Jehova Ndzimu u no shaka kuti bathu bose ba zwidiye ne kukwe ne Bushe gugwe gwe kudzimu, ne ba nga be bali mu chimo chipi. (1 Timoti 2:3, 4) Ndizo wali, Bafakazi ba Jehova be tshambisa Dzibaibili ne dzitshambiso dzi no batsha bathu banjinji kose ne bathu ba si nga hwe mu zebe ku zwidiya Baibili. Dumbu gubungano ledu la ka tshambisa dzitshambiso dzili dzi thousand mu dzividiyo dze ndebo dze maboko, a dzi yapo mu ndebo dze maboko dzi no pinda 100! To tshambisa ne andamisa dzitshambiso idzedzi chini? Ngono ta ka nakisa nshingo iwoyu chini mu ku yenda kwe chibaka?

 Dzitshambiso dze ndebo ye maboko dzo thangwa ne zwithopa zwi no shandulila mu shango yose. Nngwe ne nngwe u mu ithopa u no lingisisa zwibuyanana tshambiso ya ba ka fanila shandulila. Ku dwapo, ba no dumilana kuti nlayetsa u nowo shanduligwa chini mu ndebo ye maboko. Shule kwa ichechi, be ko tshambisa tshambiso iyeyo mu vidiyo. Mu chibaka ichechi, ku na zwithopa zwili 60 zwi no dwilila zwi shandulila tshambiso dzi no thusa ku zwidiya Baibili ne ndimi ye maboko, ngono zwingwe zwili 40 zo thama zwi jalo mu zwibaka zwingwe.

 Mu chibaka cha ka pinda, kwa ka ku tura ku thama dzividiyo dze ndebo ye maboko. Dzikhamera dze dzividiyo ne zwingisiwa zwingwe zwa ka zwi tura kwazo ku pinda ngwenu. Kakale, dzividiyo dza ka dzi rekhodegwa mu studiyo cha ka chi bakiwa naswi, ngono mu zwibaka zwingwe ku baakanyiwa mbako dzi yapo kale. Mari wose a ka e shakika a ka a nga pinda P371 671 kuti ku thamiwe chingwe ne chingwe chi no sheteka kuti ithopa chi no shandulila chi shandulile mu ndebo ye maboko.

 Kuti ku shingisiwe mari e zwipo zwibuyanana, gubungano ledu la ka shinga kwazo ku thama kuti ndongoloso ye ku shandulila i si ture. Ndizo ta ka thama kuti ku shingisiwe dzi-equipment dza ngwenu dzi no shinga zwibuyanana kakale dzi si nga ture kwazo. Pana kuti ku shingisiwe studiyo, zwithopa zwi no shandulila zo shingisa dzi green screen ngono ku be ku rekhodegwa dziviyo mu ofisi. Ha ku sheteka bathu banjinji ba no shingisa maboko, bazwalani ne dziazwadzi ba no rekhodela ipithu che tshambiso cha ba ka fanila ku rekhoda bali mu ofisi kene ku nzi, a ku cha sheteka kuti ba yende ku studiyo.

 Kakale ku na software ya ta ka thama i no batsha ba no shingisa maboko, mu nshingo wabo. Ichecho cha ka thama kuti zwithopa zwi no shandulila zwi khone ku shingisa hafu ye chibaka cha ka chi shingisiwa ntolo ku thama tshambiso ye ndimi ye maboko. Bazwalani bedu ba no bokela ichecho kwazo. Nzwalani u noyi Alexander a kati: “Ngwenu dzividiyo dze ndebo ye maboko dzo hulugwa kanjinji ku pinda ntolo. Ichecho cho ndi shathisa kwazo. Ndo lingilila dzividiyo zhuba ne zhuba.”

 Mazhuba iyawa, ko sheteka mari a pasi kwe P61 945 ku tenga zwi no shetiwa ne ithopa chi no shandulila. Ichecho cho thama kuti ti khone ku thama dzividiyo dze ndimi dze maboko mu ndimi dzingwe dzili njinji.

 Ha ithopa cha pedza ku rekhoda tshambiso ye ndebo ye maboko, dzividiyo dza ka fanila ku tumiligwa ku na ba no dzi sheta. Mu chibaka cha ka pinda, kwa ku tura kwazo ku thama dzi-videocassette ne dzi-DVD, ngono kakale ku tola nako njinji ne shingisa kwazo. Zwa ka zwa ka rekhodiwa zwa ka zwi tumiligwa ku khampani i ku kuzhe kuti ku thamiwe dzikhopi. Gwe bupelo, dzi-videocassettes ne dzi-DVD dza ka dzi tumiligwa ku dziphuthego. Ne 2013 koga, ta ka shingisa mari a no pinda P24 778 060 ku thama dzi-DVD dze ndimi ye maboko.

 Bathu ba si nga hwe mu zebe ba ka bokela ichecho kwazo. Ne kwa ka jalo, kwa ka ku si ku lelu mu zwibaka zose ku shingisa dzividiyo, ne kuti palo ye dzi-videocassettes kene dzi-DVD ya ka i dwilila i paphidzika. Mu zwimo zwingwe, kwa ka ku sheteka dzi-DVD dzili njinji kuti ku rekhodiwe buka ye Baibili ingompela. Nzwalani nngwe ku Brazil u noyi Gilnei a kati: “Ta ka ti ti ha ti shaka ku bala lukwalo, ta ka ta ka fanila ku shaka videocassette ya ka lingisana ngono ku dwa po ti be ti shaka lukwalo. Kwa ka kwa ka sima kwazo.” Azwadzi nngwe u noyi Rafayane, wa ka e shingisa dzi-DVD dze ndebo ye maboko, a kati: “Kwa ka ku nyadza ku zwidiya uli woga. Ta ka ti shingisa nako njinji ku shaka hwalo ne dzi-reference koga.” Ngono ha bazwalani ne azwadzi dzedu bali mu nshingo we ku rera, kanijinji ba ka be yenda ba na dzi-DVD kene dzi-videocassette, kuti ba dzi zane mu TV ye nthu u no khatega. Bazwalani bangwe ba ka be yenda ba ka senga dzi-DVD player dzabo. Ne kwa ka jalo, mu chibaka chifutshwanana, kwa ka bo ne dzi-DVD player dzi tukununu dzi na screen, ngono bazwalani banjinji ba ka be dzi shingisa. Bobby, u no gala ku United States, a kati: “Ha u si no ku bala ndimana ingompela ngono ku dwa po u shaka ku bala ingwe, kanjinji wa ka u chenchela ku DVD ingwe. Ichecho cha ka chi tola chibaka kakale kwa ka sima kwazo ku shingisa Baibili.”

 Ne 2013, gubungano la Jehova la ka hulula app ye JW Library Sign Language, i no thama kuti bazwalani ne dziazwadzi ba khone ku download ne zana dzividiyo dze ndimi ye maboko mu dzi-smartphone kene dzi-tablet. Kutanga app iyeyi ya ka hulugwa mu ndimi ye maboko ye America. Ku dwa po, ne 2017, kwa ka thamiwa kuti i khone be yapo mu ndimi dzose dze maboko. Bazwalani ne dziazwadzi mu shango yose ba ka shatha kwazo. Nzwalani we Brazil, u noyi Juscelino, a kati: “Nda ka ndi si nga dume! Nda ka dwilila ndi kumbula kuti Gubungano li no Laula lo da iswi bathu ba si nga hwe ku zebe chini, ne kwe sekwa be shaka ti dwilila mu malebeswa se bathu ba no hwa ku zebe koga. Nda ka shatha kwazo, ngono app iyeyi ya ka thama kuti ndi de ku zwidiya Baibili kwa ka paphidzika.”

 Ngwenu to thama dzividiyo dzose dze ndebo ye maboko ne khomputara, ngono dzi be dzi longwa mu website yedu ne mu app ye JW Library Sign Language. Ichecho cho thama kuti tshambiso dze ndimi ye maboko dzi shanduligwe, dzi rekhodiwe, ne tumiligwa mu mazhuba mashomanana koga, kusi mu mingwedzi kene makole. Dumbu, mu ndimi njinji dze maboko, tshambiso dzadzo dzo hulugwa mu chibaka chingompela ne dze bathu ba no hwa ku zebe.

 Ela njele cha ka legwa ne bangwe be bazwalani ne dziazwadzi dzedu dzi si nga hwe ku zebe. Azwadzi nngwe u no yi Klízia a kati: “I gubungano lipi lingwe li no da bathu ba si nga hwe ku zebe zwingapa ne li no thama kuti ba wane zojiwa zwe ku namata ba si nga sokole? Akuna chingwe mu shango chi nga fanana ne cha ti no thamigwa ne gubungano la Jehova.” Vladimir a kati: “Dzividiyo dzo ndi lakidza kuti Jehova u no thokomela bathu ba si nga hwe koga se bathu ba no hwa.”

 Dzividiyo dzedu dze ndimi dze maboko kanjinji dzo lakidza dziti: “Tshambiso iyeyi i no piwa se ingwe zila ye nshingo we ku diya Baibili mu shango yose u no batshiwa ne zwipo zwi no dusiwa ne ku da.” To bokela kwazo zwipo zwenyu, bunji zwi no dusiwa ne donate.pr418.com. Mari iyawa a no thama kuti ku khoneke ku thama Dzibaibili ne zwi no batsha bathu bose ku zwidiya Baibili, ku shanganyila ne ba no shingisa ndebo ye maboko.