GALANI MA KA LINDA!
Phuka Dze Shango Dzo Tapudzika ne 73 Percent mu Makole ali 50 a ka Pinda—Baibili i ka Tini
Ne October 9, 2024, World Wildlife Fund ya ka kwala mbiko i no hwisa zogwadza ne kwe se kwa bathu be bata phuka. Ya ka lakidza kuti “mu makole ali 50 a ka pinda (1970-2020), palo ye phuka ya ka tapudzika ne 73%.” Mbiko ya ka lakidza kuti: “A ku to pindilidziwa zwithu a kuyi chi nowo shingikala mu makole a li 5 a no zha chowo lakidza kuti bochilo go wobe gu li chani mu shango.”
Bathu ba njinji ba no khataziwa ne mbiko dza ka jalo. To da shango yedu kwazo ngono a ti to shaka bona phuka dzi hwisiwa zogwadza. Ndizo ti zwihwa ne zila iyeyo ne kuti Ndzimu wa ka thama kuti ti thokomele phuka idzedzo.—Genesisi 1:27, 28; Zwiani 12:10.
U nga zwi buzwa kuti, ‘Towo khona ku bakilila phuka dze shango kene? Baibili i ka Tini?’
Chi nowo shingikala mu chibaka chi no zha
Nenguba ti thama chingwe ne chingwe cha ti nga khona Ndzimu ndiye koga u nga khona ku bakilila phuka dze shango . Baibili ya ka lebela mbeli mu na Zumbunulo 11:18, kuti Ndzimu u nowo ‘chinya ibabo ba no chinya shango.’ Ndimana iyeyi i no ti diya zwithu zwibili:
1. Ndzimu u nowo dzibila bathu kuti ba si chinye shango.
2. Ndzimu u nowo tola thambo chinyolocho. To ziba chini? A ku zo tongo shingikala kuti nthu a be ne bukhoni gwe ku nga pedzisa phuka dze shango se mu chibaka cha ngwenu.
Ndzimu u nowo thamani ku baakanya chimo ichechi? U nowo shingisa Bushe gugwe gwe kudzimu ku busa shango yose. (Matewu 6:10) Bushe igogo gowo diya bathu ba no thembeka ku thokomela ne ku bakilila phuka dze shango.—Izaya 11:9.