Gole ne gole, bashingili ba ka shalugwa be chibaka chi zhele ku dwa mu shango yose ba no kokiwa ku ngina ikwele che Watchtower Bible School of Gilead, chi no batigwa ku Watchtower Educational Center ku Patterson, New York. a Ku ikwele ichechi, badiyiwa ba no zwidiya ku shinga zwibuyanana mu gobe labo le ku shingila mu gubungano la Jehova. Ikwele ichechi cho ba batsha ku simisa ne ku gadzikanya makubungano ne ndongoloso ye matabi mu shango yose.

 Gilead i ikwele cha ka thamigwa shango yose dumbu. Ha ti lakidzila, class ye bo 147, ya ka be ya ka bakhwa ne 2019, ya ka be i na badiyiwa bali 56, ku dwa mu shango dzili 29. Badiyiwa ba no ngina class ye Gilead nde ba ka shalugwa ku shingila mu chibaka chi zhele se ma-Bethelites, bapoteleki, batungwa, kene bazhulazila ba ka shalugwa.

 Ku baakanyila ikwele ichecho ko thangwa chibaka chilefu class i sathu i ka tangisa. Ha ti lakidza, World Headquarters Travel Department (WHQ Travel) i no tengela ibabo ba ka fanila nginilila ikwele dzithikiti dze pleini. Mu na ibabo be class ye Gilead ye bo 147, mari wose a ka ruwelegwa badiyiwa ku dwa ku shango dzingwe ku yenda ne ku buya ku Patterson i P11 794.52. Badiyiwa ba no dwa ku Solomon Islands ba ka be ba ka fanila ku tatha ka nna ku noti ku Patterson, ku dwapo ku tatha ka tatu ku gwilila kanyi—ili gwendo gu no tola 35,400 kilometers (22,000 mi)! Mari a no shingisiwa mu nthu ungompela ku ruwelela flaite i P25 234.80. Kuti ku si shingisiwe mari manjinji, WHQ Travel i no shingisa computer booking tool ku bona dzithikite dze mari a pasi. Nenguba kwa chi bongwa thikiti, computer program i no dwilila i shakisisa mu dziviki njinji kene mingwedzi ku bona ha ku na dzithikiti dze mari a pasi. Kakale WHQ Travel i no shingisa zwipo zwe airline credits mileage ku tenga dzithikite.

 Bunji gwe badiyiwa ba no shakiwa dzivisa ku ngina mu United States. Ne zila ya ka jalo, World Headquarters Legal Department i no ba batsha kuti ba bone dzivisa. Mari a no ruwelela dzivisa ne ku registara mu nthu ungompela i P5 595.54.

 Ngono to batshika chini mu ku diyiwa kwe badiyiwa ibaba? Hendra Gunawan u no shingila ili nkugwana ku Southeast Asia. U no shingila mu gubungano lina ba ka lobolana ba no dwa ku Gilead. A kati: “Mu chibaka cha ka pinda, gubungano ledu la ka be li sina bazhulazila. Ngono ku swika kwabo, ku thaabala kwabo ne ku zwipa kwabo kwa ka sendedzela bangwe, ku nginilila buzhulazila. Azwadzi nngwe mu gubungano ledu, wa ka pelela e nginilila Ikwele che Bushe che Bareri!”

 Sergio Panjaitan u no shinga ne ba no dwa ku Gilead ku Bethele i mu Southeast Asia. A kati: “Ku diyiwa kwabo akuzo kombolela ibo koga; kwa ka kombolela naswi bo. Ba ka zwidiya kunjinji! Ngono mu bumo gwe ku zwikudza na ichecho, ba ka pindisila luzibo gwabo ku bangwe. Ichechi cho thama kuti bathu ba kulumbidziwe mu zwithu zwe Ndzimu.”

 Dzichinyikilo dze ikwele ichechi dzo ruwelegwa chini? Ne zwipo zwi no dwa mu shango yose, zwi no ngina ne zila dza ka siyasiyana dze donate.pr418.com. To bokela zwipo zwenyu zwi no dusiwa ne ku da, zwi no batsha ikwele ichechi che shango yose.