Vyovya vinkutandeka myanda vyoe namene maduvano. Shikatandeka shovya, dimongo pakulota kumya lipwashalelo divaikidile vapanganiyange shana. Pakulota kutandeka davo, Ibunge Ilangalela indipanganiyanga shipinga shakupwashela shikatandeka shovya mu difilial uti.

Vanung’unumunu vashipinga asho vakamanya kenga shinditandeka shovya, vanavo kwashipajelo vandavatangolanavo vanang’olo vashipinga valikaja alyo pakulota kumanya lipwashalelo shani lyavalota vakwandadya ntenga. Ikava kenga shovya shinditadya matatisho makumene lákaululika kwangangola na lipwashalelo lya pashipinga, filial vandavatandola vanung’unumunu vavaikidile pakulota kulangalalela lidengo lyakupwashela. Vanung’unumunu avo vankuulula kuvalota vanung’unumunu vakulitalela au mishango kwa vinu vikumene vilateka, au vanavo vankuulula kushuma na kujava vinu vyavalota vanung’unumunu vapitidile shovya.

Dinkupagwa dipaida dyoe kwa kupwashela mu inamuna ai. Mwaa vanung’unumunu vakalota kutenda vinu kwa wamushi wavo vovene inkuululika kupagwa mpulugu, kujanga njuluku na vinu vyoe.

Vanung’unumunu vatandalegwe na filial vankuulula kwamuwa dyela ngapi na vanung’unumunu vangapi valateka pakulota kupwashela. Vanavo momo vankuulula kushema lishilika lyakupwashela, pakulota shimadengo shetu shakupwashela shipajeke. Hanapagwe wakwamuwa gweka pakulota kujugwa mishango, kutumidya lipwashalelo lya vinu, au kutenda mwanda kuka akula kutandeke shovya vanavo vákakujugwite pakulota kutenda davo.

Ata ikava davo, shikatandeka shovya, wetu tundalota namene pakulota kupwashela. (Vabal. 13:16) Wetu tunkuvanagwaledya namene vanung’unumunu vetu! Wetu tulota kutenda nyamani? Shinu shikumene, wetu tunkuulula kushwali tuvajugwila avalá vavakadidye shovya na avalá vajaula lipwashalelo. Namomo wetu tunkuulula kumya mishango pakulota kupwashela shimadengo shakwandadya ntenga shitandeka mushilambo uti. Mwina mwaa kulangalalela kwa Ibunge Ilangalela, difilial dinkumanya shana mwashi muvaikidile utumike njuluku mu inamuna yambone. Na ikava kenga wetu tunkulota kupwashela, ituvaikidile tuve tayali kwa kwandikanga lyaamba lya vanu vakulitalela pakulota kupwashela shimadengo shakulemba au kudenga lishamegwa (DC-50).

LOLA VIDEO LIVAMBWE KU BRASIL, NA BADAE JANG’ULA SHAKUDYA SHAATIKA:

Nyamani shikutadidye kushanga kwaupande walipwashalelo lyavajawile Mashaidi va Yeova baada ya livambwe ku Brasil mwaka 2020?