Mu gole le 2021 le ku shingila, a shango yose ya ka be ya ka lingisana ne bugwele gwe COVID-19. Se kwa kwa ka chenesiwa mu mbiko ye “Ku Batshiwa mu Bugwele Gwe Shango Yose,” ta ka shingisa dzimilioni dze dzipula b mu ku batsha mu bugwele ne ku thama Disaster Relief Committees dzi no pinda 950.

 Ngono, bugwele gwa kati gwa ka dwilila, zwimo zwingwe zwa ka sima ne zwa ka be zwi thangwa ne bathu dumbu zwa ka hwisa zogwadza bazwalani bedu ne dziazwadzi mu shango yose. Komiti ye Babatshanyi ye Gubungano li no Lawula, ya ka duma kuti ku shingisiwe mari a ngapa P93,049,680.00 pezhugwi kwe a ka be a dusigwa ku batsha mu bugwele gwe COVID-19 mu zwimo zwa ka sima zwi no pinda 200. Bona se kwa zwipo zwa mu no dusa zwa ka shingisiwa mu ku batsha ibabo ba ka be ba ka lingisana ne zwimo zwa ka sima zwibili.

 Ne May 22, 2021, volcano ye Dombo le Nyiragongo, mu Democratic Republic of the Congo, ya ka tangisa ku phutuka. Ku wunga kwe dope le moto dzingumba, zwikwele, ne tanka ye vula. Ngono dope le moto ya ka be isi ilo mathatha koga. Mazhuba shule kwe ku phutuka, nlota u sa lulwama we volcano wa ka wulukila mu toropo ye Goma ngono ku ka hwika ku zunguzika kunjinji kwe shango. Bunji gwe bathu mu toropo iyeyo ba ka dusiwa mu ili. Bangwe banjinji ba ka tizha, bangwe ba ka tizhila ku Rwanda.

 Mu bathu ibabo ba ka tizha ba nga be 5,000 ya ka be ili Bafakazi ba Jehova. Bangwe ba ka lashikigwa ne mizi yabo, bangwe ibo ba ka kwibigwa zwithu mu mizi yabo ha ba si no be ba tizha. Dzikomiti dzi no batsha dze Rwanda ne Democratic Republic of Congo dza ka shingidzana mu nshingo we ku batsha. Ofisi ye litabi gwe, Congo (Kinshasa) ya ka leba ne kwe komiti ingwe ino batsha iti: “Nenguba kwa ka be kwa ka shangashangana mu toropo kakale ku sathu ku ka dusiwa ndawulo ye kuti bathu ba nga batshiwa chini, komiti ya ka be ya chi tangisa ku pa bathu zojiwa, vula, ngubo, ne zwiambalo.” Bazwalani bedu ba nga pinda 2,000 ba ka be ba li pathu pa ngompela mu ingwe toropo, ba ka bakigwa dzitente, ba ka piwa dzimask, ne ku diyiwa kuti ba ba nga zwithokomela chini mu COVID-19 ne cholera ba ka tungamigwa ne Komiti i no batsha.

 Mu mingwedzi mitatu, bazwalani bedu ba ka be ba chi yesa rice i no pinda 6 tons, 6 tons ye phalichi, 3 tons ye cooking oil, ne 3 tons ye vula. Ku tapudza dzichinyikilo, Ofisi ye Litabi ya ka thama kuti ku tengwe zojiwa zwinjinji mu ndawo iyeyo mu bumo gwe kuti ku tengwe zojiwa zwi no tura mu shango dzingwe.

 Azwadzi ngwe wa ka chinyikigwa ne nzi wa a ka be a cha dwa ku u baka wa kati: “Ta ka be ta ka nyalamoyo kakale ta ka hwa zogwadza.” Ngono be nsha uwe ba ka piwa zwa ba no sheta ku ba chidza ne zwi no ba sedzedza pejo ne Ndzimu. Ngwenu akati: “Ne batsho ya Jehova, ti china zwa ti nga shingisa. Ta ka bona kuti Jehova uno senga ntolo wedu ne ku thama kuti ku be ku lelu ku lingisana ne mathatha.”

 Venezuela ya ka be ne Ikonomi i sa ka gadzikana mu makole manjinji. Bazwalani bedu ba no chilila mu zwimo zwa ka sima, ku thayela kwe zojiwa, ne bugebenga gukulu. Ngono, gubungano la Jehova ha li zo ba lasha.

 Mu gole la ka pinda le ku shingila, kwa ka shingisiwa mari a no pinda P17,446,815.00 mu ku tenga zojiwa, zwisipa ne ku zwiyesa ku bathu. Ofisi ye Litabi ye Venezuela i no leba kuti: “Ha ku te ku li ku lelu ku senga zojiwa zwe 130 tons ku zwiyesa ku shango ya zwi no sheteka ngwedzi ne ngwedzi ne ku zwipa bazwalani ba no zwi sheta.” Kuti zojiwa zwi si chinyike, bazwalani ba no yesa zojiwa zwi singa chinyike chinyolocho. Be Ofisi ye Litabi ba no dwilila beti: “to tenga zojiwa zwi li zwinjinji kwazo mu chibaka cha ku no be ku li ku lelu ku zwiwana kakale zwi singa ture. Ti be ti zwisenga ne chinyikilo dzi pasi.”

 Leonel, nngwe we Disaster Relief Committee ku Venezuela, uno da nshingo uwe. “Nshingo we ku batsha nde we mamo a pezhugwi,” a ka jalo. “Nshingo iwoyu wa ka ndi baka chi nga kwa nda ka figwa ne nkadzi ne bugwele gwe COVID-19. Ndo gala ndi shinga ne ku zwihwa ndi nga shingisiwa ku batsha bazwalani ba no sheta. Nda ka zwibonegwa se kwa Jehova a si nga ke a ka lasha bathu babe.”

 Nzwalani ngwe wa ka batshiwa wa ka tongo shingila mu komiti i no batsha mu chibaka cha ka pinda. Wa kati, “Ngwenu ya be chibaka che kuti ku batshiwe imi.” “Ha ti zo amuchila koga zwithu zwi no boneka. Bazwalani ba ka ndi batsha ne nkadzi wangu kuti ti gadzikane mu moyo. Ba ka ti thokomela, ba ka ti lakidza mahwilangoni, ne ku ti simisa.”

 Zwimo zwingwe zwa ka sima zo shingikala ku sa ka lingiligwa. Ngono, gubungano la Jehova lo khona wana zwi no batsha ne ku zwiyesa ku na ba no zwi sheta chinyolocho, to bokela zwipo zwa mu no dusila nshingo we ku batsha we shango yose. Zila dzingwe dza mu nga dusa zwipo nadzo dzo lakidziwa mu donate.pr418.com. To bokela zwipo zwa mu no dusa.