Ngono ini Satani ne madimoni a we be shinga kwazo ku tjebela bathu? Ngobe ba no shaka ti shanganila na bo mu bukomba gwa bo. Ba no shaka ku ti ti ba namate. Ba no shaka ti dumila manyepkhwa a bo ne ku thama zwithu zwa a singa shake Jehova. Bunji gwa zwo zwo nginikana ne mipanga i no zwalana ne bafi.

Lufu gwe n’diwa i shingikalo i no gwadzisa mazwiwo, ngono kwa ka fanila kakale kwa ka lingisana ku hwa zogwadza. Shule kwe lufu gwe nzwalani uwe Lazaro, Jesu “ka tebula mishodzi.”—Johani 11:35.

Ku na mipanga minji i no yendidzana ne lufu, ngono i no leyana kwazo shango yose. Bunji ha i to lambana ne milayo ye Baibili. Mim̄we mishingo, nakale, ya ka zwi sendeka mu nkumbulo we ku ti bafi ba no tjila ne ku ti ba no khona bona batjili. Dzindingililo, lila ku singa laulike, ne mishingo mi lefu ye mbiganyo kose ko buda mu litjo gwe ku sa shathisa meya dze bafi. Ngono se bafi “ku sina tja ba no ziba,” bose ba no shinga zwithu zwa ka jalo ba no dwilidza nyepa kwa Satani.—Nreri 9:5.

 Mim̄we mipanga kene mishingo i no dwa mu dumilo ye ku ti bafi ba no sheta batsho ye batjili ne ku ti ba nowo kubadza batjili ha ba singa nyaladziwe. Mu dzi m̄we shango galidema ne zwibayilo zo thamiwa mazhuba a li 40 kene gole shule kwe lufu gwe nthu. Oku ku ka yi ko batsha nfi ku ‘tjulukila’ ku bugalo gwe meya. Mpanga m̄we wa ka jayegwa nge we ku pa bafi zojiwa ne zwi no m̄wiwa.

Zwithu i zwezwi zose zwi nlandu ngobe zo dwilidza nyepkhwa la Satani nge kwe bafi. Apa Jehova wa be a nga dumilila nginikana kwe du mu mipanga ya ka zwi sendeka mu zwidiyo zwe madimona? Ha anga tongo!—2 Bakorinta 6:14-18.

Bashingili be Ndzimu we lebeswa ha bana lim̄we gobe mu mishingo i no simisa nyepkhwa la Satani. Mu bumo, ba no longa meya mu ku batsha batjili ne ku ba nyaladza. Ba no ziba ku ti koga ha nthu e tjinyika, Jehova ega n’di ye u nga m’batsha.—Jobe 14:14, 15.

Bam̄we bathu ba no shangana ne madimona nge kwa bo kene nge n’lebesa badzimu we nthu. Oku ko dan̄wa shingisa badzimu. Busangoma, buloyi, masalamusi, ntunili we laki, ne ku kandila bafi kose i mbumbiko dze shingisa badzimu.

Baibili i no lamba zwithu i zwezwi, i ti: “Ku si tongo wan̄wa mu muli m̄we . . . u no yeta shingisa badzimu, u no thama masalamusi kene m̄we u no shakisisa bushudzi kene nloyi kene m̄we u no teya bam̄we ne buloyi kene m̄we u no yenda ku n’lebesa badzimu kene ku nyambi ye ntunili we dzishingikalo kene m̄we u no kandila bafi. Ngobe m̄we ne m̄we u no thama zwithu i zwezwi u no yigwa ndi Jehova.”—Duteronomi 18:10-12.

Apa i ni Jehova e ti tjemela kwazo nge kwe mishingo i yeyi?

Ku ti ti buyigwe, Jehova u no ti  tjemela nge kwe mbumbiko dzose dze shingisa badzimu. U no da ne ku tjengeta bathu, kakale u no ziba ku ti ibo ba no nginikana ne madimona ba wo dziyila.

M̄we we bathu ba ka jalo ndi Nilda, wa ka be a li nlebesa badzimu mu Brazil. Madimona a ka thama kuti a tjilile mu magwadzi. U no leba: “Dzimeya . . . dzi ka n’di bata, dzi n’di laulanya. ‘Ndi tobedzanya ku fa ndi muka, kakale nda ka manikanyiwa nge buyendasi gwe nkumbulo. Madimona a ka ndi dziyidza kwazo kwa ka ti tshinga dza ngu dzi ka ma. A tola miti i no nyaladza a tangisa ku nwa ne ku thutila tjose. Ku ka gala kwa ka jalo nge makole.”

Mu misi, nge batsho ya Jehova ne Bafakazi ba be mu shango, Nilda ka sungunuka mu ndawulo ye madimona ngono ngwenu u no tjila butjilo gwa ka naka, gu zhele. U no ti: “‘Ndo kulumbidza bose ku ti ba si tongo be, ne nge nsi, ba ka nginikana ne meya [mibi].”