Dzi-team dze shandulilo dze chibaka chi zhele dzi no pinda 60% dzo shingila mu ofisi dze shandulilo dzi si ku ofisi ye litabi. Ini ndongoloso iyeyi i batsha? Ba no shandulila ba no shetani kuti ba khone thama nshingo wabo zwibuyanana ku ofisi ye shandulilo? Ndawo ye team ye shandulilo i no ama chini shandulilo yabo?

 Ofisi ye shandulilo i no thama kuti ba no shandulila ba gale pakati kwe bathu ba no leba lulimi gu no shanduligwa. Karin, u no shandulila mu lulimi gwe Low German, u no chenesa eti: “Chinga kwa ta ka fulukila ku ofisi ye shandulilo i ku Cuauhtémoc, Chihuahua, Mexico, to leba chi Low German mazhuba wose ne bashandulili bangwe, ha ti rera, kose ne ha tili mu dzishopo. To gala tina bathu ba no leba lulimi gwedu. To hwa zwiani zwa ti saka hwa mu chibaka chi lefu, ne ku shingisa matama a no shingisiwa ne bathu banjinji.”

 James, u no shinga mu team ye Frafra mu Ghana, akati mu zwibaka zwingwe u no shuba be nsha we Bethel ba no shingila ku litabi. Kakale wakati: “Ndo shathila ku shingila ku ofisi ye shandulilo. Ku rera ne lulimi gu no lebgwa muno ne ku bona se kwa bathu be amuchila ndebo mbuya ko ndi shathisa kwazo.”

 Bazwalani bedu ba no tola thambo chini kuti ofisi ye shandulilo i ngabe ngayi? Joseph, u no shingila mu Worldwide Design/Construction Department ku Warwick, New York, U.S.A. wakati: “Buthatha gungwe gwa ti no lingisana nago wuti dzingwe ndawo ha dzina mutakase u no thembeka, kene vula, kene inthaneti i no sheteka ku amuchila zwa baka fanila shandulila, ndizo ha ku thamiwa ofisi ye shandulilo to lingisisa kwazo ndawo dzi no pinda ingompela dza ku no lebgwa lulimi.”

 Ku leba malebeswa, zila i singa tole nako kakale i singa ture ndiye ku thamila ofisi ye shandulilo ku Holo ye Mishangano, Holo ye Bushe, kene missionary home, ku no dwa kuti bashandulili ba nga thama nshingo be dwa ku mizi yabo. Ha mibako iyeyi i sipo, bazwalani ba nga dumiligwa ku tenga ndawo ya ku nowo be ne magalo ne ofisi dzi nowo shingisiwa ne ba no shandulila. Ha ku ngabe ne ku shanduka mu team ye ku shandulila, mibako iyeyi i nga tengesiwa ngono mari iyawo a be e shingisiwa kwa a no sheteka kwazo.

 Mu gole le ku shingila le 2020, ta ka shingisa P142 230 920.00 kuti ofisi dze ku shandulila dzi dwilile dzi shinga. Dzi-team dzi mu ofisi dzedu dze ku shandulila dzo sheta dzi khompiutara, dzi-software dza ka shalulika, ne zwi no shingisiwa ku rekhoda, internet, ne zwingwe zwa ka jalo. Ko sheta P8 205.63 ku baakanyila zwi no shetiwa ne u no shandulila ku thama nshingo uwe. Dzikhompiutara dzo longwa software i no tengesiwa, ne Watchtower Translation System, ndongoloso i no batsha ba no shandulila ku longolodza nshingo wabo, ne ku khona ku bona tshambiso dzingwe.

 Kakale bashandulili ba no piwa zwa ba no shingisa ku rekhoda, kuti ba khone ku rekhoda ha ba li mu ofisi. Ta ka bona kuti zwi no shingisiwa ku rekhoda dzo sheteka kwazo ha bugwele gwe COVID-19 gu tangisa, ne kuti bashandulili ba ka khona ku zwitolela ku mizi yabo, ngono be be be khona ku dwilila be shandulila ne ku rekhoda.

 Bashingi ba si nga ruegwe be ndawo kanjinji ba no batsha ne ku lingisisa zwa ka shanduligwa ne ku thokomela ofisi dze ku shandulila. Cirstin u no shingila mu ofisi ye ku shandulila ye Afrikaans ku Cape Town, South Africa akati: “Banjinji be bareri ne bazhulazila be misi yose ba na chibaka che ku shingisa bukhoni gwabo ku batsha mu nshingo iwoyo.”

 Bashingi ba si nga ruegwe ba no shathila gobe ileli. Ungwe azwadzi u no batsha mu ofisi ye shandulila wa kati ku shingila mu ili ko “nyatutudza kakale ko kulumbidza.” Bangwe bazwalani ne dziazwadzi be ndawo iyeyo ba no batsha ne ku rekhoda mahwi. Juana, u no shandulila mu lulimi gwe Totonac mu state che Veracruz, Mexico, akati: “Ngwenu ne kuti ti pejo ne dzituropo dza ku no lebgwa lulimi gwedu, ku lelu kuti bazwalani ne dziazwadzi banjinji ba ti batshe ne ku rekhoda tshambiso dze Odiyo ne Vidiyo.”

 Ngono a ofisi dze shandulilo dza ka batsha mu quality ye ku shandulila? Banjinji mu dzimiliyoni dze bathu ba no bala tshambiso dzedu ba kati ee. Cédric, u no shinga ne team ye Chikongo ku Democratic Republic of Congo, wakati: “Bangwe be bazwalani ne dziazwadzi ba kabe be gala be dana zila yedu ye ku shandulila mu lulimi gwe Chikongo beti ‘Chikongo che tshambiso dze Watch Tower,’ ne kuti ya kabe i si nga fanane ne zila ye ku shingisiwa kwe lulimi gwe Chikongo. Ngono ngwenu, ba kati tshambiso dzedu dza ka shanduligwa ne zila i no fanana ne lulimi gwe Chikongo gu no shingisiwa ngwenu, zila i no shingisiwa ne bathu ngwenu ha be lebeleka zhuba ne zhuba.”

 Andile, u no shinga ne team ye lulimi gwe Xhosa ku South Africa, wa ka leba chi no fanana. Wa kati: “Banjinji ba no ti budza kuti ba ka bona ku shanduka kukulu mu ku shandulila, kose ne bana ba kabe be bala Thungamakole ne Ikhuwa ngwenu ba no i bala ne lulimi gwe Xhosa. Ba no da kwazo ndebo ya ka jwaeleka ye Baibili ye New World Translation itshwa.”

 Mari wose a no shingisiwa ku thama, ku baakanya, ne ku thokomela zose zwi no yendidzana ne ofisi dze shandulilo a no dwa mu zwipo zwa ka dusiwa ne ku da zwi dusigwa nshingo we shango yose, ku shanganyila ne zwa ka dusiwa ku shingisiwa donate.pr418.com.