Manung’unumunu na malumbumunu makunagwaleka:

Linagwaledyo lyatuvenavo kwa Nnungu na kwa vanu linkututadya ‘kuka navatadya vanu vave vakwoda muvenentete uti, tuvabatisha.’ (Mat. 28:19, 20; Maluk. 12:28-31) Linagwaledyo liu lyatuvenavo kwa vanu linkuvanavo dimongo. Linkuulula kukamula mitima vya ‘avalá vatandalégwe kupata shingumi shíkamalilika.’—Vit. 13:48.

Kala, wetu tushinandadya tutumila malove latuvikile mmuti na tushinavalakela vanu mabuku. Ambi wetu ituvaikidile tulipundishe inamuna inji yambone yakutangola na vanu. Ituvaikidile tulodye linagwaledyo kwa vanu tutangole vinu vivanagwela vanavo. Asho mana ake ivaikidile tuve tayali pakulota kubadili shinu shatulipanganiyenge kwambangidya twambangile mwaa vinu vimwangaisha na vinnagwela munu watuntangolanavo. Ibulushula ai ilota kutupwashela dashi kutenda davo?

Ibulushula ai inkuvanavo mashomo 12, lanavo lankulodya mavalelo lavaikidile tuvenavo pakulota tuvanagwaledye vanu na tuvatende vakwoda. Kula lishomo vaumidye mu Ibibiliya na linkulodya livalelo lyaladidye Yesu au Vaklistu vatandi muwakati wavashandadya ntenga. Ishabaa yetu, hainava shinu kuvika mmuti shinu shatuka natangola, kanji kulambela inamuna yakulodya kenga tunkuvanagwaledya vanu. Kwaumwiu kula livalelo linkulateka mudinamuna uti dya kwandadya ntenga. Kanji wetu tunauka nalola mavalelo lavenavo mana namene pakulota kwanjanga mwaa, kujila au kulangalalela mapundisho a Ibibiliya.

Paulipundisha kula lishomo, kumbukila mwashi mwaulota kulodedya livalelo alyo pautangola na vanu ku isemu yaunama. Likanyalidye pakulota wanjedye linagwaledyo lyako kumwe Yeova na kwa vanu. Linagwaledyo alyo, linakupwashela kuulula kuvatenda vakwoda na kupunda inamuna yoeyoe yakwandadya yaushilota utumile.

Kwaumwiu ni ibati ikumene kukola pamo madengo namu mwenu. (Sopon. 3:9) Tunkushwali pakulota Yeova auke mushu alaliya kulikanyalidya kwenu pakulota kuvanagwaledya vanu na kuvatenda vakwoda!