti a ndo dumila mu Ndzimu. Nda ka ndabila ndi ti: “Ha i li kuti Ndzimu ndiye u no thama kuti ti dziyile, ha ndi to shaka ku hwa chingwe ne kukwe!” Mu zhuba li no tobela, zhuba langu le kutanga mu nshingo ntshwa, nngwe we Bafakazi ba Jehova wa nda ka be ndi shinga naye wa ka ndi buzwa kuti: “A u no duma kuti Ndzimu ndiye u no thama kuti ti dziyile?” Ichecho cha ka ndi chenamisa ngono cha ka thama kuti ndi shake ku ziba kwa ka paphidzika. Mu mimwedzi i li 6 i no tobela, ta ka lebesana kanjinji, ngono a ka ndi dabila buzo njinji dza nda ka be ndi nadzo dza ka sima ne kwe buchilo, e shingisa Baibili.

 Nkadzi wa nda ka be ndi gala naye mu chibaka ichecho, wa ka be a singa shake kuti ndi mbudze zwa nda ka be ndi zwidiya. Sunday ungwe nda ka mbudza kuti nda ka koka Bafakazi kuti ba zhe ku nzi kuwo ti diya Baibili. Zhuba li no tobela, ha ndi dwa ku nshingo nda ka wana a ka tola chingwe ne chingwe mu ngumba ngono a yenda. Nda ka budila kuzhe ngono ndi ka lila. Nda ka tembezela Ndzimu, ndi nkumbila kuti a ndi batshe. Ya ka be i li gwe kutanga ndi shingisa zina le Ndzimu, Jehova mu ntembezelo.—Pisalema 83:18.

 Shule kwe mazhuba mabili nda ka tangisa ku zwidiya Baibili ne nsha we Bafakazi ba Jehova. Ba ka ti ba si no be ba yenda nda ka dwilila ndi bala buka ye You Can Live Forever in Paradise on Earth, ngono nda ka ipedza busiku igogo. a Cha nda ka zwidiya ne kwa Jehova ne Nkololo uwe, Jesu Kirisiti, cha ka ndi kutha moyo. Nda ka zwibonegwa kuti Jehova I Ndzimu u na mahwilangoni ne kuti u no hwa zogwadza ha ti dziyila. (Izaya 63:9) Nda ka kuthiwa moyo kwazo ne ludo gwe Ndzimu mu ndili, kose ne chibayilo cha nda ka dusigwa ne Nkololo uwe. (1 Johani 4:10) Nda ka pedza nkumbulo kuti Jehova Wa ka be a li moyonlefu mu ndili “ngoti abatoshaka kuti kube ne mmwe unolobesiwa, koga banoyemula kuti bose bashanduke mu matjinyo abo.” (2 Pita 3:9) Nda ka zwibonegwa kuti Jehova Wa ka be e ndi kwebela ku nli.—Johani 6:44.

 Nda ka tangisa ku be po ku zwidiyo zwe gubungano zwe Bafakazi ba Jehova mu viki iyeyo. Nda ka be ndi na mavudzi malefu, ndi na manyina, ndi tshusa, ngono Bafakazi ba Jehova ba ka ndi bata koga se nngwe we be nsha wabo wa ka be a lashika mu chibaka chilefu. Ba ka be be zwilakidza kuti i Bakirisiti be malebeswa. Nda ka zwihwa u ngati nda ka shangana ne bazwadzi ba mme kakale, ngono mu mamo a no shathisa.

 Chinyolocho koga zwithu zwa nda ka be ndi zwidiya zwa ka tangisa ku shandula zila ya ndi no chila nayo. Nda ka dusa mavudzi, ha misa ndalo ye buchapa i singa amuchigwe ne Ndzimu, ne ku lasha dzidrugs ne busukwa. (1 Bakorinta 6:9, 10; 11:14) Nda ka be ndi shaka ku shathisa Jehova. Ha nda chi ziba kuti ha a to amuchila chingwe cha ndi no thama, ndo chi misa. Nda ka be ndi zwihwa ungati nda ka bayiwa ne chingwe mu moyo. Nda ka be ndi gala ndi zwidwa nditi: ‘Ha ndi nga cha zwibate ne zila ya ka jali kakale,’ Ngono ha zwibudza kuti ndowo shandula nkumbulo wangu kose ne mazwibato angu. Ndizo ha tangisa ku bona mbayilo we ku thama zwithu ne zila ya Jehova. Ne July 29, 1989—mingwedzi i li 6 shule kwe ku tangisa ku zwidiya Baibili—nda ka dubikiwa ku be Nfakazi wa Jehova.

 Baibili ya ka ndi batsha ku shandula buthu gwangu. Mu chibaka cha ka pinda kanjinji nda ka be ndi gwa ha ndi bona nngwe u singa zwibate zwibuyanana. Ngono ngwenu ndo thama cha ndi nga khona kuti ndi chile “nge kunyalala ne mmwe ne mmwe.” (Baroma 12:18) Dumbu Jehova ndiye wa ka ndi batsha ku shanduka e shingisa Dama lile kose ne meya dzidze dza ka yengemala.—Bagalatiya 5:22, 23; Bahebera 4:12.

 Mu bumo gwe kuti ndi lawugwe ne dzidrugs, nghwa, ne njemulo dza ka bipa, ngwenu ndo gwisa ku shathisa Jehova ne ku nshingila kwa ka pelela. Ichecho cho shanganyila ku batsha bangwe ku nziba. Shule kwe makolenyana ha ndi sino be nda dubikiwa, nda ka fulukila ku shango ingwe ku batsha ne ku rera mu ndawo dza ka be dzi sheta bareri. Shule kwa ikoko, nda ka shathila ku diya bathu banjinji Baibili ne ku bona se kwa Baibili i shandula machilo abo. Kakale nda ka shathisiwa ne ku bona mme be be Nfakazi wa Jehova—ba sino be ba bona se kwa nda ka shandula buchilo gwangu.

 Ne 1999, ku El Salvador, nda ka pedza mu ikwele chi no dangwa ngwenu kuyi Ikwele che Bareri be Bushe. Ikwele ichecho cha ka ndi diya ne ku ndi batsha ku tungamila mu nshingo we ku rera ne ku diya ne ku lisa ba mu gubungano. Shulenyana mu gole ilelo nda ka lobola Eugenia, nkadzi wangu wa ndi no da kwazo. Tose to shingila se bareri be chibaka chi zhele mu Guatemala.

 Ngwenu, mu bumo gwe ku zwitoboka mu buchilo, nda ka shatha kwazo. Ku shingisa zwidiyo zwe Baibili kwa ka ndi sunungula mu ndalo ye buchapa i singa amuchigwe ne Ndzimu, ne nghwa, ngono kwa ka ndi batsha ku be ne buchilo gu no shathisa gu na ludo ne mbakiso.