Jesu waka dwa badiyiwa eti: “mowobe batendeki bangu . . . ku phelelo dze shango.” (Mishingo 1:8) Ngwenu Bafakazi ba Jehova ba no shingikadza ne buzhalo ndayelo iyeyi. Ne kwa ka jalo, ndawo dzingwe dze shango ku shanginyila wululu dzi na bathu banjinji ha dzi thu dzi ka reregwa ne buzhalo. Ngono dzingwe shango dzina Bafakazi bashomanana. (Matewu 9:37, 38) Ngono ini cha tino thama kuti ti khone ku swikilila bathu banjinji ne zila dzose dzi nga khoneka?

 Ku batsha ku shingikadza ndayelo ya Jesu, Komiti ye Kushingila ye Gubungano li no Laula le Bafakazi Ba Jehova ino tumila dzi-missionary mu ndawo dze shango dzino sheta. Ngwenu ku na dzi-missionary dzi no pinda 3 090 mu shango yose. a Bunji gwabo baka diyiwa ku zwikwele zwe Baibili zwi nonga Ikwele che Bareri be Bushe. Dzi-missionary dzo siya ne kuda mizi yadzo ku fulukila ku shango dzi poga. To bokela kwazo dzi-missionary dzi na bugalimoyo ne ntata ye njele yadzo, diyiwa ne luzibo gwadzo, dzo batsha ku andamisa ndebo mbuya ne kube zwilakidzilo zwa ka lulwama mu badiyiwa batshwa.

 Mu ofisi ye litabi gungwe ne gungwe, be Ofisi ye Bashingili be Rera ne Litabi gwe Kushingila bano shinga ne Komiti ye Litabi ku thokomela dzi-missionary mu na zwa ba no sheta, bugalo, zwe mamuko, ne mari mashomanana e ku zwichidza. Mu gole le ku shingila le 2020 Bafakazi ba Jehova ba ka shingisa mari a nga bata P287 473 590.00 ku thokomela dzi-missionary. Ne batshiwa ikoku dzi-missionary dzo khona temelela ne buzhalo ne shingisa masimba adzo mu ku rera kose ne ku simisa makubungano a ba no shingila mu ali.

 Dzi-missionary dzaka batsha chini mu nshingo we ku rera? Nzwalani Frank Madsen, u no shingila mu Komiti ye Litabi ye Malawi a kati: “Ne chibindi ne bukhoni gwabo dzi-missionary dza ka batsha makubungano kuti a khone ku pedza ndawo dza a no rerela dza ka sima ne pa ndawo dzino legwa ndimi dzipoga, se mizi yaka bakiligwa. Kakale, ku gwisa kwabo ku zwidiya lulimi gwe ndawo ne chilenje, chilakidzilo chino kulumbidza ne chino sendedzela bangwe, ngono kakale bano sendedzela batshwa ku shingila ne chibaka chi zhele. Tobokela Jehova dzi-missionary.”

 Ungwe we Komiti ye Litabi uno dwa ku shango ingwe wa kati: “Dzi-missionary zwilakidzilo zwino chila zwe kuti bathu ba Jehova ba no wanana mu shango yose. Dumbu ne ba si Bafakazi ba no khona bona kuti hatizo thubukanyiwa ne zwilenje, ngono zwidiyo zwe Baibili zwa ka ti batsha ku be bazwalani ba no wanana.”

 Dzi-missionary dzo batsha chini bareri be ndawo ya dzino shingila mu ili? Paulo, uno dwa ku Timor-Leste, uno bokela dzi-missionary dza ka tumigwa mu gubungano labo. A kati: “Ndawo yedu ino pisa kwazo kwazo. Ngono nenguba dzi-missionary dzi dwa ku ndawo dzino tothola, ha dzi to dumila pisa ikoku ku ba dzibila ku rera. Ba no gala bali mu zwidiyo zwe mangwanana zwe rera misi yose. Kanjinji ndo ba bona be gwilila ku bathu bano khatega masikati zhuba li pisa kwazo kakale ne madekwana. Ba ka batsha bathu banjinji ku zwidiya malebeswa ku shanganyila nami. Ne thaabala ne majatu, bano shingisa buchilo gwabo gose ku shingila Jehova ngono ichechi cho sendedzela gubungano lose ku nshingila ne buzhalo.”

 Ketti, nzhulazila we chibaka chi zhele ku Malawi, uno leba se kwa dzi-missionary dzaka lobolana dza ka batsha nsha uwe, a kati: “Ha dzi-missionary dza ka lobolana dza tumigwa ku gubungano ledu, ndimi nda kabe ndili Mfakazi mu nsha wangu. Ngono baka ndi batsha kwazo, ne be pejo kwazo ne be nsha wangu. Chilakidzilo chabo chaka naka cha ka batsha bana bangu ku bona kuti ku shingila Jehova ko pelela ne buchilo guno shathisa ne gwa ka lulwama. Ndo bokela ku sendedzela kwe dzi-missionary, ne kuti bana bangu be chikadzi batatu bano shingila se bazhulazila be chibaka chizhele ngono nlume wangu wa ka tangisa ku yenda ku zwidiyo zwe gubungano.”

 Mari a no thokomela dzi-missionary ano dwa ngayi? A no dwa mu zwipo zwi no dusigwa nshingo we shango yose, ngono bunji gwawo a no dusiwa ku shingisiwa zila dzi no wangwa mu donate.pr418.com. Zwipo i zwezwi zwe bumoyo nchena zo bokegwa kwazo.