The Watch Tower ye June 1, 1912 ya kati: “Bunjinji gwe babali bedu ba no ziba ibaba ba singa bone. Ba nga zwiwanila tshambiso dzi no bagwa . . . . Tshambiso dze ba singa bone dzo kwagwa ne shanga dzi no bagwa ne zwinyala.” The Watch Tower ya ka dwilila i ti: “Bathu banjinji ba singa bone ba no bokela nlaetsa we kuti zhuba li no shathisa le kuti Ndzimu a kombolele shango la bo pejo.”

 Ha matama iyawa e kwagwa, ndongoloso ye shango yose ye braille ye Ikhuwa (English) ya ka be i sa thu i ka amuchigwa. Ne kwa ka jalo, Bafakazi ba Jehova ba ka be ba chi dwilila ne tshambisa nlaetsa we Baibili ne shanga dzi no bagwa ne zwinyala, dzi no dangwa braille. Ngono ti cha thama ti jalo! Ti na tshambiso dze braille mu ndimi dzi no pinda 50. Dzo thamiwa chini?

 Ha ku thamiwa braille, kutanga ko kwagwa ku shingisiwa shanga dze braille. Michael Millen, u no shinga ne Text Processing Services ku Patterson, New York, u no chenesa e ti: “Kutanga ta ka be ti shingisa software i no tengesiwa ku kwala tshambiso dze braille. Ngwenu to shingisa Watchtower Translation System, i no shingisiwa mu bunji gwe ndimi dze shango. Ndo duma kuti akuna i nonga iyo mu shango yose.”

 Tshambiso dze braille adzina nkwalo koga we tshambiso ngono kakale dzi na cheneso ye zwitshwantsho. Ha ti lakidzila, itshwantsho che khavara che buka ye Shathila Buchilo Cha Chose! ye braille cho chenesiwa ne zila yeyi: “Nlume u no tangisa gwendo mu zila i no nyongoleka i pakati kwe miti ne maluba a ka naka ne matombo.” Jamshed, nlanda u no shingila ne nzhulazila u singa bone, a kati, “Cheneso idzedzi dze zwitshwantsho dzo ndi batsha kwazo.”

 Ha dzifaele dzi si no be dza kwagwa, dzo tumigwa ku ofisi dze matabi, ku no embosiwa tshambiso dze braille. Ko shingisiwa pampiri ya ka sima i singa pubuke kene chinyike ha i bagwa kanjinji. Ku dwa po, zebe dzo kubunganyiwa, dzo batshanyiwa, dzi be dzi tumiligwa ne tshambiso dze gubungano kene ne poso ha i na ndongoloso ye ku tumilila ba singa bone mahala. Ha ku sheteka, matabi a nga khona ku tumilila dzitshambiso dzi no shingisiwa mu zwidiyo zwe gubungano ka bunako ku bazwalani ba singa bone.

 Nshingo iwoyu wose u no sheta nako ne mari. Malebeswa wuti, printery yedu ku Wallkill, New York, i no thama Dzibaibili dze braille dzili 2 mu nako i no lizana ne ye ku thama Dzibabili dzili 50 000. Baibili ingwe ne ingwe mu nkwalo we braille we grade-two we Ikhuwa i na volumu dzili 25, ngono zwi no sheteka ku thama volumu idzedzi zo sheta mari a no pinda a no thama Baibili ingompela ka 123. a Dzikhavara koga dze volumu dzili 25 dzo shingisa mari a ngabe P1 648.47!

 Ibaba ba no batsha ne ku tshambisa tshambiso dze braille ba no zwihwa chini nekwe nshingo wa ba no thama? Nadia, u no shingila ku litabi gwe South Africa, a kati: “Bazwalani ne azwadzi dzedu ba si nga bone ne ba singa bone zwibuyanana ha ba to chila buchilo gulelu, ndo shathisiwa ne ku thama chingwe chi no ba batsha. I busupi gwe kuti Jehova u no ba da kwazo.”

 Ngono ku ingwi ha nthu u si nga bone a singa khone ku bala braille? Mu makole a si mangapani a ka pinda, ta ka hulula burouchara gu na nkwalo we braille kose ne wa ka jwaeleka, gu noyi Learn to Read Braille. Gwa ka thamigwa kuti gu shingisiwe ne bathu ba no bona kose ne ba singa bone. Burouchara gwa ka thamiwa gu na chileiti ne pene i no shingisiwa ku kwala. U no zwidiya braille u no shingisa thulusu idzedzi ku embosa shanga dze braille. Ku zwidiya ku embosa ko thama kuti e khone ku alakana shanga ne ku mbatsha ku ziba kuti i shanga ipi ha e i bata.

 Bazwalani ne dziazwadzi ba si nga bone kene ba singa bone zwibuyanana ba ka batshiwa chini ne tshambiso idzedzi? Ernst, u no gala ku Haiti, wa ka be e yenda ku zwidiyo zwe gubungano, ngono a sina tshambiso dze braille. Ne ntata ya ichecho, wa ka be a ka biga koga mu ku bata ne nsholo kuti a khone ku pa dzindebo ne ku dabila. A kati “Ngwenu, ndo khona milidza luboko ne ku dabila nako ingwe ne ingwe koga. Ndo chi zwihwa ndili chithu chingompela ne bazwalani ne dziazwadzi dzangu. Tose to amuchila zwidiyo zwe ku namata zwi no fanana!”

 Jan, nkugwana u singa bone zwibuyanana ku Austria, u no yendisa Chidiyo che Thungamakole ne Chidiyo che Baibili che Gubungano, a kati: “Tshambiso dzedu dzo hwika ku pinda tshambiso dzingwe dze braille dza nda ka bala. Ku lakidzila, ti na dzinambara dze dzizebe, mikwalo i pasi i no boneka muthuhu, ne cheneso dze itshwantsho dzi no loba lunyanga.”

 Seon-ok, nzhulazila we ku South Korea, aato bona kakale aato hwa. Kutanga wa ka be a ka linga koga ku baligwa ne ndebo ye ku chenesegwa ne ku bakhwa maboko, ngono wo chi khona ku zwibalila tshambiso dze Baibili dze braille. A kati: “Tshambiso dzingwe dze braille ku nga sima ku dzi bala ne kuti dzidots dzo shota, dzilaene adzizo tambunuka, kene pampiri ili techanana kwazo. Ngono Bafakazi ba Jehova ba no shingisa pampiri i butuka kwazo kakale dzidots dzo hwika zwibuyanana, ngono ko ndi batsha ku bala zwibuyanana” Kakale wa kati: “Kutanga, nda ka be ndi khona koga ku zwidiya tshambiso dze Baibili ndi batshiwa ne bangwe. Ngono, ngwenu ndo khona ku zwidiya ndili ndoga. Ndo shathisiwa ne ku khona ku zwibaakanyila zwidiyo zwedu zwe gubungano zwe viki ne viki ne ku khona ku be ne gobe mu zwili. Ndo bala tshambiso dzedu dzose dze braille. U nga na u kati ndo dzi da kubi.”

 Koga se tshambiso dzedu dza ka printiwa, tshambiso dzedu dze braille dzi na matama a no tobela: “Tshambiso iyeyi a i to tengisiwa. I no piwa ili zila ye ku diya bathu Baibili mu shango yose, i batshiwa ne mari a no dwa mu bathu ne kuda.” To bokela ku be mu dusa zwipo zwa ka jali mu shingisa zila dza ka chenesiwa ku donate.pr418.com. Ku pa ku dwa mu moyo kwenyu ko batsha kuti bose, ku shanganyila ibaba ba singa bone kene ba singa bone zwibuyanana, ba piwe zwidiyo zwe ku namata.