Malebeswa ne kweni? Ne kwe dzimwe dzibuzo dzi no sheteka dzi no buzwiwa ne bathu. Pamwe u no tjenamisiwa ne buzo dzi no fanana na idzedzi:

• Ndzimu u no khathazeka nge kwedu?

• Nnghwa ne ku ngongola zo wo pela?

• Ko shingikalani naswi ha ta fa?

• Ba ka fa ba no wo tjila kakale?

• Ndi nga tembezela tjini kuti Ndzimu u ndi hwe?

• Ndi nga kwanisa tjini ku shatha mu butjilo?

U nga bona ngai dabilo dze buzo idzedzi? U nga enda ku dzilaeborari kene zwitolo zwe dzibuka kwa u nga wana dzibuka njinji dzi no leba kuti dzi nga ku pa dabilo. Ka njinji buka idzedzi dzo nyanyaidzana. Dzimwe dzo shinga mu tjibaka tji si tjingapani dzi be dzi pindiwa ne tjibaka, shule kwa ko dzi lebgwa ha dza lulamisiwa kene dzi misigwa nge dzimwe.

Ne kwa ka jalo, kuna buka ili yoga i na dabilo dzi no thembeka. Buka iyeyi nde ye malebeswa. Jesu Kristi wa ka tembezela Ndzimu e ti: “Dama lenyu malebeswa.” (Johani 17:17) Ngwenu to ziba Dama ilelo i li Baibili ya ka Yengemala. Mu zebe dzi no tobela u nowo wana zibiso ya ka tjena ye Baibili ye dabilo ye malebeswa ye buzo dzi pezhugwi ipapa.

BUZO IYEYI I NO MUSIWA NGENI: To tjila mu shango i zhele ku sima moyo ne ku sa tambunuka. Budumili gu njinji go diya kuti ku ngongola ko thangwa ne Ndzimu.

TJI NO DIYIWA NE BAIBILI: Ndzimu ha a to tongo thama tja ka bipa. “A ku be kulekule ne Ndzimu we malebeswa ku thama tjiwono, ngo ti Wemasimbaose ha a nga thame ne zila e sa ka lulama!” ko leba Jobe 34:10. Ndzimu u na mazwimisilo a ka lulwama a na ludo mu bathu. Ndi zo Yesu a ka ti diya ku temebezela ti ti: “Tate bedu ba ku dzimu, . . . bushe gwenyu a gu zhe. Ku da kwenyu a ku shingikale mu shango se kwa ku shingikala ku dzimu.” (Matu 6:9, 10) Ndzimu u no khatazeka nge kwedu kwa ka nginilila kwazo kwa a ka pelela e thama ku njinji ku shingikadza mazwimisilo a we.—Johani 3:16.

Linga kakale Genesisi 1:26-28; Jakoba 1:13; na 1 Peteru 5:6, 7.

BUZO IYEYI I NO MUSIWA NGENI: Nnghwa i no dwilila e pedza matjilo e bathu ba si ba shoma. Tose to hwisiwa zogwadza ne ku ngongola kwe bathu.

TJI NO DIYIWA NE BAIBILI: Ndzimu wa ka lebela mbeli kuti u no wo thama kuti ku be ne mbakiso mu shango yose. Mu bushe gugwe, bushe gwe ku dzimu, bathu ‘ha ba to zwidiya nngwa.’ Mu bumo gwa ikoko ba no ‘thula mipanga ya bo be yi thama zwikara zwe mapadza.’ (Isaya 2:4) Ndzimu u nowo pedzisa ku sa lizalizana ne ku ngongola. Baibili i no thembesa i ti: “[Ndzimu] u no bukusha mishodzi yose mu mesho a bo, ne lufu go wo be gu sipo, tjililo ne magwadzi zo wo be zwi sipo. Zwithu zwa ntolo [zwi no nga ku sa lizalizani ne ku ngongola ku yapo ngwenu] kwa pinda.”—Bonyololo 21:3, 4.

Linga kakale Pisalema 37:10, 11; 46:9; na Mika 4:1-4.

BUZO IYEYI I NO MUSIWA NGENI: Budumili gu njinji mushango go diya kuti kuna tji mu tili tji no dwilila tji tjila ha nthu e fa. Bamwe ba no duma kuti bafi ba nga kubadza bathu ba no tjila kene kuti Ndzimu u no pisa bathu ba ka bipa mu moto we ku shumbisiwa u singa pele we dzihele.

TJI NO DIYIWA NE BAIBILI: Ha bathu be fa, ha ba tji po. ‘Bafi ha ba to ziba tjimwe,’ ko leba Nreri 9:5. Se bafi ba singa ke ba ka hwa, bata kene ku ziba tjimwe, ha ba nga kubadze kene ku batsha ba no tjila.—Pisalema 146:3, 4.

Linga kakale Genesisi 3:19 na Nreri 9:6, 10.

BUZO IYEYI I NO MUSIWA NGENI: To shaka tjila ne ku shathila butjilo ne ba ti no da. To yemula ko bona bafi ba ti no da be tjila kakale.

TJI NO DIYIWA NE BAIBILI: Bunji gwe bathu ba ka fa ba no wo musiwa. Yesu wa ka gadzabgwe kuti ‘bathu ba mu zwikumbu zwe ku kumbuligwa ba no wo buda.’ (Johani 5:28, 29) Ku dumilana nge mazwimisilo e kutanga e Ndzimu, bose ba no wo musiwa se bathu ba no wo be nge tjibaka tje ku tjila mu shango ye paradaisi. (Luke 23:43) Tjibaka tji no zha tja ka thembesiwa tjo shanganyila mamuko a ka pelela ne butjilo gu singa pele mu na ba no tenda Ndzimu. Baibili i ka ti: “Balulami ba no wo thuwa shango, ne ku galila tjose mu ili.”—Pisalema 37:29.

Linga kakale Jobe 14:14, 15; Luke 7:11-17; na Mishingo 24:15.

BUZO IYEYI I NO MUSIWA NGENI: Bathu bose ba mu budumili ba no tembezela. Ngono bathu banjinji ba no alakana kuti mitembezelo ya bo ha i to dabigwa.

TJI NO DIYIWA NE BAIBILI: Yesu wa kati diya ku leya mitembezelo ya ka kwagwa. Wa kati, “Ha u tembezela, u si tongo bgwililila zwithu zwi ngompela misi yose.” (Matu 6:7) Ha ti shaka kuti Ndzimu a teedze mitembezelo yedu, ta ka fanila tembezela ne zila ya a no dumana nayo. Ku ita itjetjo ta ka fanila ku zwidiya kuti ku da kwe Ndzimu ini, ti be ti tembezela ku endilana na ko. Johani we Kutanga 5:14 i no tjenesa kuti: “Ne i nga be ni tja titino kumbila ku dumilana nge kuda kukwe [Ndzimu] u no ti hwa.”

Linga kakale Pisalema 65:2; Johani 14:6, 14; na 1 Johani 3:22.

BUZO I YEYI I NO MUSIWA NGENI: Bathu banjinji bano dumila kuti mari, ku zingwa nge bathu banji kene ku be nthu wa ka naka ku nga zhisa ku shatha. Ngono ha be londesesa zwithu izwezwi zwa ka jali ba ka be be bona kuti ku shatha ko zwi pinda izwezwi.

TJI NO DIYIWA NE BAIBILI: Yesu wa ka shalula zila i li yoga i nga shathisa ha a ka be e ti: “Ko shatha ba no sheta zwithu zwe tjimeya.” (Matu 5:3) Shatha kwe malebeswa ko bongwa mu ku tola thambo dze kuti u gutshe zwi no sheteka mu ku ziba Ndzimu ne mazwimisilo a we. Malebeswa a no wangwa mu Baibili. Ku ziba malebeswa ku nga ti batsha ku shalula zwithu zwa ka fanila zha takhwa. Ku duma malebeswa e Baibili ku ti tungamila ha ti pedza mikumbulo nge mishingo yedu ko ti tjidza butjilo gu na mazwimisilo.—Luke 11:28.

Linga kakale Zwiane 3:5, 6, 13-18 na 1 Timoti 6:9, 10.

 Mabaka iyawa a pezhugwi a be e lakidza nge bufutshwanana dabilo dzi li 6 dze buzo dzi no dwa mu Baibili. U no shaka ku ziba dzimwe ku pinda idzedzi? Ha uli mmwe we bathu ba no “sheta zwithu zwe tjimeya,” ha kuna mbilaelo ye kuti u no shaka ziba kwa ka paphidzika. U nga tjenamila buzo dzimwe sa idzedzi: ‘Ha ili kuti Ndzimu u no khathazeka nge kwedu, ini aka letjedzela bubi gu ngapa ne tshiilo ku shingikala ne ku dwilila mu misi yose? Ndi nga lulamisa zila dze butjilo gwe nsha wangu tjini?’ Baibili ino dabila dzibuzo idzedzi ne buzhalo ne dzimwe njinji kakale.

Ne kwa ka jalo bunji gwe bathu ba no zeeza ku liga mu Baibili. Ba no i tola se buka ndefundefu, mu misi imwe ba no i tola se ya ka sima ku hwisisiwa nge bathu. U nga da ku batshiwa ku bona dabilo ku dwa mu Baibili? Bafakazi ba Jehova ba no wo ku pa batsho dzili mbili ku ku batsha.

Ye kutanga i bukana inoyi Ndzimu U No Shaka Ni mu Tili? Ya ka etigwa ku batsha bathu ba ka manikanyiwa ne butjilo ku londesa buzo dzi na dabilo dze Baibili dzi no hwika. Ye bubili i ndongoloso ye zwidiyo zwe Baibili mu nzi u wo i si nga lipisiwe. Mbakisani u wo we mmwe we Bafakazi ba Jehova u na lizibo gwe ku ku diya Baibili u nga zha ku nzi u wo nge tjibaka tja ka ku lulamila viki imwe ne imwe tjibaka tji si tji nga pani ku zuwa nawe nge kwe Baibili. Dzimilioni dze bathu mu shango yose dza ka shathila ndongoloso iyeyi. Bunji gwa bo gwa ka pedza gu ti: ‘Nda bona malebeswa!’

Ha ku na fumwa i no pinda i nga bongwa mu Baibili. Malebeswa e Baibili a no ti sunungula kuti ti bude mu ku shingisa badzimu, ku shangashangana na lutjho. A no ti gadza bgwe, ku be ne mazwimisilo, ne nge ku shatha. Yesu wa ka ti: ‘Mo wo ziba malebeswa ngono malebeswa a no wo mu sunungula.’—Johani 8:32.