“Ha ndi muka ndi zwibaakanya, ndo lidza music wangu. Ha ndi ngina mu muta, ndo lidza music. Ha nda ka zwiiketa ku nzi, ndi tshwaila, dumbu ne ndi bala​—ndo lidza music. Ndo gala nda ka teedza music.”​—Carla.

 A u no da music kwazo sa Carla? Ha kwa ka jalo, article iyeyi i no ku batsha ku shathila mbayilo wawo, ku leya mbatsha dzawo, ne ku shalula music uwo ne buchenjedu.

•  Mbayilo

•  Dzimbatsha

•  Chi no legwa ne bakhwinya babo

 Ku hwilila music ku nga fanidzanyiwa ne ku ja zojiwa. Zose ha zwi shingisiwa zwibuyanana zwa ka ku lulwamila. Kumbula:

•   Music u nga ku shathisa.

   “Ha zhuba la shwa li sa ka ndi lulwamila, ku lidza music wa ndi no da ko thama kuti ndi nyatutuke chinyolocho.”​—Mark.

•   Music u nga ku kumbuludza zwe nako ya ka pinda.

   “Kanjinji, ku na lumbo gu no ndi kumbuludza chingwe cha ndi no da cha ka pinda, ndizo ndo shatha mu zwibaka zose ha ndi gu hwa.”​—Sheila.

•   Music u nga thama kuti ku be ne ku hwanana kwa ka sima.

   “Nda kati ndili ku nshangano we Bafakazi ba Jehova we zwichabachaba, ngono kwa kati bose ba ka be ba li yapo be mba lumbo gwe bupelo, nda ka lila. Ta ka be ti lebeleka ndimi dzi si nga fanane, ngono music wa ka ti shanganya.”​—Tammy.

•   Music u nga ku batsha kuti ube ne buthu gwa ka naka.

   “Ku zwidiya ku lidza chilidzo che music ku nga thama kuti u khone ku zwibata ne ku be ne moyonlefu. A te chingwe cha u nga zwidiya chinyolocho. Zila ingompela ya u nga chi lidza butuka wu ku be ne moyonlefu.”​—Anna.

 A wa gala u ziba? Buka wulu mu dzi li dzose​—Pisalema​—ya ka thamiwa ne njimbo dzi li 150.

 Music ungwe u mbatsha, se zojiwa zwi sa ka lulwama. Bona kuti ne kutini.

•   Njimbo dzingwe dzo longa matama e ndalo dza ka tambunuka.

   “Ko lingika u ngati njimbo dzose dzi no diwa kwazo nde dzi no leba ne kwe ndalo koga. Dumbu ngwenu ha ba to cha ku leba ne kwayo.”​—Hannah.

   Baibili ikati: “Koga kuwalilana thobo kusakalingisana ne kuwalilana kunobhatisa shoni ne bugovu, zwisitongohwika zwili mu muli.” (Baefesiya 5:3) Zwibuzwe, ‘A music wangu u no thama kuti ndi si tongo teedza ndaulo iyeyi?’

•   Music u nga ku paphidzila buyendasi.

   “Mu zwibaka zwingwe ndo khona ku yezela nda ka teedza music u no thama kuti ndi kumbule ne kwe zwithu zwi no thama kuti ndi tshambilidzigwe ne ku lemegwa ne mazwiwo angu. Music u sa ka lulwama u nga thama kuti ndi kumbule zwithu zwa ka bipa.”​—Tammy.

   Baibili ikati: “Tjengeta moyo uwo nge butjenjedu.” (Zwiani 4:​23) Zwibuzwe, ‘A music wangu u no thama kuti ndi temelele mu ku kumbula zwithu zwi sa ka lulwama?’

•   Music ungwe u nga thama kuti u tinege.

   “Music u na bushongola, ne ku zwishema, ne lubengo u mbatsha mu ndili. Nda ka elanjele kuti ndo shanduka kwazo mu mazwiwo shule kwe ku hwilila music wa ka jalo. Be nsha wangu ba ka lemoga ichecho bo.”​—John.

   Baibili ikati: “Ngono ngwenu lashani zwithu zwinonga ezwi: kugwadzamoyo ne bushongola ne kugwadzisa bamwe mimoyo ne kulebela bamwe manyepkhwa kene ili kushingisa masapa mu milomo yenyu.” (Bakolosa 3:8) Zwibuzwe, ‘A music wa ndi no teedza u thama kuti ndi be bushongola, pangwe ndi si nga kumbulile mazwiwo e bangwe?’

 U nga thamani? Shalula ne buchenjedu. Ndicho chi no gwisa ku thamiwa ne mptshwa ungwe u noyi Julie. A kati: “Mu zwibaka zose ndo lingilila music wangu ngono ndi be ndi dusa wa ndi no bona kuti ha u zo lulwama. Ha te kuli ku lelu mu zwibaka zose, ngono ndo ziba kuti i chithu cha ka lulwama ku chi thama.”

 Nkadzi ungwe nchechana u noyi Tara u no zwidiya chingwe chi no fanana na ichecho. A kati: “Mu zwibaka zwingwe lumbo gu no loba zwa ka naka go lila mu radio, ngono ku dwapo ha ndi hwa matama a go, ndo be ndi ziba kuti nda ka fanila shandula seteishini. Ngono ku thama ndi jalo, ko fanana ne ku luma burotho gwe cinnamon ka ngompela ndi be ndi lecha ku gu ja! Ngono ha ndi na masimba e ku misa ku lidza lumbo gu no leba ne kwe ndalo, ko dwa kuti ndowo be ne masimba e ku misa ku shanganyila ngubo ndi sathu a ngina mu ndobolo. A nto shaka ku thayedza mesho kuti music u nga ndi sendedzela kungapani.”