Nda ka zwaligwa ku Paddington, ndawo i na bathu banjinji mu London, England. Nda ka be ndi gala na mme ne bakulu bangu be chikadzi batatu. Tate ba ka be be so ti siya ne ntata ye ku ngwa busukwa.

Nda ka ti ndi chi nchechana, mme ba ka ndi diya kuti ndi tembezele mazhuba wose. Nda ka be ndi na Baibili tukununu i na dzipisalema koga, nda ka zwithamila zila ya ndi nga khona mba dzipisalema idzedzi. Ndo kumbula ndi bala chingwe mu dzibuka dzangu dze ikwele cha ka ndi kutha moyo, cha ka be chiti: “Lingwe zhuba kowo be ku sina mangwana.” Matama iyawa a ka thama kuti ndi lale ndi kumbula ne kwe buchilo gu no zha. Nda ka kumbula nditi: ‘Buchilo gwa ka fanila guli chithu chi no sheteka. Ini ndi chila?’ Ha ndi to shaka fa!

Nda ka tangisa shakisisa ne kwe zwithu zwi si nga zigwe. Nda ka gwisa ku lebeleka ne bafi, ndi yenda ku zwikumbu ne bakhwinya bangu ba ndi no ngina ikwele nabo, ne ku lingilila dzifilimi dzi no tshusa nabo. Nda ka be ndi bona kuti dza ka be dzi khata kakale dzi tshusa.

Nda ka tangisa ku be ngwana u si nga hwe ndi na makole a li 10 koga. Nda ka tangisa ku thuta fojo, i ka ndi lemadza chinyolocho. Shulenyana, a thuta mbanje. Nda kati ndi na makole a li 11, ha tangisa ku ngwa busukwa. Nenguba gwa ka be gu si nga ndi zipile, nda ka be ndi shathila ku dakwa. Nda ka be ndi da music ne ku jaiva. Nda ka be ndi yenda ku dziphathi ne dzi-nightclub ha ndi bona chibaka. Nda ka be ndi nyeluka busiku ndi buya mangwanana kwazo bathu ba sathu ba ka muka. Zhuba li no tobela nda ka be nda ka nyala, ndi be ndi si nga yende ku ikwele. Nda ka be nditi ha nda yenda ku ikwele, ndi ngwa busukwa zwidiyo zwa ikwele zwa ka dwilila.

Nda ka feila kwazo mu gole langu le bupelo ku ikwele. Ne kuti mme ba ka be ba si nga zibe kuti ndi ngwana u si nga hwe, ba ka hwa zogwadza ne ku zhala bushongola. Ta ka be ti so tukana, ngono ha pelela ndi tizha mu nzi. Ne chibakanyana, nda ka gala ne mbisana wa nda ka be ndi dana naye, Tony, wa ka be a li Nrasta. Wa ka be e baligwa mu milandunyana, e tengesa dzi-drug kakale e zigwa ili nthu u no da nghwa kwazo. Ku sathu ku ka noti ngayi nda ka zwisenga, ha be ndi thama ngwana ndi na makole a li 16.

Nda ka shangana ne Bafakazi ba Jehova ndi gala mu hostele ye bakadzi ba sa ka lobogwa ne bana babo. Nda ka piwa ngumba ne batungamili be ndawo iyeyo. Bafakazi babili be chikadzi ba ka be be gala be kumba bakadzi ba chechana. Zhuba lingwe nda ka lebesana nabo. Nda ka be ndi shaka ku ba lakidza kuti cha ba no leba manyepkhwa. Ba ka dabila buzo dzangu dzose ba ka tebama ne ku tambunuka ku dwa mu Baibili. Ba ka be ba na buthu ne ludo, i li chingwe cha ka ndi khata kwazo. Ngono ha duma ku zwidiya Baibili nabo.

Ku sathu ku ka noti ngayi nda ka zwidiya chingwe mu Baibili cha ka shandula buchilo gwangu. Ku dwa mu buchechana gwangu, nda ka be ndi cha fa. Ngono ngwenu nda ka zwibonegwa cha ka be chi diyiwa na Jesu ne kwe ku musiwa kwe bafi! (Johani 5:28, 29) Kakale, ndi ka bona kuti Ndzimu u no ndi da. (1 Pita 5:7) Kwazokwazo nda ka kuthiwa moyo ne matama a mu na Jeremiya 29:11, a noti: “‘Ngoti ndoziba ndongoloso yandinayo nge kwenyu, ndongoloso yekumuthama kuti mubhudilile kusi kumuthamila tjakabipa, ndongoloso ye kumugadzabgwe ne kube ne bumangwana,’ kojalo Yahwe.” Nda ka tangisa ku duma kuti ndi nga chilila chose mu Paradaise.​—Pisalema 37:29.

Bafakazi ba Jehova ba ka ndi lakidza ludo gwe malebeswa. Nda ka ti nda yenda ku zwidiyo zwabo gwe kutanga, nda ka amuchigwa ne ku lakidziwa ludo​—nngwe ne nngwe wa ka be e ndi lakidza buthu kwazo! (Johani 13:34, 35) Kwa ka be ku si nga fanane ne se kwa nda ka tongo amuchigwa ku ingwe kereke. Bafakazi ba ka ndi amuchila ba sa ka lingilila mamo angu. Ba ka be ne chibaka nami, be ndi thokomela, be ndi teedza, ne ku ndi batsha ne chingwe ne chingwe cha nda ka be ndi sheta. Nda ka be ndi zwiwa ndili mu nsha nkulu u na ludo.

Mu ku zwidiya Baibili kwangu, nda ka bona kuti nda ka be nda ka fanila shandula buchilo gwangu kuti gu yendidzane ne mazwibato a no shakiwa ne Ndzimu. Kwa ka be kwa ka ndi simila ku lecha ku thuta fojo. Nda ka bona kuti njimbo dzingwe dzo paphidza njemulo yangu ye ku thuta, ngono ndi ka si cha hwilile njimbo dzingwe ne dzingwe koga. Kuti ndi lechedze zwithu izwezwi, nda ka misa ku yenda ku dziphathi ne dzi-nightclub kwa nda ka be ndi nga ngwa busukwa kuti ndi dakwe. Nda ka be ne bakhwinya ba ka thama kuti ndi shandule buchilo gwangu kuti gu be gwa ka lulwama.​—Zwiani 13:20.

Mu chibaka ichecho, Tony na iyebo wa ka be e zwidiya Baibili ne Bafakazi ba Jehova. Ne kuti Bafakazi ba ka be dabila buzo dzidze ku dwa mu Baibili, na iyebo a ka duma kuti cha a ka be e zwidiya malebeswa. Wa ka shandula buchilo gugwe kwazo, a ka thubukana ne bakhwinya babe ba ka be da nghwa, ku lechedza ku thama milandunyana, ne ku misa ku thuta mbanje. Kuti ti shathise Jehova, ta ka bona kwa ka fanila kuti ti shandule mazwibato edu a sa ka lulwama kuti ti kudze ngwana wedu zwibuyanana. Ta ka lobolana ne 1982.

Ndo kumbula ndi shakisisa misholo ya ndi nga zwidiya mu magazine dze Thungamakole ne Mukani! a dzi no leba se kwa bathu bangwe ba ka khona ku shandula machilo abo se kwa nda ka be ndi shaka. Nda ka kulumbidziwa ne mazwibato abo kwazo! Nda ka simisiwa ne ku gala ndi gwisa kwazo ngono ndi si nga zwitoboke. Nda ka dwilila ndi kumbila Jehova kuti a si tongo ndi toboka. Tony nami ta ka dubikiwa se Bafakazi ba Jehova ne July 1982.

Ku be nkhwinya wa Jehova Ndzimu kwa ka buluka buchilo gwangu. Imi na Tony ta ka bona se kwa Jehova a ka ti batsha mu zwibaka zwa ka sima. Ta ka bona kuti ti linge ku Ndzimu mu zwibaka zwa ka sima, ta ka bona kuti wa ka batsha ne ku thokomela nsha wedu.​—Pisalema 55:22.

Nda ka shathila ku batsha bana bangu ku ziba Jehova sami. Ngwenu ndo shathila ku bona bana babo be kula be ziba Ndzimu.

Ha ndi cha lala ndi kumbula ne kwe zwi nowo zha ne lufu. Imi na Tony ta ka batika mu ku kumba makubungano e ba Bafakazi ba Jehova kuti ti ba simise. To batana nabo mu ku diya bangwe kuti ha ba nga be ne ku galamoyo mu na Jesu, na ibo ba nowo bona buchilo gu singapele.