Bafakazi ba Jehova ba no amika kwazo ne kwe bazwalani ne dziazwadzi dzabo. (1 Pita 2:17) Bunji gwedu to zwiwa se azwadzi u noyi Tannis, we Kenya. Akati, “Ndo da ku ziba chi no shingikikalila bazwalani ne dziazwadzi dzangu dzi no dika mu shango yose.” Tannis ne dzimiliyoni dze Bafakazi bangwe ba no ziba chini chi no shingikala mu shango yose? Ku tangisa ne 2013, ta ka khona ku thama ti jalo ti shingisa section ye Dzikhani i mu website yedu ye jw.org.

 Section iyeyi ye Dzikhani i na mbiko i no thembeka ne kwe Bafakazi ba Jehova, mu khani dzi nonga ku hulugwa kwe dzibaibili, nshingo we ku batsha ha ku na ngozi, dzi-project dze ku baka, ne mishingo ingwe i buthokwa. I no ti budza ne kwe bazwalani ne dziazwadzi dzedu ba ka longegwa mu jele dumilo yabo. Kakale section iyeyi ye Dzikhani i na maitemogelo a no kgothatsa ne kwe dzi-campaign dze ku rera kose ne Chikumbuludzo. Ndi yani u no shakisisa ne kwe dzikhani idzedzi, ngono dzo baakanyiwa chini?

 Section ye Dzikhani i no yendisiwa ne Ofisi ye Public Information (OPI). Lephatha igogu gu ku ofisi wulu ye shango yose ngono gu shinga gu li pasi kwe Komiti ye Babatshanyi ye Gubungano li no Laula. OPI i na bazwalani ne dziazwadzi ba no pinda 100—bunji gwabo ba no shinga ne ku da ba si nga ruwegwe be gala kuzhe—kakale ku na bakwali, bashakisisi, visual artists, ne ba shandulile. Bangwe ba no shinga ku lebesana ne bashingi ba hurumente, dzi-professor ne matichara, ne be dzikhani. OPI i no batshiwa ne dzi Public Information Desk (PID) dzi no pinda 80 mu matabi mu shango yose.

 Ku baakanyila khani ingwe, OPI i no shinga ili pejo ne dzi PID. Ha bazwalani be bona khani ingwe, ba no shakisisa ne kwayo ne ku kubungana zibiso yayo i no thembeka. Ichecho cho shanganyila ku buzwa dzibuzo ne ku lebeleka ne ba na luzibo. Shule kwe ku kubunganya mabaka e malebeswa, khani i no kwagwa, i be editiwa, i bagwa kakale, i lakidziwa ne dzifota, ne ku tumiligwa ku ofisi ye Komiti ye Babatshanyi kuti i dumiligwe.

 Bazwalani ne dziazwadzi dzedu ba no zwiwa chini ne kwe section ye Dzikhani? Cheryl, azwadzi e ku Philippines, ekati, “Ndo da dumbu ku tangisa zhuba ne ku bala dzikhani ne kwe gubungano la Jehova ne bathu babe.”

 Babali banjinji ba no leba ne kwe ku sa fanana kwa ba no bona pakati kwe section ye Dzikhani ye jw.org ne dzikhani dzingwe. Tatiana, u ku Kazakhstan, akati: “ Ndo boka kuti ndo themba dzikhani dze jw.org. Dzo thembeka kakale dzi malebeswa.” Azwadzi u noyi Alma ku Mexico akati: “Dzikhani dzi no nyadza moyo dze ngwao a dzi to fanana ne dzikhani dze section ye Dzikhani dzi no kgothatsa kwazo.”

 Section ye Dzikhani ha i to thembeka koga; kakale i no simisa dumilo. Bernard, ku Kenya, akati: “Section ye Dzikhani ya ka ndi batsha kuti ti linge bazwalani ne dziazwadzi se be nsha wangu, ne ba ka dwa bali ba ngayi. Ndo khona ku leba mazina abo ne zwimo zwa ba ka lingisana nazo mu mitembezelo yangu.” Azwadzi u noyi Bybron, ku Kenya, akati: “Ndo shatha ha ndi bona article ne kwe ku hulugwa kwe Baibili mu ndimi ipoga! Dzi-article idzedzi dzo ndi kumbuludza kuti Jehova ha a to shalaula.”

 Dzikhani dza ka lingisana ne kwe bazwalani ba no dziyidzika dzi nga ti ama ne zila ya ka lulwama. Jackline, ku Kenya akati: “Ku bona chibindi chabo ko simisa dumilo yangu dumbu. Ndo linga kuti ndi bone chi no ba batsha kuti ba khone ku dzikitadza. Nda ka zwidiya kuti zwithu zwi nonga mitembezelo, ku bala Baibili ne mba dumbu—ndizo zwi kulu mu ku simisa bazwalani bedu.”

 Azwadzi u noyi Beatriz ku Costa Rica u no bokela dzikhani dze ngozi dze lubumbo. Akati: “Section ye Dzikhani i no thama kuti ndi bone kuti gubungano ledu lo batsha chini bazwalani bedu ba no sheta ka bonako, zwibuyanana ne ludo. Ko thama kuti ndi dume kwa ka pelela kuti gubungano ileli ndi la Jehova.”

 To boka seni ku piwa khani ptshwa ne kwe bazwalani ne dziazwadzi dzedu mu shango yose! Ichecho cha chi si ngake chi ka khoneka, ha i be isi zwipo zwi no dusiwa ne ku da mu shango yose, bunji zo dusigwa mu donate.pr418.com. To bokela zwipo zwenyu zwi no dusiwa ne ku da ne moyonchena.