Ha i fanisa kuti tinga thubukanya chini pakati kwe budumili gwe malebeswa ne budumili gwe manyepkhwa, Baibili ikati: “Mowobaziba nge zwizwalo zwabo. Apa zhambi dzotjegwa mu mihwa kene, kene phaya mu zwishosho?” (Matewu 7:16) Se kwa koga u nga khona ku thubukanya zhambi mu mihwa nge zwizwalo zwayo, u nga thubukanya budumili gwe malebeswa mu na gwe manyepkhwa ne zwizwalo kene ne zwa ba no thama.

1.   Budumili gwe malebeswa go diya malebeswa a ka teiwa mu Baibili, isi mu dzifilosofi dze bathu. (Johani 4:24; 17:17) Ichecho cho shanganyila malebeswa e budumili ne kwe meya ne thembiso ye buchilo gu singapele mu shango ye paradaisi. (Pisalema 37:29; Izaya 35:5, 6; Ezekiele 18:4) Kakale go diya ku dusila pachena manyepkhwa e budumili gwe manyepkhwa.—Matewu 15:9; 23:27, 28.

2.   Budumili gwe malebeswa go batsha bathu ku ziba Ndzimu, ku shanganyila ne ku ba diya ne kwe zina lile, Jehova. (Pisalema 83:18; Izaya 42:8; Johani 17:3, 6) Ha gu to diya kuti Ndzimu ha a to zibgwa kene u kulekule, ku thubukana na ichecho go diya kuti u no shaka kuti ti wanane naye.—Jakuba 4:8.

3.   Budumili gwe malebeswa go lakidza kuti Jesu Kirisiti ndiye wa ti nga bona buchilo naye. (Mishingo 4:10, 12) Batobeli ba Jesu ba no hwa ndaulo dzidze ne gwisa ku tobela chilakidzilo chiche.—Johani 13:15; 15:14.

4.   Budumili gwe malebeswa go temelela kuti Bushe gwe Ndzimu ndigo koga thembo ye bathu. Batobeli bago ba no budza bangwe ba ka thaabala ne kwe Bushe.—Matewu 10:7; 24:14.

5.   Budumili gwe malebeswa go kudza ludo gu sina bugovu. (Johani 13:35) Go diya kuti ti hloniphe zwithopa zose zwe bathu ne ku amuchila bathu be njudzi dzose, zwilenje, ndimi, ne kudziwa ne zila isi nga fanane. (Mishingo 10:34, 35) Ne kuti ba no sendedzegwa ne ludo, batobeli bago ha ba to nginilila mu dzinghwa.—Mika 4:3; 1 Johani 3:11, 12.

6.   Budumili gwe malebeswa ha gu na badiyi ba no ruegwa, kakale ha gu to pa bashingili bago mazina a no ba kudza e budumili.—Matewu 23:8-12; 1 Pita 5:2, 3.

7.   Budumili gwe malebeswa ha gu to nginikana choselele ne dzikhani dze chipolotiki. (Johani 17:16; 18:36) Ne kwa ka jalo, batobeli bago ba no hlonipha ne hwa hurumente we ndawo yabo, be dumilana ne ndaulo ye Baibili i noti: “Ipani Kaisara zwithu zwa Kaisara [bamilili be ndaulo ye mbusi], mupe Ndzimu zwithu zwe Ndzimu.”—Mako 12:17; Baroma 13:1, 2.

8.   Budumili gwe malebeswa i zila ye buchilo, hate chilenje koga kene chingwe chi no thamiwa. Batobeli bago ba no chila ku yenda ne milayo i pezhugwi ye Baibili ye mazwibato mu buchilo gwabo gose. (Baefesiya 5:3-5; 1 Johani 3:18) Ne kwa ka jalo, pana kuti ba manikane, ba no shathisiwa ne namata “Ndzimu wa ka shatha.”—1 Timoti 1:11.

9.   Ba mu budumili gwe malebeswa hate bali banjinji. (Matewu 7:13, 14) Ba ka tobela budumili gwe malebeswa kanjinji ba no lingigwa pasi, be sotiwa, ne ku dziyidzigwa ku thama ku da kwe Ndzimu.—Matewu 5:10-12.

Budumili gwe malebeswa hate ‘budumili gwa ka ndi lulwamila koga’

 Ku na mbatsha ye ku shalula budumili, ta ka temelela koga mu kuti go thama kuti ti zwihwe chini. Baibili ya ka lebela mbeli kuti kowobe ne chibaka bathu kwa “banowokubunganya bezwipoteledza nge badiyi banjinji banodiya tjabanoshaka zebe dzabo dzitjihwa.” (2 Timoti 4:3) Ku leyana na ichechi, Baibili i no ti kulumbidza kuti ti tobele “budumili gubuyanana ne gu si na shambgwa mu mesho e Ndzimu na Tate,” dumbu ne gu singa tolegwe pezhugwi.—Jakuba 1:27, footnote; Johani 15:18, 19.