Muwakati wakuvandika upole umwe Yeova kwaupande wa shilambo ashi undawikila mwisho. Idini yakushang’apa indabamolegwa, shipinga sha venentete shindauka ndavatenda ing’ondo venentete vake Nnungu, na Yeova andauka ndavabamola vanu vakalau ku Alimagedoni. Vaklistu vankulindila na amu kutandeka kwa vinu avi.

Kwaumwiu, wetu hatunamanya shinu shana vinu uti kwaupande wa mauvilo makumene. Kwampano, wetu hatunamanya shinu shana duvani palota kutunduvanga mauvilo makumene. Wetu hatunamanya shinu dishabaa shani dilota kuvatadya vanashiyasha kutenda ing’ondo didini dyakushang’apa. Wetu hatunamanya shinu wakati shani au mwashi shipinga sha venentete mwashilota kuvatandela ing’ondo venentete vake Nnungu. Namomo hatunamanya shinu mwashi Yeova mwalota kuvabamolela vanu vakalau ku Alimagedoni.

Pavedoni, Ibibiliya inkutupa dyabali uti dyatulota pakulota tulole wakati wamushu na wakika pamo na ntima shii. Kwampano, wetu tunkumanya kenga tunkunama muwakati wa “maduva lamwisho.” (2 Tim. 3:1) Wetu tunkumanya kenga kubamalegwa kwa didini dyakushan’apa “vandapajanianga” pakulota idini iu hainabamolegwe. (Mat. 24:22) Wetu tunkumanya kenga Yeova andavambola venentete vake. (2 Pat. 2:9) Na yadavo wetu tunkumanya kenga aijá wantandwele Yeova, pakulota kuvabamola vanu vakalau na kwambola imbumba íkaululika kuvalangika kwaindila ya Alimagedoni ni waishaliya na wadimongo.—Mao. 19:11, 15, 16.

Vinu vilota kutandeka muwakati wamushu kwaumwiu vindauka ndavatadya vanu “kuvanavo kujopa kwoe namene.” Pavedoni, kwa kushomya na kukumbukilanga vitendo vya kwambola vimwe Yeova na nyamani shatwaulila nae kwaupande wa wakati wamushu, wetu tundaulula “kwimila na kwinula myuti vyetu,” tukulupila kenga kwambolegwa kwetu kuvele pepi.—Luk. 21:26, 28.