Ne July 2022, kwa ka bikiwa ne kwe dzi-temperature dzi pezhugwi ku pinda dza ka be po mu shango yose:

•   “Kwa ka be ne heatwave ye bubili ngwedzi iwoyo, ya ka thama kuti China e pe kumbuludzo i no dzi pinda dzose ne kwe ku pisa kwa ka pindilila mu dzitoropo wulu dzi nga bata 70.”—July 25, 2022, CNN Wire Service.

•   “Memoto i mu chikgwa ku poteleka Europe i no paphizika, ha heatwave e thama kuti dzi-temperature dzi yende pezhugwi kwazo.”—July 17, 2022, The Guardian.

•   “Dzitoropo wulu mu United States dza ka be ne dzi-temperature dzi pezhugwi kwazo kupinda dza ka tongo be po ne Sunday, ha heatwave ye chilimo e andama ku noti ku East Coast ne dzingwe ndawo dzi ku South ne Midwest.”—July 24, 2022, The New York Times.

 Kose ikoko ko dwani? A kowo pelela shango i sa ka lulwamila buchilo? Baibili ikatini?

 Ee. Dzi-heat wave dzi mu shango dzo yendidzana ne cha ka lebegwa mbeli ne Baibili ne kwe misi yedu. Ku lakidzila, Jesu wa ka porofita kuti towo bona “zwinoshingikala zwinotjisa.” (Luka 21:11) Dzi-temperature dzi no paphidzika mu shango yose dza ka thama kuti bunji gu bilaele kuti bathu ba nowo chinya shango.

 A kuzo jalo. Ndzimu wa ka bumbila shango kuti bathu ba galile mu ili cha chose. (Pisalema 115:16; Nreri 1:4) Mu bumo gwe ku lecha bathu ku i chinya, wa ka thembesa kuti u nowo “lobesa ibabo banolobesa shango.”—Zumbunulo 11:18.

 Kumbulila buporofiti gubili koga gu no lakidza chingwe cha ka thembesiwa ne Ndzimu kakale:

•   “Tjilambanyika ne shango yakawoma zowoshatha, tjilambanyika tjowothinila tjikashatha, tjowofanana ne luba.” (Izaya 35:1) Ndzimu ha a nga lechedzele kuti shango i be chilabanyika chi singa gagwe, ngono u nowo baakanya ndawo dzose dza ka chinyiwa.

•   ‘Mo thokomela shango mukayidilidzila, moyifumisa kwazo.’ (Pisalema 65:9) Ne batsho ye Ndzimu, shango i nowo be paradaisi.

 Ku zwidiya ne sekwa ku shanduka kwe climate ku shingikadza buporofiti gwe Baibili, bala nsholo u noti “Ku Shanduka Kwe Climate ne Zwi Chowo Shingikala—Baibili Ikatini.”

 Ku zwidiya kwa ka paphidzika ne kwe thembeso ye Baibili ne kwe ku gwiliza shango mu mamo ayo a ka naka, bala nsholo u noti “Who Will Save the Earth?”