Nlidzo i chipo cha ka naka cha ti no piwa na Jehova. U nga ama mikumbulo yedu, ne ku shandula se kwa ti no zwihwa, ne ku ti sendedzela. Njimbo dzedu dze original song dza kajalo. Malebeswa hwuti njimbo idzedzi dzi nga ti batsha ku be bakhwinya ba Jehova.

 Chinga kwe 2014, kwa ka thamiwa dzi original song dzi no pinda 70, ngono ingwe yadzo ya bo yapo mu ndimi dzi no pinda 500! Ngono pangwe wa ka tongo zwibuzwa kuti, ‘Njimbo idzedzi dzo thamiwa ndi boyani kakale dzo thamiwa chini?’

 Dzi original songs dzo thamiwa ne ithopa che nlidzo mu Audio/Video Services, chi no shingila kusi kwe butungamili gwe Komiti ye ku Diya ye Gubungano li no Laula. Ithopa ichechi chi na bazwalani ne dziazwadzi ba li 13 ba no batsha ne ku kwala, ku rekhoda, ku longolodza ne ku peleledza njimbo. Pezhugwi kwa ikoku, Komiti ye ku Diya ya ka dumilila ba no zwipa mu shango yose ku batsha ne nshingo iwoyu, ibaba ba no shanganyila ba no kwala, ba no lidza ne ba no mba. Bazwalani ne azwadzi ibaba ne ku zwiyesa pasi ba no shingisa bukhoni gwabo ba si nga shake ku kudziwa.

 Original song i no thamiwa chini? Che kutanga, Komiti ye ku Diya i no shalula Hwalo dze Baibili dzi nowo be ntewo we lumbo, kose ne kuti lumbo gu be ne mazwiwo a ka tini. Ku dwapo ithopa che nlidzo cho pa bangwe be bazwalani ne azwadzi gobe le ku kwala dzinoto ne matama e lumbo. Ko thamiwa chilakidzilo che lumbo. Komiti ye ku Diya i no linga kakale chilakidzilo che lumbo i ko dusa ndayelo ye chi nga thamiwa. Be ithopha che nlidzo ba no baakanya, ku dwa po be be be rekhoda. Njimbo idzedzi dzo rekhodegwa mu ndawo dzi si nga fanane, ku shanganyila ne mu ofisi dze matabi ne mu dzistudiyo dzi mu mizi.

 Ha bazwalani bedu be thama ne ku rekhoda dzi original songs, ba no shingisa zwishingisiwa zwi no rekhoda, ndongoloso i no kwala dzinoto dze nlidzo, dzi audio library, ne zwingwe zwinjinji. Kakale nshingo iwoyu u no shaka zwishingisiwa zwi no nga zwilidzo, mixing consoles, amplifiers, speakers, ne microphones. Mari a nga tenga microphone u ngompela a nga tangisa mu P1,182.37 ku no ti P11,823.74. Ne 2020, ta ka shingisa P1,371,557.84 mu zwishingisiwa zwe ku rekhoda nlidzo.

 Ini chi no thamiwa ku shingisa mari zwibuyanana? Mu bumo gwe kuti ku be ne ithopa chikulu che be nlidzo ku Bethele, banjinji ba no zwipa be shingila ku mizi yabo ba no batsha. Pana ku kubunganya bazwalani banjinji ba no lidza zwilidzo, kanjinji ko thamiwa nlidzo ne khomputara.

 Bazwalani ne dziazwadzi ba no shathila ku teedza dzi original songs. Tara, u no gala ku Germany, a kati: “Njimbo dzo ndi batsha ku tebama ha ndi dziyidzika. Ku dzi teedza ne lulimi gwangu, ndo zwihwa u ngati nda ka gumbatigwa na Jehova.” Nzwalani u no dangwa Dmitry we Kazakhstan wa kati: “Ndo da teedza njimbo idzedzi ne kuti andito sheta ku elanjele kuti a dzo dumilana ne milayontewo ye Baibili. Kakale, njimbo idzedzi dzo ndi batsha ku biga nkumbulo mu na zwe ku namata.”

 Delia, u ku South Africa, u no chenesa se kwa a no zwihwa ne kwe dzi original song e ti: “Ndidzo dzi no ndi batsha kwazo mu ku namata. Ha nda temeka mafupa kene nda ka lingisana ne ndiko, nako dzose ku na lumbo gwa ka lingisana ne chimo changu. Kanjinji, ha ndi hwa nlidzo u no tangisa koga ndo zwihwa chinyolocho nda bo butuka!”

 Dzingwe dzo diwa kwazo. Lerato, u ku South Africa bo, a ka ti: “Lumbo gu no dangwa ‘Iyo ya Chi Swika’ ne gu noyi ‘Shango Tshwa’ dzo thama kuti ndi zwibone ndi amuchila mme ba cha dwa pa musiwa mu bafi. Chibaka ne chibaka ha ndi teedza njimbo idzedzi, ndo ba bona be labukila ku ndili kuti be ndi gumbatile.”

 Original song ya ka batsha kwazo azwadzi ungwe nchechana ku Sri Lanka. Wa kati: “Tichara wangu we sainsi wa ka ndi suta mbeli kwe bana bangwe ne ku be ndili Nfakazi wa Jehova. Nda ka tshuga kwazo, ngono ndi si nga zibe kuti ndi thameni. Ha ndi swika ku nzi, mme ba ka ndi kulumbidza kuti ndi teedze lumbo gu noti: ‘Study Makes You Strong.’ Lumbo igogo gwa ka ndi batsha ku bona kuti ini nda ka fanila ku shakisisa ne ku baakanyila se kwa ndi nga dabila tichara. Zhuba li no tobela, nda ka lebesana naye. Wa ka ndi teedza ngono a ka lakidza kuti u no bokela zwi no dumigwa ne Bafakazi ba Jehova. Ndo boka gubungano la Jehova ku be li ti pa njimbo dza kajalo dzi no kulumbidza.”

 To tola ngayi mari a no ruelela dzichinyikilo dze ku thama njimbo idzedzi? Mu zwipo zwi no dusigwa nshingo we shango yose, zwi no dusiwa kanjinji ku shingisiwa donate.pr418.com. To bokela zwipo izwezwo zwa mu no dusa ne mimoyo yose.